อีซยา 5 - Northern Pwo Karen Thai Bible

แท๊ซ้ะอวีง แบฆ้ะ ดี๊ โซ๊ง ซไบ้ะแซ อ ชื้อ อ้า

¹ อวีงซ้ะชู้ เกม๊า จ ซ้ะอวีงแท๊ ลู่ง จ ฌุ้พาง เท่ง ซ้ะ อ ฌ่าง เก จ ฌุ้พาง เท่ง ซ้ะ อ แท๊ แบฆ้ะ ดี๊ น โซ๊ง ซไบ้ะแซ จ ฌุ้พาง เท่ง ซ้ะ อ โซ๊ง ซไบ้ะแซ โอ ล โซ๊ง โอ ทลู่ง คู พี่ อล๊าอฆวี้ ฌี้ มะ

² อ เว๊ เคิง เท่อ ฌ้อง นอ, ฆี๊ไฆวะ โล่ง เลาพะ ดี๊ เซิงล้าง ซไบ้ะมื่ง ลู่ง อ ฌี้ อ เว๊ ไต้ทาง ทล่าง โอคุ้ แคว่ทะ เท่อ ลู่ง โซ๊ง พ้า นอ ดี๊ แพล้นี่ ทพ้า ไย่ ซไบ้ะแซ ลู่ง โซ๊ง พ้า นอ ปะ อ เว๊ มื้งแล่ เว๊ อ แซ ช๊า ม ซูงทางแซทาง แบเด้าะ ซูงทางแซทาง ก้ะ ลู่ง อ แซ ไช ล้อ

³ ค๊องเนงอี้ง, โพล้ง เยรูซเลง ดี๊ โพล้ง ยูดา-เอ้อ อวีงซ้ะชู้ ต้ะเซ๊ง เฆ้อ ดี๊ ก โซ๊ง ซไบ้ะแซ

⁴ ทเม้งเล้ โอ พี่ ม แม้-อ้ะ ซี ได้ะ, ลู่ง ก โซ๊ง ซไบ้ะแซ อ ฌ่าง พี่ ก ล นี่ แม้ เอะ-อ้ะ ได้ะ แบ พี่ ก มื้งแล่ อ้ะ ม ซูงทางแซทาง ซไบ้ะแซ ช๊า แบทเล้ แซทาง ก้ะ ลู่ง อ แซ ไช?

⁵ ค๊องเนงอี้ง ก ม โล้ เอะ น ซื๊ง ซีง ลแพ บี่อี้ง ก ม แม้ ทเม้งเล้ ดี๊ ก โซ๊ง ซไบ้ะแซ ก ม กูงไฆวะ อ ทร้อง ร้องทะ เท่อ ฌ้อง อ ม แบ ทแม้ เฌ๊ฌ้องไฆวะ ก ม แม้ ล้างฆ่อง อ กางแป ฌ้อง อ ม แบ ท ไย่เละค๊างพะ ล้อ

⁶ ก ม แม้ เกม๊า อ เก ทล่าง โอโปล้ ก้ะ กูกิ้ โพล้ง ม ล โอ ดิ้ไฆวะ อ ได้-อ้า, แม้ โบงทาง ฌางคู-อ้า, น่างแฌ้ แบ ทชูง พู ดี๊ ทชูง พ้ะดู นอ ม เมทาง ดี๊ ก ม อางแบเลา ทเอิง ล เกม๊า อ ฆวีงล้าง ทช้า ชู๊ง-อ้ะ แบ

⁷ เมะเว๊ กแช่ยาเว ซึ้คู ดูทึชองทึ อ โซ๊ง ซไบ้ะแซ เมะเว๊ อีซลาเอง อชื้ออชะ ดี๊ โพล้ง ยูดา เก เซง มื่งเทิง พี่ กแช่แยว้ แบ อ ซ้ะ ดี๊ กแช่แยว้ มื้งแล่ ท อเกิ้งอแบ แบเด้าะ แคว่เซ้อ โอ ดี๊ ท ซวีงล้างบุ้ล้าง มื้งแล่ ทฌี้ทแอว้ แบเด้าะ แคว่เซ้อ โอ ดี๊ ท อ ลู่ง กุ้ซย้ะ เกม๊า แม้ช้า-อ้ะ

