เยเรมี 8 - Northern Pwo Karen Thai Bible

¹ กแช่ยาเว ไจ้ะเว๊ บี่อี้ง, “ล พ๊า แย๊ นอ, กเย่ ยูดา อ กจุ้แฆว้ อ ฆีง, โพล้ง ยูดา อ กดูกแซย่ อ ฆีง, โพล้งลื่งเท่ออคู อ ฆีง, โมไคล้คิ้กแช่แยว้ อ ฆีง, ดี๊ โพล้ง เว่ง เยรูซเลง อ ฆีง, โพล้ง ม โอ แม้นี่ โชะทางไฆวะ เว๊ ลู่ง อ ซื๊งเว๊ อ แซวคู ไล๊ พ้า

² ดี๊ อ เว๊ ม ลีงแล่ ทาง ทฆีง ลแพ นอ, ลู่ง มื่ง ดี๊ แล้ อ เมะแซ พ้า, ดี๊ กเย่ ท พี่ อ โอ ลู่ง มุ้คู ลแพ นอ เลาพะ, พี่ อ ซื๊งเว๊ เอ ดี๊ โบงทางแบ้ทาง เว๊, พี่ อ นี่ โพะตไล่ เว๊ อ ไค๊, พี่ อ เว๊ นี่ อางฆื๊ง เว๊ ดี๊ โบงทางแบ้ทาง เว๊, โพล้ง ม ล โอ อางกีซยอง ทฆีง-อ้า, เคิงล้างบ้า ทฆีง ลแพ อี้ง-อ้า น่างแฌ้ แบ, แบเด้าะ ม เก บี่ซุ้ดี๊ ทพูแฆ่ อ อี ลู่ง ฌางคู คู ล้อ

³ กเย่ โพล้ง พี่ อ โอ ล้างลื๊อ ก้ะ ลู่ง เด้าคูล่างพ้า พี่ ออ้าอซ๊าง อี้ง, พี่ อ โอท๊าง ก้ะ ลู่ง ทล่าง ล จอง ดี๊ ล จอง, พี่ ก นี่ โฌ๊ไจไฆวะ-อ้ะ นอ, ม ลึ นี่ ทซี๊ง ฌี้เละ โอม๊า ได้ะ”, กแช่ยาเว ซึ้คู ดูทึชองทึ ไจ้ะเว๊ บี่อี้ง ล้อ

โพล้ง น๊างชื้อ อเซิงอซ้ะ ล บี่ล่างบี่เกล้ แบ น้ะ มะ

⁴ “เกม๊า น ไคล้ ดี๊ อ ซื๊งเว๊ ซีง ลแพ บี่อี้ง กแช่ยาเว ไจ้ะเว๊ บี่อี้ง พี่ กโพล้ง ล้างเทะเค้า นอ, อ เว๊ ม ล เฌ้เทิงทาง ล้า แบ โบ่? โพล้ง แฌ้ฌี้ๆ, เมะ แกยไฆวะ อ ซ้ะ นอ, อ เว๊ ม ล แกยไท้ อ ซ้ะ แบ โบ่?

⁵ แบทเล้ โพล้ง ล ชื้อ อี้ง, เมะเว๊ เยรูซเลง นอ, แกยไฆวะ อ ซ้ะ ไบล้ะกแด้ ทไคล้ ครึๆ? อ เว๊ พองทะ ทอางโล๊ไละ เฌิ่งเพิ่ง อ ซื๊งเว๊ ซม๊า เท่อ, ล ญ่อง แกยไท้ อ ซ้ะ แบ

⁶ ก ดุ้ ก แน่, ดี๊ คุ้ช๊องแน-อ้ะ แบเด้าะ อ ซื๊งเว๊ นอ, ล นี่ ไคล้ ท พี่ อ แบเมาะ แบ อ เว๊ ล แกยไฆวะ อ ซ้ะ ดี๊ อ ทอ้าทซ๊าง น่างแฌ้ แบ อ ไจ้ะเว๊ บี่อี้ง, ‘จ นี่ แม้ แบ ทเม้งเล้ โบ่?’ กุ้แฌ้ แกยฆ้าง อ ซ้ะ ลู่ง อ กแช่ อ เกล้ แด เว๊ ล้อ บี่ซุ้ดี๊ กซี ซยู๊ อ คู ชิ้นอง ฆ้าง ลู่ง ทดึ้ทชาง พ้า

