เกล้​ท​ซ้ะวี่ง 6 - Northern Pwo Karen Thai Bible

แบฆ้ะ ดี๊ โพล้ง นาซี อ ไฌ่

¹ กแช่ยาเว ไคล้ ดี๊ โมเซ ไจ้ะเว๊

² “เกม๊า น โล้ เอะ โพล้ง อีซลาเอง นอ บี่อี้ง, โพล้ง แคว๊ ฌี้ โพล้ง อ มืง ฌี้, พี่ อืงล้าง เว้ อ ซ้ะ ล้างช๊าง ม เก โพล้ง นาซี เมะเว๊ โอเจไฆวะ เทว๊ ล้าง อ ซ้ะ ดี๊ กแช่ยาเว นอ

³ เกม๊า โพล้ง ล แฌ้ นอ ดืง โอ้ ซไบ้ะ แซ ที๊ง, ดี๊ ไซ้ะ, อ เว๊ ล แบ โอ้ ที๊งไช พี่ โพล้ง แม้นี่ เว๊ ดี๊ ซไบ้ะ แซ ที๊ง ฌี้, ไซ้ะ ฌี้ นอ, อ เว๊ ล แบ โอ้ ซไบ้ะ แซ ที๊ง ดี๊ อาง ซไบ้ะ แซ อ เม๊ง ฌี้ ไฆ๊ ฌี้ น่างเม้ง แบ

⁴ ลู่ง อช๊าอโท่ พี่ อ เว๊ เก โพล้ง นาซี ได้ะ อ แค๊ นอ, ท เม้ง ฌี้ๆ, พี่ เฌ๊นี่ ดี๊ ซไบ้ะ แซ นอ, ทึเมะ ม เก อ คลี๊ง ฌี้, อ ไพ้ะ ฌี้ นอ, อาง เว๊ ล ซี น่างเม้ง แบ

⁵ ลู่ง อช๊าอโท่ พี่ ล ว๊าง แย๊ อ เว๊ อืงล้าง อ ซ้ะ เก โพล้ง นาซี นอ, เกม๊า อ โล้งไฆวะ อ คู ล ฌี้, อ เว๊ แบ ฌี้ แบ แอว้ ท้อง ลู่ง อช๊าอโท่ พี่ โอเจไฆวะ เทว๊ล้าง อ ซ้ะ ดี๊ กแช่ยาเว นอ ม ชิ้ทาง, ดี๊ อ เว๊ แบ อางกี อ คูซู๊ง พ้ะ โท๊

⁶ “ดี๊ อช๊าอโท่ ล ว๊าง แย๊ พี่ อ เว๊ โอเจไฆวะ เทว๊ล้าง อ ซ้ะ ลู่ง กแช่ยาเว อ ฌ่าง ได้ะ อ แค๊ นอ, อ เว๊ ล แบ ลี้ฆ้าง เบ้า ทจู แบ

⁷ เกม๊า อ แม้ แบอ้าล้าง อ ซ้ะ ดี๊ อ มู่ อ แพ่-อ้า, อ พื่ง อ วี่ อ มืง อ แคว๊-อ้า, พี่ อ ซี๊ง นอ ล ฌี้, เมะเว๊ ทเก โพล้ง นาซี เทว๊ล้าง ซ้ะ ลู่ง อ กแช่แยว้ อ ฌ่าง นอ, โอ ลู่ง อ เว๊ อ คู ล้อง ได้ะ นอ ล้อ

⁸ อช๊าอโท่ ล ว๊าง แย๊ พี่ อ เว๊ เก โพล้ง นาซี ได้ะ อ แค๊ นอ, อ เว๊ แบ ฌี้ แบ แอว้ ลู่ง กแช่ยาเว อ ฌ่าง ล้อ

⁹ “ดี๊ โพล้ง เมะ เฌ๊ ซี๊ง เบ้า ลู่ง อ ฌ๊างไท้ะ ล ทีง ฆ่าง นอ, อ เว๊ อ คู พี่ อางกี ฌี้ เว๊ เกม๊า อฌี้อแอว้ นอ เกทาง ทแบอ้า ล้อ, อ เว๊ แบ ไร้ะ โต้งโล้งไฆวะ อ คู ลู่ง ล นี้ง แย๊ พี่ อ แม้เช๊ง แม้เกล้ง ล้าง อ ซ้ะ นอ, เมะเว๊ มื่ง เนว๊ นี้ง ล นี้ง นอ, อ เว๊ แบ ไร้ะ โต้งโล้ง อ คู

¹⁰ ดี๊ ลู่ง มื่ง โฆะ นี้ง ล นี้ง นอ, อ เว๊ แบ แม้นี่ ทูลี่ง คี๊ง เบง ฌี้, ทูลี่งแอว้ อ พู คี๊ง เบง ฌี้, ลี้ โชะ เอะ โพล้งลื่งเท่ออคู ลู่ง เด้ทโอซยองอล่าง อ เกล้ ป้ะตู๊งไท้ะ

