เกล้​ท​ซ้ะวี่ง 15 - Northern Pwo Karen Thai Bible

ทเทว๊ ทลื่งทาง เท่อ ล เม้งๆ, ล มยู๊ๆ

¹ กแช่ยาเว ไคล้ ดี๊ โมเซ ไจ้ะเว๊

² “เกม๊า น โล้ เอะ โพล้ง อีซลาเอง, เมะเว๊ ไคล้ ดี๊ อซื๊งเว๊ บี่อี้ง, พี่ น ซื๊ง ม ลี้ นึฆ้าง ที๊งล่างค่างพ้า พี่ น ม ลี้ฆ้าง โอ-อ้ะ, พี่ จ เกล๊าง เอะ น ซื๊ง นอ

³ น ซื๊ง เมะ เฌ๊ โชะ ทลื่งทาง, น แม้นี่-อ้ะ ลู่ง งู้ น๊างมู๊ง อ แกล้ ฌี้, แมะ ดี๊ แกะ น๊างมู๊ง อ แกล้ ฌี้, ลี้ เทว๊ เอะ กแช่ยาเว เก ทลื่งทาง เช้า ทพูแฆ่ น๊างดื้ง ฌี้, เก ทลื่งทาง แม้ ชิ้เทา ไท้ ทอืงล้าง เว้ เท่อ ฌี้, เก ทลื่งทาง ซ้ะ โอ แบซ้ะ เทว๊-อ้ะ ฌี้, เทว๊-อ้ะ ลู่ง ทลื่งอาง โละซ้ะ ท๊อง ทอแค๊, บี่ซุ้ เกม๊า อ กลื่ง น๊าม๊า ลู่ง แบ กแช่ยาเว อ ซ้ะ ฌี้ นอ

⁴ เกม๊า โพล้ง พี่ อ เฌ๊ โชะ ทลื่งทาง เทว๊ เอะ กแช่ ยาเว นอ, เฌ๊ โชะ ดี๊ ทลื่งทาง เทว๊ ทซูงทแซ, เมะเว๊ ฌื๊งไน้ะ ลู่ง อ ฌี้ ล กีโล, แกย้ ดี๊ ทซู เมาะ ล เล๊ง

⁵ ดี๊ เกม๊า แม้นี่ ไซ้ะ ซไบ้ะ แซ ที๊ง เมาะ ล เล๊ง, เก ทโอ้ ลื่งทาง เท่อ กู่ง โละซ้ะ ดี๊ แกะ พู กุ้ อ ดื้ง, พี่ อ เก ทลื่งทาง เช้า ทพูแฆ่ น๊างดื้ง ฌี้, ทพูแฆ่ ลื่งทาง เท่อ ฌี้

⁶ ดี๊ ลู่ง แกะ แพ๊ ล ดื้ง อ ฌ่าง นอ, เกม๊า น แด้เว้นี่ ทลื่งทาง เทว๊ ทซูงทแซ ดี๊ ฌื๊งไน้ะ ลู่ง อ ฌี้ คี๊ง กีโล, แกย้ ดี๊ ทซู เมาะ ล เล๊ง คึ

⁷ แบเด้าะ ลู่ง ทโอ้ ลื่งทาง เท่อ อ ฌ่าง นอ, ม๊า น เทว๊ ไซ้ะ ซไบ้ะ แซ ที๊ง ล เล๊ง คึ, เกม๊า อ เก ท อ กลื่ง น๊าม๊า ลู่ง แบ กแช่ยาเว อ ซ้ะ

⁸ พี่ น แม้นี่ งู้ พู เก ทลื่งทาง เช้า ทพูแฆ่ น๊างดื้ง ฌี้, เก ทพูแฆ่ ลื่งทาง เท่อ บี่ซุ้ เก ทลื่งทาง แม้ ชิ้เทา ไท้ ทอืงล้าง เว้ ซ้ะ ฌี้, เก ทลื่งทาง แม้ฆู๊งแม้พุ้ เท่อ เทว๊ เอะ กแช่ยาเว ฌี้

