เนฮะมี 5 - Northern Pwo Karen Thai Bible

เนฮะมี แม้ไฆวะ ทแม้น้ะแม้โน๊ง

¹ โพล้งเฌงพูฆ๊างพู ดี๊ อ แม๊ กุ้ซย้ะ เท่อ อ ลู่ง เซ๊ ตทูง, ไคล้ล้าง น๊างพื่งวี่ โพล้ง ยู ลแพ นอ อเตาอแต๊

² เมะเว๊ โพล้ง โอ พี่ อ ไจ้ะเว๊, “เฆ้อ ก โอ แอดี้งแอแฌ้, เลา ดี๊ ก พูมืง พูแคว๊, เกม๊า ก นี่ แบ บืง บี่ซุ้ ก ม อาง-อ้ะ, ดี๊ โอม๊า ซี”

³ ดี๊ โพล้ง โอ ไจ้ะเว๊, “ก แบ เป้าะล้าง ก ไชะ ก ฆึ้, ก โซ๊ง ซไบ้ะ แซ, ดี๊ กเด้ากล่าง, บี่ซุ้ ม นี่ แบ บืง, เป๊งนี่ ทซ้ะวี่งล้างดุ้ ทอาง”

⁴ ดี๊ โพล้ง อ แฌ้แพ ไจ้ะเว๊, “ก นี่ อางล่อง จี้ เก ทค๊อง อ ฆวี้ เทว๊ เอะ กจุ้แฆว้, ลู่ง ก เป้าะล้าง ก ไชะ ดี๊ ก โซ๊ง ซไบ้ะ แซ

⁵ กชื้อกชะ เก บี่ซุ้ดี๊ ก น๊างพื่งวี่ อชื้ออชะ, ก พู บี่ซุ้ดี๊ อ พู, แบเด้าะ ก เกม๊า ก พูมืง พูแคว๊ เก ทอฆ่อง ได้ะ, ก พูมืง แบ ล แฌ้ๆ, เก ทอฆ่อง เย้า ดี๊ ก แม้ช้า-อ้ะ ลซีแบ, เมะเว๊ โพล้ง อ แฌ้แพ แม้นี่ก้ะ ก ไชะ ดี๊ ก โซ๊ง ซไบ้ะ แซ”

⁶ ท่อง จ แน่ฌ๊า อ ลู่ง กุ้ซย้ะ เท่อ ดี๊ อ ทไคล้ นอ, จ ซ้ะทาง น้ะ มะ

⁷ จ ช๊องมอง ที๊ง เท่อ ฌ้อง นอ, จ แม้นี่ ทโล้ทไคล้ อี้ง, ลี้ ไจ้ะ แบ เพล่ดูแม้เท่อบลางพ้า ดี๊ โพล้งแคว่ทะเท่อ ลแพ นอ, จ ไคล้ ดี๊ อ ซื๊งเว๊ บี่อี้ง, “น ซื๊ง ล แฌ้ๆ, เกม๊า โพล้ง อางล่องนี่ จี้, ฌ้อง น กุ้ นี่ ทอางกีล้างทะ ดี๊ น น๊างพื่งวี่” ดี๊ แย้ จ กุ้ซยอง โพล้ง น๊างมู๊ง พ้ะดู, เฌ๊ ดึ้ โละซ้ะ ดี๊-อ้ะ

⁸ ดี๊ จ โล้ เอะ-อ้ะ บี่อี้ง, “จ เทะนี่ไท้ จ น๊างพื่งวี่ โพล้ง ยู ซีงลแพ, พี่ อ แบ ทอางแช๊-อ้ะ ลี้ ลู่ง ค่าง อ แฌ้แพ เฌ๊ไท้, ท๊อง เว๊ จ แม้ ซี นอ, แบเด้าะ น ซื๊งเว๊ อางแช๊ กแด้ ไท้ ลู่ง น น๊างพื่งวี่, บี่ซุ้ เกม๊า ก แบ ฆวี้นี่ไท้ อ ซื๊งเว๊” กเย่ โพล้ง ลแพ นอ โอ กโช้ ไก้ไม่, ไคล้ ล ทาง แบ

