อีซยา 30 - Northern Pwo Karen Thai Bible

ทอางกีล้าง ซ้ะ ดี๊ อีไย้ะ นอ อซูงอแซ ล โอ แบ

¹ “ท เซงทื่งเฌ๊ฌ้อง แบ พู ลี้ง พี่ กไบล้ะกแบล”, กแช่ยาเว ไจ้ะเว๊ บี่อี้ง “โพล้ง พี่ ช๊องมองเว้ทแม้, แบเด้าะ ล เมะ ก เท่อ แบ โพล้ง แม้ ทเอิ้งล้าง, แบเด้าะ ล เมะ ก ท แบซ้ะ แบ บี่ซุ้ แม้ แอทาง ทเด้บ้ะ คี๊งโทะ

² กเย่ โพล้ง ลี้ ลู่ง อีไย้ะ พี่ ล นี่ อางโกอางจ้ะ เท่อ ดี๊ เฆ้อ แบ บี่ซุ้ ม ลี้ โอคุ้ซูง, ลู่ง ฟาโร อ ท ยู่ทะแคว่ทะ พ้า ดี๊ ม อางฆื๊ง ทล่าง ทุ้ กดื้ง ซ้ะ, ลู่ง อีไย้ะ อ กดื้งแล้ ซยืง พ้า

³ อกย้องบี่นอ, ฟาโร อ ท ยู่ทะแคว่ทะ ม เกทางก้ะ น ท ฌางแช้ฌางเด ดี๊ ทล่าง ทุ้ กดื้ง ซ้ะ ลู่ง อีไย้ะ กดื้งแล้ ซยืง อ เพ๊ละ, ม เกทางก้ะ น ท แช้เมะแช้แน๊

⁴ อไฌ่บี่อี้ง ทึเมะ อ ซื๊งเว๊ อ กดูกแซย่ โอ ลู่ง โซอาง ดี๊ กเย่ อ โพล้ง ไคล้เดิง เท่อ ลี้ท้อง ฮาเน

⁵ โพล้ง กุ้แฌ้ นี่ แบ ท ฌางแช้ฌางเด ดี๊ โพล้ง ล ชื้อ พี่ ล ล้างเปิ่ง ดี๊-อ้ะ แบ พี่ ล นี่ เฌ๊โชะ เอะ-อ้ะ ท แม้ช้า-อ้า, ท ล้างเปิ่ง-อ้า แบ เฌ๊โชะ ที่ ท ฌางแช้ฌางเด ดี๊ ท ฌางแช้เมะฌางแช้แน๊

⁶ ทไคล้ พี่ อ ชอง แบฆ้ะ ดี๊ ทพูแฆ่ เม้ง ลู่ง เนเกะ ลี้ ลู่ง ที๊งล่างค่างพ้า ลู่ง ทน้ะทโน๊ง ดี๊ ซ้ะ เฌ๊ฌ้อง น้ะ ทล่าง พี่ คี๊ยื่ง มู่ ดี๊ คี๊ยื่ง แพ๊ เลา ดี๊ ฌู่ง พ้ะโท๊ ท่อง, ดี๊ ฌู่ง เมยาเซา อ ซื๊งเว๊ ลแพ นอ ต้างทาง อคองอแซย้ ลู่ง แลว้ อ โคล๊ง คู ดี๊ ต้างทาง อฆ้าอโฆ่ ลู่ง เอ้า อ บู้ง คู ลี้ ลู่ง โพล้ง ล ชื้อ พี่ ล ล้างเปิ่ง ดี๊-อ้ะ แบ

⁷ เมะเว๊ อีไย้ะ อ ท แม้ช้า นอ, อซูงอแซ ล โอ แบ ดี๊ ล ล้างเปิ่ง แบ อกย้องบี่นอ, ก กุ้-อ้ะ บี่อี้ง ราฮ้ะ พี่ ชี๊น้าง ไก้ไม่”

โพล้ง เฌงพูฆ๊างพู พี่ กไบล้ะกแบล

⁸ ค๊องเนงอี้ง, เกม๊า ลี้ แดเทา, ดี๊ กวิ้ล้าง ลู่ง ทปางเป คู ลู่ง อ เมะแซ พ้า ดี๊ กวิ้ไน ลู่ง ไละ พ้า บี่ซุ้ อช๊าอโท่ ชู่งแย๊โค๊ พี่ ม เฌ๊ท้อง อ ม เก พีงญาง ครึๆ

⁹ เมะเว๊ อ เว๊ เก โพล้ง เฌงพูฆ๊างพู พี่ กไบล้ะกแบล เก พู ลี้ง พี่ ไคล้ คีงอูง เท่อ เก พู ลี้ง พี่ ล ญ่อง ชู่ง กแช่ยาเว อ ทอางแม้เลา แบ