⁹ เกม๊า ลี้ โชะ ทลื่งทาง เทว๊ ทซูงทแซ, เทว๊ กู่ง ฆึ-อ้ะ ดี๊ งู้ แพ๊ นอ, อ นอ เมะเว๊ ฌื๊งไน้ะ ลู่ง อ ฌี้ ซ๊า กีโล, แกย้ ดี๊ ทซู คี๊ง เล๊ง

¹⁰ ดี๊ เกม๊า ลี้ โชะ ทโอ้ ลื่งทาง เท่อ, เมะเว๊ ไซ้ะ ซไบ้ะ แซ ที๊ง คี๊ง เล๊ง, บี่ซุ้ เก ทลื่งทาง เช้า ดี๊ มี, เก ท อ กลื่ง น๊าม๊า ลู่ง แบ กแช่ยาเว อ ซ้ะ

¹¹ แม้-อ้ะ บี่อี้ง, ลู่ง งู้ แพ๊ ฌี้, แกะ แพ๊ ฌี้ อ ฌ่าง กุ้ อ ดื้ง, ดี๊ ลู่ง แกะ แพ๊ พู ฌี้, แมะ พู ฌี้ อ ฌ่าง กุ้ อ ดื้ง ปะ

¹² แม้-อ้ะ บี่อี้ง ดี๊ ทพูแฆ่ กุ้ อ ดื้ง ฆวี๊ อ แอ อ แซย้ พี่ น แม้นี่ แด้เว้-อ้ะ ม เทว๊-อ้ะ นอ

¹³ กเย่ โพล้ง ลู่ง อ กแช่ อ ค่าง พ้า นอ, แบ แม้ เว๊ บี่อี้ง กุ้ อ แฌ้ ล้อ, พี่ ม เทว๊ ทลื่งทาง เช้า ดี๊ มี, เก ท อ กลื่ง น๊าม๊า ลู่ง แบ กแช่ยาเว อ ซ้ะ นอ

¹⁴ โพล้ง ล ชื้อ แด พี่ อ เฌ๊ โอชู๊ ดี๊ แน้ ฌี้, โพล้ง พี่ อ โอ น ซุ้ น แกล้ ครึๆ, นอ ฌี้, เมะ เทว๊ ทลื่งทาง เช้า ดี๊ มี, เก ท อ กลื่ง น๊าม๊า ลู่ง แบ กแช่ยาเว อ ซ้ะ นอ, เกม๊า อ ซื๊งเว๊ แม้ บี่ซุ้ดี๊ น ซื๊ง แม้-อ้ะ นอ ปะ ล้อ

¹⁵ ม แบ โอ ดี๊ ทอเค้อะอต้าง ล เม้ง ฆ่าง ลู่ง โพล้ง น๊างมู๊ง อ ฌ่าง, ดี๊ โพล้ง ล ชื้อ แด พี่ อ เฌ๊ โอชู๊ ดี๊ แน้ นอ อ ฌ่าง ปะ, เก ทอเค้อะอต้าง ล้างชู้ล้างแกย, ท้อง น พู ชู้ ลี้ง ชู้, เมะเว๊ น ซื๊ง แม้ ซ้ะ บี่จะเล้ นอ, โพล้ง ล ชื้อ แด แบ แม้ ซ้ะ บี่นอ, ลู่ง กแช่ยาเว อ เมะแซ พ้า ปะ ล้อ

¹⁶ ม แบ โอ ดี๊ ทอางแม้เลา ล เม้ง ฆ่าง, ดี๊ ทอางกีล้าง ล เม้ง ฆ่าง ลู่ง น ซื๊ง ฌ่าง, ดี๊ โพล้ง ล ชื้อ แด พี่ อ เฌ๊ โอชู๊ ดี๊ แน้ นอ อ ฌ่าง ปะ>>

¹⁷ กแช่ยาเว ไคล้ ดี๊ โมเซ ไจ้ะเว๊

¹⁸ “เกม๊า น โล้ เอะ โพล้ง อีซลาเอง, เมะเว๊ ไคล้ ดี๊ อซื๊งเว๊ บี่อี้ง, พี่ น ซื๊งซีง เฌ๊ ท้อง ที๊งล่างค่างพ้า พี่ จ ม เกม๊า น ลี้ นึฆ้าง นอ

