ทอางปฆ้า 6 - Northern Pwo Karen Thai Bible

ทชูแพ อางท่างนี่ ทช๊องไก้ ก้องแย่

ท้อง ลู่ง โพล้ง ซ้ะอวีงแท๊ อคู, เจ่ ทเด้งเซ๊ พี่ โอ ดี๊ พลี้ง อ โคละ, บี่ซุ้ดี๊ เชมิ้นิ้ ดาเว อ แท๊ อางปฆ้า

¹ กแช่ยาเว-เอ้อ, เกม๊าเต้ โละซ้ะเอ้งไฌ้ แย้ ดี๊ ทซ้ะทาง ล ฌี้ ดี๊ ซองแย้ซ๊างแย้ ดี๊ ทซ้ะทาง พ้ะดู ล ฌี้

² กแช่ยาเว-เอ้อ, เกม๊าเต้ ย๊างซ้ะ แบ แย้ ไช้ะ, เมะเว๊ จ ล้างเพาล้างเบ้ ไฌ่แช่แบ้แช่ กแช่ยาเว-เอ้อ, เกม๊าเต้ แฌแซกต้าง แย้ ไช้ะ, เมะเว๊ จฆีงจเกว้ แบแกแบเฌ้ แบน้ะแบโน๊ง ล้อ

³ เลาฆึ ดี๊ จเซิงจซ้ะ นอ, แบแกแบเฌ้ แบน้ะแบโน๊ง น้ะมะ กแช่ยาเว-เอ้อ, ชี่ไยะเด้าะเล้?

⁴ กแช่ยาเว-เอ้อ, เกม๊าเต้ แกยไท้ น ซ้ะ, แม้ช้า จ ทโอม๊า ไช้ะ เกม๊าเต้ แม้ช้า แย้ พ้องพลิ้ไฆวะ, แด-อ้ะ ลู่ง น ทเอทกวี้ง พี่ อฌิ่งอค๊า นอ อ ฌ่าง

⁵ เมะเว๊ ลู่ง พลื่งค่าง นอ, ทนางแบทางไท้ กแช่แยว้ ลโอแบ ลู่ง พลื่งค่าง นอ, โพล้ง เล้ ม อางปฆ้า กแช่แยว้?

⁶ จ ล้างเพาล้างเบ้ ดี๊ ท ฌางล้างย้าล้าง อกย้อง ดี๊ เมะที๊งล้าง, ล้างอวีงล้างพะ ล่างมี๊ง กุ้ อ แน้ ทล่าง ดุ้ไน้ ซ้ะ นอ, แบโจแบเซ๊ง ดี๊ เมะที๊งเมะน๊อง

⁷ จ เมะคลี๊ง ล้างโมยไฆวะ ดี๊ ทน้ะเซิงน้ะซ้ะ อ ล้างเพาล้างเบ้, เป๊งนี่ ลู่ง โพล้ง โอเว้งโอก๊าง ดี๊ แย้ ลแพ นอ อกย้อง

⁸ น ซื๊ง กุ้ แฌ้ พี่ แม้ ทอ้าทซ๊าง-เอ้อ, เกม๊า ล้างแซยล้างพ้ะไฆวะ ดี๊ แย้ เมะเว๊ กแช่ยาเว คุ้ช๊องแน จ ลู่ง ฌาง เย้า

⁹ กแช่ยาเว คุ้ช๊องแน จ ทอางโฆอางแย๊ กแช่ยาเว ฮะนี่ จ ทชูแพ อางท่าง เท่อ

¹⁰ กเย่ จดีงจแด้ เลาพะ นอ, ม ฌางแช้ฌางเด, ดี๊ ซ้ะเมซ้ะไพล้ เทอ น้ะมะ อซื๊งเว๊ ลแพ นอ ม วีงไท้อซ้ะ, ดี๊ ม ฌางแช้ฌางเด ล ทีงฆ่าง ล้อ