ทอางด้อง 15 - Northern Pwo Karen Thai Bible

¹ ทไคล้ช๊า ลู่ง อเพาอเบ้ นอ, แม้ล้างแม่ไฆวะ ท ซ้ะทาง พ้ะดู แบเด้าะ ทไคล้ แช๊คูดูซ้ะ นอ, แม้ซ้ะทาง เท่อ

² โพล้ง โอ ดี๊ ทโกงซีมองแบ นอ, อ พลี้ อางปฆ้า ทซีงแฌ๊ แบเด้าะ โพล้งเซ๊กูเฌ๊ฌ้อง นอ, อ นุ้ ลู๊งล๊าง ทเซ๊กูเฌ๊ฌ้อง

³ กแช่ยาเว อ เมะคลี๊ง นอ, โอ กุ้จองกุ้ไจ้ โอคุ้แคว่ โพล้งอ้า ดี๊ โพล้งฌี้

⁴ พลี้ พี่ แม้ มึทาง ซ้ะ นอ, เก เซงทม๊า มื่งเทิง แบเด้าะ พลี้ คีงอูงคีงตู๊ง นอ, ดึ้ เกม๊า ซ้ะ เฌ๊ฌ้อง น้ะ มะ

⁵ โพล้งเซ๊กูเฌ๊ฌ้อง นอ, ดึ้เดว อ แพ่ อ ทซองทซ๊าง แบเด้าะ โพล้ง พี่ ควี๊งคูแกยแน่ ดี๊ ท โล้ซีงแฌ๊ นอ, เก โพล้ง พี่ อรู้งอแซย๊

⁶ โพล้งแบกแช่แยว้อซ้ะ อ เด้า พ้า นอ, โอ ดี๊ คองแซย้ แอฌี่งแอฌ้อง แบเด้าะ โพล้งอ้าโพล้งซ๊าง อ ท นี่แบอางแบ นอ, เฌ๊โชะ ทน้ะทโน๊ง

⁷ โพล้ง โอ ดี๊ ทโกงซีมองแบ นอ, แม้ แอทางเล่ทาง ทซีงแฌ๊ แบเด้าะ โพล้งเซ๊กูเฌ๊ฌ้อง อ ซ้ะ นอ, ล แม้ อ ซ้ะ บี่นอ แบ

⁸ กแช่ยาเว แช๊เมะไฌ๊ซ้ะ ดี๊ โพล้งอ้าโพล้งซ๊าง อ ทลื่งทาง แบเด้าะ ซ้ะอวีงซ้ะโทะ เท่อ, ลู่ง โพล้งโต้โพล้งล้อง อ ท ชูแพ พ้า

⁹ กแช่ยาเว แช๊เมะไฌ๊ซ้ะ ดี๊ โพล้งอ้าโพล้งซ๊าง อ เกล้ แบเด้าะ อ เอ โพล้ง, พี่ โพะ ทแบกแช่แยว้อซ้ะ อ ไค๊

¹⁰ โอ ดี๊ ท พลี ซองแบซ๊างแบ น้ะมะ, ลู่ง โพล้ง พี่ ญ๊องไฆวะ เกล้ ฌี้ นอ อ ฌ่าง โพล้ง พี่ แช๊เมะ ดี๊ ท โล้ซีงแฌ๊ นอ, ม ซี๊ง ล้อ

¹¹ พลื่งค่าง ดี๊ ทเซงทื่งเฌ๊ฌ้อง อ ล่าง นอ, โพลทางเติ้งต้าง ลู่ง กแช่ยาเว อ เมะแซ พ้า กโพล้ง อ ซ้ะ ม โพลทาง แอเละ อ นอ ชี่แอเล้

¹² โพล้ง พี่ อ เฌา แม้ไฌ๊ซ้ะ โพล้ง อ แฌ้แพ นอ, ล แบซ้ะ แบ ท โล้ซีงแฌ๊-อ้ะ แบ อ เว๊ ล ลี้ฌูง โพล้ง โอ ดี๊ ทโกงซีมองแบ แบ

¹³ ทเซิงมึซ้ะมึ นอ, ดึ้ เกม๊า เมะนี่งเมะเอ้ง แบเด้าะ พี่ เซิงอึ้ซ้ะอึ้ นอ, ดึ้ เกม๊า วีงแล้ ล้างเพา ล้างแช่ ล้อ

¹⁴ โพล้ง พี่ โอ ดี๊ ทแนซีโน้งซี นอ, อางฆื๊ง ทซีงแฌ๊แน่ฌ๊า แบเด้าะ โพล้งเซ๊กูเฌ๊ฌ้อง อ นุ้ นอ, อาง ทเซ๊กูเฌ๊ฌ้อง เก ทอาง

¹⁵ โพล้ง พี่ อ น้ะเซิงน้ะซ้ะ อ มื่งนี้ง กุ้นี้ง นอ, ออ้าอซ๊าง ล้อ แบเด้าะ เซิงฆวี๊งซ้ะโย้ นอ, โอ ดี๊ ทลื่งอาง โละซ้ะ ไค๊คื๊ง

¹⁶ โอ ดี๊ คองแซย้ ลปี๊ลคี่, แบเด้าะ โอ ดี๊ ท ดู้งแบยางแบ กแช่ยาเว นอ ฌี้เละ โอ ดี๊ คองแซย้ แอฌี่งแอฌ้อง, แบเด้าะ โอ ดี๊ ท แบคู่แบโฌ้ ปะ

¹⁷ อาง ทดุ้ทแล เก ทอาง ลู่ง ทล่าง พ้า, พี่ โอ ดี๊ ทเอทกวี้ง นอ ฌี้เละ อาง งู้ บองอืง อ แย, พี่ โอ ดี๊ ท แช๊เมะไฌ๊ซ้ะ ปะ นอ ได้ะ

