เกล้​ท​ซ้ะวี่ง 36 - Northern Pwo Karen Thai Bible

โพล้ง มืง พี่ อ ทางแซย่, นี่แบก้ะ คองแซย้ อ ไฌ่

¹ โพล้ง กีเลอา ล ดองๆ, อ ชื้อ อ คู อ แน่, พี่ เก มาคี อ พู, พี่ อ เก มานาเซ อ พู, ลู่ง โยซิ้ อ ชื้อ พ้า นอ, เฌ๊ฆ้าง เบ้า, ไคล้ทาง เท่อ ลู่ง โมเซ ดี๊ กดูกแซย่, เมะเว๊ กเย่ โพล้ง อีซลาเอง อคูอแน่ ลแพ นอ อ เมะแซ พ้า

² อซื๊ง ไจ้ะเว๊, “กแช่ยาเว อางแบเลา จ เซงคู เกม๊า พอง ไละพู, ลู่ง ท นี่แบ ที๊งล่างค่างพ้า, เกล๊าง เอะ โพล้ง อีซลาเอง เก อคองอแซย้, ดี๊ กแช่ยาเว อางแบเลา จ เซงคู, ม๊า อ เกล๊าง เอะ ก น๊างพื่งวี่ เซโลเฟฮะ อคองอแซย้, เกล๊างก้ะ เอะ อ พูมืง

³ โพล้ง มืง ลแพ นอ เมะ ทางแซย่ ดี๊ โพล้ง อีซลาเอง อ ชื้อ อ แฌ้แพ, อ พู ลแพ นอ อคองอแซย้, พี่ อ เก อ พี๊ง อ พู๊ง ลู่ง แย๊ อู้ง เว๊ นอ, ม แบ ทแม้นี่ไฆวะ, ฌ้อง ลี้ แม้ แอทาง เอะ โพล้ง ล ชื้อ แย๊ พี่ อ ลี้ โอ เว๊ ดี๊-อ้ะ นอ อคองอแซย้, ทบี่นอ คองแซย้ พี่ ก นี่ แบ-อ้ะ ลู่ง ก พอง ไละพู นอ ม แบ ท โชะนี่ไฆวะ

⁴ ดี๊ ท่อง อ ท้อง เนง โพล้ง อีซลาเอง อ เนง ททูแพล่ไฆวะ นอ, คองแซย้ พี่ เก อ เท่อ นอ, ม แบ ทแม้นี่ แอทางก้ะ เอะ โพล้ง ล ชื้อ แย๊ พี่ อ เว๊ ลี้ โอ เว๊ ดี๊-อ้ะ นอ ล้อ, อ นอ เก ทแม้นี่ก้ะ ก พี๊ง ก พู๊ง ลู่ง แย๊ อคองอแซย้”

⁵ ดี๊ โมเซ อางแบเลา โพล้ง อีซลาเอง บี่ซุ้ดี๊ กแช่ยาเว อ ทไคล้ นอ ไจ้ะเว๊, “โพล้ง โยซิ้ อ ชื้อ ไคล้ เท่อ นอ แบ เย้า

⁶ อ อี้ง นอ เก เท่อ พี่ กแช่ยาเว อางแบเลา แบฆ้ะ ดี๊ เซโลเฟฮะ อ พูมืง, พี่ อ ไจ้ะเว๊, ‘เกม๊า กมืงซีง นอ ทางแซย่ ดี๊ โพล้ง แฌ้ ฌี้ๆ, พี่ แบ อ ซ้ะ, แบเด้าะ อ เว๊ แบ ทางแซย่ ดี๊ โพล้ง ลู่ง อ พี๊ง อ พู๊ง ลู่ง แย๊ อ ชื้อ ล ดองๆ อ แกล้ นอ ล้อ

⁷ บี่อี้ง ล้อ, โพล้ง อีซลาเอง อคองอแซย้ ม ล แบ ท แญ่ไฆวะ-อ้ะ โอนี่ ล ชื้อ อี้ง, ลี้ โอก้ะ ล ชื้อ เด้าะ แบ, เมะเว๊ โพล้ง อีซลาเอง กุ้ อ แฌ้ แบ ช๊างล้าง อ ซ้ะ ดี๊ อ พี๊ง อ พู๊ง ลู่ง แย๊ อู้ง อคองอแซย้ นอ ล้อ

⁸ ดี๊ พูมืง กุ้ อ แฌ้, พี่ นี่ก้ะ คองแซย้ ลู่ง โพล้ง อีซลาเอง อ ชื้อ พ้า ชื้อ ฌี้ๆ, นอ, ม๊า อ ทางแซย่ ดี๊ โพล้ง แฌ้ ฌี้ๆ, ลู่ง อ แพ่ อ ชื้อ พ้า, บี่ซุ้ โพล้ง อีซลาเอง กุ้ อ แฌ้ ม นี่ก้ะ อ แพ่ อ พี๊ง อ พู๊ง ลู่ง แย๊ อู้ง อคองอแซย้

⁹ ทบี่นอ ทแญ่ไฆวะ คองแซย้, โอนี่ อี้ง ล ชื้อ, ลี้ก้ะ ลู่ง อู้ง ล ชื้อ เด้าะ นอ ม ล โอ แบ, เมะเว๊ โพล้ง อีซลาเอง ล ชื้อ แบ ล ชื้อ นอ, แบ ช๊างล้าง อ ซ้ะ ลู่ง อ กแช่ อคองอแซย้ อ ล่าง โอ พ้า นอ ล้อ”

¹⁰ กแช่ยาเว อางแบเลา โมเซ บี่จะเล้ นอ, เซโลเฟฮะ อ พูมืง แม้ เว๊ บี่นอ ล้อ

¹¹ ดี๊ กเย่ เซโลเฟฮะ อ พูมืง, เมะเว๊ มาลา, ทีราซา, โฮะลา, มีงคา, ดี๊ นูอา นอ, ทางแซย่ ดี๊ กเย่ อ ม้าง อ พูแคว๊ ซีงลแพ นอ ล้อ

¹² อซื๊งเว๊ ทางแซย่ ดี๊ โพล้ง มานาเซ อ ชื้อ, โยซิ้ อ พู, ดี๊ อคองอแซย้ นอ โอ ลู่ง อ พู๊ง อ ชื้อ ลู่ง แย๊ ล ดองๆ, อ พ้า ได้ะ นอ ล้อ

¹³ ทลแพ อี้ง นอ, เก ทอางแม้เลา, ดี๊ ทอางกีล้าง พี่ กแช่ยาเว อางแบเลา โพล้ง อีซลาเอง, เฌ๊นี่ ดี๊ โมเซ ลู่ง ทแด้คู โมอา, ลู่ง ที๊ง โจเด้ง กล้อง พ้าไท้ะ, พี่ โอ กแท้ โละซ้ะ ดี๊ เว่ง เยรีโค นอ ล้อ