อีซยา 8 - Northern Pwo Karen Thai Bible

อีซยา อ พู เก ทแม้ไน แบฆ้ะ ดี๊ อะซีเรีย อ ทดึ้ทชาง

¹ ฌ้อง นอ กแช่ยาเว ไคล้ ดี๊ แย้ บี่อี้ง, “เกม๊า แม้นี่ เซง ปางเป พ้ะเล่ ล เบง, ดี๊ เกม๊า กวิ้ล้าง เท่อ อ คู นอ ดี๊ ไละเมะ โย๊ๆ, บี่อี้ง, ‘มาเฮชาลางฮาชาบะ’, ”

² ดี๊ จ นี่ พีงญาง พี่ ล้าง ทื๊งแบนะแบ-อ้ะ, เมะเว๊ อูรียา โพล้ง ลื่งเท่ออคู, ดี๊ เยเบเรคียา อ พู เซคารียา, บี่ซุ้ เก พีงญาง เอะ แย้

³ ฌ้อง จ ลี้ฆ้างฌูง โมไคล้คิ้ กแช่แยว้ อ มืง อ เว๊ นอ ด้าทาง ดี๊ กึทาง นี่ อ พูแคว๊ ล แฌ้, ดี๊ กแช่ยาเว ไคล้ ดี๊ แย้ บี่อี้ง, “พู นอ เกม๊า กุ้ อ เม้ง บี่อี้ง, ‘มาเฮชาลางฮาชาบะ’

⁴ เมะเว๊ ซลื๊อ พืงแซ นอ ม ซีงแฌ๊ กุ้ เท่อ, ‘มู่ แพ่’, ซี นอ, ดามากา อคองอแซย้, ดี๊ เท่อ พี่ ลู่นี่ก้ะ-อ้ะ ลู่ง ซามารียา นอ ม แบ ท ไท้โชะ ลู่ง อะซีเรีย อ กจุ้แฆว้ อ เมะแซ พ้า”

⁵ ฌ้อง นอ กแช่ยาเว ไคล้ ดี๊ แย้ ได้ะ บี่อี้ง

⁶ “เป๊งนี่ โพล้ง ล ชื้อ อี้ง ซม๊า ที๊ง ลู่ง ชีโลอา พี่ แยว้ล้าง โกย้ๆ, ดี๊ เซิงมึซ้ะมึ แบฆ้ะ ดี๊ เรซีง, ดี๊ เรมาลียา อ พู”

⁷ อกย้องบี่นอ, แคว่เซ้อ ทอดูทึโท๊ทึ กแช่, ม ดึ้ เกม๊า ที๊ง ลู่ง ที๊ง ยูเฟตี กล้อง พี่ โอ ดี๊ อไฌ่อแบ้ ดี๊ โอ แอฌี่งแอฌ้อง, เมะเว๊ อะซีเรีย อ กจุ้แฆว้ ดี๊ อฆี๊งอแล้ เลาพะ, เฌ๊ ดึ้ โละซ้ะ ดี๊ อ ซื๊งเว๊, ที๊ง นอ ม แยว้ล้าง ล้างพะ อ กล้อง กุ้บ้อง, ดี๊ กลึ้ไบ้ะ อ คื่อ พ้าไท้ะ เลาพะ

⁸ ดี๊ ม กว้ะ เว๊ เด้าะ ลี้ นึฆ้าง ลู่ง ยูดา พ้า, อ ม กลึ้ไบ้ะ ดี๊ แยว้ล้าง พะไฆวะ ท๊อง อ ท้อง โคะบ้อง, ดี๊ อ ได้ะ พี่ ย้างแย่ ทาง อ ซ้ะ นอ, ม คลึไบ้ะ น ที๊งล่างค่างพ้า อเล่อโท๊ ล้อ, แน้ อีงมานูเอง-เอ้อ

⁹ กโพล้ง กุ้ชื้อกุ้ชะ ลแพ ซีง-เอ้อ, เกม๊า ซีงแฌ๊ ดี๊ เกม๊า ซ้ะเมซ้ะไพล้ เท่อ กเย่ ค่าง ลู่ง อ ไย้ กุ้จอง-เอ้อ, เกม๊า ดุ้แน่ คุ้ช๊องแน เท่อ เกม๊า น ซื๊ง เราทะ ย่างเด้ง ดี๊ เกม๊า ซ้ะเมซ้ะไพล้ เท่อ เกม๊า น ซื๊ง เราทะ ย่างเด้ง ดี๊ เกม๊า ซ้ะเมซ้ะไพล้ เท่อ

¹⁰ เกม๊า ช๊องมอง ซกุ้ เว้ทแม้ แบเด้าะ นอ ล เกทางเกโท๊ แบ เกม๊า ก้างแก้ โละซ้ะ, แบเด้าะ ม โอเฌิ่งโอค๊า ล ซี แบ เมะเว๊ กแช่แยว้ โอ ดี๊ เฆ้อ

¹¹ เมะเว๊ กแช่ยาเว ไคล้ ดี๊ แย้ บี่อี้ง ดี๊ จูง ลู่ง อชองอไคล๊, ดี๊ โล้ ซีงแฌ๊ เว้ แย้ ล เกม๊า จ โอม๊า โพะ โพล้ง ล ชื้อ อี้ง อ เกล้ แบ, ไจ้ะเว๊ บี่อี้ง

