อีซยา 1 - Northern Pwo Karen Thai Bible

¹ ทแดเว้ แบฆ้ะ ดี๊ ยูดา ดี๊ เยรูซเลง, พี่ อามอ อ พู อีซยา แด แบ เว๊ ลู่ง ยูดา อ กจุ้แฆว้ อูซียา โยทาง อาฮ้ะ ดี๊ เฮเซคียา อ ชู้ แค๊

ยูดา อ ทอ้าทซ๊าง ลแพ นอ

² ทมุ้คู-เอ้อ, เกม๊า คุ้ช๊องแน เท่อ, ฌางคูโคล๊งคู-เอ้อ, เกม๊า ดุ้ แน่ เมะเว๊ กแช่ยาเว ไจ้ะเว๊ บี่อี้ง “ก นี่ ลื่ง พู ดี๊ เกม๊า อ ดูทางโท๊ทาง แบเด้าะ อ ซื๊งเว๊ นี่ กไบล้ะกแบล ดี๊ เฆ้อ

³ งู้ นอ ซีงแฌ๊ อ กแช่ ได้ะ ดี๊ แลว้ นอ ซีงแฌ๊ อ เซงคู อ ทล่าง อางกี นาง แบเด้าะ อีซลาเอง ล ซีงแฌ๊ เท่อ แบ ก พู ก ลี้ง แน เท่อ ล ซี แบ”

⁴ เอ้อ, กโพล้ง กุ้ชื้อกุ้ชะ อ ทเด้บ้ะ ตาง กโพล้ง อ ชื้อ พี่ อ ยุ้ ทอ้าทซ๊าง อ ทอวีงทยุ้ โพล้งอ้าโพล้งซ๊าง อชื้ออชะ พู พี่ แม้ เฌ๊ฌ้อง เท่อ อ ซื๊งเว๊ ซีง ลแพ ญ๊องไฆวะ กแช่ยาเว อ ซื๊งเว๊ ดึ้เดว อีซลาเอง อ กแช่แยว้ พี่ อฌี้อแอว้ อ ซื๊งเว๊ ซีง ลแพ, วีงโด้งโคล๊งไฆวะ อ ซ้ะ ดี๊ กแช่แยว้

⁵ แบทเล้ น ซื๊ง แบซ้ะ แบ ท พลี ได้ะ? แบทเล้ น ซื๊ง กไบล้ะกแบล ครึๆ? คูฆีง นอ แช๊ เลาพะ เซิงซ้ะ ล้างเพาล้างแช่ไฆวะ เลาพะ

⁶ ลโค๊ลู่ง คางย๊างซ้ะ พ้า ท้อง ลู่ง คูฆีง นอ ท บี่ อ ล่าง ล โอ น่างเม้ง ล้า แบ โอ ที่ ทางลึ้ทางแล๊ ดี๊ เก นางพลี อ ล่าง เลา ดี๊ เก พ้าล่าง ซวีงล้าง ล นี่ ชี่งทางไฆวะ เว๊-อ้า, ล ไบ้ทะ เว๊-อ้า แม้ มึทาง ดี๊ ทซู-อ้า แบ

⁷ น ซื๊ง ค่าง โอโปล้ ก้ะ กูกิ้ น เว่ง ลแพ นอ แบ ทเช้า อ้ะ ดี๊ มี น ที๊งล่างค่างพ้า ลแพ นอ โพล้งลชื้อแด แม้ เฌ๊ฌ้องไฆวะ เว๊ ลู่ง น ซื๊ง เมะแซ พ้า อ โอโปล้ ก้ะ กูกิ้, บี่ซุ้ดี๊ โพล้งลชื้อแด แม้ เฌ๊ฌ้อง เว๊

⁸ ซีโยง อ พูมืง นอ, แบ ท ญ๊องไฆวะ บี่ซุ้ดี๊ เด้ พู ลู่ง ซไบ้ะ โซ๊ง พ้า บี่ซุ้ดี๊ เด้ ลู่ง ฆึ้ ที้ง พ้า บี่ซุ้ดี๊ เว่ง พี่ แบ ท กาไบ้ะ พ้องวะ

⁹ กแช่ยาเว ซึ้คู ดูทึชองทึ เมะ ล นี่ อางกี ล้างลื๊อ เอะ เฆ้อ โพล้ง ล น้าง แบ นอ เฆ้อ นอ ก ม เก บี่ซุ้ดี๊ เว่งโซโดง ดี๊ เก บี่ซุ้ดี๊ เว่ง โกโมรา นอ ล้อ

¹⁰ เกม๊า คุ้ช๊องแน กแช่ยาเว อลู่งอแท๊ โพล้ง โพะคอง เว่งโซโดง-เอ้อ เกม๊า ดุ้แน่ คุ้ช๊องแน ก กแช่แยว้ อ ทอางแม้เลา โพล้ง เฌงพูฆ๊างพู เว่ง โกโมรา

¹¹ กแช่ยาเว ไจ้ะเว๊ บี่อี้ง “น ทลื่งทาง แอฌี่งแอฌ้อง นอ, ม เก ท ล้างเปิ่ง เอะ เฆ้อ ทเม้งเล้? แกะ แพ๊ พี่ เก ทลื่งทางเช้าทพูแฆ่น๊างดื้ง นอ, ก ท โอ แอ น้ะ เย้า เลา ดี๊ ทพูแฆ่ พี่ ลื่ง ดูทาง บองทาง เว๊ ซีง ลแพ นอ อ ซู ก ล ซ้ะอวีงซ้ะโทะ ดี๊ งู้แพ๊ อ ซวีง-อ้า แกะ พู อ ซวีง-อ้า, แมะ แพ๊ อ ซวีง-อ้า แบ

¹² “พี่ น เฌ๊ฆ้าง เนโพล ทาง ซ้ะ ลู่ง ก เมะแซ พ้า นอ โพล้งเล้ อางท่าง เกม๊า น ซื๊ง แม้ บี่อี้ง พี่ เฌ๊ฆ้าง ไย่เละค๊างพะ เท่อ ลู่ง ก คว้าง พ้า?

¹³ ทเทว๊ ลเฌิ่งลค๊า แบ นอ, เฌ๊โชะ ล้า ล ฌี้ ทน๊าม๊า นอ เก ท ล้าง ซ้ะลูซ้ะไล้ะ ลู่ง ก ฌ่าง มื่งนี้ง แม้ ทไฌ่ แม้มึอางอวีง แล้ ทางซ๊าง, มื่ง ดืงเท่อ ดี๊ ท กุ้ เฌ๊ โอซยอง นอ ทแม้ ทอ้าทซ๊าง ล พ๊าฆ่าง ดี๊ ท แพโซง ซยื๊งซย้อง นอ, ก โอโก้ง ล ซี แบ

¹⁴ ก แช๊เมะไฌ๊ซ้ะ ดี๊ น มื่งนี้ง แม้ ทไฌ่ แม้มึอางอวีง แล๊ ทางซ๊าง, ดี๊ มื่งนี้ง แม้ ทไฌ่ แม้มึอางอวีง บี่ซุ้ดี๊ น ท อางกีล้าง เว้ นอ เกทาง ก้ะ ทอวีงทยุ้ ฆ๊า ลู่ง ก ล้อง ก อวีง ก ยุ้-อ้ะ ท๊อง ทไปว้ะ ก ซ้ะ เย้า

¹⁵ พี่ น เยาทาง น จูง ก ม กาไบ้ะไฆวะ ก เมะ ดี๊ แน้ ทึเมะ น ม ชูแพอางท่าง เท่อ แอฌี่งแอฌ้อง ฌี้ นอ ก ล คุ้ช๊องแน แบ เป๊งนี่ น จูง โอ ฆวี้ ดี๊ ทซวีงทเซ๊ง

¹⁶ เกม๊า อางกีฌี้ ล้าง ซ้ะ, ดี๊ แม้ น ซ้ะ เมะเช๊งเมะเกล้ง เกม๊า น แม้ไฆวะ น ทอ้าทซ๊าง ท่อง อ พ้องไฆวะ ดี๊ ก เมะ เกม๊า แม้ ทอ้าทซ๊าง ล้า ล ฌี้

¹⁷ เกม๊า แม้ลู ท อ ฌี้ เกม๊า อางฆื๊งแคว่ ท อเกิ้งอแบ เกม๊า แม้แบไท้ ท แคแนแคแก้ เกม๊า ไจ้ะช้าไคล้ช้า เอะ โพล้ง พูฆวี แพ่ เกม๊า ไคล้ช้า บ้าคว่าง ลู่ง โพล้ง มืงเม๊ อ ฌ่าง”

¹⁸ กแช่ยาเว ไจ้ะเว๊ บี่อี้ง “เฌ๊เซ้อ, เกม๊า ก ไคล้คว่าง โละซ้ะ ทึเมะ น ทเด้บ้ะ เก บี่ซุ้ดี๊ ซี่ง โฌ้จีลี ฌี้ นอ ม แอว้ ด้องซุ้ แน๊วะ ทึเมะ ม โฌ้ บี่ซุ้ดี๊ ตไกยะ โฌ้ ฌี้ นอ ม เกก้ะ ด้องซุ้ แกะ อ ชอง

¹⁹ น ซื๊ง เมะ แบซ้ะ ดี๊ คุ้ช๊องแน เท่อ นอ น ม นี่ อาง แบ อซูงอแซ ฌี้ ลู่ง ที๊งล่าง ค่างพ้า

²⁰ แบเด้าะ น ซื๊ง เมะ ซม๊า เท่อ ดี๊ กไบล้ะกแบล นอ น ม แบ ท อางยื่งคล่อง ดี๊ น้ะไอ อ แน่” เมะเว๊ กแช่ยาเว อ นุ้ นี่ โล้ เว้ เว๊ เย้า”

