เอซรา 7 - Northern Pwo Karen Thai Bible

เอซรา อ ทเฌ๊ ดี๊ อ ทไพ้ะทแม้

¹ โอก้ะ ลู่ง ไค๊, ลู่ง อาทาเซอซี เก กจุ้แฆว้ ค่าง เปอแซย อ ชู้ แค๊ นอ, เซไรยา อ พู เมะเว๊ เอซรา, เซไรยา นอ เก อาซารียา อ พู, อาซารียา นอ เก เฮงคียา อ พู

² เฮงคียา นอ เก ชางลู อ พู, ชางลู นอ เก ซาโด อ พู, ซาโด นอ เก อาฮีทู อ พู

³ อาฮีทู นอ เก อามารียา อ พู, อามารียา นอ เก อาซารียา อ พู, อาซารียา นอ เก เมราโยะ อ พู

⁴ เมราโยะ นอ เก เซราฮียา อ พู, เซราฮียา นอ เก อุ้ซี อ พู, อุ้ซี นอ เก บุ้คี อ พู

⁵ บุ้คี นอ เก อาบีชูวา อ พู, อาบีชูวา นอ เก ฟีเนฮะ อ พู, ฟีเนฮะ นอ เก เอเลอาซา อ พู, เอเลอาซา นอ เก อาโรง โพล้งลื่งเท่ออคูดูทึ อ พู

⁶ เอซรา ล แฌ้ อี้ง นอ โอนี่ ลู่ง บาบีโลง พ้า ลี้ทาง, อ เว๊ เก คู ซองเท่อซ๊างเท่อ, ซีงแฌ๊ โมเซ อ ทอางแม้เลา อ ไฌ่, พี่ กแช่ยาเว โพล้ง อีซลาเอง อ กแช่แยว้ เกล๊าง เอะ-อ้ะ, ดี๊ กจุ้แฆว้ เกล๊าง เอะ-อ้ะ กุ้เม้ง, พี่ อ อางท่าง เว๊ นอ ฌี้ มะ, เมะเว๊ กแช่ยาเว อ เว๊ อ กแช่แยว้ อ จูง โอ ดี๊-อ้ะ

⁷ โพล้ง โอ แบ ล แฌ้ๆ, ลู่ง โพล้ง อีซลาเอง อ แกล้ พ้า, ดี๊ กเย่ โพล้งลื่งเท่ออคู อ แกล้ พ้า, กเย่ โพล้ง เลวี, กเย่ โพล้ง ซ้ะอวีง แท๊ ดี๊ โพล้งคุ้แคว่เกล้ป้ะตู๊ง, ดี๊ เพล่บาง พี่ อ แม้ เท่อ คระ ลู่ง กแช่แยว้อล่างโอ พ้า นอ, นี่ ลี้ทาง เว๊ ปะ, ลี้ ท้อง เยรูซเลง ลู่ง เนว๊ เนง ล เนง พ้า, พี่ กจุ้แฆว้ อาทาเซอซี อ ชู้ แค๊ นอ

⁸ ดี๊ อ เว๊ เฌ๊ท้อง เยรูซเลง ลู่ง แล้ เย่ เบง ล เบง พ้า, พี่ เก เนว๊ เนง ล เนง ลู่ง กจุ้แฆว้ อ ชู้ แค๊

⁹ เมะเว๊ ลู่ง มื่ง อ ต้องคู ล นี้ง ลู่ง แล้ อ ต้องคู ล เบง พ้า นอ, อ เว๊ โอนี่ ลู่ง บาบีโลง พ้า ลี้ทาง, ดี๊ ลู่ง มื่ง อ ต้องคู ล นี้ง ลู่ง แล้ เย่เบง ล เบง พ้า นอ, อ เว๊ เฌ๊ ลู่ง เยรูซเลง, เมะเว๊ อ กแช่แยว้ อ จูง ฌี้ทึแอว้ทึ นอ โอ ดี๊-อ้ะ

¹⁰ เมะเว๊ เอซรา อางกีล้าง อ ซ้ะ, พี่ ม ไฌ่ ซีงแฌ๊ กแช่ยาเว อ ทอางแม้เลา ดี๊ แม้โพะ เว๊ อ ไค๊, ดี๊ ซอง กแช่แยว้ อ ทอเค้อะอต้าง, ดี๊ ทอางกีล้าง ลู่ง อีซลาเอง พ้า

กจุ้แฆว้ อาทาเซอซี อ ไละ กวิ้ยื่ง ลี้ ท้อง เอซรา

¹¹ อ อี้ง นอ เก ไละกวิ้ยื่ง อเตว่, พี่ กจุ้แฆว้ อาทาเซอซี เกล๊าง เอะ โพล้งลื่งเท่ออคู เอซรา, พี่ เก คู ซองเท่อเซ๊งพ้าท้างพ้า, พี่ อ ไฌ่ ซีงแฌ๊ กแช่ยาเว อ ทซองทซ๊าง อไฌ่อกย้อง, ดี๊ กแช่แยว้ อ ทอเค้อะอต้าง ลู่ง โพล้ง อีซลาเอง อ ฌ่าง นอ บี่อี้ง