ไคล้อ้าไคล้ซ๊าง ท ลเกิ้งล แบ แบ ลู่ง กโพล้ง อซุ้อแกล้

⁸ ท เซงทื่งเฌ๊ฌ้อง แบ โพล้ง ลแพ นอ, พี่ แม้ ดูทาง เด้า ดี๊ ท ลู่นี่ เด้า ดี๊ แม้ แอทาง ไชะ ดี๊ ท ลู่นี่ ไชะ ท้อง ลู่ง ล ล้างลื๊อ เกม๊า โพล้ง อ แฌ้แพ ล โอ ล้า แบ ดี๊ น ซื๊งเว๊ โอ ล มู๊ง เฆาะ ลู่ง ที๊งล่างค่างพ้า นอ

⁹ กแช่ยาเว ซึ้ดู ดูทึชองทึ ไคล้ ดี๊ แย้ ไจ้ะเว๊ “เต้ๆ, ล้อ เด้า ตบลึ้ โพลง ม แบ โอโปล้ ก้ะ กูกิ้ เด้าดูล่างไค้ะ ดี๊ เด้าฌี้เด้าแอว้ นอ, โพล้ง ม ล โอ เว๊ อ พ้า น่างแฌ้ แบ

¹⁰ เมะเว๊ โซ๊ง ซไบ้ะแซ คี๊งชี๊งเย่ ไล๊ นอ, ม นี่แบ ซไบ้ะแซ ที๊ง เมาะ โฆะ เล๊ง เฆาะ ดี๊ ท อ คลี๊ง อ เล๊ง ล แย้ โฆะชี๊ง นอ, ม นี่ อซูงอแซ ชี๊งโฆะ เล๊ง เฆาะ ล้อ”

¹¹ ท เซงทื่งเฌ๊ฌ้อง แบ โพล้ง ลแพ นอ, พี่ เฌ้เทิงทาง ลู่ง โฌ้ ล้างคึ บี่ซุ้ ลี้ ซยู๊ ฌูง ไซ้ะ ดี๊ โพล้ง พี่ โอ ท้อง ทไค้ะทแน้ ลแพ นอ ฌ้อง ไซ้ะ ซไบ้ะแซ ที๊ง, ดึ้ เกม๊า อ เว๊ ม้า เท่อ ล้างเท้าล้างเย้

¹² อ เว๊ อ ท ลื่งอางลื่งโอ้ โอ ดี๊ ทแน่พี่โอดี๊อโน้ง, ดี๊ ทแน่ พ้ะดู รางมานา, ปี้ง, ดี๊ ไซ้ะ ซไบ้ะแซ ที๊ง แบเด้าะ อ ซื๊งเว๊ ล ควี๊งคูแกยแน่ ดี๊ กแช่ยาเว อ ทไพ้ะทแม้-อ้า ล ช๊องมองแคว่ที๊ง กแช่แยว้ อ จูงล่างคางคู-อ้า แบ

¹³ อกย้องบี่นอ, โพล้ง เฆ้อ ก ชื้อ ล้างแบ เก ทฆ่อง ลู่ง ล ซีงแฌ๊แน่ฌ๊า เท่อ แบ อกย้อง อ โพล้ง คูดูโมะโท๊ เก โพล้ง ซู๊อางซู๊โอ้ ซ้ะ เท่อ ดี๊ อมู๊งอโฌ่ นอ, ซู๊งไฆ๊ ลู่ง ท ซู๊อางซู๊โอ้ ซ้ะ เท่อ อกย้อง

¹⁴ อกย้องบี่นอ พลื่งค่าง นอ, แม้ เล่ทางโท๊ทาง อ โคะ ดี๊ อ้างทาง อ นุ้ พ้ะเล่, อช๊าอโท่ ล โอ แบ เยรูซเลง อ เซงคู ซีง ลแพ, ดี๊ เว่ง อ โพล้งเฌงพูฆ๊างพู นอ ลี้ล้าง ล พ๊าฆ่าง ดี๊ ท อ ลู่ง เซ๊ตทูงเซ๊ล้างคล้าง, ดี๊ ท แม้มึอางอวีง พี่ โอ เว๊ อ พ้า นอ