¹¹ ดี๊ โพล้งลื่งเท่ออคู ม เทว๊ เว๊, เก ทลื่งทาง แพล่ไฆวะ ทเด้บ้ะ ล เบง, ดี๊ ล เบง เด้าะ นอ ม เทว๊ เว๊, เก ทลื่งทาง เช้า ทพูแฆ่ น๊างเบง, บี่ซุ้ ม แม้ ทไฌ่ เท้าไฆวะ ทแบอ้า เอะ-อ้ะ, เป๊งนี่ อ เว๊ แม้ ไพ้ะ แบ เท่อ แบฆ้ะ ดี๊ ทจู, อกย้องบี่นอ, อ เว๊ แบ อางกี ฌี้ อ คู, เกม๊า อฌี้อแอว้ ลู่ง มื่ง ล นี้ง แย๊ นอ

¹² อเว๊ แบ โอเจไฆวะ เทว๊ล้าง อ ซ้ะ ดี๊ กแช่ยาเว ลู่ง อช๊าอโท่ พี่ เก โพล้ง นาซี อ แค๊ นอ ล พ๊า เด้า, แบเด้าะ อช๊าอโท่ ลู่ง อ พ้องไฆวะ พี่ อ เว๊ โอเจไฆวะ นอ, ทื๊ง-อ้ะ เก ทล้างกวางไฆวะ, เมะเว๊ เท่อ พี่ อ เว๊ เก โพล้ง นาซี นอ เกทาง ทแบอ้า เย้า, อ นอ เกม๊า อ เว๊ เฌ๊ โชะ แกะ แพ๊ พี่ อ โญะ โอ ล เนง นอ ล ดื้ง, เก ทลื่งทาง แพล่ไฆวะ ทไพ้ะทแม

¹³ “ท่อง อ เว๊ เก โพล้ง นาซี ชิ้ทาง อช๊าอโท่ เย้า นอ, โพล้ง พี่ เก โพล้ง นาซี นอ อ ทอางแม้เลา โอ บี่อี้ง, เมะเว๊ เกม๊า เฌ๊ฌ้า-อ้ะ ลู่ง เด้ทโอซยองอล่าง อ เกล้ ป้ะตู๊งไท้ะ

¹⁴ เกม๊า อ เฌ๊ เทว๊ ทลื่งทาง เท่อ เอะ กแช่ยาเว, อ นอ เมะเว๊ แกะ แพ๊ พู ลู่ง อ ฌี้ ทึ, พี่ อ โญะ โอ ล เนง นอ ล ดื้ง, เก ทลื่งทาง เช้า ทพูแฆ่ น๊างดื้ง, ดี๊ แกะ มู่ พู ลู่ง อ ฌี้ ทึ, พี่ อ โญะ โอ ล เนง นอ ล ดื้ง, เทว๊-อ้ะ เก ทลื่งทาง แพล่ไฆวะ ทเด้บ้ะ, ดี๊ แกะ แพ๊ พู ล ดื้ง พี่ อ ฌี้ ทึ นอ, เทว๊-อ้ะ เก ทลื่งทาง แม้ฆู๊งแม้พุ้ เท่อ

¹⁵ ดี๊ กู พี่ ล แบ ดี๊ อ ซีง แบ ฆวี้ ด้างเพะ ล เบง, (เมะเว๊ กู พี่ แม้ เว๊ ดี๊ ฌื๊งไน้ะ ลู่ง อ ฌี้ แกย้ ดี๊ ทซู, ดี๊ กู น๊างเบง พี่ ล แบ ดี๊ อ ซีง แบ แกย้ ดี๊ ทซู), เลา ดี๊ ทลื่งทาง เทว๊ ทซูงทแซ, ดี๊ ทโอ้ ลื่งทาง เท่อ พี่ อ กู่ง โละซ้ะ นอ ปะ

¹⁶ ฌ้อง โพล้งลื่งเท่ออคู ม เทว๊ ทลแพ อี้ง ลู่ง กแช่ยาเว อ เมะแซ พ้า, ดี๊ ม เทว๊ ทลื่งทาง แพล่ไฆวะ ทเด้บ้ะ, ดี๊ ทลื่งทาง เช้า ทพูแฆ่ น๊างดื้ง

¹⁷ ท่องอช๊าง นอ, โพล้งลื่งเท่ออคู ม เทว๊ แกะ แพ๊ เก ทลื่งทาง แม้ฆู๊งแม้พุ้ เท่อ เอะ กแช่ยาเว ล พ๊า ฆ่าง ดี๊ กู พี่ ล แบ ดี๊ อ ซีง แบ, พี่ อ โอ ด้างเพะ พ้า นอ, เลา ดี๊ ทลื่งทาง เทว๊ ทซูงทแซ พี่ อ กู่ง โละซ้ะ ดี๊ ทโอ้ ลื่งทาง เท่อ นอ ปะ