¹⁰ อ ซื๊งเว๊ ไคล้ ดี๊ โพล้งโล้เว้พ้ะเว้เท่อ บี่อี้ง, “แด เท่อ ล ฌี้” ดี๊ ไคล้ ดี๊ โมไคล้คิ้ แยว้ บี่อี้ง, “โล้เว้พ้ะเว้ เอะ เฆ้อ ท พี่ อ แบเมาะ ล ฌี้ เกม๊า ไคล้ ดี๊ เฆ้อ ที่ เท่อ พี่ อพุ้อพลี๊ เกม๊า โล้เว้พ้ะเว้ ทอางโล๊

¹¹ เกม๊า ไจพ้องไฆวะ เกล้, เกม๊า แกยไฆวะ ซ้ะ ดี๊ เกล้ เกม๊า ก ต้องนอง โละซ้ะ ดี๊ อีซลาเอง อ กแช่แยว้, พี่ อฌี้อแอว้ ล้า ล ฌี้”

¹² อกย้องบี่นอ, อีซลาเอง อ กแช่แยว้ พี่ อฌี้อแอว้ ไจ้ะเว๊ บี่อี้ง “เป๊งนี่ น ดึ้เดว ทไคล้ อี้ง ดี๊ อางกีล้าง ซ้ะ ลู่ง ท แคแน พ้า ดี๊ ท ลโต้ลล้อง แบ ดี๊ เปิ่ง ท ลแพ นอ

¹³ อกย้องบี่นอ, ทเด้บ้ะ อี้ง ม เก เอะ แน้ บี่ซุ้ดี๊ กางแป พ้ะโท๊ อ ล่าง เท้พ้ะ โพลทาง พี่ ม ล้างฆ่อง พี่ ม ล้างฆ่อง ค๊องเนงอี้ง ล ทีงฆ่าง, เมาะ พล้ะไช้ะ เมะ

¹⁴ อ ม ล้างฆ่อง บี่ซุ้ดี๊ ซแล้ ไต้พ้า, อ ทพ้าทล่าง พี่ อ เฌ๊ฌ้อง ไฆวะ พี่ แบ ท ท่างพ้ะ ด้องซุ้ ล ย๊างซ้ะ เท่อ แบ พี่ ล แด ทพ้าทล่าง นอ อไก้อโค๊ แบ เมาะ ม เจ เบลิงไฆวะ มี ลู่ง มีอ้า อ ล่าง ฌ๊างไท้ะ-อ้า เจ่ เบลิงไฆวะ ที๊ง ลู่ง อ โบ้ อางกี ที๊ง-อ้า นอ แบ”

¹⁵ อไฌ่บี่อี้ง, ทอดูทึโท๊ทึ กแช่ยาเว, เมะเว๊ อีซลาเอง อ กแช่แยว้ พี่ อฌี้อแอว้ ไคล้ ไจ้ะเว๊ บี่อี้ง “ลู่ง ท แกยไท้ซ้ะ ดี๊ โอโท๊ เฌิ่งเพิ่ง นอ, น ซื๊ง ซีง ลแพ ม พ้องพลิ้ ท โอกโช้ ไก้ไม่ ดี๊ ท อางกีล้างซ้ะ นอ, ม เก นไฌ่นแบ้ แบเด้าะ น ล ญ่อง แม้โพะ อ ไค๊ แบ

¹⁶ ดี๊ น ซื๊ง เว๊ ซีง ลแพ ไจ้ะ บี่อี้ง ‘ล แม้ แบ, ก ม เทา กซี ไจคุ้ซูงไฆวะ’ อกย้องบี่นอ, น ซื๊ง ม ไจคุ้ซูงไฆวะ ดี๊ ไจ้ะ บี่อี้ง, ‘ก ม เทา กซี เพล ทึ’ อกย้องบี่นอ, โพล้ง ล้องช่อง แน้ ม เพล ทึ

¹⁷ โพล้ง อ แฌ้ ล ม๊า ม ไจคุ้ซูง, ลู่ง โพล้ง ล แฌ้ อ ท ไคล้ เคิ่ง อกย้อง น ซื๊งเว๊ ซีง ลแพ ม ไจคุ้ซูง, ลู่ง โพล้ง เย่ แฌ้ อ ท ไคล้เคิ่ง อกย้อง ท้อง ลู่ง น ซื๊ง ม ล้างลื๊อ ก้ะ บี่ซุ้ดี๊ ตไก้ยะ แม้ไน เท่อ, อ เทิง ลู่ง ทลู่ง อ จ้องคู บี่ซุ้ดี๊ ตไก้ยะ แม้ ซีงแฌ๊ เท่อ ลู่ง ทจ้องม๊อง คู”

