อีซยา 7 - Northern Pwo Karen Thai Bible

อีซยา เกม๊า กจุ้แฆว้ อาฮ้ะ อ คื๊งเซิงแล้ซ้ะ

¹ ลู่ง ยูดา อ กจุ้แฆว้ อูซียา อ พูแคว๊ โยทาง, อ พูแคว๊ อาฮ้ะ อ ชู้ แค๊ นอ, เรซีง กจุ้แฆว้ ลู่ง ซีรี, ดี๊ เรมาลียา อ พูแคว๊ เปคา, กจุ้แฆว้ ลู่ง อีซลาเอง เฌ๊ทาง ลู่ง เยรูซเลง, บี่ซุ้ ดึ้ซึ้ โละซ้ะ ดี๊ เว่ง นอ, แบเด้าะ ดึ้ซึ้ เว่ง นอ ล น้า แบ

² พี่ โพล้ง โล้ แบ ดาเว อชื้ออชะ ไจ้ะเว๊, “ซีเรีย เฌ๊ ช๊างล้าง อ ล่างโอซยอง โอ ลู่ง เอฟาอีง อ ค่างช๊า พ้า เย้า”, กจุ้แฆว้ ดี๊ โพล้ง อ เฌงพูฆ๊างพู อ ซ้ะ ว้ะโทะ บี่ซุ้ดี๊ เซง มื่งเทิง ลู่ง ทเคแกล้ ว้ะโทะ พี่ ลี้งอูงเท้า เว๊ อ แค๊

³ ดี๊ กแช่ยาเว ไคล้ ดี๊ อีซยา บี่อี้ง, “เกม๊า น ไจทาง ลี้ ต้องนอง อาฮ้ะ, เลา ดี๊ น กแช่ ดี๊ น พูแคว๊ เชอารายาชู ลู่ง ที๊งกวี้ง ท้ะโค๊ อ ที๊งท้อง คูทุ้, ลู่ง เกล้ ทล่าง อางชืง เท่อ

⁴ ดี๊ เกม๊า น ไคล้ ดี๊-อ้ะ บี่อี้ง, ‘เกม๊า ปโล่ เท่อ, เกม๊า โอกโช้, ดี๊ ซ้ะเม เท่อ ล ฌี้, เกม๊า น ซ้ะ ซ้ะเมซ้ะไพล้ เท่อ ลู่ง เซงมื่ง กึ้ อไก้อโค๊ พี่ เบ้า ม ล้างไพะ เย้า คี๊งกึ้ อี้ง อกย้อง ล ฌี้, เมะเว๊ ลู่ง เรซีง ซีรี ดี๊ เรมาลียา อ พูแคว๊ อ ท ซ้ะทาง พ้ะดู อกย้อง

⁵ เป๊งนี่ ซีรี ดี๊ เอฟาอีง, เลา ดี๊ เรมาลียา อ พูแคว๊ นี่ ช๊องมองเว้ทแม้ ออ้าอซ๊าง ดี๊ แน้, ไจ้ะเว๊ บี่อี้ง

⁶ “เกม๊า เฆ้อ ซีง ลแพ ลี้ทาง ดึ้ โละซ้ะ ดี๊ ยูดา, ดี๊ แม้ เกม๊า อ ซ้ะเมซ้ะไพล้ เท่อ, ฌ้อง เกม๊า ก แม้พล๊อง อเว่งอทะ ลู่ง เฆ้อ ก ฌ่าง แด เว๊, ดี๊ ต๊างทาง ทาเบเอง อ พู เกม๊า อ เก กจุ้แฆว้ ลู่ง เว่ง พ้า นอ”

⁷ ทอดูทึโท๊ทึ กแช่ยาเว ไจ้ะเว๊ บี่อี้ง “ม ล เกทาง อ ซ้ะ บี่นอ แบ ดี๊ ม ล กึทาง แบ

