อีซยา 17 - Northern Pwo Karen Thai Bible

ทไคล้ พี่ อ ชอง แบฆ้ะ ดี๊ เว่ง ดามากา

¹ ทไคล้ พี่ อ ชอง แบฆ้ะ ดี๊ เว่ง ดามากา อี้งเซ้อ, ดามากา ม ล โอ ล้างลื๊อ เก เว่ง ล้า แบ ดี๊ ม เกทาง ก้ะ ท แค่เทาแค่ไช้ะ อ โป้ง

² อาโรเออ อ เว่ง ลแพ นอ, ม แบ ท ญ๊องไฆวะ โอโปล้ ก้ะ ม เกทาง ก้ะ ทล่าง ลู่ง แมะ แกะ น๊างมู๊ง อ ฌ่าง ทล่าง พี่ อ ซื๊งเว๊ ม มี๊งน้าง เว๊, พี่ โพล้ง ล โอ แม้ ซ้ะเม-อ้ะ น่าง แฌ้ แบ

³ ทล่างทุ้กดื้งซ้ะ ม ล้างแม่แดไฆวะ เอฟาอีง ดี๊ มื่งบ้าง ม ล้างแม่แดไฆวะ ดามากา ดี๊ ซีรี อ โพล้ง พี่ โอ ล้างลื๊อ ก้ะ นอ ม เก บี่ซุ้ดี๊ โพล้ง อีซลาเอง อฆี๊งอแล้ กแช่ยาเว ซึ้คู ดูทึชองทึ โล้ เว๊ บี่อี้ง ล้อ

⁴ ดี๊ โอก้ะ ลู่ง ไค๊ ล นี้ง แย๊ นอ ยาคุ้ อฆี๊งอแล้ ม ล้างไช้ะล้างย่อง ดี๊ อล้องอย่าง พี่ อบองอซู นอ ม ล้างฆวี่

⁵ ม เก บี่ซุ้ดี๊ โพล้ง เก้าบืง, พี่ อางกีซยอง บืง มื่งเทิง, พี่ บุ้ ชี๊เทิง อ ซ้ะ อ จูง ม เก้า บืง แซเชา ดี๊ ม เก บี่ซุ้ โพล้ง พี่ อางกี บืง แซเชา ลู่ง ทลู่ง เรฟาอีง คางไท้ะ

⁶ แบเด้าะ ท เก้านี่ พี่ โอ ล้างลื๊อ ก้ะ พี่ นอ ม เก บี่ซุ้ดี๊ ท ท่าง ไพ มื่งเทิง พี่ โอ เมาะ เว๊ คี๊ง โพลง-อ้า, ซ๊า โพลง-อ้า พี่ โอ ล้างลื๊อ ก้ะ ลู่ง อ คี๊งจุ้ โท๊ ทึ-อ้า เมาะ ลี่งโพลง ท้อง เย่โพลง-อ้า พี่ โอ ลู่ง เซง อ ได้ ล้อง กแช่ยาเว, อีซลาเอง อ กแช่แยว้ โล้ เว๊ บี่อี้ง ล้อ

⁷ ล นี้ง แย๊ นอ, โพล้ง ม ควี๊งคูแกยแน่ ดี๊ อ กแช่แยว้ พี่ ไต้ล้าง เท่อ, ดี๊ อ เมะคลี๊ง ม แคว่ อีซลาเอง อ กแช่แยว้ พี่ อฌี้อแอว้

⁸ อ เว๊ ม ล ควี๊งคูแกยแน่ ดี๊ ทลื่งล่าง พี่ แม้ เว๊ ดี๊ อ จูง นอ แบ, ดี๊ อ เว๊ ม ล แคว่ เท่อ พี่ อ จูงโน้ง แม้ทาง เว๊ นอ แบ, ทึเมะ ม เก เฌเทิง อาเชรา เมะ ฌี้, ทล่าง เช้า ทน๊าม๊า เมะ ฌี้