กแช่แยว้ อ ทเอิ้งล้าง ดี๊ ซีโยง

¹⁸ อกย้องบี่นอ, กแช่ยาเว โอคุ้แท๊ พี่ ม ย๊างซ้ะ แน้ อกย้องบี่นอ, กแช่แยว้ ม เฌ้เทิงทาง บี่ซุ้ ย๊างซ้ะ น ซื๊ง เมะเว๊ กแช่ยาเว เก กแช่แยว้ พี่ อเกิ้งอแบ โพล้ง กุ้แฌ้ พี่ โอคุ้แท๊ กแช่แยว้ นอ, โอมึโอพ้า

¹⁹ เอ้อ, โพล้ง เฌงพูฆ๊างพู พี่ โอ ซีโยง พ้า, โพล้ง พี่ เปิ่งโอเปิ่งช๊อง เยรูซเลง พ้า, น ล ฌาง ล้า แบ, กแช่แยว้ ม ย๊างซ้ะ แบ น ลู่ง กุ้ทาง เท่อ เต้ๆ, ล้อ, ท่อง กแช่แยว้ แน่ฌ๊า เว๊ นอ, อ ม ไคล้ช๊า แน้

²⁰ ทึเมะ ทอดูทึโท๊ทึ กแช่ เกล๊าง เอะ แน้ กู ลู่ง ทน้ะทโน๊ง, ดี๊ เกล๊าง เอะ น ซื๊ง ที๊ง ลู่ง ทน้ะเซิงน้ะซ้ะ, ทึเมะ บี่นอ ฌี้ นอ, น คู ดูทึโท๊ทึ ม ล โอคุ้ซูง ล้า แบ, แบเด้าะ น เมะคลี๊ง ม แด น คู ดูทึโท๊ทึ

²¹ ดี๊ ท่อง น แกย น ซ้ะ ลู่ง อ ฆุ้ ล โค๊ ฌี้, แกย น ซ้ะ อ จี ล โค๊ ฌี้ นอ, น แน่ ม แน่ฌ๊า ทไคล้ ลู่ง น ล่างไค๊ ล โค๊ บี่อี้ง, “อ อี้ง เก เกล้, เกม๊า ลี้ ลู่ง เกล้ ล บ้อง อี้ง”

²² ฌ้อง น ม ญ๊องไฆวะ น ทเค่งทฌ้าง แพล้กีงแพล้ไว้ ลู๊ง ดี๊ จี้ ดี๊ น ทเค่งทฌ้าง โล๊ล้าง นี่ จูง ดี๊ ท๊อง, น ม แม้ ที่มื่งที่พ้ะไฆวะ-อ้ะ, ด้องซุ้ ท ลเช๊งลเกล้ง แบ, ดี๊ น ม ไคล้ ดี๊-อ้ะ บี่อี้ง, “ไจ ท่อง อ พ้องไฆวะ”

²³ ดี๊ กแช่แยว้ ม เกล๊าง ทเฌ๊ช้า เอะ น ทคลี๊งทโพ๊ พี่ น ฆวีงล้าง ลู่ง ฌางคู คู, ดี๊ เกล๊าง บืง พี่ เก ฌางคู อซูงอแซ, บืง มแอมโฌ่ ดี๊ มกู้งมล๊า, ล นี้ง แย๊ นอ, น ทพูแฆ่ น๊างมู๊ง พี่ น ลื่ง-อ้ะ, ม อาง เท่อ โอ ลู่ง นาง ญ้าง พ้ะเล่ พ้า

²⁴ งู้ ดี๊ แลว้ พี่ เจ่ แม้ไชะ นอ, ม อาง ทอาง ลู่ง อ ฌี้ พี่ ฌื่ง-อ้ะ ดี๊ ลูงไควะ ดี๊ ท้ะแท่ ชิ้ เท่อ

²⁵ ดี๊ ทลู่ง คู พ้ะโท๊ กุ้ โพลง, ดี๊ ท จ้องคู พ้ะโท๊ กุ้ อ จ้อง นอ, ม โอ ดี๊ ที๊งกล้อง พู พี่ โอ ดี๊ ที๊ง แยว้ล้าง, ลู่ง มื่ง ล นี้ง แย๊ พี่ โอ ดี๊ ท แม้ซี๊ง พ้ะดู โละซ้ะ, พี่ ทล่างคุ้แคว่จู้เท่อ ล้างฆ่อง นอ ล้อ