⁸ อไฌ่บี่อี้ง ซีรี อ คูฆีง นอ, เมะเว๊ ดามากา ดี๊ ดามากา อ คูฆีง นอ, เมะเว๊ เรซีง (ฆู๊งชี๊งเย่ เนง พ้า นอ, เอฟาอีง ม เท้พ้ะ เก ล ไก้ๆ, ท๊อง ล เก โพล้ง น๊างชื้อ ล้า แบ)

⁹ ดี๊ เอฟาอีง อ คูฆีง นอ, เมะเว๊ ซมาเรีย ดี๊ ซมาเรีย อ คูฆีง นอ, เมะเว๊ เรมาลียา อ พู น เมะ ล นะ เท่อ เฌิ่งเพิ่ง แบ นอ น โอ เฌิ่งเพิ่ง ล ซี แบ”

อีซยา เกม๊า ทแม้ไน เอะ อาฮ้ะ, แบฆ้ะ ดี๊ อีงมานูเอง

¹⁰ กแช่ยาเว ไคล้ ดี๊ อาฮ้ะ ได้ะ ไจ้ะเว๊

¹¹ “เกม๊า น อางท่าง นี่ ทแม้ไน ดี๊ น กแช่ยาเว น กแช่แยว้, ทึเมะ ม เกม๊า อ โยะคิ้ ท้อง พลื่งค่าง ฌี้, โท๊ ท๊องซุ้ ทมุ้คู ฌี้ นอ ซี”

¹² แบเด้าะ อาฮ้ะ ไคล้ช๊า เว๊ บี่อี้ง, “ก ล ชูแพอางท่าง แบ, ดี๊ ก ล แม้แคว่ดุ้ กแช่ยาเว แบ”

¹³ ดี๊ อีซยา ไจ้ะเว๊ บี่อี้ง, “จ กแช่ ดาเว อชื้ออชะ-เอ้อ, อวีงซ้ะชู้ คุ้ช๊องแน, ทแม้ เกม๊า กโพล้ง อ ซ้ะ ล้างแช่ นอ, เก ท อ ไฌ่ ลปี๊ลคี่ ลู่ง น ซื๊ง ฌ่าง-อ้า?, ดี๊ น เกม๊า จ กแช่แยว้ อ ซ้ะ ล้างแช่ ปะ ล้อ-อ้า?

¹⁴ อกย้องบี่นอ, ทอดูทึโท๊ทึ กแช่ ม เกล๊าง ทแม้ไน แด กแช่ เว๊ ล้อ, อี้งเซ้อ, มืงน้าง ล แฌ้ ม ด้าทาง, ดี๊ พูแคว๊ ล แฌ้ ม กึทาง, โพล้ง ม กุ้ เว๊ อ เม้ง อีงมานูเอง

¹⁵ อ เว๊ ม อาง นู่งที๊ง ปไวะได้ะ ดี๊ นี๊จ้าง, ลู่ง อช๊าอโท่ พี่ อ ซีงแฌ๊ ซม๊า ทอ้าทซ๊าง ดี๊ อางลึ นี่ ทฌี้ทแอว้

¹⁶ เมะเว๊ ซลื๊อ พืงแซ นอ ม ซีงแฌ๊ ซม๊า ทอ้าทซ๊าง ดี๊ อางลึ นี่ ทฌี้ทแอว้ นอ, กจุ้แฆว้ คี๊งแฌ้ อ ที๊งล่างค่างพ้า พี่ น ซ้ะเมซ้ะไพล้ เว๊ นอ ม โอโปล้ก้ะ กูกิ้