⁹ แย้ จ ไจ้ะ บี่อี้ง, “เท่อ พี่ น ซื๊ง แม้-อ้ะ นอ ล ฌี้ แบ, เกิ้ง น ม โอม๊า ลู่ง ทดู้งแบยางแบ ก กแช่แยว้, บี่ซุ้ ปด้างทะ โพล้ง กุ้ที๊งกุ้ค่าง พี่ เก กดีงกแด้ นอ อ ทไคล้ ไฌ๊ซ้ะ เท่อ ล เมะแบ-อ้า?

¹⁰ แอเละ อ นอ ได้ะ, แย้ ดี๊ จ น๊างพื่งวี่ ดี๊ จ เพล่, ก เกม๊า อ เว๊ อางล่องนี่ ก จี้ ดี๊ บืง ปะ, พี่ ก เกม๊า โพล้ง อางล่อง เท่อ ลู่ง ทกุ้ นี่ ทอางกีล้างทะ เท่อ นอ, เกม๊า ก แม้ ล้า ล ฌี้ เฆาะ

¹¹ ล นี้ง แย๊ อี้ง ม๊า ลู่ง ก เกม๊า ไท้-อ้ะ อ ไชะ, โซ๊ง ซไบ้ะ แซ, โซ๊ง ไพ แซ, ดี๊ อ เด้า, ดี๊ จี้ อ โพ๊, อ บืง, อ ไซ้ะ ซไบ้ะแซ ดี๊ ทซู พี่ น แม้นี่ อ ซื๊งเว๊ อ เท่อ นอ”

¹² ฌ้อง อ ซื๊งเว๊ ไคล้ บี่อี้ง, “ก ม เกม๊า ไท้ ทลแพ อี้ง, ดี๊ ก ล กุ้นี่ เท่อ ดี๊ อ ซื๊งเว๊ น่าง เม้ง แบ, ก ม แม้โพะ น ท ไคล้ อ ไค๊”, ดี๊ แย้ จ กุ้นี่ กเย่ โพล้งลื่งเท่ออคู เฌ๊, ดี๊ เกม๊า โพล้งลื่งเท่ออคู แม้นี่ ทชูล้าง ซ้ะ ดี๊ อ ซื๊งเว๊ นอ, ไจ้ะเว๊, อ ซื๊ง ม แม้โพะ เท่อ, พี่ อ เอิ้งล้าง เว๊ เย้า นอ อ ไค๊

¹³ ฌ้อง แย้ จ ไพละพลู๊ไฆวะ จ ไช๊ คางไท้ะ, พี่ โชะ ทะ เท่อ นอ ปะ, ดี๊ จ ไคล้ บี่อี้ง, “บี่นอ ล้อ, โพล้ง พี่ แฌ้ เล้ เมะ ล นี่ แม้โพะ ทเอิ้งล้าง อี้ง อ ไค๊ แบ นอ, เกม๊า กแช่แยว้ ไพละพลู๊ไฆวะ-อ้ะ ดี๊ อ เด้า อ ล่าง, ดี๊ อคองอแซย้, เกม๊า อ เว๊ แบ ทแม้ พลุ้ทางไฆวะ ฌ้อง ลี้ ก้ะ โปล้ปลิ้”, ฌ้อง โพล้ง น๊างมู๊ง ไจ้ะเว๊, “อาเมง”, ดี๊ อางปฆ้า ทาง กแช่ยาเว, ฌ้อง โพล้งเฌงพูฆ๊างพู แม้โพะ เท่อ, พี่ อ เอิ้งล้าง เว๊ นอ อ ไค๊