²⁶ แอเละ อ นอ ได้ะ, แล้ อ พ้าง ม บี่ซุ้ดี๊ มื่ง อ พ้าง, ดี๊ มื่ง อ พ้าง ม พ้าง เก เนว๊โทะ, บี่ซุ้ดี๊ มื่ง เนว๊ นี้ง อ พ้าง, ลู่ง มื่งนี้ง พี่ กแช่แยว้ ไบ้ เอะ อพูอลี้ง อ พ้าล่าง, ดี๊ แม้ก้องแย่ เอะ เว๊ อ ล่าง ทางลึ้ทางแล๊ พี่ กแช่แยว้ ท่าง-อ้ะ นอ ล้อ

ทต้ะเซ๊ง อะซีเรีย

²⁷ อี้งเซ้อ, กแช่ยาเว อเม้งอแซ เฌ๊นี่ ลู่ง อ ไย้ คู่เล้า ดี๊ กแช่แยว้ อ ท ซ้ะทาง, ดี๊ ทคูง ไบ้ะไทะ พี่ อ ดี้งทาง กแช่แยว้ อ นุ้เฌะ โอ ฆวี้ ดี๊ ทซ้ะทาง พ้ะดู ดี๊ กแช่แยว้ อ พลี้ บี่ซุ้ดี๊ มีอาง เฌ๊ฌ้อง เท่อ

²⁸ กแช่แยว้ อ ลี้ง แซทางแซล้าง บี่ซุ้ดี๊ ที๊งกล้อง พู พี่ กลึ้ไบ้ะ เท่อ ล้างอวีงล้างพะ พี่ กลึ้ไบ้ะ เท่อ พ้ะโท๊ ท้อง โคะบ้อง บี่ซุ้ ม ฌื่ง กเย่ โพล้ง กุ้ชื้อกุ้ชะ, ดี๊ ทฆี ฌื่ง เท่อ ลู่ง ทแม้ เฌ๊ฌ้อง พ้า ดี๊ ม ท๊างทาง กื่อ ลู่ง โพล้ง กุ้ชื้อกุ้ชะ ลแพ นอ, อ แคฆีง, บี่ซุ้ ลี้ฌ้า เว๊

²⁹ น ซื๊ง ม โอ ดี๊ แท๊ซ้ะอวีง บี่ซุ้ดี๊ มื่งแน้ พี่ โอ ดี๊ ท อ ไฌ่ แม้มึอางอวีง ซยื๊งซย้อง, ดี๊ โอ ดี๊ ทเซิงมึซ้ะมึ บี่ซุ้ดี๊ โพล้ง พี่ ไจทาง โพะ ปี้ง เซ๊ อ ไค๊, บี่ซุ้ ม ลี้ ลู่ง กแช่ยาเว อ ทลู่ง, ท้อง อีซลาเอง อ กแช่ ไล๊

³⁰ ดี๊ กแช่ยาเว ม ดึ้ เกม๊า โพล้ง แน่ฌ๊า อ ลู่ง เซ๊ พ้ะดู, ดี๊ ม ดึ้ เกม๊า แด อ จูง พี่ เป้ล้าง เท่อ ดี๊ ท ซ้ะทาง พ้ะดู, ดี๊ มีเค้ อาง เฌ๊ฌ้อง เท่อ, เลา ดี๊ ทเฌ๊ช้า พ้ะดู ดี๊ ลี้งเฌ๊ พ้ะดู ดี๊ มื่งแซ ล้าง

³¹ โพล้ง อะซีเรีย ม ไพ้ะฆิ้โค๊ฆิ้ ดี๊ กแช่ยาเว อ ลู่ง เซ๊, กแช่แยว้ ม ท่าง เท่อ ดี๊ อ เซง

³² ดี๊ นางพลี พี่ เจ่ แม้เตาแม้แต๊ เท่อ กุ้ อ ทีง, พี่ กแช่ยาเว เป้ล้าง-อ้ะ อล้องอย่าง นอ, ม พุ้ โละซ้ะ ดี๊ รางมานา ดี๊ ทแน่พี่โอดี๊ อโน้ง, ดี๊ กแช่แยว้ ม ดึ้-อ้ะ ลู่ง ทดึ้ทชาง พ้า ดี๊ จูง พี่ เว่งว๊าง อ ซ้ะ

³³ เมะเว๊ ทล่าง ลู่ง เช้า เท่อ อ ฌ่าง นอ, เตะ เว้ เว๊ ไยะเย้า, เอ้อ, แด้ เว้ เว๊ ลู่ง กจุ้แฆว้ อ ฌ่าง, ทล่าง ล้างด้ะ อ เทิง นอ โยะ ดี๊ เล่, ล พ๊าฆ่าง ดี๊ มี ดี๊ เซงมื่ง แอฌี่งแอฌ้อง, เมะเว๊ กแช่ยาเว อ ลี้ง แซทางแซล้าง นอ, บี่ซุ้ดี๊ มีอ้าแพลแช๊ อี อ กล้อง, พี่ เช้า เว๊ เกม๊า อ เค้ทาง นอ ล้อ