เกล้ทซ้ะวี่ง 9 - Northern Pwo Karen Thai Bibleทื๊ง ทไฌ่ ปาซกา ลู่ง ซีไน ( ทจฆ.12:1-20 ) 1 ลู่ง แล้ อ วี่งคู ล เบง, คี๊ง เนง ล เนง พ้า, ล โค๊ ลู่ง อ ซื๊งเว๊ ไจทางไฆวะ ค่าง อีไย้ะ พ้า นอ, กแช่ยาเว ไคล้ ดี๊ โมเซ ลู่ง แพะคูทเคแกล้ ซีไน ไจ้ะเว๊ 2 “เกม๊า โพล้ง อีซลาเอง แม้ ทไฌ่ ปาซกา, บี่ซุ้ดี๊ อช๊าอโท่ พี่ แบ ทอางกีล้าง เว๊ นอ 3 เมะเว๊ มื่ง นี้ง ล ชี๊ง ลี่ ลู่ง แล้ ล เบง แย๊ อี้ง อ พ้า นอ, เกม๊า น ซื๊งซีง แม้ ทไฌ่ ปาซกา, บี่ซุ้ดี๊ อช๊าอโท่ พี่ แบ ทอางกีล้าง เว๊ นอ, เกม๊า น แม้โพะ ทอเค้อะอต้าง, ดี๊ ทอางกีล้าง อ ไค๊ กุ้ อ เม้ง, พี่ แบฆ้ะ ดี๊ ท ล ไฌ่ อี้ง” 4 โมเซ เว๊ โล้ เอะ โพล้ง อีซลาเอง, เกม๊า เว๊ อ แม้ ทไฌ่ แม้มึอางอวีง ปาซกา 5 อ ซื๊งเว๊ แม้ ทไฌ่ ปาซกา ลู่ง แล้ อ วี่งคู ล เบง พ้า, ลู่ง มื่ง นี้ง ชี๊ง ลี่ง, มื่งแฌล้างโค๊, ลู่ง ทล่าง ซีไนแพะคูทเคแกล้, ดี๊โพล้ง อีซลาเอง แม้โพะ เว๊ อ ไค๊ กุ้ เม้ง พี่ กแช่ยาเว อางแบเลา เอะ โมเซ นอ 6 แบเด้าะ โพล้ง แคว๊ แบ ล แฌ้ๆ, แบอ้า, เป๊งนี่ พอง แบ ทจู, อ เว๊ แม้ ทไฌ่ แม้มึอางอวีง ปาซกา ล นี้ง แย๊ นอ ล ซี แบ, อ ซื๊งเว๊ เฌ๊ฌูง โมเซ ดี๊ อาโรง ล นี้ง แย๊ นอ 7 โพล้ง ลแพ นอ โล้ เอะ อ ซื๊งเว๊ คี๊ง แฌ้ นอ ไจ้ะเว๊, “เฆ้อ ก แบอ้า เป๊งนี่ ก พองแบ ทจู, แบทเล้ น ล เกม๊า ก เทว๊ ทลื่งทาง เท่อ เอะ กแช่ยาเว บี่ซุ้ดี๊ อช๊าอโท่ ลู่ง โพล้ง อีซลาเอง อ ซุ้ อ แกล้ พ้า นอ แบ” 8 ดี๊ โมเซ โล้ เอะ อซื๊งเว๊ซีง ไจ้ะเว๊, “โอคุ้ แท๊ แบ, บี่ซุ้ จ ม คุ้ช๊องแน แคว่-อ้ะ, กแช่ยาเว ม อางแบเลา เว๊ บี่จะเล้ พี่ อ แบฆ้ะ ดี๊ น ซื๊ง นอ” 9 กแช่ยาเว ไคล้ ดี๊ โมเซ ไจ้ะเว๊ 10 “เกม๊า น โล้ เอะ โพล้ง อีซลาเอง บี่อี้ง, โพล้ง ลู่ง น ซุ้ น แกล้, ดี๊ น คลี๊ง น แซ พ้า เมะ โอ แฌ้ๆ, เมะ แบอ้า ลู่ง อ พอง แบ โพล้ง อ จู