อีซยา 31 - Northern Pwo Karen Thai Bible

ท เก ฌุ้พาง โละซ้ะ ดี๊ อีไย้ะ นอ, อซูงอแซ ล โอ แบ

¹ ท เซงทื่งเฌ๊ฌ้อง แบ โพล้ง ลแพ นอ, พี่ ลี้ล้าง ลู่ง อีไย้ะ, บี่ซุ้ อางท่าง นี่ ทแม้ช้า เลา ดี๊ ช๊องมอง เปิ่ง กซี ลแพ นอ ท เซงทื่งเฌ๊ฌ้อง แบ โพล้ง ลแพ นอ, พี่ อางกีล้าง ซ้ะ ดี๊ เลาะ ดึ้ซึ้, เมะเว๊ อ โอ แอ ดี๊ อางกีล้าง ซ้ะ ดี๊ ซึ้พู เทา กซี, เมะเว๊ อ ซื๊งเว๊ ซีง ลแพ อชองอ ไคล๊ ดู มะ แบเด้าะ ล เฌา แคว่ฆ้าง อีซลาเอง อ กแช่แยว้, พี่ อฌี้อแอว้ นอ-อ้า อางโกอางจ้ะ เท่อ ดี๊ กแช่ยาเว-อ้า แบ

² แบเด้าะ กแช่แยว้ นอ, อไพ่อแซย๊ ปะ, ดี๊ ม เฌ๊โชะ เอะ-อ้ะ ทอ้าทน้ะ กแช่แยว้ ล กุ้นี่ไท้ อลู่งอแท๊ แบ แบเด้าะ ม เฌ้เทิงทาง ดึ้ โละซ้ะ ดี๊ โพล้ง อชื้ออชะ พี่ แม้ทอ้าทซ๊าง ดี๊ ซู้ง โละซ้ะ ดี๊ โพล้ง แม้ ทเด้บ้ะ อ โพล้ง แม้ช้า เท่อ

³ โพล้ง อีไย้ะ เก ที่ กโพล้ง เฆาะ ล้อ, ล เมะ กแช่แยว้ แบ ดี๊ อ กซี นอ เก ที่ ไพ้ะ แย เฆาะ ล้อ, ล เมะ วีงแล้ แบ ท่อง กแช่ยาเว เยาฆ้าง อ จูง นอ โพล้ง แม้ช้า เท่อ นอ, ม แบท้า, ดี๊ โพล้ง ฮะนี่ ทแม้ช้า นอ, ม ล้างเทะเค้า ดี๊ อ ซื๊งเว๊ ซีง ลแพ, ม เซงทื่งเฌ๊ฌ้องไฆวะ เลาพะ

⁴ เมะเว๊ กแช่ยาเว ไคล้ ดี๊ แย้ บี่อี้ง ไจ้ะเว๊ “บี่ซุ้ดี๊ คี๊ยื่ง-อ้า, คี๊ยื่ง แพ๊-อ้า, พี่ เคิ่ง เท่อ โอ ลู่ง อ แชอาง เช๊คู ดี๊ ท่อง อ เว๊ กุ้ นี่ โพล้ง ลื่งแกะ ล มู๊ง เฌ๊ ดึ้-อ้ะ นอ อ เว๊ ล ซ้ะเมซ้ะไพล้ อ ซื๊งเว๊ ลแพ นอ, อ ลู่ง กุ้ซย้ะ เท่อ แบ ดี๊ ล เซิงไพ่ซ้ะว้ะ ดี๊ อ ซื๊งเว๊ อ ลู่ง เซ๊ ตทูงล้างคล้าง นอ แบ ทบี่นอ, กแช่ยาเว ซึ้คู ดูทึชองทึ ม เฌ๊ล้าง บี่ซุ้ ดึ้ซึ้ ลู่ง ทลู่ง ซีโยง คู ดี๊ อ ท จ้องม๊อง คู

⁵ บี่ซุ้ดี๊ ทู พี่ แว่ อ ได้ะ, บี่นอ ล้อ กแช่ยาเว ซึ้คู ดูทึชองทึ ม ยู่ทะแคว่ทะ เยรูซเลง กแช่แยว้ ม ยู่ทะแคว่ทะ เว๊ ดี๊ แม้พ้องพลิ้ เว๊ กแช่แยว้ ม แพ๊ ค๊างพะ ดี๊ แม้ช้า ทม๊า

⁶ โอ้, โพล้ง เฌงพูฆ๊างพู อีซลาเอง-เอ้อ, เกม๊า เฌ๊ไท้ฌูงไท้ กแช่แยว้ พี่ น ซื๊ง กไบล้ะกแบล ดี๊-อ้ะ ลู่ง ออ้าอซ๊าง น้ะ

⁷ เมะเว๊ ล นี้ง แย๊ นอ, โพล้ง ล แฌ้ๆ, ม ญ๊องไฆวะ ทเค่งทฌ้าง พี่ ไต้ เว๊ ดี๊ จี้, ดี๊ อ ทเค่งทฌ้าง พี่ ไต้ เว๊ ดี๊ ท๊อง, พี่ น จูง นี่ แม้ทาง เว๊ พี่ อ เด้บ้ะ น้ะ ลู่ง น ฌ่าง

⁸ ฌ้อง โพล้ง อะซีเรีย ม ล้างเทะเค้า ดี๊ น้ะ พี่ ล เมะ กโพล้ง อ เท่อ แบ ดี๊ น้ะ พี่ ล เมะ กโพล้ง อ เท่อ แบ นอ, ม อางไฆวะ-อ้ะ ดี๊ อ เว๊ ม ซยู๊คุ้ซูงไฆวะ น้ะ ดี๊ อ โพล้ง แคว๊ น่างบางซ้ะบาง นอ, ม แบ ท แคแน เจ่ไฌ่เจ่แบ้

⁹ อ ทล่างทุ้กดื้งซ้ะ ม เลาไฆวะ ดี๊ ท เซิงไพ่ซ้ะว้ะ ดี๊ อ เซงคู ลแพ นอ ม ญ๊องไฆวะ ตไก้ยะ แม้ไน เท่อ ดี๊ ท ซ้ะเมซ้ะไพล้ กแช่ยาเว พี่ อ มี โอ ลู่ง ซีโยง พ้า ดี๊ กแช่แยว้ พี่ อ มีอ้า ล่าง โอ ลู่ง เยรูซเลง พ้า นอ, ไจ้ะเว๊ บี่อี้ง ล้อ