¹⁹ ดี๊ พี่ น อาง ทอาง ลู่ง ที๊งล่างค่างพ้า เว๊ นอ, เกม๊า น เทว๊ ทเทว๊ ลื่งทาง เท่อ เอะ กแช่ยาเว

²⁰ เกม๊า น แม้นี่ ฌื๊งไน้ะ พี่ น ไฌะ บลิ้-อ้ะ อ ซ๊าง นอ, แม้ กู ล ลอง เทว๊-อ้ะ เก ทเทว๊ ลื่งทาง เท่อ, เก ทเทว๊ ลื่งทาง เท่อ พี่ นี่ แบ-อ้ะ ลู่ง ท เพา บืง อ ล่าง พ้า, ม๊า น เทว๊ กู อ อี้ง

²¹ เกม๊า น แม้นี่ ฌื๊งไน้ะ พี่ น ไฌะ บลิ้-อ้ะ อ ซ๊าง นอ, เทว๊-อ้ะ เก ทเทว๊ ลื่งทาง เท่อ เอะ กแช่ยาเว ท้อง น พู ชู้ ลี้ง ชู้

²² แบเด้าะ น ซื๊ง เมะ แม้ ไพ้ะ แบ เท่อ พี่ ล โอทาง ซ้ะ แม้-อ้ะ แบ, ดี๊ ลนี่ แม้โพะ ทอางแม้เลา กุ้ อ ทีง, พี่ กแช่ยาเว ไคล้ เว๊ ดี๊ โมเซ อี้ง อ ไค๊ แบ

²³ เมะเว๊ กุ้ อ เม้ง พี่ กแช่ยาเว อางแบเลา น ซื๊ง, เฌ๊ เว๊ ดี๊ โมเซ ล โค๊ ลู่ง มื่ง ล นี้ง แย๊ พี่ กแช่ยาเว โล้ เว๊, ดี๊ ท้อง ชู่งแย๊ ล ฆ๊างๆ, ท้อง น พู ชู้ ลี้ง ชู้

²⁴ ดี๊ เมะ เก ทแม้ ไพ้ะ แบ เท่อ, พี่ ล โอทาง อ ซ้ะ แม้-อ้ะ แบ, พี่ โพล้ง น๊างมู๊ง ล คลึ้ ซีงแฌ๊ เว๊ แบ นอ, เกม๊า โพล้ง น๊างมู๊ง เลาพะ นอ เทว๊ งู้ แพ๊ พู ล ดื้ง, เก ทลื่งทาง เช้า ทพูแฆ่ น๊างดื้ง, เกม๊า อ เก ท อ กลื่ง น๊าม๊า ลู่ง แบ กแช่ยาเว อ ซ้ะ, ล พ๊า ฆ่าง ดี๊ ทลื่งทาง เทว๊ ทซูงทแซ, ดี๊ ทโอ้ ลื่งทาง เท่อ พี่ อ กู่ง โละ ซ้ะ, บี่ซุ้ดี๊ ทอเค้อะอต้าง นอ, เลา ดี๊ เทว๊ แมะ แพ๊ ล ดี้ง, เก ทลื่งทาง แพล่ไฆวะ ทเด้บ้ะ

²⁵ ดี๊ เกม๊า โพล้งลื่งเท่ออคู แม้ ทไฌ่ เท้าไฆวะ ทแบอ้า เอะ โพล้ง อีซลาเอง น๊างมู๊ง, ฌ้อง อ ซื๊งเว๊ ม พ้องไฆวะ ดี๊ อ ทไพ้ะทแม, พี่ อ แม้ แบ เว๊ ลู่ง ล โอทาง อ ซ้ะ แม้ เว๊ แบ นอ, ดี๊ อ ซื๊งเว๊ นี่ เทว๊ อ ทลื่งทาง เอะ กแช่ยาเว, ดี๊ เทว๊ ทลื่งทาง แพล่ไฆวะ ทเด้บ้ะ ลู่ง กแช่ยาเว อ เมะแซ พ้า, ลู่ง ทไพ้ะทแม, พี่ อ ซื๊ง ล โอทาง อ ซ้ะ แม้ เว๊ แบ อกย้อง นอ ล้อ