ฌี้, ลี้ เท่อ ไท้ เท่อ ไย้ ฌี้ นอ, โพล้ง ล แฌ้ นอ ม แม้ ทไฌ่ ปาซกา เทว๊ เอะ กแช่ยาเว ซี 11 แบเด้าะ เกม๊า อ แม้ ทไฌ่ ปาซกา ล แพ อี้ง ลู่ง แล้ คี๊ง เบง ล เบง, มื่ง นี้ง ล ชี๊ง ลี่ง, มื่งแฌล้างโค๊, เกม๊า อ อาง กู ล แบ ดี๊ อ ซีง แบ ดี๊ ทดุ้ แค 12 อ ซื๊งเว๊ ล แบ เกม๊า ท โอก้ะ ท้อง ลู่ง ทพ้างทาง โฌ้โค๊ น่าง เม้ง แบ, ดี๊ เกม๊า แม้ แค่ แกะ ปาซกา อ ฆีง นอ ล ฌี้ เกม๊า อ แม้โพะ ทอเค้อะอต้าง อ ไค๊, แบฆ้ะ ดี๊ แม้ ทไฌ่ แม้มึอางอวีง ปาซกา กุ้ อ เม้ง 13 แบเด้าะ โพล้ง พี่ ล แบอ้า แบ, ดี๊ ล ลี้ เท่อ ไท้ เท่อ แบ, แบเด้าะ เมะ ล แม้ ทไฌ่ แม้มึอางอวีง ปาซกา แบ นอ, เกม๊า แม้ไฆวะ โพล้ง ล แฌ้ นอ ลู่ง โพล้ง ล ชื้อ ฆ่าง ดี๊-อ้ะ นอ อ แกล้, เป๊งนี่ อ เว๊ ล นี่ ลี้ โชะ ทเทว๊ ลื่งทาง เท่อ เอะ กแช่ยาเว บี่ซุ้ดี๊ ทอช๊าอโท่ อางกีล้าง เว๊, นอ แบ, อกย้องบี่นอ, โพล้ง ล แฌ้ นอ, แบ โท่ง ไท้ อ กแช่ อ เตาอแต๊ แด เว๊ นอ ล้อ 14 โพล้ง ล ชื้อ แด พี่ เฌ๊ เปิ่งโอเปิ่งช๊อง น ซื๊ง แกล้, เมะ แบซ้ะ แม้ ทไฌ่ ปาซกา เทว๊ เอะ กแช่ยาเว นอ, เกม๊า อ แม้ เว๊ ด้องซุ้ ทอเค้อะอต้าง, ดี๊ ทอางกีล้าง แบฆ้ะ ดี๊ ทไฌ่ ปาซกา นอ ล้อ, โพล้ง ล ชื้อ แด ฌี้, โพล้ง ลู่ง อ กแช่ อ ค่าง พ้า ฌี้ นอ, แบ แม้โพะ ทอเค้อะอต้าง อ ไค๊ ล เม้ง ฆ่าง อี้ง ล้อ ทเอิง อ เทิง, ดี๊ มี อ เทิง (ทจฆ.13:21-22; 40:34-38) 15 มื่ง ล นี้ง แย๊ พี่ ท๊างทาง เด้กแช่แยว้อล่างโอ นอ, ทเอิง เฌ๊ คลึไบ้ะล้าง ทะ เด้กแช่แยว้อล่างโอ, เมะเว๊ เด้ทล่างแม้ไนทเอิ้งล้าง, ลู่ง มื่งแฌล้างโค๊ นอ, ทเอิง โอ ลู่ง เด้กแช่แยว้อล่างโอ อ เช๊คู โพล ทาง บี่ซุ้ดี๊ มีเค้, ท้อง ลู่ง ทพ้างทาง ลู่ง โฌ้โค๊ นอ ล้อ 16 ทแม้ อ ซ้ะ บี่นอ พี่ อ โท่ ล้อ, เมะเว๊ ทเอิง คลึไบ้ะล้าง เด้ นอ ลู่ง มแช๊ โค๊, ลู่ง มแน้โค๊ นอ โพล ทาง บี่ซุ้ดี๊ มีเค้ 17 พี่ พ๊า เล้, พี่ ทเอิง ดี้งทางไฆวะ เด้ อ คู ฌ้อง นอ, โพล้ง อีซลาเอง ม ลี้ เว๊, พี่ ทเอิง ลี้ โอโท๊ จอง ฌี้ๆ, นอ, โพล้ง อีซลาเอง ช๊างล้างนี่ อ ล่าง โอซยอง พี่ นอ ล้อ 18 โพล้ง อีซลาเอง ลี้ เว๊ บี่ซุ้ดี๊ กแช่ยาเว อ ทโล้ทละ นอ, ดี๊ ช๊างล้างนี่ อ ล่าง โอซยอง บี่ซุ้ดี๊ กแช่ยาเว อ ทโล้ทละ นอ, พี่ ทเอิง โอโท๊ ลู่ง เด้กแช่แยว้อล่างโอ อ เช๊คู ได้ะ นอ, อ ซื๊งเว๊ โอ ทล่างโอซยอง พ้า พี่ นอ ล้อ 19 ทึเมะ ทเอิง โอ ลู่ง เด้กแช่แยว้อล่างโอ อ เช๊คู ตบลึ้ นี้ง ฌี้ นอ, โพล้ง อีซลาเอง แม้ โพะ ทอางแบเลา อ ไค๊, เมะ เว๊ อซื๊ง เว๊ ล ลี้ เท่อ ได้ะ แบ 20 แบ พ๊าๆ, นอ ทเอิง โอโท๊ ลู่ง เด้กแช่แยว้อล่างโอ อ เช๊คู แซย้ โฆะ นี้ง ล้อ, อ ซื๊งเว๊ โอ ลู่ง ทล่างโอซยอง พ้า บี่ซุ้ดี๊ กแช่ยาเว โล้ เอะ-อ้ะ นอ, ดี๊ ลี้ เว๊ บี่ซุ้ดี๊ กแช่ยาเว โล้ เอะ-อ้ะ นอ 21 แบ พ๊าๆ, ทเอิง โอโท๊ ได้ะ ล โค๊ ลู่ง มื่งแฌล้าง ท้อง ลู่ง โฌ้โค๊, แบเด้าะ ท่อง ทเอิง ดี้งทาง ลู่ง โฌ้โค๊ นอ, อ ซื๊งเว๊ แญ่ไฆวะ อ ล่าง ลี้ เว๊, ดี๊ ทเอิง เมะ โอโท๊ ได้ะ มแช๊ โค๊ ฌี้ มแน้ โค๊ ฌี้, ท่อง ทเอิง ดี้งทาง ลี้ นอ อ ซื๊งเว๊ ลี้ เว๊ ล้อ 22 ทึ เมะ ทเอิง โอโท๊ ลู่ง เด้กแช่แยว้อล่างโอ อ เช๊คู คี๊ง นี้ง ฌี้, ล แล้ ฌี้, ไยะ ท้อง ลู่ง ล เนง ฌี้ นอ, โพล้ง อีซลาเอง โอ เว๊ ลู่ง อ ทล่างโอซยอง พ้า ไยะ ค๊อง นอ ล้อ, อ ซื๊งเว๊ ล ลี้ไฆวะ แบ, แบเด้าะ พี่ ทเอิง ดี้งทาง พ๊า ฌี้ๆ, นอ อ ซื๊งเว๊ ลี้ เว๊ ล พ๊า แย๊ นอ ล้อ 23 อซื๊งเว๊ซีง ช๊างล้างนี่ อ ล่าง โอซยอง บี่ซุ้ดี๊ กแช่ยาเว โล้ เอะ-อ้ะ, ดี๊ ลี้ เว๊ บี่ซุ้ดี๊ กแช่ยาเว โล้ เอะ-อ้ะ นอ, อ ซื๊งเว๊ แม้โพะ กแช่ยาเว อ ทไคล้ อ ไค๊ บี่ซุ้ดี๊ กแช่ยาเว โล้ เว๊, พี่ เฌ๊ เว๊ ดี๊ โมเซ นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society