¹⁵ กโพล้ง นอ แบ ทแม้ ล้างพือ, ดี๊ โพล้ง นอ ล้างไช้ะ ล้างย่อง ดี๊ โพล้ง ทื่งดู ล้าง ซ้ะ อ เมะคลี๊ง พ้า นอ, ล้างพือล้างปี๊

¹⁶ แบเด้าะ กแช่ยาเว ซึ้คู ดูทึชองทึ, ม นี่แบ ท อางปฆ้า ทาง ดี๊ ท อเกิ้งอแบ ดี๊ กแช่แยว้ พี่ อฌี้อแอว้ เนโพลทาง ทฌี้ทแอว้ ดี๊ ทแบกแช่แยว้อซ้ะ

¹⁷ ฌ้อง แกะพู ม อางฆื๊ง อาง เท่อ บี่ซุ้ดี๊ เก อ นาง ล่าง พ้ะเล่ โพล้งลชื้อแด ม อางฆื๊ง อาง เท่อ, โอ ลู่ง โพล้ง ทโอทช๊อง อ ทล่าง ล้างฆ่อง แค่เทาแค่ไช้ะ พ้า

¹⁸ ท เซงทื่งเฌ๊ฌ้อง แบ โพล้ง ลแพ นอ, พี่ ทวี่งเละ ทไพ้ะทแม ดี๊ ท ลเมะลโต้ แบ อ พลี้ง ดี๊ ทวี่งเละ ทเด้บ้ะ บี่ซุ้ดี๊ เจ่ พลี้ง เชิ่ง เลาะ

¹⁹ เมะเว๊ โพล้ง พี่ ไจ้ะเว๊ บี่อี้ง, “เกม๊า กแช่แยว้ ปชื่งปตี้ เท่อ เกม๊า กแช่แยว้ แม้ เพลทาง อ ทแม้ บี่ซุ้ ก ม แด แบ-อ้ะ เกม๊า อีซลาเอง อ กแช่แยว้ พี่ อฌี้อแอว้, อ ทไพ้ะทแม้ ฌ้องทางเกทาง เมะ เพล บี่ซุ้ ก ม ซีงแฌ๊-อ้ะ”

²⁰ ท เซงทื่งเฌ๊ฌ้อง แบ โพล้ง ลแพ นอ, พี่ กุ้ ทอ้า เก ทฌี้ ดี๊ กุ้ ทฌี้ เก ทอ้า โพล้ง พี่ ทื๊ง เว๊ ทไค้ะ เก ทพ้าง ดี๊ ทพ้าง เก ทไค้ะ โพล้ง พี่ ทื๊ง เว๊ ทแค เก ทช๊า ดี๊ ทช๊า เก ทแค

²¹ ท เซงทื่งเฌ๊ฌ้อง แบ โพล้ง ลแพ นอ, พี่ อ แซย๊ ลู่ง อ กแช่ อ เมะ แคว่ พ้า ดี๊ อไพ่อแซย๊ ลู่ง อ กแช่ อ เมะ แคว่ พ้า

²² ท เซงทื่งเฌ๊ฌ้อง แบ โพล้ง ลแพ นอ, พี่ เก โพล้ง เซิงน้าซ้ะน้า ลู่ง ท โอ้ ไซ้ะ ซไบ้ะแซ ที๊ง ดี๊ เก โพล้ง แม้ เท่อ เบิง ลู่ง ท แพ๊ซยอง ไซ้ะ

²³ โพล้ง พี่ ต้ะเซ๊ง โพล้งอ้าโพล้งซ๊าง เกม๊า พ้องไฆวะ ดี๊ ทไพ้ะทแม ลู่ง จี้ทไซ้ะไบ้ะนุ้ อกย้อง ดี๊ แม้นี่ ก้ะ ท อเกิ้งอแบ พี่ โอ ดี๊ โพล้งแบกแช่แยว้อซ้ะ

²⁴ ทบี่นอ, มีแลเค้ อางไฆวะ โล่ทุ้ บี่จะเล้ ดี๊ นางไฆ๊ ล้างไซ้ะไน้ะ มีอ้า พ้า บี่จะเล้ นอ อ ซื๊งเว๊ อฌี่งอเฌ้ ม เก บี่ซุ้ดี๊ ทอืงทอ้อง ดี๊ อ โพ๊พ้ะ ม ดี้งทางดี้งล้างไฆวะ, บี่ซุ้ดี๊ ทมูงทมวี๊ง บี่นอ ล้อ เป๊งนี่ อ ซื๊งเว๊ ลแพ นอ, ญ๊องไฆวะ กแช่ยาเว ซึ้คู ดูทึชองทึ อ ทอางแม้เลา ดี๊ ดึ้เดวทื่งแช้ อีซลาเอง อ กแช่แยว้ พี่ อฌี้อแอว้ อลู่งอแท๊

