ทอางปฆ้า 53 - Northern Pwo Karen Thai Bible

ทไคล้อ้าไคล้ซ๊าง โพล้ง ลแพ นอ, พี่ ล นะ เว๊ แบ กแช่แยว้ โอ

ท้อง ลู่ง โพล้ง ซ้ะอวีงแท๊ อคู, อ โคละ บี่ซุ้ดี๊ มาฮะล้ะ, ดาเว อ มาซคี ล ไฌ่

¹ โพล้ง เซ๊กูเฌ๊ฌ้อง ไคล้ กโช้ ลู่ง อ ซ้ะ พ้า ไจ้ะเว๊, “กแช่แยว้ ลโอแบ” อซื๊งเว๊ ลแพ นอ อ้าทางซ๊างทาง, ดี๊ แม้ ทลเกิ้งลแบ แบ, พี่ อ ล้างแช๊เมะไฌ๊ซ้ะ โพล้ง แม้ ทอฌี้ ล โอ น่างแฌ้ แบ

² กแช่แยว้ โอ ลู่ง มุ้คู แคว่ล้าง กโพล้ง ลแพ นอ เมะ โพล้ง ม โอ ล แฌ้ๆ, ชี่-อ้า, พี่ อไพ่อแซย๊ พี่ อ อางฆื๊งนี่ กแช่แยว้

³ อซื๊งเว๊ ซีงลแพ แกยไท้ อ ซ้ะ เลาพะ อ้าทางซ๊างทาง บี่ซุ้ โละซ้ะ เลาพะ โพล้ง แม้ ทอฌี้ ล โอ น่างแฌ้ แบ ล โอ น่างแฌ้ แบ เฆาะ

⁴ กเย่ โพล้ง พี่ แม้ ทอ้าทซ๊าง นอ, ล ซีงแฌ๊ เว๊-อ้า? เมะเว๊ โพล้ง พี่ อ อาง จ พู จ ลี้ง, ด้องซุ้ อาง ทอางทโอ้ ดี๊ ล นี่ กุ้ทาง เท่อ โล้แบ กแช่แยว้ แบ

⁵ อซื๊งเว๊ ซีงลแพ ม โอ พี่ นอ, ดี๊ ทซ้ะเมซ้ะไพล้ เท่อ น้ะมะ ซ้ะเมซ้ะไพล้ เท่อ ด้องซุ้ พี่ ล โอ น่างพ๊า ได้ะแบ เมะเว๊ กแช่แยว้ ม ลีงแล่ไฆวะ โพล้ง, พี่ ช๊างล้าง อ ทล่าง โอซยอง ดึ้ซึ้ แน้ ดี๊ น ม ดึ้เกม๊า อซื๊งเว๊ ฌางแช้ฌางเด, เมะเว๊ กแช่แยว้ ซม๊า-อ้ะ

⁶ เกม๊าเต้ ทแม้พ้องพลิ้ อีซลาเอง, เฌ๊นี่ ลู่ง ซีโยง พี่ กแช่แยว้ เกม๊า อพูอลี้ง โอฌี้โอแอว้ไท้ นอ ยาคุ้ ม ซ้ะอวีงซ้ะโทะ, อีซลาเอง ม เซิงมึซ้ะมึ