⁷ ทึเมะ ทูแล้ซ๊า ลู่ง มุ้คู ซีงแฌ๊ อ ทช๊าทโท่ แด เว๊ ได้ะ ดี๊ ทูลี่ง, ทูเบลงบลาง, ดี๊ ทูเกราะ นี่ แฌแซกต้าง อ ทช๊าทโท่ แด เว๊ แบเด้าะ กพูกลี้ง ล ซีงแฌ๊ กแช่ยาเว อ ทอางกีล้าง แบ

⁸ “น ม ไคล้ บี่อี้ง ซี บี่จะเล้, ‘ก โอ ดี๊ ท โกงซีมองแบ ดี๊ กแช่ยาเว อ ทอางแม้เลา นอ, โอ ดี๊ เฆ้อ?’ แบเด้าะ แคว่เซ้อ, โพล้งกวิ้ไนไละ ซีง ลแพ นอ, อ ลิ้จ๊าง อางโล๊ไละ เท่อ นี่ ดึ้ เกม๊า เกทางก้ะ ทไคล้ อางโล๊ไละ เท่อ ล้อ

⁹ โพล้ง โอ ดี๊ ทโกงซีมองแบ ซีง ลแพ, ม แบ ฌางแช้ฌางเด อ ซื๊งเว๊ ม ซ้ะเมซ้ะไพล้ เท่อ, ดี๊ แบ ท พองนี่-อ้ะ อี้งเซ้อ, อ ซื๊งเว๊ นี่ ซม๊า กแช่ยาเว อลู่งอแท๊ ดี๊ อ เว๊ โอ ดี๊ ทโกงซีมองแบ บี่จะเล้?

¹⁰ อกย้องบี่นอ, ก ม เกม๊า อ ซื๊งเว๊ อ แม๊, ลี้ เกก้ะ โพล้ง แฌ้แพ อ เท่อ เกม๊า อ เว๊ อ ฆึ้ อ ไชะ นอ, เกก้ะ โพล้ง พี่ ม ลู่ นี่ ก้ะ อ เท่อ นอ อ เท่อ เป๊งนี่ ล โค๊ ลู่ง โพล้ง พือทึปี๊ทึ ท้อง ลู่ง โพล้งดูทึโท๊ทึ นอ กุ้แฌ้ นอ, แน่แฌ่ แบซ้ะ นี่แบอางแบ เท่อ ลู่ง ลเกิ้งลแบ แบ ล โค๊ ลู่ง โมไคล้คิ้กแช่แยว้, ท้อง ลู่ง โพล้งลื่งเท่ออคู กุ้แฌ้ นอ, ล แฌ้ๆ, แม้ กไบล้ะกแบล เท่อ ล้อ

¹¹ อ เว๊ นี่ แม้ก้องแย่ ดุ้ไท้ กพูกลี้ง อ พ้าล่าง เฆาะ ไจ้ะเว๊ บี่อี้ง, ‘ทมึทพ้า, ทมึทพ้า’ พี่ ทมึทพ้า ล โอ แบ เฆาะ นอ

¹² พี่ อ เว๊ แม้ ท ล้าง แช๊เมะไฌ๊ซ้ะ นอ, อ เว๊ ฌางแช้ ชี่-อ้า? ล เมะ แบ, อ เว๊ ล ฌางแช้ แบ เฆาะ ล้อ อ เว๊ ล ซีงแฌ๊ ฌางแช้ แบ อกย้องบี่นอ, อ เว๊ ม ล้างเทะเค้า, ลู่ง โพล้ง พี่ อ ล้างเทะเค้า เย้า ลแพ นอ, อ โป้ง พ้า ท่อง ก แม้เตาแม้แต๊-อ้ะ นอ, อ เว๊ ม ล้างอางซย่าง ล้อ” กแช่ยาเว โล้ เว๊ บี่อี้ง ล้อ

¹³ กแช่ยาเว ไจ้ะเว๊ บี่อี้ง, “พี่ ก ม อางกีซยอง-อ้ะ นอ ก แด เว๊, ซไบ้ะ มื่ง-อ้า กูงเย้ มื่งเทิง-อ้า นอ, อ แซ ล โอ แบ ทึเมะ อ แล นอ, ล้างไย้ะล้างไฆ๊ไฆวะ เว๊ ดี๊ ท เม้งฌี้ๆ, พี่ ก เกล๊าง-อ้ะ นอ, ล้างแม่แดไฆวะ-อ้ะ ล้อ”

