โฮเชยา 9 - Northern Pwo Karen Thai Bible

ท แม้เตาแม้แต๊ อีซลาเอง อ ทเด้บ้ะ

¹ โอ้, อีซลาเอง-เอ้อ, เซิงมึซ้ะมึ ล ฌี้ ซ้ะอวีงซ้ะโทะ เท่อ ด้องซุ้ โพล้ง กุ้ชื้อกุ้ชะ ลแพ นอ ล ฌี้ เฆาะ เป๊งนี่ น โละกวี้ เอโบ้งเอพะ เท่อ, ซ้ะ ล โอ ดี๊ น กแช่แยว้ แบ น เอ เค๊เซ๊ มืง อ จี้ อางเล้ง ทาง เท่อ ลู่ง ทล่าง เพา ล้าง บืง ลแพ นอ

² แบเด้าะ ทล่าง เพา ล้าง บืง ดี๊ ทพ้า ไย่ ซไบ้ะแซ ม ลื่ง-อ้ะ ล กู้งลล๊า แบ ดี๊ ไซ้ะ ซไบ้ะแซ ที๊ง อ ซ๊าง มไว้ะมว๊างไฆวะ ดี๊-อ้ะ

³ อ เว๊ ล นี่ โอ ลู่ง กแช่ยาเว อ ที๊งล่างค่างพ้า แบ แบเด้าะ เอฟาอีง ม ไท้ไท้ ลู่ง อีไย้ะ อ เว๊ ม อาง ทอาง แบอ้า ลู่ง อะซีเรีย พ้า

⁴ อ เว๊ ล นี่ ลู๊งล้าง ไซ้ะ ซไบ้ะแซ ที๊ง เทว๊ เอะ กแช่ยาเว แบ ดี๊ อ ทพูแฆ่ ลื่งทาง เท่อ นอ, ล ดึ้ เกม๊า กแช่แยว้ แบ อ ซ้ะ แบ ทพูแฆ่ ลื่งทาง เท่อ นอ, ม เก บี่ซุ้ดี๊ ทอาง ลู่ง ท มองแบม้ะแบ เอะ-อ้ะ โพล้ง พี่ ล แฌ้ เล้ อาง เว๊ นอ, ม เก ทแบอ้า เมะเว๊ อ ทอาง นอ, บี่ซุ้ แม้ ล้างแม่ อ กแช่ อ ท ซู๊งอางซ้ะ เท่อ ล้อ ม ล นี่ นึฆ้าง ลู่ง เด้กแช่ยาเวอล่างโอ พ้า แบ

⁵ น ม แม้ ทเม้งเล้, พี่ ท้อง มื่งนี้ง แม้ ท อ ไฌ่ ดี๊ ลู่ง กแช่ยาเว อ มื่งนี้ง ท อ ไฌ่ แม้มึอางอวีง นอ

⁶ เมะเว๊ ทึเมะ อ เว๊ ไจแดไฆวะ ท เซงทื่งเฌ๊ฌ้อง ฌี้ นอ อีไย้ะ ม อางกีซยอง นี่-อ้ะ เว่ง เมงฟี ม เคิงล้างบ้า-อ้ะ แล้แช๊ มื่งเทิง ม แม้นี่ก้ะ อ ท ลื่งดูฆวี้ดู, พี่ แม้ เว๊ ดี๊ จี้ ทชูง มื่งเทิง ม เมทาง ลู่ง อ เด้ พ้า

⁷ อช๊าอโท่ ลู่ง ท แม้เตาแม้แต๊ เฌ๊ ท้อง เย้า ดี๊ อช๊าอโท่ ลู่ง ท ม๊าแกไท้ นอ, เฌ๊ท้อง เย้า เกม๊า อีซลาเอง ซีงแฌ๊ เว๊ โมไคล้คิ้กแช่แยว้ นอ, เกทางก้ะ โพล้ง เซ๊กูเฌ๊ฌ้อง เย้า โพล้ง พี่ โอ ดี๊ ทบุ้แบ อ ซ้ะ นอ, พลื่งทางมวี๊งทาง เป๊งนี่ ลู่ง น ทเด้บ้ะ ดี๊ น ท แช๊เมะไฌ๊ซ้ะ พ้ะดู อกย้อง

⁸ โมไคล้คิ้กแช่แยว้, เก โพล้งคุ้แคว่ทะเท่อ ยู่แคว่ เอฟาอีง เอะ จ กแช่แยว้ แบเด้าะ โพล้ง ดุ้ทูบล้ะทู อ ทดุ้ทเช โอ ลู่ง อ เกล้ เฆ้ง เลาพะ ดี๊ ท แช๊เมะไฌ๊ซ้ะ โอ ลู่ง อ กแช่แยว้ อ ล่างโอ พ้า