¹⁷ กแช่ยาเว ม เฌ๊ฌ้า มื่งนี้ง อช๊าอโท่ นอ ล้างแบ กจุ้แฆว้, ล้างแบ อ โพล้ง เฌงพูฆ๊างพู, ดี๊ ล้างแบ อ แพ่ อชื้ออชะ, เก อช๊าอโท่ พี่ ล โพลทาง น่างชุ้ แบ, ลโค๊ลู่ง เอฟาอีง โอเจโอพ้ะไฆวะ ดี๊ ยูดา เย้า, เมะเว๊ อะซีเรีย อ กจุ้แฆว้ อ มื่งนี้ง อช๊าอโท่

¹⁸ “ล นี้ง แย๊ นอ, กแช่ยาเว ม ยู อ นุ้, กุ้ นี่ ปโคะ พี่ โอ ลู่ง ที๊ง อีไย้ะ กล้อง อ คี๊ง, ดี๊ กุ้ นี่ นี๊ พี่ โอ ค่าง อะซีเรีย พ้า

¹⁹ ฌ้อง อ ม เฌ๊ เลาพะ, ดี๊ เชา โอ ลู่ง ที๊งกล้อง ไบล้จุ้ลุ้ ลู่ง โล่ง อ เช้า พ้า, ดี๊ โอ ลู่ง ทชูง ทดู อี อ เทิง ล้อง เลาพะ, ดี๊ นาง ล่าง พ้ะ เล่ คู เลาพะ

²⁰ “ล นี้ง แย๊ นอ, ทอดูทึโท๊ทึ กแช่ ม เจ่ โด้พู พี่ โจ่ นี่ ลู่ง ที๊งยูเฟตี อ ที๊งล่างค่างพ้า ล แพ้ แด ได้ะ, เมะเว๊ อะซีเรีย อ กจุ้แฆว้, ลู่ง ท โล้งไฆวะ ชอง ลู่ง ท กดื้งกทะ พ้า ดี๊ ม ทิ้ทางไฆวะ นุ้ชองแคพ้าง ปะ

²¹ “ล นี้ง แย๊ นอ, กแคว๊ ล แฌ้ ม ลื่ง งู้ มู่น๊าง ล ดื้ง ดี๊ แกะ คี๊ง ดื้ง

²² ดี๊ ลู่ง อ เกล๊าง นู่ง แอฌ้อง อกย้อง นอ, อ เว๊ ม โอ้ นู่งที๊ง ปไวะได้ะ, เมะเว๊ กุ้แฌ้ พี่ โอ ล้างลื๊อ ก้ะ ลู่ง ที๊งล่างค่างพ้า นอ, ม โอ้ นู่งที๊ง ปไวะได้ะ ดี๊ นี๊จ้าง

²³ “ล นี้ง แย๊ นอ, ทล่าง กุ้ อ จอง พี่ ซไบ้ะมื่ง โอลี้งโอล้อง อ มื่ง ล ม๊า, พี่ อลื่งอฆวี้ เก จี้ ล ม๊า เชเค่ง นอ, ม เกทาง ก้ะ ทชูง พู มื่งเทิง ดี๊ ทชูง พ้ะดู

²⁴ โพล้ง ม เฌ๊ พี่ นอ ล พ๊าฆ่าง ดี๊ คลีงบ้อง คลีงแช, เมะเว๊ ที๊งล่างค่างพ้า น๊างเบง นอ, ม โอ ที่ ทชูง พู ดี๊ ทชูง พ้ะดู ล้อ

²⁵ แบเด้าะ ทลู่งทจ้อง กุ้จอง พี่ แบ ทเคิง ดี๊ ท้ะพล้ะ นอ, น ล ลี้ พี่ นอ แบ, เป๊งนี่ ซ้ะเม ทชูง พู ดี๊ ทชูง พ้ะดู, แบเด้าะ ทลู่งทจ้อง ลแพ นอ, ม เกทาง ก้ะ ทล่าง พี่ โพล้ง ทูแพล่ งู้ น๊างมู๊ง ไจดุ้, ดี๊ เก ทล่าง พี่ เกม๊า แกะ น๊างมู๊ง ไย่เละค๊างพะ เว๊”