ทอางด้อง 26 - Northern Pwo Karen Thai Bible

¹ ทฆี๊งทแล้ นอ, ล เกิ้ง ดี๊ โพล้งเซ๊กูเฌ๊ฌ้อง แบ ด้องซุ้ แน๊วะ ลู่ง ทคู่แค๊, ดี๊ ทเฌ๊ช้า ลู่ง ท เก้าอางดิ้อาง อ แค๊ นอ ล้อ

² โนะโจะ ยู้งลี้ยู้งไท้, ดี๊ ทูบลีงบลาง ยู้งลี้ยู้งไท้ บี่จะเล้ นอ ทชูอ้า ลู่ง ลเกิ้งลด้าง แบ นอ, อซูงอแซ ล กึทาง แบ บี่นอ ล้อ

³ นางเป้ ลู่ง กซี อ ฌ่าง, กื่อ ลู่ง แลว้ อ ฌ่าง ดี๊ นางพลี ลู่ง โพล้งเซ๊กูเฌ๊ฌ้อง อ โคล๊ง อ ฌ่าง

⁴ ไคล้ช๊า โพล้งเซ๊กูเฌ๊ฌ้อง, บี่ซุ้ดี๊ อ ท เซ๊กูเฌ๊ฌ้อง นอ ล ฌี้ ไค๊ไก้ะ น ม เก บี่ซุ้ดี๊-อ้ะ

⁵ เกม๊า ไคล้ช๊า โพล้งเซ๊กูเฌ๊ฌ้อง, บี่ซุ้ดี๊ อ ท เซ๊กูเฌ๊ฌ้อง นอ ไค๊ไก้ะ อ เว๊ ม ช๊องมองล้าง อ ซ้ะ, โอ ดี๊ ทโกงซีมองแบ

⁶ โพล้ง พี่ อ โซ๊ง ทโล้โค, ดี๊ โพล้งเซ๊กูเฌ๊ฌ้อง อ จูง นอ บี่ซุ้ดี๊ กล้างเทะไฆวะ อ คาง คี๊งแพ้, ดี๊ โอ้ ท แม้ชองแม้จุ้

⁷ ทอางด้อง โอ ลู่ง โพล้งเซ๊กูเฌ๊ฌ้อง อ นุ้ พ้า นอ บี่ซุ้ดี๊ โพล้ง อ คาง เฌ๊ฌ้อง, พี่ ล้างเช้ ล ล้างเปิ่งล้างเอ้ง แบ นอ ล้อ

⁸ โพล้ง พี่ อางกีเมะอางกีแน๊ โพล้งเซ๊กูเฌ๊ฌ้อง นอ บี่ซุ้ดี๊ โพล้ง พี่ อ จ้าทะ โล่ง ดี๊ โก๊งซีง

⁹ ทอางด้อง พี่ โอ ลู่ง โพล้งเซ๊กูเฌ๊ฌ้อง อ นุ้ พ้า นอ บี่ซุ้ดี๊ ทชูง มื่งเทิง, โอ โพล้ง ยื้งแย่ ม้า เท่อ อ จูง พ้า

¹⁰ โพล้ง พี่ อ อางเล้ง โพล้งเซ๊กูเฌ๊ฌ้อง ฌี้, โพล้ง พี่ อ เฌ๊ แพ๊ แบ เท่อ ฌี้ นอ บี่ซุ้ดี๊ โพล้ง ค้ะคลีง พี่ อ ค้ะ โพล้ง กุ้แฌ้ ล้อ

¹¹ โพล้งเซ๊กูเฌ๊ฌ้อง, พี่ อ แม้ เซ๊กูเฌ๊ฌ้อง เท่อ พ๊าๆ, เย้า, พ๊าๆ, เด้าะ นอ บี่ซุ้ดี๊ ทวีง พี่ อ ไท้ฌูงไท้ เท่อ, พี่ อ โคละทางไฆวะ เว๊ นอ ล้อ

¹² น แด โพล้ง พี่ ช๊องมองล้าง อ ซ้ะ, โอ ดี๊ ทโกงซีมองแบ ชี่-อ้า? ทมื้งแล่ โอ ดี๊ โพล้งเซ๊กูเฌ๊ฌ้อง แอเละ อ เว๊ นอ ได้ะ

¹³ โพล้ง เกิง นอ ไคล้ บี่อี้ง, “คี๊ยื่ง โอ ลู่ง เกล้ คี๊ยื่ง โอ ลู่ง เว่ง คว้าง พ้า”

¹⁴ ป้ะตู๊ง แกย อ ซ้ะ ลี้ไท้ๆ, ดี๊ อ เจ้ แค่ไคล้ะ บี่จะเล้ นอ โพล้ง เกิง นอ แม้ เว๊ แด, ลู่ง อ ล่างมี๊ง คู บี่นอ ล้อ