เนฮะมี อ ท ซ้ะโพล๊

¹⁴ แอเละ อ นอ ได้ะ, ล โค๊ ลู่ง อช๊าอโท่ พี่ จ นี่ แบ ท ต๊างทาง, เก ทอดูยู่แคว่เท่อ ลู่ง ค่าง ยูดา พ้า, ล โค๊ ลู่ง อ เนง คี๊งชี๊ง ท้อง อ เนง ซ๊าชี๊ง คี๊ง เนง, ลู่ง กจุ้แฆว้ อาทาเซอซี อ ชู้ แค๊ นอ, เลา พะ นอ เก ล ชี๊งคี๊ง เนง, แย้ ฌี้ จ น๊างพื่งวี่ ฌี้, (ล ญ่อง อาง ทอดูยู่แคว่เท่อ อ ทอาง นอ แบ), ล นี่ อาง แบ ทอาง ลู่ง ท เก ทอดูยู่แคว่เท่อ อ ทอาง นอ แบ

¹⁵ ทอดู ยู่แคว่ เท่อ ลู่ง จ เมะแย๊, นี่ เอน้าชางบ้า โพล้งเฌงพูฆ๊างพู, จี้ พี่ เก อ ทอางทโอ้ อ ฆวี้, ดี๊ ไซ้ะซไบ้ะ แซ ที๊ง นอ, แม้ นี่ เว๊ อ เท่อ ล นี้งๆ, ลี่งชี๊ง เชเค่ง, ทึเมะ อ กดูกแซย่ ฌี้ นอ, เจ่ อดู้งอยาง ดู นี่ โพล้งเฌงพูฆ๊างพู, แบเด้าะ ลู่ง ท ดู้งแบยางแบ กแช่แยว้ อกย้อง นอ, ยี๊ แด จ ล นี่ แม้ เท่อ บี่นอ แบ

¹⁶ จ โอ ดี๊ ทแม้ ไต้ทาง กางแป อี้ง ได้ะ, ดี๊ ล นี่ อางฆื๊ง ฌางคู ล่าง เก จ เท่อ แบ, ดี๊ จ เพล่ เลาพะ นอ โอซยอง โละซ้ะ, แม้ เท่อ พี่ นอ

¹⁷ แอเละ อ นอ ได้ะ, จ โพล้ง โอ อ แฌ้ ล แย้ เย่ชี๊ง, อาง ซกุ้ เท่อ ดี๊ แย้, เมะเว๊ โพล้ง ยู ซีงลแพ ดี๊ โพล้งแคว่ทะเท่อ, กเย่ โพล้ง ลู่ง อ เฌ๊ โอ ดี๊ เฆ้อ, พี่ อ เฌ๊นี่ ลู่ง โพล้ง กุ้ที๊งกุ้ค่าง, พี่ โอ วะ กฆูกฆ้อง นอ โอเจ ได้ะ

¹⁸ เท่อ พี่ แด้เว้-อ้ะ ล นี้งๆ, นอ, โอ เว๊ งู้ ล ดื้ง, ดี๊ แกะ พี่ ลึ นี่-อ้ะ เย้า นอ ฆู๊ง ดื้ง, ทูแท้, ช๊าง, โพล้ง แด้เว้ เอะ แย้ ปะ กุ้ อ พ๊า, พี่ ชิ้ทาง อ นี้ง ล ชี๊ง นอ, ไซ้ะ ซไบ้ะ แซ ที๊ง แอฌ้อง ฆวี้ โทง ทไพ้ะ ตบลึ้ โพลง, ทึเมะ แอ บี่อี้ง ฌี้ นอ, จ ล อางท่าง นี่ ท เก ทอดู ยู่แคว่ เท่อ อ ทอางทโอ้ น่าง เม้ง แบ, เมะเว๊ ทไพ้ะทแม้ นอ, อฆ๊าอไชะ ลู่ง โพล้ง ล ชื้อ อี้ง อ ฌ่าง เย้า

¹⁹ จ กแช่แยว้-เอ้อ, เกม๊าเต้ นางแบทางไท้ ทกุ้เม้ง, พี่ จ นี่ แม้-อ้ะ, ลู่ง โพล้ง ล ชื้อ อี้ง อ ฌ่าง, เกม๊า อ กึทาง อซูงอแซ ลู่ง อ ฌี้ ไช้ะ