²⁶ ดี๊ โพล้ง อีซลาเอง น๊างมู๊ง เลาพะ นอ, ม พ้องไฆวะ ดี๊ อ ทไพ้ะทแม, เลา ดี๊ โพล้ง ล ชื้อ แด, พี่ อ โอชู๊ ลู่ง อ ซื๊งเว๊ อ ซุ้ อ แกล้ นอ, เมะเว๊ โพล้งเฌงพูฆ๊างพู เลาพะ นอ, แม้ แบฆ้ะ ล้าง อ ซ้ะ ดี๊ ทไพ้ะทแม พี่ ล โอทาง ซ้ะ ม แม้ เว๊ นอ แบ

²⁷ โพล้ง พี่ แฌ้ เล้ เมะ แม้ ไพ้ะ แบ เท่อ, พี่ ล โอทาง อ ซ้ะ แม้ เว๊ แบ นอ, เกม๊า โพล้ง ล แฌ้ นอ แม้นี่ แมะ มู่ อ โญะ โอ ล เนง นอ เทว๊-อ้ะ, เก ทลื่งทาง แพล่ไฆวะ ทเด้บ้ะ

²⁸ ดี๊ เกม๊า โพล้งลื่งเท่ออคู แม้ ทไฌ่ เท้าไฆวะ ทแบอ้า เอะ โพล้ง ล แฌ้ นอ ลู่ง กแช่ยาเว อ เมะแซ พ้า, ลู่ง ทเด้บ้ะ อ กย้อง, พี่ อ เว๊ แม้ ไพ้ะ แบ เท่อ ลู่ง ล โอทาง อ ซ้ะ แม้ เว๊ แบ นอ, เกม๊า แม้ ทไฌ่ เท้าไฆวะ ทแบอ้า เอะ-อ้ะ, ฌ้อง อ เว๊ ม พ้องไฆวะ ดี๊ อ ทไพ้ะทแม นอ ล้อ

²⁹ เกม๊า โอ ดี๊ ทอางแม้เลา ล เม้ง ฆ่าง อี้ง, ลู่ง โพล้ง พี่ อ แม้ ไพ้ะ แบ เท่อ ลู่ง ล โอทาง ซ้ะ แม้ เว๊ แบ นอ อ ฌ่าง, เมะเว๊ เลา ดี๊ โพล้ง อีซลาเอง, พี่ เก โพล้ง โอ ลู่ง อ กแช่ อ ค่าง พ้า, โพล้ง ล ชื้อ แด พี่ อ โอชู๊ ลู่ง น ซื๊ง แกล้

³⁰ แบเด้าะ โพล้ง แฌ้ ฌี้ๆ, พี่ อ จะ ม แม้ ไพ้ะ แม้แม เท่อ นอ, อ เว๊ เก โพล้ง ลู่ง อ กแช่ อ ค่าง พ้า ฌี้, โพล้ง ล ชื้อ แด ฌี้, โพล้ง ล แฌ้ นอ ดึ้เดวทื่งแช้ แบ กแช่ยาเว ล้อ, อ เว๊ ม แบ ทแม้ไฆวะ-อ้ะ ลู่ง โพล้ง อีซลาเอง อ ซุ้ อ แกล้

³¹ เป๊งนี่ อ เว๊ ทื่งแช้ กแช่ยาเว อ ทไคล้, ดี๊ ลือค๊างพะ กแช่ยาเว อ ทอางแม้เลา, อ เว๊ ม แบ ทแม้ ไฆวะ-อ้ะ เต้ๆ, อ เว๊ แบ ฮะนี่ อ เตาอแต๊ ล้อ”

โพล้ง พี่ อ ลือค๊างพะ มื่งดืงเท่อ อเตาอแต๊

³² ล ว๊าง แย๊ พี่ โพล้ง อีซลาเอง โอ ลู่ง แพะคูทเคแกล้ นอ, อ ซื๊งเว๊ แด โพล้ง ล แฌ้, ลี้ แม้ เซงมื่ง ลู่ง มื่งดืงเท่อ ล นี้ง นอ