¹⁸ โพล้ง พี่ อ ซ้ะคู่ นอ, ดึ้ เกทาง ท ติ้โละไอโละ แบเด้าะ โพล้ง พี่ ซ้ะทาง โกย้ นอ, แม้ โอโท๊ไฆวะ ท คิ้คุ้ไวะวะ

¹⁹ โพล้ง เกิง อ เกล้ นอ, โอฆวี้ ดี๊ ทชูงทเม มื่งเทิง แบเด้าะ โพล้งโต้โพล้งล้อง อ เกล้ นอ, เก เกล้ อพุ้อแด้ ล้อ

²⁰ พูแคว๊ พี่ โอ ดี๊ ทโกงซีมองแบ นอ, ดึ้ เกม๊า แพ่ อ ซ้ะมึ แบเด้าะ โพล้งเซ๊กูเฌ๊ฌ้อง นอ, ดึ้เดวทื่งแช้ อ กแช่ อ มู่

²¹ ท เซ๊กูเฌ๊ฌ้อง นอ, เก เอะ โพล้ง พี่ ล โอ ดี๊ ท ซีงแฌ๊ล้างซ้ะ แบ, อ ท เซิงมึซ้ะมึ แบเด้าะ โพล้ง พี่ โอ ดี๊ ท แนซีโน้งซี นอ, ม โพะ เกล้ พี่ อโต้อล้อง

²² ล โอ ดี๊ ทเนฌ้าโล้ฌ้า โละซ้ะ แบ นอ, ทช๊องมองเว้ทแม้ ล เกทางเกโท๊ แบ แบเด้าะ พี่ โอ ดี๊ โพล้ง โล้ฌ้าละฌ้า เท่อ แอ แฌ้ นอ, ทช๊องมองเว้ทแม้ นอ, ฌ้องทางเกทาง เว๊ ล้อ

²³ โพล้ง พี่ โอ ดี๊ ทไคล้ช๊า อเกิ้งอด้าง ลู่ง อ นุ้ พ้า นอ, เซิงมึซ้ะมึ ล้อ ทไคล้ ล ทีง, พี่ แบเมาะแบเค้อะ นอ, ฌี้ เต้ๆ

²⁴ เกล้ ทม๊า นอ, ลี้ฌ้า โพล้งไพ่โพล้งแซย๊ ทาง ลู่ง ทพุ้พ๊าง ท้ะโค๊ บี่ซุ้ อ เว๊ ม นี่ เฌ๊ฆิ้ไฆวะ พลื่งค่าง, ลู่ง ทปล้างพ้า ละโค๊

²⁵ กแช่ยาเว กูงไฆวะ ทิ้ไฆวะ โพล้ง ทื่งดูล้างซ้ะ อเด้าอล่าง แบเด้าะ เกม๊า โพล้งมืงเม๊ อ ทล่างทเกล้ อช๊าอโท่ โอ บี่ ล่างๆ, ล้อ

²⁶ กแช่ยาเว แช๊เมะไฌ๊ซ้ะ ดี๊ โพล้งอ้าโพล้งซ๊าง อ ทช๊องมอง แบเด้าะ ทไคล้ ลู่ง อมึอพ้า นอ, อฌี้อแอว้ ล้อ

²⁷ โพล้ง พี่ อ แน่แฌ่แน่ท้า อางฆื๊ง ท นี่แบอางแบ นอ, ดึ้ เกม๊า อ เด้าคูล่างพ้า แบน้ะแบโน๊ง แบเด้าะ โพล้ง พี่ แช๊เมะ ดี๊ จี้ทไซ้ะไบ้ะนุ้ นอ, ม โอม๊า เว๊ ล้อ

²⁸ โพล้งแบกแช่แยว้อซ้ะ นอ, ช๊องมอง เว๊ ม ไคล้ช๊า เท่อ บี่จะเล้ แบเด้าะ โพล้งอ้าโพล้งซ๊าง อ นุ้ นอ, ลู๊งล้าง ทอ้าทซ๊าง

²⁹ กแช่ยาเว โอ ช้างชื้ง ไย้ ดี๊ โพล้งอ้าโพล้งซ๊าง แบเด้าะ แน่ฌ๊า โพล้งแบกแช่แยว้อซ้ะ อ ท ชูแพอางท่าง

³⁰ เมะคลี๊ง อ ทโฌ่งทพ้าง นอ, ดึ้ เกม๊า ซ้ะ ซ้ะอวีงซ้ะโทะ เท่อ ดี๊ ทโล้โค ลู่ง อ ฌี้ นอ, ดึ้ เกม๊า ไพ้ะมึแยมึ

³¹ แน่ พี่ คุ้ช๊องแน ทโล้ ซีงแฌ๊, พี่ เกล๊าง ทม๊า นอ ม โอ ลู่ง โพล้ง โอ ดี๊ ทโกงซีมองแบ อ โป้ง พ้า

³² โพล้ง พี่ ล ดุ้ อ แน่ ดี๊ ทซองทซ๊าง แบ นอ, ดึ้เดว ล้าง อ ซ้ะ แบเด้าะ โพล้ง พี่ ควี๊งคูแกยแน่ ดี๊ ท โล้ซีงแฌ๊ นอ, นี่แบ ท แนซีโน้งซี ล้อ

³³ ทดู้งแบยางแบ กแช่ยาเว นอ, ม ซอง เท่อ เกม๊า เกทาง ทโกงซีมองแบ ดี๊ ท ชางล้างซ้ะ นอ, เฌ๊ วี่ง ทฆี๊งทแล้