¹⁴ ‘แบทเล้ ก ซื๊งเว๊ ซีง ลแพ, ก ชี๊น้าง เฌิ่งเพิ่ง เกม๊า เฌ๊ฌ้า โละซ้ะ เซ้อ, เกม๊า ก ซื๊งเว๊, ลี้ นึฆ้าง ลู่ง เว่ง พี่ โอ ดี๊ ทล่างแคว่จู้เท่อ ลแพ นอ อ พ้า ดี๊ เซงทื่งเฌ๊ฌ้องไฆวะ พี่ นอ แดเทา เมะเว๊ กแช่ยาเว, ก กแช่แยว้ ม เกม๊า เฆ้อ ก เซงทื่งเฌ๊ฌ้อง ดี๊ เกล๊าง ก โอ้ ที๊ง, โอ ดี๊ อ จืง เป๊งนี่ ก แม้ ทเด้บ้ะ แบ กแช่ยาเว

¹⁵ ก ซื๊งเว๊ ก อางฆื๊งแคว่ ทมึทพ้า, แบเด้าะ ท อ ฌี้ ล โอ เฌ๊ น่าง เม้ง แบ เฆาะ ก อางฆื๊งแคว่ อช๊าอโท่ ลู่ง ทแม้ ก้องแย่ไท้, แบเด้าะ แคว่เซ้อ ทไพ้ะฆิ้โค๊ฆิ้

¹⁶ “อ กซี อ ลู่ง กุ้ซย้ะ อ โคะ นอ, แน่ฌ๊า-อ้ะ เฌ๊นี่ ลู่ง เว่ง ดาง กเย่ ค่าง เลาพะ นอ, ว้ะ เทาทื้ง ดี๊ อ กซี ลแพ นอ, อ ลู่ง กุ้ซย้ะ โคะ อ ซื๊งเว๊ เฌ๊ อาง ค่าง, ดี๊ ท กุ้เม้ง พี่ โอ ค่าง คู นอ, ท้อง อ เลา ล้อ เลา ดี๊ เว่ง, ดี๊ โพล้ง พี่ เปิ่งโอเปิ่งช๊อง เว่ง พ้า นอ

¹⁷ เมะเว๊ อี้งเซ้อ, ก โซ๊งทาง ฌู่ง เฌ๊ ลู่ง น ซื๊ง อซุ้อแกล้ เมะเว๊ ฌู่ง พ้ะโท๊ท่อง, พี่ ม จ้าทะ-อ้ะ ดี๊ ทอูงทโป้ ล ซี แบ ดี๊ อ ม ไอ น ซื๊งเว๊ ซีง ลแพ ล้อ” กแช่ยาเว โล้ เว๊ บี่อี้ง ล้อ

โมไคล้คิ้กแช่แยว้ ฌางล้างย้าล้าง ลู่ง โพล้งเฌงพูฆ๊างพู อ ฌ่าง

¹⁸ จ ทน้ะทโน๊ง อี้ง น้ะกชุ้, แม้ก้องแย่ไท้ ล ซี ล้า แบ จเซิงจซ้ะ นอ, ช๊องไก้ ได้ะ ล้อ

¹⁹ คุ้ช๊องแน เซ้อ, จพูจลี้ง อ ลู่ง กุ้ซย้ะ เท่อ เฌ๊นี่ เฆ้งที๊งเฆ้งค่าง ล้อ “กแช่ยาเว ล นี่ โอ ซีโยง พ้า แบ โบ่? เว่ง อ กจุ้แฆว้ นอ, ล โอ เว่ง พ้า แบ-อ้า? แบทเล้, อ ซื๊งเว๊ ไล๊ดุ้ เฆ้อ, เกม๊า ก ซ้ะ ทาง ดี๊ อ ซื๊งเว๊ อ ทเค่งทฌ้าง อกย้อง ดี๊ อ ทเค่งทฌ้าง ล ค่าง แด อกย้อง?”

²⁰ “ท เก้านี่ อว๊างอแค๊ พ้องไฆวะ, ทคู่ แค๊ นอ, ทึไฆวะ เย้า ดี๊ ก ซื๊งเว๊ ซีง ลแพ นอ, ลพ้องลพลิ้ แบ”

²¹ ลู่ง จพูจลี้ง อ ทแช๊ทคลี อกย้องนอ, จแช๊จคลี เว๊ ล้อ จ เมะมองแน๊อึ้, ดี๊ ท เซิงพ่องซ้ะว้ะ นอ, พองทะ แย้ ไชะไนะ

²² ทซีง แม้ก้องแย่ไท้ เท่อ, ลู่ง กีเลอา พ้า, ล โอ แบ โบ่? พี่ พ นอ โม๊ พ้ะดู ล โอ แบ-อ้า? แบทเล้ จพูจลี้ง มืง อไพ้ะอแย ล โอไท้ บี่ อ ล่าง ล้า แบ?