²⁵ ทบี่นอ, กแช่ยาเว อ ท ซ้ะทาง พ้ะดู ซยุ้ทาง แบ อพูอลี้ง ดี๊ กแช่แยว้ เยาฆ้าง อ จูง แม้เทะแม้ท้าง-อ้ะ ดี๊ ดึ้ซึ้-อ้ะ ฌ้อง ทลู่ง ลแพ นอ ว้ะโทะ เทาทื้ง ดี๊ อ ซื๊งเว๊ อ จู นอ บี่ซุ้ดี๊ ทโซยะทซย้าง อ โป้ง โอ ลู่ง เกล้ ลู่ง พ้า ทึเมะ บี่นอ ฌี้, กแช่แยว้ อ ท ซ้ะทาง ล ล้างแม่ แบ ดี๊ กแช่แยว้ อ จูง นอ เยาฆ้าง อ ซ้ะ ได้ะ

²⁶ กแช่แยว้ ม แม้ ซีงแฌ๊ เท่อ เอะ โพล้ง กุ้ที๊งกุ้ค่าง พี่ อ โอ ไย้ ดี๊ กแช่แยว้ ยู อ นุ้, กุ้-อ้ะ เฌ๊นี่ ลู่ง มุ้คูทึ ฌางคูทึ ดี๊ อี้ง เซ้อ, อ เว๊ ม เฌ๊ เพลเพล้าเด้า ดี๊ ปชื่งปตี้

²⁷ ลู่ง อ ซื๊งเว๊ อซุ้อแกล้ นอ, โพล้ง ล ล้างเพาล้างแช่ น่างแฌ้ แบ, ดี๊ ล แบท้า ล้างเทะเค้า น่างแฌ้ แบ โพล้ง มี๊งเชามี๊งเค๊ง-อ้า, มี๊ง แบ อ ซ้ะ ไชว้ะ-อ้า ล โอ น่างแฌ้ แบ ย่างเด้ง พลี้ง ล ล้างเบ้าะไฆวะ น่าง บ้อง แบ คางไพ้ะ พลี้ง ล ซางเทะ น่างบ้อง แบ

²⁸ กเย่ อ คลีงแช นอ โอ ที่ อ จู้งฆิ้ เลาพะ อ คลีงบ้อง นอ ไพทาง เว้ เว๊ อ กซี ลแพ นอ อ คางมีง บี่ซุ้ดี๊ โล่งมีท้ะแช๊ ดี๊ อ เลาะ คางไร้ะ บี่ซุ้ดี๊ ลี้งอูง ว้างไร้ะ เท่อ

²⁹ อ ลู่ง กุ้ซย้ะ อ โคะ บี่ซุ้ดี๊ คี๊ยื่ง อ เว๊ กุ้ซย้ะ อ โคะ ด้องซุ้ คี๊ยื่ง แพ๊ ลแพ นอ ล้อ อ เว๊ เคิ่ง เท่อ พี่ ซย่างเท่ง อ แชอาง อ แค๊ นอ ฌ้อง อ เว๊ ไท้โชะ อาง เว๊, ดี๊ โพล้ง ล โอ แม้ช้า เว๊ ซี น่างแฌ้ แบ

³⁰ ล นี้ง แย๊ นอ, อ เว๊ ม เคิ่ง อ แช อาง นอ บี่ซุ้ดี๊ ปางเล อ ลู่ง เซ๊ ดี๊ โพล้ง แฌ้ฌี้ๆ, เมะ แคว่ ฆ้าง ที๊งล่างค่างพ้า นอ แคว่เซ้อ, โอ ที่ ทไค้ะซ๊า ดี๊ ท น้ะเซิงน้ะซ้ะ ทึเมะ ทพ้าง นอ, แบ ทเอิง กดื้งทะ เว๊ ล้อ