⁹ ล นี้ง แย๊ นอ, อ เว่ง พี่ อเฌิ่งอค๊า ซีง ลแพ, พี่ อ ซื๊งเว๊ ญ๊องไฆวะ เว๊ เกม๊า อ โอโปล้ ก้ะ, เป๊งนี่ ลู่ง โพล้ง อีซลาเอง อกย้อง, ม เก บี่ซุ้ดี๊ ทล่าง ญ๊องไฆวะ ลู่ง ทเคแกล้-อ้า, ลู่ง เซงแกล้-อ้า นอ, ดี๊ ม เกทาง ก้ะ ทล่าง โอโปล้ ก้ะ ล้อ

¹⁰ เป๊งนี่ น เฌ๊พลุ้ ซ้ะนางไฆวะ น กแช่แยว้ เก ทพ้องทพลิ้ ดี๊ ล นางแบ น กแช่แยว้ ไล๊ ลู่ง ท ล่าง โอคุ้ซูง นอ แบ ทบี่นอ, น เซิงล้าง เซงมื่งเทิง ลู่ง ท เซิงมึซ้ะมึ ดี๊ ชิ้ล้าง โพล้งลชื้อแด อ ซไบ้ะแซ ได้

¹¹ ทึเมะ น แม้ เกม๊า อ เมทาง ล นี้ง แย๊ พี่ น เซิงล้าง-อ้ะ ดี๊ แม้ เกม๊า อ โพ๊ทาง ลู่ง โฌ้โค๊ ล นี้ง แย๊ พี่ น ฆวีงล้าง-อ้ะ ทึเมะ บี่นอ ฌี้ นอ, ท แม้นี่ อซูงอแซ นอ ม ไจคุ้ซูงไฆวะ เว๊ ลู่ง มื่ง ล นี้ง แย๊ ท เมะมองแน๊อึ้, ดี๊ ทแช๊ ทคลี พี่ แม้ ก้องแย่ ล ซี แบ

¹² เอ๊, โพล้ง เฌงพูฆ๊างพู อ ลู่ง เซ๊ตทูงเซ๊ล้างคล้าง แอฌี่งแอฌ้อง เซ๊ พ้ะดู บี่ซุ้ดี๊ ปางเล อ ลู่ง เซ๊ ล้างว้างล้างซวาง เอ๊, โพล้ง กุ้ชื้อกุ้ชะ ลแพ นอ, อ ลู่ง เซ๊ ล้างว้างล้างซวาง เซ๊ ล้างว้างล้างซวาง, บี่ซุ้ดี๊ ที๊ง พี่ อไฌ่อแบ้ โอ แอ อ ลู่ง เซ๊ ล้างว้างล้างซวาง

¹³ กเย่ โพล้ง กุ้ชื้อกุ้ชะ, แม้ เซ๊ อ ลู่ง ล้างว้างล้างซวาง, บี่ซุ้ดี๊ ที๊ง แอฌี่งแอฌ้อง อ ลู่ง แบเด้าะ กแช่แยว้ ม แม้น้าแม้ฆ่าง -อ้ะ, ดี๊ อ เว๊ ม ไจคุ้ซูงไฆวะ ไย้โยะ แบ ท โฌ๊ไจไฆวะ บี่ซุ้ดี๊ พี๊ซวิ้, พี่ แบ ลี้งอูง-อ้ะ ลู่ง ทลู่ง คู บี่ซุ้ดี๊ ทมูงทมวี๊ง พี่ อ ดี้งไฆวะ ลู่ง ลี้ง อ เมะแซ พ้า

¹⁴ แคว่เซ้อ, ลู่ง มแฌล้างโค๊ นอ โอ ดี๊ ท ไพ้ะฆิ้โค๊ฆิ้ ลู่ง ท ล คลึ้ พ้างทาง ได้ะ แบ นอ, อ ซื๊งเว๊ ซีง ลแพ ล โอ ล้า แบ อ อี้ง เก โพล้ง อมยู๊อจะ พี่ ย้ะโละ นี่ ก้ะ กคองกแซย้ ดี๊ เก โพล้ง พี่ ตมละ เฆ้อ อ เท่อ ล น้าง