เกล้ทซ้ะวี่ง 23 - Northern Pwo Karen Thai Bible1 บาลาอาง โล้ เอะ บาล้ะ ไจ้ะเว๊, “ไต้ทางนี่ เอะ แย้ ทลื่งล่าง เนว๊ โพลง พี่ อี้ง, ดี๊ แม้นี่ เอะ แย้ งู้ แพ๊ เนว๊ ดื้ง, แกะ แพ๊ เนว๊ ดื้ง” 2 บาล้ะ แม้ เว๊ บี่ซุ้ดี๊ บาลาอาง โล้ เอะ-อ้ะ นอ, ฌ้อง บาล้ะ ดี๊ บาลาอาง แม้นี่ งู้ แพ๊ ล ดื้ง, ดี๊ แกะ แพ๊ ล ดื้ง, เทว๊ เว๊ เก ทลื่งทาง ลู่ง ทลื่งล่าง ล โพลงๆ, นอ อ คู 3 ฌ้อง บาลาอาง โล้ เอะ บาล้ะ ไจ้ะเว๊, “เกม๊า น ชี๊เทิง ลู่ง น ทลื่งทาง อ ฌ๊างไท้ะ นอ, เมะ ยี๊แด นอ จ ม ลี้, แบซีงลู่ง กแช่ยาเว ม เฌ๊ ต้องนอง โละอซ้ะ ดี๊ แย้, ดี๊ อ เว๊ เนโพลทาง เอะ แย้ ทเม้ง เล้ นอ, จ ม โล้ เอะ แน้ ล้อ”, ฌ้อง อ เว๊ ลี้ทาง ลู่ง ทจ้องคู พ้ะ โท๊ ไวะ 4 กแช่แยว้ แด โละซ้ะ ดี๊ บาลาอาง, บาลาอาง โล้แบ กแช่แยว้ ไจ้ะเว๊, “จ แม้ทางนี่ ทลื่งล่าง เนว๊ โพลง, ดี๊ จ แม้นี่ งู้ แพ๊ ล ดื้ง, ดี๊ แกะ แพ๊ ล ดื้ง, จ เทว๊-อ้ะ เก ทลื่งทาง ลู่ง ทลื่งล่าง กุ้ โพลง นอ อ คู” 5 กแช่ยาเว ชวี๊งล้าง ทไคล้ ลู่ง บาลาอาง อ นุ้ พ้า, ดี๊ ไจ้ะเว๊, “ไท้ฌูง บาล้ะ ดี๊ ไคล้ ดี๊-อ้ะ บี่นอ” 6 บาลาอาง ไท้ฌูง บาล้ะ, แด เว๊ อ ชี๊เทิง ลู่ง อ ทลื่งทาง นอ อ ฌ๊างไท้ะ, เลา ดี๊ โพล้ง โมอา อ กดูกแซย่ กุ้ แฌ้ นอ ชี๊เทิง ดี๊-อ้ะ ปะ 7 บาลาอาง เตะล้าง ทไคล้ อางด้อง เท่อ บี่อี้ง “บาล้ะ เฌ๊ฌ้า แย้, จ โอนี่ ลู่ง เฌง อาราง พ้า โพล้ง โมอา อ กจุ้แฆว้ เฌ๊ฌ้า แย้, จ โอนี่ ลู่ง ทลู่ง คู มื่ง ทาง ล โค๊ เฌ๊ เซ้อ, เฌ๊ ชูอ้า ยาคุ้ อ ชื้อ นอ เอะ แย้ เฌ๊ ไช้ะ, เฌ๊ ไคล้อ้าไคล้ซ๊าง แบ โพล้ง อีซลาเอง 8 จ ม ชูอ้า โพล้ง พี่ กแช่แยว้ ล ชูอ้า เว๊ แบ ซี บี่จะเล้? จ ม ไคล้อ้าไคล้ซ๊าง โพล้ง พี่ กแช่ยาเว ล ไคล้อ้าไคล้ซ๊าง เว๊ แบ ซี บี่จะเล้? 