¹⁸ ฌ้อง โพล้ง เก นาซี ม โล้งไฆวะ อ คู พี่ อ อืงล้าง เว้ อ ซ้ะ เย้า นอ ลู่ง เด้ทโอซยองอล่าง อ เกล้ ป้ะตู๊งไท้ะ, ดี๊ ม แม้นี่ อ คูซู๊ง พี่ อ อืงล้าง เว้ เว๊ นอ ลี้ เช้าพล้าง เว๊ มี อ้า พ้า, พี่ อ โอ ทลื่งทาง แม้ฆู๊งแม้พุ้ เท่อ อ เช๊ละ นอ

¹⁹ ท่อง โพล้ง นาซี โล้งไฆวะ อ คู พี่ อ อืงล้าง เว้ เว๊ ฌ้อง เย้า นอ, โพล้งลื่งเท่ออคู ม แม้นี่ แกะ แพ๊ อ จูง อ แย เทง, พี่ อางฆวี่ง เว๊ เย้า นอ, ดี๊ ม แม้นี่ กู ล แบ ดี๊ อ ซีง แบ ลู่ง ด้างเพะ พ้า นอ ล ลอง, ดี๊ กู น๊างเบง พี่ ล แบ ดี๊ อ ซีง แบ นอ ล เบง, ฌ้อง ม อางกีล้าง เว๊ ลู่ง โพล้ง เก นาซี นอ อ จูง พ้า คี๊ง โค๊ เลา

²⁰ ฌ้อง โพล้งลื่งเท่ออคู ม แม้นี่ ทลแพ นอ ล พ๊า ฆ่าง ดี๊ แกะ อ ซ้ะแน๊ แย, ดี๊ อ กีงไท้ะ แย, พี่ แบ ทอางกีนี่-อ้ะ ล น้าง นอ, ม แม้ ทไฌ่ เยาฆ้าง, เก ทลื่งทาง เยาทาง เว่งว๊าง เทว๊ เอะ กแช่ยาเว, เก เท่อ พี่อฌี้อแอว้ ลู่ง โพล้งลื่งเท่ออคู นอ อ ฌ่าง, ท่องอช๊าง นอ, โพล้ง เก นาซี ลแพ นอ ม โอ้ ซไบ้ะ แซ ที๊ง ซี ล้อ

²¹ “อ อี้ง นอ เก ทอางแม้เลา ลู่ง โพล้ง นาซี นอ อ ฌ่าง, ดี๊ อ ทเทว๊ ลื่งทาง เท่อ, พี่ เทว๊ เอะ กแช่ยาเว ลู่ง อ อืงล้าง ซ้ะ เก นาซี นอ อ กย้อง, ท อ แฌ้แพ พี่ อ เทว๊ เว๊ ซี นอ โอเจ ได้ะ, อ เว๊ แบ แม้โพะ เท่อ พี่ อ อืงล้าง เว้ ซ้ะ นอ อ ไค๊ ด้องซุ้ ทอางแม้เลา แบฆ้ะ ดี๊ ท เก นาซี นอ ล้อ”

โพล้งลื่งเท่ออคู อ ทชูฌี้

²² กแช่ยาเว ไคล้ ดี๊ โมเซ ไจ้ะเว๊

²³ “เกม๊า น โล้ เอะ อาโรง ดี๊ อ พู อ ลี้ง ลแพ นอ บี่อี้ง, เกม๊า น ซื๊ง กุ้ แฌ้ ชูฌี้ แบ โพล้ง อีซลาเอง บี่อี้ง

²⁴ ‘เกม๊า กแช่ยาเว ชูฌี้ น ซื๊ง, ดี๊ ยู่แคว่ แฌแซกต้าง น ซื๊ง

²⁵ เกม๊า กแช่ยาเว อ เมะ พ้าง ล้างแบ น ซื๊ง, ดี๊ ย๊างเซิงย๊างซ้ะ แบ น ซื๊ง

²⁶ เกม๊า กแช่ยาเว บุ้ทาง อ เมะ แคว่ น ซื๊ง, ดี๊ เกล๊าง ทมึทพ้า โอ ดี๊ น ซื๊ง

²⁷ “บี่อี้ง ล้อ, อซื๊งเว๊ ม เกม๊า จ เม้ง จ แซ โอ ดี๊ โพล้ง อีซลาเอง, ดี๊ จ ม ชูฌี้ แบ อ ซื๊งเว๊ กุ้ แฌ้ นอ ล้อ”