เว่ง อ้าทางซ๊างทาง

²¹ เว่ง พี่ อโต้อล้อง เกทาง ก้ะ เว่ง ท เอโบ้งเอพะ เย้า อ เว๊ โอ แบ ฆวี้ ดี๊ ท อเกิ้งอแบ ทแบกแช่แยว้อซ้ะ โอไปว้ะ แบ ลู่ง อ พ้า แบเด้าะ ค๊องเนงอี้ง โอ ที่ โพล้ง แม้ซี๊งอางแช๊ เท่อ

²² น จี้ เกทาง ก้ะ จี้ อ อี เย้า น ไซ้ะ ซไบ้ะแซ ที๊ง นอ, แกย้ฆึ อ ซ้ะ ดี๊ ที๊ง เย้า

²³ น เซงคู นอ, เก โพล้ง ล มู๊ง พี่ อ กไบล้ะกแบล ดี๊ เก ฌุ้พาง โละซ้ะ ดี๊ โพล้ง ตมละตเช เท่อ กุ้แฌ้ เอ จี้ ทไซ้ะไบ้ะนุ้ ดี๊ ล้องช่อง ทเกล๊าง อ เว๊ ล นี่ ไจ้ะช้าไคล้ช้า เอะ พูฆวี แพ่ แบ ดี๊ โพล้ง มืงเม๊ อ เตา นอ เฌ๊ ล ท้อง อ ซื๊งเว๊ แบ

²⁴ ทบี่นอ, ทอดูทึโท๊ทึ กแช่, เมะเว๊ กแช่ยาเว ซึ้คู ดูทึชองทึ อีซลาเอง อ กแช่แยว้, พี่ โอ ดี๊ อดู้งอยางอซยื๊งอซย้อง แอทึ ไจ้ะเว๊ บี่อี้ง “แคว่เซ้อ, ก ม ทูแพล่ ทาง ก ท ซ้ะทาง ล้างแบ โพล้ง โอเว้งโอก๊าง ดี๊ เฆ้อ ดี๊ ก ม แม้แกไท้ กดีงกแด้ แด กแช่ เว๊ ล้อ

²⁵ ก ม แกย กจูง เฌ๊ ดึ้ แน้ ก ม ฆู่งไฆวะ เฮ๊ อี, บี่ซุ้ดี๊ อางซฌ้ะ เท่อ ดี๊ ทซีง ที๊ง ก ม แม้ไฆวะ น ท แกย้ฆึ อ ซ้ะ ไจทางไฆวะ ท่อง อ เลา

²⁶ ก ม ดึ้ เกม๊า น โพล้ง ต้ะเซ๊ง เท่อ โอ ไท้ บี่ อ ล่าง ดี๊ เกม๊า น โพล้ง เนฌ้าโล้ฌ้า เท่อ โอ ไท้ ด้องซุ้ ลู่ง อ ต้องคู อู้ง ลู่ง ไค๊ อ เว๊ ม กุ้ แน้ บี่อี้ง, เว่ง ลู่ง อฌี้อแอว้ เว่ง ลู่ง อโต้อล้อง”

²⁷ ซีโยง ม นี่แบ ท เทะนี่ไท้ ดี๊ ท อเกิ้งอแบ ดี๊ โพล้ง พี่ เปลงไท้ อ ซ้ะ ลู่ง เว่ง พ้า นอ, ม นี่แบ ท เทะนี่ไท้ ดี๊ ทแบกแช่แยว้อซ้ะ

²⁸ แบเด้าะ โพล้ง กไบล้ะ ดี๊ โพล้ง ทเด้บ้ะ ลแพ นอ, ม แบ ทแม้ เฌ๊ฌ้อง ฆึ-อ้ะ ดี๊ โพล้ง ลแพ นอ พี่ อ ญ๊องไฆวะ กแช่ยาเว, ม แบ ทแม้ล้างเทา ล้อ

²⁹ เมะเว๊ น ซื๊ง ม ฌางแช้ ดี๊ ซี๊ พ้ะดู มื่งเทิง อไฌ่อกย้อง พี่ น ซื๊ง ซีง ลแพ แบซ้ะ-อ้ะ นอ เลา ดี๊ น ม ฌางแช้ ลู่ง โซ๊ง อไฌ่อกย้อง พี่ น ซื๊ง ซีง ลแพ ลึ นี่-อ้ะ นอ

³⁰ เมะเว๊ น ซื๊ง ซีง ลแพ ม เก บี่ซุ้ดี๊ ซี๊ พ้ะดู มื่งเทิง พี่ อ แล ล้างไย้ะ ไฆ๊ ดี๊ บี่ซุ้ดี๊ โซ๊ง พี่ ที๊ง ล โอ แบ

³¹ ดี๊ โพล้ง พี่ อชองอไคล๊ นอ, ม เกทาง ก้ะ เย่ อเย้าอเย้ ดี๊ อ ทไพ้ะทแม้ เกทาง ก้ะ มีไพ่ ค้ะ ฌ้อง เท่อ คี๊งเม้ง นอ มี ม อาง ฆึ เว๊ ดี๊ โพล้ง แม้ ล้างไพะ เว๊ ล ซี น่างแฌ้ แบ