9 เมะเว๊ จ โอนี่ ลู่ง ไล๊ จ้องคู แคว่ ล้าง อ ซื๊งเว๊ ดี๊ ลู่ง ทลู่ง พ้ะโท๊ คู จ แด ฌูงล้าง อ ซื๊งเว๊ แคว่เซ้อ, โพล้ง ล ชื้อ โอเจ แด เว๊ ล โป้ง เฆาะ ดี๊ ล ดว้ะซยองล้าง อ ซ้ะ นึฆึ ดี๊ กเย่ โพล้ง กุ้ที๊งกุ้ค่าง แบ 10 โพล้ง เล้ ม ดว้ะดุ้ ยาคุ้ พี่ อ แอ ด้องซุ้ ฌางคู มูง นอ ซี? ดี๊ โพล้ง เล้ ม ดว้ะดุ้ อีซลาเอง ล โทะ ลู่ง อ ลี่ง โทะ พ้า นอ ซี เกม๊า เต้ จ ซี๊ง ด้องซุ้ โพล้ง ลู่ง ทแบแยว้อซ้ะ อ ทซี๊ง นอ ดี๊ เกม๊า จ ทโอม๊า อ ไค๊ ทึ บี่ซุ้ดี๊ อ ซื๊งเว๊” 11 ฌ้อง บาล้ะ ไคล้ ดี๊ บาลาอาง ไจ้ะเว๊, “น แม้ เอะ แย้ ทเม้ง เล้, จ กุ้นี่ แน้ เกม๊า น เฌ๊ ชูอ้า จ ดีง จ แด้, แบเด้าะ แคว่เซ้อ, ลู่ง น ชูฌี้-อ้ะ ล โค๊ เด้าะ” 12 อ เว๊ ไคล้ช๊า-อ้ะ ไจ้ะเว๊, “จ แบ ปโล่ล้าง ซ้ะ พี่ ม ไคล้ เท่อ ที่ กแช่ยาเว ชวี๊งล้าง เว๊ จ นุ้ พ้า นอ ล้อ ล เมะ แบ-อ้า?” บาลาอาง อ ทพ้ะเว้เท่อ คี๊ง เม้ง ล เม้ง 13 บาล้ะ ไคล้ ดี๊-อ้ะ ไจ้ะเว๊, “เกม๊า น ลี้ ดี๊ แย้ ล จอง เด้าะ ไช้ะ, ลู่ง น โอนี่ พี่ นอ น ม แด-อ้ะ ซี, น ม แด ที่ อ โอ เบ้า ทึ ลแพ นอ ล้อ, ดี๊ น ล แด โพล้ง เลาพะ แบ, พี่ นอ เกม๊า น ชูอ้า เอะ แย้ อ ซื๊งเว๊ ไช้ะ” 14 ฌ้อง บาล้ะ เฌ๊ฌ้า บาลาอาง ลู่ง โซฟี อ ไชะ, เฌ๊ ท้อง ทลู่ง ปีซกา อ จ้องคู, ดี๊ ไต้ทางนี่ ทลื่งล่าง เนว๊ โพลง, ดี๊ เทว๊ งู้ แพ๊ ล ดื้ง, ดี๊ แกะ แพ๊ ล ดื้ง ลู่ง ทลื่งล่าง คู นอ กุ้ โพลง 15 บาลาอาง โล้ เอะ บาล้ะ ไจ้ะเว๊, “ พี่ แย้ จ ลี้ แด โละซ้ะ ดี๊ กแช่แยว้ ลู่ง อู้ง อ แค๊ นอ, เกม๊า น ชี๊เทิง โอ น ทลื่งทาง อ ฌ๊างไท้ะ พี่ อี้ง แด เทา” 16 ฌ้อง กแช่ยาเว แด โละซ้ะ ดี๊ บาลาอาง, ดี๊ ชวี๊งล้าง ทไคล้ ลู่ง อ เว๊ อ นุ้ พ้า ไจ้ะเว๊, “ไท้ฌูง บาล้ะ ดี๊ ไคล้ ดี๊-อ้ะ บี่นอ” 17 บาลาอาง เฌ๊ไท้ฌูง บาล้ะ, ดี๊ แด เว๊ อ เท่อ ชี๊เทิง โอ ลู่ง อ กแช่ อ ทลื่งทาง ฌ๊างไท้ะ, เลา ดี๊ กเย่ โมอา อ กดูกแซย่ ลแพ นอ ชี๊เทิง โอ ดี๊-อ้ะ, บาล้ะ อางจ้ะ บาลาอาง ไจ้ะเว๊, “กแช่ยาเว ไคล้ ทเม้งเล้?” 18 บาลาอาง เตะ ล้าง อ ทไคล้ อางด้อง เท่อ บี่อี้ง “บาล้ะ-เอ้อ, เฌ้เทิงทาง, ดี๊ คุ้ช๊องแน-อ้ะ ซีโป อ พู-เอ้อ, ช๊องแน แย้ อี้ง 19 กแช่แยว้ นอ ล เมะ อ เก กโพล้ง พี่ อ คีงอูง แบ ดี๊ ล เก กโพล้ง อ พู พี่ แบ เปลงไท้ อ ซ้ะ แบ พี่ อ เว๊ โล้ เว้ เท่อ เย้า นอ, ล แม้โพะ เว๊ อ ไค๊ แบ-อ้า? พี่ อ เว๊ ไคล้ เว้ เท่อ เย้า นอ, ม ล แม้ เว๊ ท่อง อ ชิ้เทา แบ-อ้า? 20 แคว่เซ้อ, จ นี่แบ กแช่แยว้ อ ทอางแบเลา ม๊า จ ชูฌี้ เท่อ พี่ กแช่แยว้ ชูฌี้ เท่อ เย้า นอ, จ เปลงไท้-อ้ะ ล ซี ล้าแบ 21 ล แด ทน้ะทโน๊ง ลู่ง ยาคุ้ อ ซุ้ อ แกล้ พ้า แบ ดี๊ ลู่ง อีซลาเอง อ ซุ้ อ แกล้ พ้า นอ, ล แด ทน้ะทโน๊ง แบ กแช่ยาเว, เมะเว๊ อ ซื๊งเว๊ อ กแช่แยว้ นอ โอ ดี๊-อ้ะ ดี๊ ท อ ลู่ง ซองลี้ ชูฌี้ เทว๊ เอะ กจุ้แฆว้ นอ, โอ ลู่ง อ ซุ้ อ แกล้ 22 กแช่แยว้ ไจทางฌ้าไฆวะ อซื๊งเว๊ ลู่ง ค่าง อีไย้ะ พ้า เก ด้องซุ้ ทดู โฌ้ อ โน้ง ลู่ง อซื๊งเว๊ อ ฌ่าง 23 ทบี่นอ ทอูงทโป้ ล โอ น่าง เม้ง แบ, พี่ ม แม้ แบไท้ะ ยาคุ้ ซี ทดู้งทยาง ล โอ น่าง เม้ง แบ, พี่ ม แม้อ้าแม้ซ๊าง อีซลาเอง ซี ค๊องเนงอี้ง, ยาคุ้ ดี๊ อีซลาเอง ม นี่แบ ทโล้ เอะ-อ้ะ ไจ้ะเว๊ กแช่แยว้ นี่ แม้ เท่อ พี่ ล เม้ง เล้ 24 แคว่เซ้อ, โพล้ง ล ชื้อ เฌ้เทิงทาง ด้องซุ้ คี๊ยื่ง อ มู่ พ้ะดู ดี๊ ชี๊เทิง ทาง ด้องซุ้ คี๊ยื่ง อ แพ๊ ล ญ่อง มี๊งน้าง แบ, ท๊อง เว๊ ม อางแบ อ แช, ดี๊ โอ้ ทซวีง พี่ อ แบ ทแม้ซี๊ง-อ้ะ” 25 ฌ้อง บาล้ะ โล้ เอะ บาลาอาง ไจ้ะเว๊, “ชูอ้า-อ้ะ ล ฌี้, ดี๊ ชูฌี้-อ้ะ ล ฌี้” 26 แบเด้าะ บาลาอาง ไคล้ช๊า บาล้ะ ไจ้ะเว๊, “จ ล โล้ เอะ แน้ ล เมะ แบ-อ้า พี่ ไจ้ะ, ‘ทกุ้ อ เม้ง พี่ กแช่ยาเว ม ไคล้ เว๊ นอ, จ แบ แม้โพะ อ ไค๊’, ” 27 บาล้ะ โล้ เอะ บาลาอาง ไจ้ะเว๊, “เฌ๊ ไวะ, จ ม ลี้ฌ้า แน้ ล จอง เด้าะ, แบซีงลู่ง กแช่แยว้ ม แบ อ ซ้ะ เกม๊า น ชูอ้า-อ้ะ ลู่ง จ ฌ่าง พี่ นอ” 28 บาล้ะ ลี้ฌ้า บาลาอาง ลู่ง ทลู่ง เปโอ อ จ้องคู, พี่ แคว่ ล้าง เท่อ แด ปางเล มิ้ 29 ฌ้อง บาลาอาง โล้ เอะ บาล้ะ ไจ้ะเว๊, “ไต้ทางนี่ เอะ แย้ ทลื่งล่าง พี่ อี้ง เนว๊ โพลง, ดี๊ แม้นี่ เอะ แย้ งู้ แพ๊ เนว๊ ดื้ง, แกะ แพ๊ เนว๊ ดื้ง 30 บาล้ะ แม้ เว๊ บี่ซุ้ดี๊ บาลาอาง โล้ เอะ-อ้ะ นอ, ดี๊ เทว๊ งู้ แพ๊ ล ดื้ง, ดี๊ แกะ แพ๊ ล ดื้ง, ลู่ง ทลื่งล่าง คู นอ กุ้ อ โพลง |
Pwo Karen Bible (Thailand) © Thailand Bible Society, 2016.
Thailand Bible Society