¹² “ท พี่ โพล้ง ล ชื้อ อี้ง กุ้ เว๊ ท ช๊องมอง กไบล้ะกแบล ซกุ้ เท่อ นอ, น ซื๊งเว๊ กุ้-อ้ะ ท ช๊องมอง กไบล้ะกแบล ซกุ้ เท่อ ล ฌี้, ดี๊ เท่อ พี่ อ ซื๊งเว๊ ซีง ลแพ ซ้ะเม เว๊ นอ, น ซื๊งเว๊ ซ้ะเม ล ฌี้, ดี๊ ซ้ะเม ยางแบ-อ้ะ ล ฌี้”

¹³ แบเด้าะ กแช่ยาเว ซึ้คู ดูทึชองทึ นอ ล้อ, พี่ น ซื๊ง แบ ทื๊ง-อ้ะ อซยื๊งอซย้อง กแช่แยว้ เก โพล้ง พี่ น แบ ซ้ะเม-อ้ะ, ดี๊ เก โพล้ง พี่ น แบ ซ้ะเม ยางแบ-อ้ะ

¹⁴ ฌ้อง นอ กแช่แยว้ ม เก ทล่างซยื๊งซย้อง, แบเด้าะ นอ ม เก โล่ง แบท้า คาง, ดี๊ เก ไล๊ พี่ ดึ้ เกม๊า อีซลาเอง อชื้ออชะ คี๊ง ชื้อ ล้างเทะเค้า, เลา ดี๊ เก ทดุ้ทเช ดี๊ เก ทโกงทแกย พลี้งคว้าง ลู่ง โพล้ง เยรูซเลง อ ฌ่าง

¹⁵ ดี๊ โพล้ง อ แฌ้ แอฌี่งแอฌ้อง ม ล้างเทะเค้า ลู่ง โล่ง นอ อกย้อง, ม ล้างอางซย่าง ดี๊ เท้พ้ะแค่เทา อ ซื๊งเว๊ ม แบ พลี้ง ดี๊ แบ ท พองนี่-อ้ะ

¹⁶ เกม๊า อางกี ทไคล้ พีงญาง, ดี๊ เกม๊า กวิ้ล้าง แม้ไน ทอางแม้เลา ลู่ง จพูจลี้ง ลแพ นอ อซุ้อแกล้ พ้า

¹⁷ จ ม โอคุ้แท๊ กแช่ยาเว พี่ อางกีซูงไฆวะ อ เมะ ดี๊ ยาคุ้ อชื้ออชะ, ดี๊ จ ม มื้งแล่ เท่อ ดี๊ กแช่แยว้

¹⁸ แคว่เซ้อ, แย้ ดี๊ จ พู พี่ กแช่ยาเว เกล๊าง เอะ แย้ นอ, เก ทแม้ ซีงแฌ๊ ดี๊ เก ทแม้ไน ลู่ง อีซลาเอง พ้า, พี่ อ เฌ๊นี่ ดี๊ กแช่ยาเว ซึ้คู ดูทึชองทึ, พี่ โอ ลู่ง ทลู่ง ซีโยง คู

¹⁹ ดี๊ ท่อง อ ซื๊งเว๊ ลแพ นอ ไคล้ ดี๊ แน้ ไจ้ะเว๊, “เกม๊า อางจ้ะ เท่อ ดี๊ โพล้ง ซูงล้าง เท่อ-อ้า, โพล้ง อูง เท่อ ซี ล่อง เท่อ นึ-อ้า, พี่ กุ้ซย้ะ เท่อ อ ลู่ง เซ๊ เจ้าะแจ้ะ ดี๊ อ ลู่ง เซ๊ ปรื้งๆ, นอ”, ล เกิ้ง แบ-อ้า พี่ โพล้ง เฌงพูฆ๊างพู ม อางจ้ะ เท่อ ดี๊ อ กแช่แยว้, เกิ้ง ชี่-อ้า พี่ อ เว๊ ม ลี้ อางจ้ะ โพล้ง ซี๊ง ลู่ง โพล้ง โอม๊า อ ฌ่าง?

²⁰ ลี้ แคว่ ทอางแม้เลา ดี๊ ทไคล้ พีงญาง, ล้างที๊ง เต้ๆ, ล้อ, โพล้ง พี่ อ ล ไคล้ ด้องซุ้ แย้ แบ นอ, ม เก โพล้ง พี่ ล โอ ดี๊ ทพ้าง ทาง ลู่ง โฌ้โค๊ แบ

²¹ อ ซื๊งเว๊ ม ลี้ แพ๊ ที๊งล่างค่างพ้า ดี๊ ทน้ะทโน๊ง, ดี๊ ท ซู๊อางซ้ะเท่อ, พี่ อ เว๊ ซู๊อางซ้ะเท่อ นอ, อ เว๊ ม ซ้ะทาง พ้ะดู, ดี๊ ชูเอ้าชูกย้าง อ กจุ้แฆว้ ดี๊ อ กแช่แยว้, พี่ อ เมะ แคว่ทาง ทพุ้พ๊าง นอ

²² ดี๊ ท่อง อ แคว่ ฌางคูโคล๊งคู นอ, แคว่เซ้อ, โอ ที่ ทน้ะเซิงน้ะซ้ะ ดี๊ ทไค้ะซ๊า, ท ซ้ะ เฌ๊ฌ้อง น้ะ อ ท เมะมองแน๊อึ้, ดี๊ อ เว๊ ม แบ ท ชางพลุ้ฆ้าง ลู่ง ทไค้ะซ๊าโนย๊ง พ้า