เยเรมี 52 - Northern Pwo Karen Thai Bible

ช๊องมองที๊งไท้ ทแม้ เฌ๊ฌ้อง เยรูซเลง

¹ พี่ เซเดคียา ทาง เก กจุ้แฆว้ นอ, อ โญะ โอ คี๊ง ชี๊ง ล เนง, อ เว๊ โพะคอง เท่อ เว่ง เยรูซเลง พ้า ชี๊ง ล เนง, อ มู่ อ เม้ง ฮามูทาง, เก เยเรมี โพล้ง ลิ้นา อ พูมืง

² อ เว๊ แม้ ทอ้าทซ๊าง ลู่ง กแช่ยาเว อ เมะแซ พ้า, บี่ซุ้ดี๊ พี่ เยโฮยาคีง แม้ เว๊ กุ้เม้ง นอ ล้อ

³ ดี๊ เป๊งนี่ ลู่ง กแช่ยาเว อ ท ซ้ะทาง พ้ะดู ดี๊ เยรูซเลง ดี๊ ยูดา อกย้อง นอ, กแช่แยว้ เว่งว๊าง อ ซื๊งเว๊ ไจพ้องไฆวะ อเมะอแน๊, ดี๊ เซเดคียา นี่ กไบล้ะกแบล ดี๊ กจุ้แฆว้ ลู่ง บาบีโลง

⁴ ดี๊ ควี๊ง เนง ล เนง พ้า, ลู่ง อ เว๊ อ ชู้ แค๊, มื่ง อ นี้ง ล ชี๊ง ลู่ง แล้ อ เบง ล ชี๊ง พ้า นอ, เนบูคาเนซา ลู่ง เว่ง บาบีโลง, ล พ๊าฆ่าง ดี๊ อ ซึ้พู มู๊ง เลาพะ, นี่ ดึ้ซึ้ โละซ้ะ ดี๊ เว่ง เยรูซเลง, ดี๊ พ้องวะ ทะ เว่ง ดี๊ ไต้ทาง ทร้อง พ้องวะ เว๊ วะชวะ

⁵ เว่ง นอ, แบ ท พ้องวะ โอ ท้อง เนง ชี๊ง ล เนง, ลู่ง กจุ้แฆว้ เซเดคียา อ ชู้ แค๊

⁶ ท่อง ท้อง มื่ง ควี๊ง นี้ง ล นี้ง, ลู่ง แล้ ลี่ง เบง ล เบง พ้า นอ, ท ซ้ะวี่งล้างดุ้ ทอาง น้ะมะ ลู่ง เว่ง พ้า นอ, ทอาง พี่ เกม๊า เอะ ค่าง อ โพล้ง เฌงพูฆ๊างพู นอ ล โอ แบ

⁷ ฌ้อง เว่ง นอ ที่มื่งที่พ้ะ เว๊ ดี๊ ซึ้พู เลาพะ นอ, ไจทาง ลู่ง มแน้แค๊, โพะ เกล้ ลู่ง เว่ง อ ป้ะตู๊ง, กางแป คี๊ง แพ้ อ เบ้าช้า, พี่ โอ กจุ้แฆว้ อ โซ๊ง เซง พ้าไท้ะ นอ, เมะ โพล้ง เคลเดีย นอ, พ้องวะ เท่อ วะ เว่ง, ดี๊ อ ซื๊งเว๊ ลแพ นอ ลี้ ลู่ง ทพุ้ทแด้ ล โค๊ นอ ล้อ

⁸ แบเด้าะ โพล้ง เคลเดีย อ ซึ้พูมู๊ง นอ, ลี้ ล้องช่อง กจุ้แฆว้, ดี๊ ลี้ คลึ้ เซเดคียา ลู่ง ทแด้ พ้า เว่ง เยรีโค, ดี๊ อ เว๊ อ ซึ้พูมู๊ง นอ, ที่มื่งที่พ้ะ ไจแดไฆวะ-อ้ะ ล้อ

⁹ ดี๊ อ เว๊ พองนี่ กจุ้แฆว้, เฌ๊ทาง ฌ้า เว๊ เทว๊ เอะ กจุ้แฆว้ ลู่ง บาบีโลง, ลู่ง เว่ง รีลา ค่าง ฮามา พ้า, ดี๊ กจุ้แฆว้ นอ ต้ะเซ๊ง เว๊ อ เตา ล้อ

