อีซยา 4 - Northern Pwo Karen Thai Bible

¹ ล นี้ง แย๊ นอ, กมืง เนว๊แฌ้ ม พองทะ กแคว๊ ล แฌ้ ไจ้ะเว๊ บี่อี้ง “ก ม อาง ก กแช่ อ ทอาง, ดี๊ ซุ้ ก กแช่ อ ทซุ้ทก้อง อวีงซ้ะชู้ เกม๊า โพล้ง กุ้ เฆ้อ บี่ซุ้ดี๊ น เม้ง อวีงซ้ะชู้ แม้ไฆวะ ก ท ฌางแช้ฌางเด”

โพล้ง พ้องพลิ้ ซี๊ง ลู่ง ซีโยง พ้า, อ ดูทางโท๊ทาง ชู่งแย๊โค๊

² ล นี้ง แย๊ นอ, กแช่ยาเว อ ได้ มฌี้มแอว้ ดี๊ อดูอโท๊, ดี๊ ที๊งล่างค่างพ้า อซูงอแซ ม เก ท มึเซิงมึซ้ะ, ดี๊ เก โพล้ง พ้องพลิ้ ดี๊ ท ซี๊ง ลู่ง อีซลาเอง พ้า อฆี๊งอแล้

³ ดี๊ โพล้ง พี่ อ ล้างลื๊อ โอ ลู่ง ซีโยง พ้า, ดี๊ โอท๊าง ลู่ง เยรูซเลง พ้า นอ, ม แบ ท กุ้-อ้ะ ทฌี้ทแอว้, เมะเว๊ โพล้ง กุ้แฌ้ พี่ แบ ท กวิ้ล้าง เว๊ โอม๊า ลู่ง เยรูซเลง พ้า

⁴ พี่ ทอดูทึโท๊ทึ กแช่ นี่ ซฌ้ะไฆวะ ซีโยง อ พูมืง ลแพ นอ อ ท แบอ้าแบซ๊าง, ดี๊ แม้เช๊งแม้เกล้ง เยรูซเลง อ ซวีง ล่าง ลู่ง เว่ง นอ อซุ้อแกล้, ดี๊ วีงแล้ ลู่ง ทต้ะเซ๊ง, ดี๊ วีงแล้ ลู่ง เช้า อางไฆวะ เท่อ

⁵ ดี๊ กแช่ยาเว ม ไต้ ทเอิง ลู่ง มแช๊แค๊ อ ฌ่าง, เลา ดี๊ ท อ คูง ดี๊ มีอ้า อ แล พ้าง ลู่ง มแน้แค๊ อ ฌ่าง, โอ ลู่ง ทลู่ง ซีโยง อ คูด้าง กุ้จองกุ้ไจ้, ดี๊ โอ ลู่ง เว่ง นอ อ โพล้งเฌงพูฆ๊างพู อ คูด้าง, เมะเว๊ ม โอ ดี๊ อ คู ซุ้ซู๊ง คลึไบ้ะ กแช่แยว้ อโฌ่งอพ้าง อ คูด้าง เลาพะ

⁶ ดี๊ ม เก กดื้งแล้ ซยืง กดื้งทะ ทคู่ ลู่ง มแช๊แค๊, เลา ดี๊ เก ทล่าง โอคุ้ซูง, ดี๊ เก ทล่าง โอกดื้งไฆวะ ลี้งล๊าง ดี๊ ทเฌ๊ช้า