⁹ อ เว๊ อ้าทางซ๊างทาง ล้างโยะ ลู่ง ทอ้าทซ๊าง พ้า แอ มะ ด้องซุ้ เว่ง กีเบอา อ ชู้ อู้ง ล้อ กแช่แยว้ ม นางแบทางไท้ อ ทไพ้ะทแม กแช่แยว้ ม แม้เตาแม้แต๊-อ้ะ ลู่ง อ ทเด้บ้ะ อกย้อง

¹⁰ ก แด อีซลาเอง บี่ซุ้ดี๊ แด ซไบ้ะแซ ลู่ง แพะคูทเคแกล้ พ้า ก แด น ซื๊ง พี๊งชู้พู๊งชู้ ลู่ง แย๊ อู้ง บี่ซุ้ดี๊ แด กูงเย้ แซ อ ต้องคู ล ว๊าง ลู่ง อ มื่งเทิง ล้อง พี่ ลพ๊าแย๊ แซทาง อ ต้องคู ล ว๊าง นอ แบเด้าะ อ เว๊ เฌ๊ฌูง ท กโช้งกแช่ บาอางเปโอ ดี๊ เทว๊ล้าง อ ซ้ะ เอะ ท พี่ อ ล้างไช้ะล้างย่อง นอ ดี๊ เกทางก้ะ ท ล้าง ซ้ะลูซ้ะไล้ะ ด้องซุ้ ท พี่ อ เอ เว๊ นอ

¹¹ เอฟาอีง อฆี๊งอแล้ นอ, ม ลี้ ยู้ง บี่ซุ้ดี๊ ทู ล โอ ดี๊ ท กึทาง แบ, ล โอ ดี๊ ท เฌ้าโอซ้ะโอ แบ, ล โอ ดี๊ ท ด้าทาง แบ

¹² ทึเมะ อ เว๊ ม ลื่ง อ พู ซี ท๊อง อ ดู ฌี้ นอ ก ม แม้ ล้างมื่งล้างพ้ะไฆวะ-อ้ะ ท๊อง ล โอ ล้างลื๊อ น่างแฌ้ ล้า แบ ท เซงทื่งเฌ๊ฌ้อง แบ-อ้ะ พี่ ก ไจแดไฆวะ-อ้ะ

¹³ ก แด เอฟาอีง เก บี่ซุ้ดี๊ โซ๊ง ท๊าง, พี่ เซิงล้าง ลู่ง ญ้าง พ้า แบเด้าะ เอฟาอีง แบ ลี้ฌ้า อชื้ออชะ, ลี้ อางกีล้าง เอะ โพล้ง แม้ซี๊ง เท่อ

¹⁴ โอ้, กแช่ยาเว-เอ้อ, อวีงซ้ะชู้ เกล๊าง เอะ-อ้ะ น ม เกล๊าง เอะ-อ้ะ ทเม้งเล้ อวีงซ้ะชู้ เกล๊าง เอะ-อ้ะ อ อ้อง พ้า พี่ อ เฌ้า ล้างฆวีง ดี๊ เกล๊าง เอะ-อ้ะ นู่งคี๊ง พี่ อ ไซวะ ซู๊งไฆ๊

¹⁵ อ ทอ้าทซ๊าง กุ้เม้ง โอ ลู่ง กีลากาง พ้า ก แช๊เมะไฌ๊ซ้ะ ทางซ๊าง-อ้ะ พี่ นอ ก ม โฌ๊ไจทาง-อ้ะ ไจแดไฆวะ ก ล่างโอ พ้า เป๊งนี่ อ ทแม้ พี่ ออ้าอซ๊าง อกย้อง นอ ก ล เอ-อ้ะ ล้า แบ เฆาะ กเย่ อคูอแน่ นอ, โอ เว๊ ที่ โพล้ง กไบล้ะกแบล เลาพะ

¹⁶ เอฟาอีง แบ ทแม้ เฌ๊ฌ้องไฆวะ เย้า อฌี่งอเฌ้ นอ ล้างไย้ะล้างไฆ๊ ไฆวะ อ ซื๊งเว๊ ซีง ลแพ ม ล โอ ดี๊ อซูงอแซ ล้า แบ ทึเมะ อ เว๊ ม กึทาง อ พู อ ลี้ง ฌี้ นอ ก ม แม้ซี๊งไฆวะ อ พู อ ลี้ง พี่ อ เอ เว๊ นอ ล้อ

¹⁷ จ กแช่แยว้ ม เว่งว๊าง ญ๊องไฆวะ-อ้ะ เป๊งนี่ อ ซื๊งเว๊ ลแพ นอ ล ชู่งลู่งเน้แท๊ กแช่แยว้ แบ อ เว๊ ม เก โพล้ง ไจ เว้งว้าง โอ ลู่ง โพล้ง กุ้ชื้อกุ้ชะ ซีง ลแพ อซุ้อแกล้ ล้อ