เกล้ทซ้ะวี่ง 27 - Northern Pwo Karen Thai Bibleเซโลเฟฮะ อ พู มืง 1 เซโลเฟฮะ อ พู มืง ซีงลแพ นอ เฌ๊ฆ้างฌูง-อ้ะ, (เซโลเฟฮะ นอ เก เฮเฟอ อ พู, เฮเฟอ นอ เก กีเลอา อ พู, กีเลอา นอ เก มาคี อ พู, มาคี นอ เก มานาเซ อ พู, โอนี่ ลู่ง โยซิ้ อ พู มานาเซ ล ดอง อ ชื้อ พ้า, อ เว๊ อ พูมืง ลแพนอ อ เม้ง, เมะเว๊, มาลา, นูอา, โฮะลา, มีงคา, ดี๊ ทีราซา) 2 อ ซื๊งเว๊ เฌ๊ ชี๊เทิง ลู่ง โมเซ, ดี๊ โพล้งลื่งเท่ออคู เอเลอาซา, ดี๊ กดูกแซย่, ดี๊ โพล้ง น๊างมู๊ง เลาพะ อ เมะแซ พ้า, ลู่ง เด้ทโอซยองอล่าง อ เกล้ ป้ะตู๊งไท้ะ ไจ้ะเว๊ 3 “ก แพ่ ซี๊ง ลู่ง แพะคูทเคแกล้, แบเด้าะ อ เว๊ ล นี่ โอซยอง ดี๊ โพล้ง โครา, พี่ อ ฆู๊ง โละซ้ะ ดึ้ กแช่ยาเว ลแพ นอ แบ, อ เว๊ ซี๊ง ลู่ง อ กแช่ อ ทเด้บ้ะ อ กย้อง, ดี๊ อ เว๊ อ พูแคว๊ ล โอ น่าง แฌ้ แบ 4 แบทเล้ น แม้ล้างแม่ไฆวะ ก แพ่ อ เม้ง ลู่ง น ชื้อ ล ดอง นอ อ พ้า, พี่ อ เว๊ อ พูแคว๊ ล โอ แบ อกย้อง นอ, อวีงซ้ะชู้ เกม๊า ก นี่แบ คองแซย้ ลู่ง ก แพ่ อ พื่ง อ วี่ อ ซุ้ อ แกล้ ไช้ะ” 5 แบฆ้ะ ดี๊ อ ซื๊งเว๊ อไฌ่อกย้อง นอ, โมเซ โล้ เว๊ ลู่ง กแช่ยาเว อ เมะแซ พ้า 6 กแช่ยาเว ไคล้ ดี๊ โมเซ ไจ้ะเว๊ 7 “เซโลเฟฮะ อ พูมืง ไคล้ เท่อ นอ แบ เย้า, น แบ เกล๊าง เอะ-อ้ะ อคองอแซย้ ลู่ง อ แพ่ อ พื่ง อ วี่ อ ซุ้ อ แกล้, ดี๊ เกม๊า อซื๊งเว๊ อ แพ่ อคองอแซย้ นอ ล้างเทะแบ เกก้ะ อซื๊งเว๊ อ เท่อ 8 เกม๊า น โล้ เอะ โพล้ง อีซลาเอง บี่อี้ง, ‘โพล้ง แคว๊ ล แฌ้ เมะ ซี๊ง, ดี๊ อ พูแคว๊ ล โอ น่าง แฌ้ แบ นอ, เกม๊า อคองอแซย้ นอ, ล้างเทะแบ เกก้ะ อ พูมืง อ เท่อ 9 ดี๊ อ พูมืง เมะ ล โอ แบ นอ, อคองอแซย้ นอ, แบ เกล๊างก้ะ เอะ อ พื่ง อ วี่ 10 ดี๊ อ พื่ง อ วี่ เมะ ล โอ แบ นอ, อคองอแซย้ นอ, แบ เกล๊างก้ะ เอะ อ แพ่ อ พื่ง อ วี่ 11 ดี๊ อ แพ่ อ พื่ง อ วี่ เมะ ล โอ แบ นอ, อคองอแซย้ นอ, แบ เกล๊างก้ะ เอะ อ มื่ง อ แคว๊ พี่ อ เท่ง ดี๊-อ้ะ ลู่ง อ เว๊ อ ชื้อ ล ดอง นอ อ พ้า, ม เกก้ะ โพล้ง ล แฌ้ นอ อ เท่อ ซี, อ อี้ง นอ เก ทอเค้อะอต้าง, ดี๊ เก ทอางกีล้าง ลู่ง โพล้งเฌงพูฆ๊างพู อีซลาเอง อ ฌ่าง, บี่ซุ้ดี๊ กแช่ยาเว อางแบเลา โมเซ นอ ล้อ ทตางทาง โยชูวา เก โพล้ง แม้ เท่อ เท่งก้ะ โมเซ อ ล่าง ( ลทอ.31:1-8 ) 12 กแช่ยาเว ไคล้ ดี๊ โมเซ ไจ้ะเว๊, “เกม๊า ลี้ทาง ลู่ง ทลู่ง