¹⁰ กจุ้แฆว้ ลู่ง บาบีโลง แม้ซี๊ง เซเดคียา อ พูแคว๊ ลแพ นอ, ลู่ง อ เว๊ อ เมะแซ พ้า, ดี๊ แม้ซี๊งไฆวะ ยูดา อคูอแน่ เลาพะ ลู่ง เว่ง รีลา พ้า

¹¹ อ เว๊ แม้โบล เซเดคียา อ เมะคลี๊ง, ดี๊ จ้าทะ เว๊, ฌ้อง กจุ้แฆว้ ลู่ง บาบีโลง ลี้ฌ้า-อ้ะ ลู่ง บาบีโลง พ้า ดี๊ เด้าทะ เว๊ พ้อง พ้า, ท้อง มื่งนี้ง พี่ อ เว๊ ซี๊ง นอ ล้อ

¹² พี่ มื่ง ล ชี๊ง นี้ง ลู่ง แล้ เย่ เบง ล เบง พ้า, พี่ เก เนง ชี๊ง ควี๊ง เนง ล เนง ลู่ง กจุ้แฆว้ เนบูคาเนซา กจุ้แฆว้ ลู่ง บาบีโลง อ ชู้ พ้า นอ, เนบูซาราดาง ซึ้คู ยู่แคว่ ทะ กจุ้แฆว้, พี่ แม้ เอะ กจุ้แฆว้ บาบีโลง อ เท่อ นอ, นี่ ลี้ นึฆ้าง ลู่ง เว่ง เยรูซเลง พ้า

¹³ ดี๊ อ เว๊ นี่ เช้าไฆวะ กแช่ยาเว อ ล่างโอ ดี๊ กจุ้แฆว้ อ บลาง, ดี๊ เว่ง เยรูซเลง อเด้าอล่าง เลาพะ, อ เว๊ เช้าไฆวะ เด้า พ้ะดู กุ้ โพลง เลาพะ

¹⁴ ดี๊ โพล้ง เคลเดีย อ ซึ้พูมู๊ง เลาพะ, พี่ โอ ดี๊ ซึ้คู ยู่แคว่ ทะ กจุ้แฆว้ นอ, นี่ แม้ล้างฆ่อง กางแป เลาพะ, พี่ โอ วะชวะ เว่ง เยรูซเลง นอ

¹⁵ ดี๊ เนบูซาราดาง ซึ้คู ยู่แคว่ ทะ กจุ้แฆว้ นอ, พองนี่ โพล้ง เฌงพูฆ๊างพู อน้ะอซยาง ทึ แบ ล แฌ้ๆ, พองนี่ โพล้ง เฌงพูฆ๊างพู พี่ ล้างลื๊อ โอก้ะ เว่ง พ้า, พองนี่ โพล้ง พี่ อ ไจคุ้ซูง ลี้ฌูง กจุ้แฆว้ ลู่ง บาบีโลง, ดี๊ พองนี่ ซแล้ พี่ ล้างลื๊อ โอก้ะ นอ, ลี้ เก ทอฆ่อง ล้อ

¹⁶ แบเด้าะ เนบูซาราดาง ซึ้คู ยู่แคว่ ทะ กจุ้แฆว้ นอ, อางกีโท่ล้าง ก้ะ โพล้ง พี่ อน้ะอซยาง ทึ ล น้าง ลู่ง ค่าง พ้า, บี่ซุ้ เกม๊า เว๊ อ เก โพล้ง แม้ โซ๊ง ซไบ้ะ, ดี๊ เก โพล้ง แม้ฆึ้ แม้ไชะ

¹⁷ กเย่ เฌเทิง ท่องบ้าง พี่ โอ กแช่ยาเว อ ล่างโอ พ้า, เลา ดี๊ ทเคิง ดี๊ อ้างพ้ะดู ท่องบ้าง, พี่ โอ กแช่ยาเว อ ล่างโอ พ้า นอ, โพล้ง เคลเดีย นี่ ท่าง เฌ๊ฌ้องไฆวะ เว๊ เก ล ไก้ๆ, ดี๊ ไท้โชะ ท่องบ้าง เลาพะ ลู่ง บาบีโลง

¹⁸ ดี๊ อ เว๊ แม้นี่ พ้า, โละไควะ, ท้ะไร้ะ มีโด้ง อ ไฆวะ, อ้าง, โท๊กีง ทน๊าม๊า, ดี๊ ทพ้าทล่าง ท่องบ้าง, พี่ เจ่ เว๊ ลู่ง เว่งฮ๊าง อ ทแม้ ทไฌะทไฌ่ พ้า

