อีซยา 34 - Northern Pwo Karen Thai Bible

ทต้ะเซ๊ง กเย่ โพล้ง กุ้ชื้อกุ้ชะ

¹ โพล้ง กุ้ชื้อกุ้ชะ ลแพ ซีง-เอ้อ, เกม๊า เฌ๊ฆ้าง เบ้า, บี่ซุ้ ม นี่ คุ้ช๊องแน เท่อ โพล้ง อ ชื้อ ลแพ ซีง-เอ้อ, เกม๊า อางกีล้าง ซ้ะ คุ้ช๊องแน เท่อ-เซ้อ เกม๊า ฌางคูโคล๊งคู ดี๊ ท กุ้เม้ง พี่ โอ อ คู นอ, คุ้ช๊องแน เท่อ เลา ดี๊ ฌางคูคู ดี๊ กเย่ ท พี่ อ เฌ๊นี่ ลู่ง ฌางคูคู

² เมะเว๊ กแช่แยว้ ซ้ะทาง พ้ะดู ดี๊ โพล้ง กุ้ที๊งกุ้ค่าง ดี๊ ซ้ะทาง ดี๊ อ ซึ้พู มู๊ง เลาพะ กแช่แยว้ แม้เฌ๊ฌ้อง อ ซื๊งเว๊, ดี๊ อางกีล้าง เอะ ท แม้ซี๊ง กล้างซี๊ง

³ อ โพล้ง พี่ แบ ท แม้ซี๊ง ลแพ นอ, ม แบ ท เว่งว๊าง ไจทาง ดี๊ กลื่ง น๊าอืง เฌ๊นี่ ดี๊ อ ซื๊งเว๊ อ จู นอ, ม น๊าอืงน๊าอ้อง อ ซื๊งเว๊ อซวีงอเซ๊ง ม แยว้ล้าง แบ ทลู่ง ลแพ นอ ล้อ

⁴ กเย่ เท่อ พี่ อ โอ ลู่ง มุ้คู ลแพ นอ, ม เฌ๊ฌ้อง ล้างแม่ไฆวะ ดี๊ มุ้คู นอ, ม แบ ท ทื๊งไฆวะ บี่ซุ้ดี๊ ไละทื๊ง กเย่ เท่อ พี่ อ โอ ลู่ง มุ้คู ลแพ นอ, ม ล้างเทะ บี่ซุ้ดี๊ เซงแล ล้างเทะ นี่ ลู่ง ซไบ้ะ มื่ง ล้อง-อ้า ล้างเทะ นี่ ลู่ง กูงเย้ มื่งเทิง ล้อง-อ้า นอ ล้อ

⁵ ท่อง ก น้ะ นี่ โอ้ เท่อ, ท๊อง อ บลิ้ โอ้ ลู่ง ทมุ้คู เย้า นอ แคว่เซ้อ, อ ม เฌ๊ล้าง ลู่ง เอโดง เฌ๊ ลู่ง โพล้ง อ ชื้อ พี่ ก อางกีล้าง เกม๊า แม้เฌ๊ฌ้องไฆวะ ลู่ง ทต้ะเซ๊ง พ้า

⁶ กแช่แยว้ อ น้ะ แบโจ ดี๊ ทซวีง แบอ้า ดี๊ ท อซูอไย้ ดี๊ แกะพู อ ซวีง, ดี๊ แมะ แพ๊ อ ซวีง ดี๊ แกะ แพ๊ อ ลี่ อซูอไย้ เมะเว๊ กแช่ยาเว โอ ดี๊ ท แม้ซี๊ง ลื่งทาง เท่อ ลู่ง เว่ง โบรา พ้า โอ ดี๊ ทแม้ซี๊ง พ้ะดู ลู่ง ค่าง เอโดง พ้า

⁷ ทดู โฌ้ ม ล้างเทะเค้า ล พ๊าฆ่าง ดี๊ อ ซื๊งเว๊ ดี๊ งู้ บาง ล พ๊าฆ่าง ดี๊ งู้ แพ๊ พี่ อชองอไคล๊ อ ซื๊งเว๊ อ ที๊งล่างค่างพ้า ม โอฆวี้ ดี๊ ทซวีง ดี๊ ฌางคู ม แบโจ ดี๊ ท อซูอไย้

⁸ เมะเว๊ กแช่ยาเว โอ ดี๊ อ มื่งนี้ง ลู่ง ท แม้แกไท้ อ ฌ่าง โอ ดี๊ เนง ลู่ง ท แม้ช๊าไท้ ซีโยง อ ท คิ้คุ้ไวะวะ อ ฌ่าง