¹⁵ โพล้ง เกิง นอ บล้าล้าง อ จูง โท๊กีง พ้า อ เว๊ ทไปว้ะอซ้ะ, พี่ ม เกม๊า อ จูง เฌ๊ไท้ไท้, ลู่ง อ กแช่ อ นุ้ นอ ล้อ

¹⁶ โพล้ง เกิง นอ, แคว่ล้าง อ ซ้ะ โอ ดี๊ ทโกงซีมองแบ, แอเละ โพล้ง เนว๊ แฌ้, พี่ ไคล้ช๊า เท่อ ซี ลู่ง อไพ่อแซย๊ นอ ได้ะ

¹⁷ โพล้ง พี่ อ ลี้ โญ๊ง ดี๊ ท ติ้โละไอโละ อไฌ่อกย้อง, พี่ ล เมะ อ กแช่ อไฌ่อกย้อง แบ นอ บี่ซุ้ดี๊ โพล้ง ทึ้ ทวีง อ แน่ นอ ล้อ

¹⁸ โพล้ง พลื่ง ไควะ มีอ้าไค๊, คลีงแช, ดี๊ ทซี๊ง บี่จะเล้ นอ

¹⁹ โพล้ง พี่ อ อางโล๊ไละ อ ฌุ้พาง ดี๊ ไจ้ะเว๊, “จ ไจ้ะดุ้ ล้อ”, นอ, แม้ อ ซ้ะ บี่นอ ล้อ

²⁰ อไฌ่บี่อี้ง, เซงมื่ง ลโอแบ นอ, มี ล้างไพะ ดี๊ พี่จองเล้ โพล้ง เซ๊วีงซ๊องแล้ เท่อ ลโอแบ นอ, ท ติ้โละไอโละ โอโท๊ไฆวะ เว๊ ล้อ

²¹ แซวท่อง เก มีอ้าอี, ดี๊ เซงมื่ง เก มี อ แช บี่จะเล้ นอ โพล้ง พี่ อ ยื้งแย่ ท ติ้โละไอโละ นอ, ดึ้ เกม๊า ท ติ้โละไอโละ เล่ทางโท๊ทาง บี่นอ ล้อ

²² โพล้ง เซ๊วีงซ๊องแล้ เท่อ อ ทไคล้ นอ, บี่ซุ้ดี๊ ทอาง ลู่ง ออวีงอช๊า ลี้ล้าง ลู่ง ล้องย่าง พ้า กุ้จองกุ้ไจ้

²³ นุ้ พี่ อ ไคล้อ้าไคล้ซ๊าง เท่อ, ดี๊ เซิงอ้าซ้ะอ้า นอ บี่ซุ้ดี๊ เฮ๊ พี่ กยูเท่ง ทพ้าทล่าง ฌางคู อ เบงคู นอ ล้อ

²⁴ โพล้ง พี่ แช๊เมะไฌ๊ซ้ะ ดี๊ โพล้ง อ แฌ้แพ นอ, แม้ไบ้ะแม้บ้า เท่อ ดี๊ ทไคล้ ดี๊ อางกี ท อางโล๊ไละ ลู่ง แย๊โค๊

²⁵ พี่ อ เว๊ ไคล้ บี่ซุ้ดี๊ โอ ดี๊ ทย๊างซ้ะ นอ, นะ-อ้ะ ล ฌี้ อไฌ่บี่อี้ง, โอ ดี๊ ท ล้าง แช๊เมะไฌ๊ซ้ะ แอเม้งแอมยู๊ ลู่ง อ ซ้ะ พ้า

²⁶ ทึเมะ อ เว๊ ม แม้ไบ้ะแม้บ้า ท แช๊เมะไฌ๊ซ้ะ, ดี๊ อ ทอ้าทซ๊าง, ดี๊ อ ท แซย๊กไบล้ะ ฌี้ นอ แบเด้าะ อ ทอ้าทซ๊าง ม แบ ทโล้ล้าง, ลู่ง ทล่าง แพโซง พ้า

²⁷ โพล้ง พี่ อ เคิง ซลา โล๊ไละล้าง เท่อ นอ, อ กแช่ ม ล้างเทะไท้ เว๊ ล้อ โพล้ง พี่ อ ไร้ะทาง โล่ง นอ, อ เท่อ ม ไร้ะล้าง เฌ๊ไท้ เคล้ ไท้-อ้ะ ล้อ

²⁸ พลี้ คีงอูง เท่อ นอ, แช๊เมะ ดี๊ โพล้ง พี่ อ แม้เฌ๊ฌ้อง เว๊ ดี๊ นุ้ ไคล้มึแน่ ดุ้ เท่อ นอ, แม้ เซงทื่งเฌ๊ฌ้อง เท่อ ล้อ