¹⁹ เลา ดี๊ โท๊กีงอ้างพู, มีอ้าโด้งล่าง, อ้าง, พ้า, มีโด้ง อ เทิง, โท๊กีง ท น๊าม๊า, ดี๊ โล๊ง ทโอ้ ลื่งทาง เท่อ, ทเม้งเล้ พี่ ไต้ เว๊ ดี๊ ท๊องบ้าง นอ, ซึ้คู ยู่แคว่ ทะ กจุ้แฆว้ นอ, แม้นี่ ไท้โชะ เว๊ เก ท๊องบ้าง, ทเม้งเล้ พี่ ไต้ เว๊ ดี๊ จี้ นอ, แม้นี่ ไท้โชะ เว๊ เก จี้ ล้อ

²⁰ แบเด้าะ เฌเทิง พ้ะดู คี๊ง เทิง, ดี๊ อ้าง พ้ะดู ล โพลง, ดี๊ งู้ ท่องบ้าง ชี๊ง คี๊ง ดื้ง, พี่ โอ อ้าง พ้ะดู เช๊ละ, ดี๊ ท อ เทิง ซีง ลแพ, พี่ กจุ้แฆว้ ซาโลโม นี่ ไต้ทาง เว๊ ลู่ง กแช่ยาเว อ ล่างโอ, ท ลแพ อี้ง อ ท่องบ้าง นอ เค๊ง เว๊ ลน้าลเพ้ แบ

²¹ แบเด้าะ เฌเทิง นอ, ล เทิง โท๊ ชี๊ง โฆะ แพล่, ทู เว๊ วะชวะ นอ เก ชี๊ง คี๊ง แพล่, ดี๊ อ ตาง ลี่ง มื่ง, อ ซ้ะ คี่ง พ้า ฌู๊ จ โอ้ โคล้

²² เฌเทิง คู อี้ง นอ, โอ ดี๊ อ จอง ท่องบ้าง, อ จอง ล โพลง นอ โท๊ เย่ เพล่, โอ ดี๊ อ กีง ป้างกิ้ อ ซ้ะ, ดี๊ ม้างเกาะ แซ อ ฌ้าง เลาพะ นอ, แม้ เว๊ ดี๊ ท่องบ้าง, โอ วะ ท อ จอง, ดี๊ เฌเทิง คี๊ง เทิง ล เทิง นอ, โอ บี่ซุ้ โละ ซ้ะ, เลา ดี๊ ม้างเกาะ แซ อ ฌ้าง ปะ

²³ อ แพ้ ล้อง โอ ดี๊ ม้างเกาะ แซ อ ฌ้าง, ควี๊ง ชี๊ง ฆู๊ง โพลง, ลู่ง อ กีง ป้างกิ้ คู วะชวะ นอ, โอ ดี๊ ม้างเกาะ แซ อ ฌ้าง เลาพะ อ โพลง ล แย้

²⁴ ดี๊ ซึ้คู ยู่แคว่ ทะ กจุ้แฆว้ นอ, พองนี่ เซไรยา โพล้งลื่งเท่ออคูดูทึ, ดี๊ เซฟางยา โพล้งลื่งเท่ออคู, ดี๊ โพล้ง โอคุ้ แคว่ทะ ป้ะตู๊ง ซ๊า แฌ้

²⁵ ดี๊ โอนี่ ลู่ง เว่ง นอ, อ เว๊ พองนี่ เพล่ดูแม้เท่อลู่งบลางพ้า, พี่ เก ซึ้พูมู๊ง อ คู ดู, ดี๊ กจุ้แฆว้ อ โพล้ง เนฌ้าโล้ฌ้า เท่อ เนว๊ แฌ้, พี่ แด เว๊ ลู่ง เว่ง พ้า นอ, ดี๊ ซึ้พูมู๊ง อ คู ดู อ โพล้ง กวิ้ไน ไละ, พี่ อ ลึ นี่ โพล้ง เฌงพูฆ๊างพู, ดี๊ โพล้ง เฌงพูฆ๊างพู อ แฌ้ ฆู๊ง ชี๊ง ได้ะ, พี่ แด เว๊ ลู่ง เว่ง พ้า นอ