อาบารี คู อี้ง, ฌ้อง แคว่ดุ้ ที๊งล่างค่างพ้า พี่ จ เกล๊าง เอะ โพล้ง อีซลาเอง นอ 13 ดี๊ ท่อง น แด แบ-อ้ะ ฌ้อง เย้า นอ, น ม ซี๊งไฆวะ ไท้ โอ ดี๊ น โพล้งเฌงพูฆ๊างพู ด้องซุ้ น โจ้ อาโรง, พี่ อ ซี๊งไฆวะ เย้า นอ ล้อ 14 เป๊งนี่ น ซื๊ง คี๊ง แฌ้ อี้ง ลือ จ ทไคล้ ลู่ง แพะคูทเคแกล้ ซี่ง, เมะเว๊ พี่ โพล้ง น๊างมู๊ง เอ้งไฌ้ เท่อ นอ, น ล แม้ฆี๊งแม้แล้ แย้ ลู่ง อ ซื๊งเว๊ อ เมะแซ พ้า, ลู่ง ที๊ง โอ นอ แบ” (อ อี้ง นอ เมะเว๊ ที๊ง เมรีบา ลู่ง คาเดะ แพะคูทเคแกล้ ซีง พ้า) 15 โมเซ ไคล้ ดี๊ กแช่ยาเว ไจ้ะเว๊ 16 “เกม๊า กแช่ยาเว ลู่ง กโพล้ง กุ้ แฌ้ อ วีง อ แล้ อ กแช่แยว้ นอ, อางลึนี่ โพล้ง แคว๊ ล แฌ้ ต๊างทาง-อ้ะ ม๊า อ โอ ลู่ง โพล้ง น๊างมู๊ง อี้ง อ พ๊างคู ไช้ะ 17 อ เว๊ ม เก โพล้ง พี่ ม ไจทางแค๊ล้าง ลู่ง อ ซื๊งเว๊ เมะแซ พ้า, อ เว๊ ม เก โพล้ง พี่ ม ไจทางฌ้า นึฆ้างฌ้า อ ซื๊งเว๊, บี่ซุ้ กแช่ยาเว อ โพล้ง น๊างมู๊ง ล เก บี่ซุ้ดี๊ แกะ พี่ โพล้ง ล โอ ลื่ง-อ้ะ แบ นอ แบ” 18 กแช่ยาเว ไคล้ ดี๊ โมเซ ไจ้ะเว๊, “เฌ๊ฌ้า นูง อ พู, โยชูวา พี่ กแช่แยว้ อ วีงฌี้แล้แอว้ โอ ดี๊-อ้ะ นอ, ฌ้อง เกม๊า น อางกีล้าง น จูง ลู่ง อ ล้อง 19 เกม๊า อ ชี๊เทิง ลู่ง โพล้งลื่งเท่ออคู เอเลอาซา, ดี๊ โพล้ง น๊างมู๊ง เลาพะ นอ อ เมะแซ พ้า, ฌ้อง เกม๊า น อางแบเลา เอะ อ เท่อ ลู่ง โพล้ง ลแพ นอ อ เมะแซ พ้า 20 ม๊า น อางกีล้าง เอะ-อ้ะ น ดู้ง น ยาง นอ, บี่ซุ้ เกม๊า โพล้ง อีซลาเอง น๊างมู๊ง เลาพะ นอ ชู่งลู่งเน้แท๊-อ้ะ 21 ดี๊ อ เว๊ ม ชี๊เทิง ลู่ง โพล้งลื่งเท่ออคู เอเลอาซา อ เมะแย๊, พี่ ม อางจ้ะ เท่อ ลู่ง อ เว๊ อ ฌ่าง, บี่ซุ้ดี๊ ทโล้ ล้าง ทอเกิ้งอแบ อ ทอางจ้ะ เท่อ ดี๊ อูรี ลู่ง กแช่ยาเว อ เมะแซ พ้า, ดี๊ อซื๊งเว๊ซีง ม ไจทาง ดี๊ นึฆ้าง บี่ซุ้ ดี๊ โพล้งลื่งเท่ออคู โล้ เอะ-อ้ะ, เลา ดี๊ อ เว๊ ดี๊ โพล้ง อีซลาเอง, เมะเว๊ โพล้ง น๊างมู๊ง เลาพะ” 22 ฌ้อง โมเซ แม้ เว๊ บี่ซุ้ดี๊ กแช่ยาเว อางแบเลา-อ้ะ นอ, อ เว๊ เกม๊า โยชูวา เฌ๊ ชี๊เทิง ลู่ง โพล้งลื่งเท่ออคู เอเลอาซา, ดี๊ โพล้ง น๊างมู๊ง เลาพะ นอ อ เมะแซ พ้า 23 ท่องอช๊าง นอ, อ เว๊ อางกีล้าง อ จูง ลู่ง โยชูวา อ ล้อง, ดี๊ อางแบเลา เอะ เว๊ อ เท่อ บี่ซุ้ดี๊ กแช่ยาเว โล้ เอะโมเซ นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society