⁹ ฌ้อง เอโดง อ ที๊งกล้อง พู ลแพ นอ, ม เกทางก้ะ มไตว เท้า ดี๊ อ ฌางคู ม เกทางก้ะ มีอ้าแพลแช๊ อี อ ที๊งล่างค่างพ้า ม เก ยาง อ เท้า พี่ มีอาง เว๊

¹⁰ ม ล ล้างไพะ แบ, ทึเมะ ลู่ง มแน้แค๊ เมะ ฌี้, มแช๊แค๊ เมะ ฌี้ อ คูง ม คูง ดี้งทาง ครึๆ อ ม แบ ท ญ๊องไฆวะ โอโปล้ ก้ะ ท้อง โพล้ง กุ้ชู้กุ้ว๊าง โพล้ง ม ล โอ ลี้ แพ๊ เว๊ น่างแฌ้ แบ ล้างชู้ล้างแกย

¹¹ แบเด้าะ ทู โฌะชวี, ดี๊ กล้ะ โด้ง ม แม้นี่ ก้ะ เว๊ เก อ เท่อ บ้างชื้งรื้ง ดี๊ กล้ะ ม โอ เว๊ พี่ นอ กแช่แยว้ ม เชิ่ง ท เติ้งทางเติ้งล้าง อ พลี้ง บีงบูง ลู่ง อ คูด้าง ดี๊ ทูแพล่ นางทู แซ ลู่ง ท โปล้ปลิ้

¹² อ เพล่ดูแม้เท่อบลางพ้า ลแพ นอ, กุ้ เท่อ เม้งฌี้ๆ, พี่นอ, ไจ้ะเว๊ เก บ้างมื่ง ล ซี แบ ดี๊ กเย่ อ เซงคู ม ล โอ ล้า แบ

¹³ ทชูง มื่งเทิง ม เมทาง ลู่ง อ ทล่างคุ้แคว่เท่อ อ คูด้าง แล้แช๊ ดี๊ ย้างพลื่งแซ มื่งเทิง, ม เมทาง ลู่ง อ ทล่างคุ้แคว่จู้เท่อ พ้า อ ม เก ทวีงเม้ง อ ล่าง โอ ดี๊ เก ทูโนะโจะ พ้ะดู อ ล่าง คว้าง พ้า

¹⁴ ดี๊ ทพูแฆ่ เม้ง ม แด โละซ้ะ ดี๊ ทวีงโย่ แกะ แพ๊ ม อางฆื๊ง กุ้ อ ฌุ้พาง ทแจ ลู่ง ทไค้แกล้ ม เฌ๊ โอไปว้ะ พี่ นอ ดี๊ อ แด ทล่าง โอไปว้ะ ลู่ง อ กแช่ อ ฌ่าง

¹⁵ ด้องกอ้อง ม แม้ อ ซวี๊ง, ดี๊ ดีงล้าง พี่ นอ เลา ดี๊ ฌืง อ ดีง, ดี๊ อางกีซยอง ทะ อ พู ลู่ง อ ซยืง เช๊ละ เอ้อ, ไละ ได้ะซ๊า ม โอซยอง ซกุ้ พี่นอ ล เบงๆ, นอ โอ ดี๊ อกู่งอเก้ง

¹⁶ เกม๊า อางฆื๊ง แคว่, ดี๊ เกม๊า พ้ะ นี่ ลู่ง กแช่ยาเว อ ไละ พ้า ลู่ง อ โป้ง พ้า นอ, ล ล้างแม่ น่างเบง แบ ล โอ น่างเบง แบ, พี่ อ กู่ง ล โอ แบ เมะเว๊ กแช่แยว้ อ นุ้ นี่ อางแบเลา เว๊ เย้า ดี๊ กแช่แยว้ อ วีงฌี้แล้แอว้ อางกีซยอง นี่ อ ซื๊งเว๊

¹⁷ กแช่แยว้ พอง เอะ เว๊ อ ไละพู พ้ะดุ้ เท่อ กแช่แยว้ อ จูง, นี่ อางน้าง เอะ เว๊ อ เท่อ, ดี๊ พลี้ง ทู เท่อ อ ซื๊งเว๊ ม นี่ อ เท่อ ล้างชู้ล้างแกย อ ม เปิ่งโอเปิ่งช๊อง พี่ นอ, ท้อง โพล้ง กุ้ชู้กุ้ว๊าง ล้อ