²⁶ ดี๊ เนบูซาราดาง ซึ้คู ยู่แคว่ ทะ กจุ้แฆว้, พองนี่ โพล้ง ลแพ อี้ง, ลี้ฌ้า เว๊ เทว๊ เอะ บาบีโลง อ กจุ้แฆว้ ลู่ง รีลา

²⁷ ดี๊ กจุ้แฆว้ ลู่ง บาบีโลง ท่าง-อ้ะ, ดี๊ แม้ซี๊งไฆวะ อ ซื๊งเว๊ ลแพ นอ ลู่ง รีลา, โพล้ง ฮามา อ ที๊งล่างค่างพ้า, ยูดา นอ แบ ท พองนี่ ไจแดไฆวะ อ กแช่ อที๊งอค่าง ลี้ เก ทอฆ่อง ล้อ

²⁸ อ อี้ง นอ, เก โพล้ง เฌงพูฆ๊างพู อ แฌ้แอแฌ้แซย้, พี่ เนบูคาเนซา พองนี่ เว๊ ลี้ เก ทอฆ่อง, ลู่ง เนง เนว๊ เนง ล เนง พ้า, โพล้ง ยู โอ เว๊ ซ๊า ม๊า คี๊ง ชี๊ง ซ๊า แฌ้

²⁹ เนง ชี๊ง โฆะ เนง ล เนง พ้า, ลู่ง กจุ้แฆว้ เนบูคาเนซา อ ชู้ พ้า นอ, อ เว๊ แญ่ไฆวะ ทอฆ่อง โอนี่ ลู่ง เว่ง เยรูซเลง พ้า, โฆะ แย้ ซ๊า ชี๊ง คี๊ง แฌ้

³⁰ เนง คี๊ง ชี๊ง ซ๊า เนง ล เนง พ้า, ลู่ง กจุ้แฆว้ เนบูคาเนซา อ ชู้ พ้า นอ, เนบูซาราดาง ซึ้คู ยู่แคว่ ทะ กจุ้แฆว้, พองนี่ โพล้ง ยู เก ทอฆ่อง เนว๊ แย้ ลี่ง ชี๊ง เย่ แฌ้, ดว้ะฆึ โพล้ง เลาพะ นอ เก ลี่ง ม๊า ฆู๊ง แย้ แฌ้

เยโฮยาคี นี่แบ ทย๊างซ้ะ พี่ เก ทอฆ่อง แค๊ นอ

³¹ ดี๊ ลู่ง เนง ซ๊า ชี๊ง เนว๊ เนง ล เนง พ้า, พี่ เยโฮยาคี กจุ้แฆว้ ลู่ง ยูดา เก ทอฆ่อง นอ, พี่ มื่ง คี๊ง ชี๊ง เย่ นี้ง ล นี้ง, ลู่ง แล้ ชี๊ง คี๊ง เบง ล เบง พ้า, ล เนง แย๊ พี่ อ ทาง โพะคอง เท่อ นอ, เอวีเมโรดา กจุ้แฆว้ ลู่ง บาบีโลง นอ, ย๊างซ้ะ แบ เยโฮยาคี กจุ้แฆว้ ลู่ง ยูดา, ดี๊ เกม๊า เว๊ อ ไจทางไฆวะ พ้อง พ้า ล้อ

³² อ เว๊ ไคล้ ดี๊ เยโฮยาคี ดี๊ ทย๊างเซิงย๊างซ้ะ, ดี๊ เกล๊าง เอะ เว๊ ล่าง ชี๊น้าง พี่ อฆี๊งอแล้ ฌี้เละ กจุ้แฆว้ ซีง ลแพ, พี่ โอ บาบีโลง พ้า นอ ได้ะ

³³ ทบี่นอ, เยโฮยาคี เบ้าะล้างไฆวะ อฆ้าอโฆ่ พี่ เก โค้งเตา นอ, ดี๊ อางเท่อโอ้เท่อ ลู่ง กจุ้แฆว้ อ คะ อาง เท่อ คู กุ้ มื่งนี้ง เพล้า อ ชู้ นอ ล้อ

³⁴ เมะ ทซู๊งทเจ่ อ ฆวี้ นอ, นี่แบ เว๊ ดี๊ กจุ้แฆว้ ท๊อง อ แบ เจ่ เว๊ ล นี้งฌ่างๆ, เพล้า อ ชู้, ท้อง ลู่ง มื่งนี้ง พี่ อ ซี๊ง นอ ล้อ