มีคา 3 - Northern Pwo Karen Thai Bible

โพล้ง โพะคอง เท่อ, ดี๊ โมไคล้คิ้เท่อ ลู่ง ออ้าอซ๊าง

¹ ดี๊ จ ไจ้ะ บี่อี้ง น ซื๊ง ซีง ลแพ, พี่ เก ยาคุ้ อคูอแน่ เมะเว๊ กเย่ โพล้ง โพะคอง อีซลาเอง อชื้ออชะ, เกม๊า คุ้ช๊องแน น ซื๊ง ซีง ลแพ, เกิ้ง ม ซีงแฌ๊ ท อเกิ้งอแบ อไฌ่อกย้อง ล เมะ แบ-อ้า?

² น ซื๊ง ซีง ลแพ, พี่ แช๊เมะไฌ๊ซ้ะ ทฌี้ทแอว้, ดี๊ เอ ทอ้าทซ๊าง โพล้ง พี่ ซย๊างไฆวะ กพูกลี้ง อ ไพ้ะ ดี๊ ซย๊างไฆวะ แย, โอเจไฆวะ ดี๊ อ ซื๊งเว๊ ซีง ลแพ อฆีงอเกว้

³ โพล้ง พี่ อาง กพูกลี้ง อ แย ดี๊ กูงลิ้ไฆวะ อ ซื๊งเว๊ อไพ้ะอโค๊ ดี๊ บุ้แค่ อ ซื๊งเว๊ อฆีงอเกว้ เก ล กึ้ๆ ดี๊ ดาง เว๊ เก ล ไก้ๆ, บี่ซุ้ดี๊ ทแย ลู่ง พ้า พ้า บี่ซุ้ดี๊ ทแย พี่ โอ พ้าเบ้า พ้า

⁴ ฌ้อง อ ซื๊งเว๊ ม กุ้ซย้ะ อางท่าง ทแม้ช้า ดี๊ กแช่ยาเว แบเด้าะ กแช่แยว้ ล ไคล้ช๊า อ ซื๊งเว๊ แบ ล พ๊า แย๊ นอ, กแช่แยว้ ม อางกีซูงไฆวะ อ เมะ ดี๊ อ ซื๊งเว๊ ซีง ลแพ นอ เป๊งนี่ อ ซื๊งเว๊ นี่ แม้ ทอ้าทซ๊าง ตบลึ้ เม้ง

⁵ กแช่ยาเว ไคล้ บี่อี้ง, แบฆ้ะ ดี๊ โมไคล้คิ้กแช่แยว้ ลแพ นอ อ ไฌ่ โพล้ง พี่ ลี้ฌ้า กพูกลี้ง เกม๊า เว๊ อ เฌ๊พลุ้ไฆวะ โพล้ง พี่ กุ้ซย้ะ เท่อ ไจ้ะเว๊, “ทฆู๊งทพุ้” ลู่ง อช๊าอโท่ พี่ โอ ดี๊ ทอางทโอ้ อ แค๊ นอ แบเด้าะ โล้ล้าง ทดึ้ทชาง เอะ โพล้ง พี่ ล เนฆ้าง ดึ้อาง เท่อ อ นุ้ พ้า น่างเม้ง แบ

⁶ อกย้องบี่นอ, มแน้แค๊ ล โอ ดี๊ ทแดเว้ เอะ อ ซื๊งเว๊ แบ ดี๊ ทไค้ะ ซ๊าโญ๊ง, ม กึทาง เอะ อ ซื๊งเว๊, ดี๊ น ซื๊ง ม พ้ะเว้ เท่อ ล ซี น่างแฌ้ แบ ลู่ง โมไคล้คิ้กแช่แยว้ ซีง ลแพ อ ฌ่าง นอ, มื่ง ม ล้างนึไฆวะ ดี๊ ลู่ง อ ซื๊งเว๊ อ ฌ่าง, มแช๊แค๊ นอ, ม ไค้ะซ๊า

⁷ โพล้ง แด ทแดเว้ ม ฌางแช้เมะฌางแช้แน๊ โพล้งพ้ะเว้เท่อ ม ฌางแช้ อ ซื๊งเว๊ กุ้แฌ้ ม กาไบ้ะ อ เมะ เมะเว๊ ทไคล้ช๊า ล โอ เฌ๊นี่ ดี๊ กแช่แยว้ แบ

⁸ แบเด้าะ ลู่ง จ ฌ่าง นอ, จ โอ ฆวี้ ดี๊ ทซยื๊งทซย้อง เมะเว๊ ดี๊ กแช่ยาเว อ วีงฌี้แล้แอว้ ดี๊ ท อเกิ้งอแบ, ดี๊ ไฌ่แบ้ พี่ ม โล้ล้าง ยาคุ้ อ ท ลือค๊างพะ เอะ อ กแช่ แด เว๊ ดี๊ โล้ล้าง อีซลาเอง อ ทเด้บ้ะ เอะ อ กแช่ แด เว๊

⁹ เกม๊า คุ้ช๊องแน ทไคล้ อี้ง แดเทา, น ซื๊ง ซีง ลแพ, พี่ เก ยาคุ้ อชื้ออชะ อคูอแน่ ดี๊ โพล้ง โพะคอง อีซลาเอง อชื้ออชะ เมะเว๊ กเย่ โพล้ง พี่ แช๊เมะ ดี๊ ท อเกิ้งอแบ ดี๊ โพล้ง พี่ เปลงไฆวะ ท แบเมาะแบเค้อะ กุ้เม้ง

¹⁰ โพล้ง พี่ ไต้ทาง ซีโยง ดี๊ ทซวีง ดี๊ ไต้ทาง เยรูซเลง ดี๊ ท ลเกิ้งลแบ แบ

¹¹ กเย่ เว่ง อี้ง อคูอแน่ นอ, ต้ะเซ๊ง บ้าคว่าง ดี๊ ท แด ที่ จี้ทไซ้ะไบ้ะนุ้ ดี๊ กเย่ โพล้งลื่งเท่ออคู นอ, ซองเท่อซ๊างเท่อ ดี๊ ท แด ที่ จูงเล้งคางเล๊ เลา ดี๊ กเย่ โมไคล้คิ้กแช่แยว้ นอ, พ้ะเว้ เท่อ ดี๊ ท แด ที่ จี้ ทึเมะ บี่นอ ฌี้ นอ, อ ซื๊งเว๊ เฆว้ง แบ กแช่ยาเว, ดี๊ ไจ้ะเว๊ บี่อี้ง “กแช่ยาเว โอ ลู่ง กซุ้กแกล้ ล เมะ แบ โบ่? ทเซงทื่งเฌ๊ฌ้อง ล โอ กึทาง ดี๊ เฆ้อ ซี น่างเม้ง แบ”

¹² ทบี่นอ, ลู่ง น ซื๊ง อไฌ่อกย้อง อี้ง ล้อ ซีโยง ม แบ ท เท๊ไฆวะ บี่ซุ้ดี๊ เท๊ไชะ ดี๊ เยรูซเลง ม เกทางก้ะ ท แค่เทาแค่ไช้ะ อ โป้ง ดี๊ ทลู่ง ลู่ง เด้กแช่แยว้อล่างโอ, ม เก ทล่าง พ้ะโท๊, โอ ดี๊ เซง มื่งเทิง คลึไบ้ะ เว๊