³³ โพล้ง พี่ อ แด โพล้ง แม้ เซงมื่ง ล แฌ้ นอ, เฌ๊ฌ้า เว๊ ลู่ง โมเซ ดี๊ อาโรง, ดี๊ โพล้ง น๊างมู๊ง เลาพะ นอ อ โอ

³⁴ อ ซื๊งเว๊ เด้าทะ โพล้ง ล แฌ้ นอ, เมะเว๊ แบ แม้ เอะ เว๊ บี่จะเล้ นอ, ล ซีงแฌ๊ เว๊ ได้ะ แบ

³⁵ ฌ้อง กแช่ยาเว ไคล้ ดี๊ โมเซ ไจ้ะเว๊, “โพล้ง แคว๊ ล แฌ้ นอ แบ แม้เตาแม้แต๊-อ้ะ ท่อง อ ซี๊ง, โพล้ง น๊างมู๊ง เลาพะ นอ แบ ไควะ ซี๊ง เว๊ ดี๊ โล่ง ลู่ง ทล่างโอซยอง อ ฆ้อง ค๊องโค๊”

³⁶ โพล้ง น๊างมู๊ง เลาพะ นอ เฌ๊ฌ้า เว๊ ลู่ง ทล่างโอซยอง อ ฆ้อง ค๊องโค๊, ดี๊ แม้นี่ โล่ง ไควะ เว๊ ท่อง อ ซี๊ง, แม้ เว๊ บี่ซุ้ดี๊ กแช่ยาเว อางแบเลา โมเซ นอ ล้อ

ช้ะทาง ลูง กพูง ลู่ง ไช๊พ้ะโท๊ แย๊โค๊ ล ท๊า อ คางไท้ะ ล้อง

³⁷ ฌ้อง กแช่ยาเว ไคล้ ดี๊ โมเซ ไจ้ะเว๊

³⁸ “เกม๊า น ไคล้ ดี๊ โพล้ง อีซลาเอง, ดี๊ โล้ เอะ อซื๊งเว๊ เกม๊า อ แม้นี่ ลูง กพูง ล พู๊งๆ, ช้ะทาง-อ้ะ ลู่ง ไช๊ คางไท้ะ, ท้อง อ พู ชู้ ลี้ง ชู้, ดี๊ เกม๊า อ แม้นี่ ลูง เปย้า ช้ะทาง ฆึ-อ้ะ ล พู๊งๆ, ลู่ง อ โนง ล้อง กุ้ อ โนง

³⁹ บี่ซุ้ น ซื๊ง กุ้ แฌ้ ม แคว่ ลูง กพูง ล พู๊งๆ, นอ, ดี๊ นางแบ กแช่ยาเว อ ทอางแม้เลา กุ้ อ ทีง, ฌ้อง แม้โพะ อ ไค๊, บี่ซุ้ น ล แม้ เท่อ ท๊อง ทแบ น กแช่ อ ซ้ะ แด เว๊ แบ, ดี๊ ล แม้ เท่อ ท๊อง พี่ น ซื๊ง เมะ ซู๊ แด ซ้ะ-อ้ะ นอ แบ, อ นอ ลี้ฌ้า น ซื๊ง เกม๊า เอโบ้งเอพะ เท่อ บี่นอ ล้อ

⁴⁰ บี่ซุ้ น ซื๊ง ม นางแบ จ ทอางแม้เลา, ดี๊ แม้โพะ อ ไค๊ กุ้ อ ทีง, ดี๊ เก โพล้ง ลู่ง อฌี้อแอว้, ลู่ง น ซื๊ง กแช่แยว้ อ ฌ่าง

⁴¹ แย้, กแช่ยาเว น กแช่แยว้, พี่ อ ไจทางฌ้าไฆวะ น ซื๊ง ลู่ง ค่าง อีไย้ะ พ้า, บี่ซุ้ เก น ซื๊ง อ กแช่แยว้, แย้, เมะเว๊ กแช่ยาเว น กแช่แยว้ นอ ล้อ”