โฮเชยา 3 - Northern Pwo Karen Thai Bible

ท คื๊งเซิงแล้ซ้ะ ลู่ง กแช่แยว้ อ ทเอทกวี้ง พ้า

¹ ดี๊ กแช่ยาเว ไคล้ ดี๊ แย้ ไจ้ะเว๊, “เกม๊า น ลี้ ล พ๊า เด้าะ, ลี้ เอ โละซ้ะ ดี๊ กมืง ล แฌ้, พี่ อ ด้าง กแม เอ เว๊, ดี๊ เก กมืง เอโบ้งเอพะ เท่อ, บี่ซุ้ดี๊ พี่ กแช่ยาเว เอ อีซลาเอง อชื้ออชะ บี่ นอ ล้อ, ทึเมะ อ ซื๊งเว๊ ม แกยไฆวะ อ ซ้ะ ลี้ฌูง ท กโช้งกแช่ อ แฌ้แพ, ดี๊ ท แบ อ ซ้ะ ดี๊ กู ซไบ้ะแซ ไฆ๊>>

² ทบี่นอ, ยี๊ แด จ ฆวี้ นี่-อ้ะ, เก จี้ ชี๊งเย่ เชเค่ง, ดี๊ บืงบาเล กีโล ล แย้ เย่ชี๊ง

³ ยี๊ แด จ โล้ เอะ-อ้ะ บี่อี้ง, “น แบ โอ ดี๊ แย้ ไยะ มะ ได้ะ, โละกวี้ เอโบ้งเอพะ เท่อ ล ฌี้, ลี้ เก กแคว๊ แฌ้แพ อ เท่อ ล ฌี้, เมะ ยี๊ แด นอ, จ ล ลี้ฆ้างฌูง แน้ แบ ปะ ล้อ”

⁴ เมะเว๊ อีซลาเอง อชื้ออชะ ม โอ เว๊ พี่ อ กจุ้แฆว้ ล โอ แบ, ดี๊ อคูอแน่ ล โอ แบ เก อช๊าอโท่ ไยะ มะ, เลา ดี๊ ล โอ ดี๊ ท ลื่งทาง แบ, ล โอ ดี๊ เฌเทิง ซยื๊งซย้อง แบ, ล โอ ดี๊ ไช๊อเบงคูลท๊า ดี๊ ทเค่งทฌ้างแบ

⁵ ลู่ง ไค๊ อีซลาเอง อชื้ออชะ ม เฌ๊ไท้, ดี๊ อางฆื๊ง อ กแช่ยาเว กแช่แยว้, ดี๊ อางฆื๊ง อ กจุ้แฆว้ ดาเว, ดี๊ ชู่งแย๊โค๊ นอ, อ เว๊ ม ดู้งแบยางแบ กแช่ยาเว, ดี๊ อางฆื๊ง กแช่แยว้ อ ทฌี้ทแอว้