¹² “อาทาเซอซี กจุ้แฆว้ พี่ อ ดูเละ กจุ้แฆว้ กุ้ แฌ้ นอ, ท้อง เอซรา โพล้งลื่งเท่ออคู, คู ซอง กแช่แยว้ ลู่ง ทมุ้คู ล แฌ้ นอ อ ทอางแม้เลา

¹³ ค๊องเนงอี้ง จ กวิ้ทางไละ อางแบเลา เท่อ บี่อี้ง, โพล้ง เฌงพูฆ๊างพู อีซลาเอง แฌ้ ฌี้ๆ, อ ซื๊งเว๊ อ โพล้งลื่งเท่ออคู ฌี้, โพล้ง เลวี ลู่ง จ มื่ง จ บ้าง พ้า อี้ง ฌี้, พี่ อ ซ้ะ โอ ม ลี้ ลู่ง เยรูซเลง นอ, เกม๊า อ ลี้ ดี๊ แน้ ซี

¹⁴ เมะเว๊ กจุ้แฆว้ ดี๊ โพล้งเนฌ้าโล้ฌ้าเท่อ เนว๊ แฌ้, นี่ เจ่ทาง แน้, เกม๊า ลี้ อางจ้ะ เท่อ แบฆ้ะ ดี๊ ยูดา ดี๊ เยรูซเลง, บี่ซุ้ดี๊ น กแช่แยว้ อ ท อางแม้เลา พี่ โอ น จูงพ้า นอ

¹⁵ ดี๊ เกม๊า ลี้ โชะ จี้ ดี๊ ท๊อง, พี่ กจุ้แฆว้ ดี๊ อ โพล้งเนฌ้าโล้ฌ้าเท่อ อ ซ้ะ โอ, ม เทว๊ เอะ โพล้ง อีซลาเอง กแช่แยว้, พี่ โอ เยรูซเลง พ้า

¹⁶ ล พ๊า ฆ่าง ดี๊ จี้ ดี๊ ท๊อง เลาพะ, พี่ น ม อางฆื๊ง นี่-อ้ะ เฆ้ง เว่งดูคล้องโท๊ บาบีโลง พ้า, เลา ดี๊ ทเทว๊ พี่ โพล้งเฌงพูฆ๊างพู ดี๊ โพล้งลื่งเท่ออคู, อ ซ้ะ โอ ม เทว๊ เอะ อ กแช่แยว้อล่างโอ, พี่ โอ เยรูซเลง พ้า นอ

¹⁷ ฌ้อง จี้ อี้ง นอ เกม๊า น เจ่-อ้ะ เมะ ฌี้ ฆวี้ งู้ แพ๊, แกะ แพ๊, ดี๊ แกะ พู, ดี๊ ทลื่งทาง เทว๊ ทซูงทแซ พี่ กู่งโละซ้ะ, ดี๊ ทโอ้ ลื่งทาง เท่อ พี่ กู่งโละซ้ะ, ดี๊ เกม๊า น เทว๊ ทลแพ อี้ง ลู่ง น กแช่แยว้อล่างโอ, อ ทลื่งล่าง คู, พี่ โอ เยรูซเลง พ้า นอ

¹⁸ เมะ จี้ ดี๊ ท๊อง พี่ ล้างลื๊อก้ะ นอ, แน้ ดี๊ น น๊างพื่งวี่ แคว่ เว๊ ฌี้, พี่ ม แม้ บี่จะเล้ นอ, เกม๊า แม้ แดเทา, บี่ซุ้ดี๊ น กแช่แยว้ อ ทแบซ้ะ นอ

¹⁹ ดี๊ ทซู๊งทเจ่ พี่ นี่ อางกีล้าง เอะ แน้, ลู่ง ทแม้ เท่อ น กแช่แยว้อล่างโอ พ้า อ ฌ่าง นอ, เกม๊า น อางกีล้าง เทว๊-อ้ะ ลู่ง กแช่แยว้ อ เมะแซ พ้า, ลู่ง เยรูซเลง พ้า

²⁰ ดี๊ ท เม้ง ฌี้ๆ, พี่ เอดุ้ เจ่-อ้ะ, ลู่ง น กแช่แยว้อล่างโอ พ้า อ ฌ่าง ได้ะ, พี่ น แบ อางฆื๊ง นี่-อ้ะ นอ, เกม๊า น อางฆื๊ง นี่-อ้ะ ลู่ง กจุ้แฆว้ อ ทล่างอางกีซยองเท่อ อ พ้า นอ

²¹ “ดี๊ แย้ เมะเว๊ กจุ้แฆว้ อาทาเซอซี, นี่ กวิ้ทาง ไละ อางแบเลา เท่อ, ลี้ ท้อง โพล้ง แคว่ ทล่างอางกีซยองเท่อ, ลู่ง เว่งดูคล้องโท๊ ที๊ง แว่โค๊ แพ้, ลู่ง มื่งนึ ล โค๊ นอ บี่อี้ง, ท เม้ง ฌี้ๆ, พี่ โพล้งลื่งเท่ออคู เอซรา คู ซอง กแช่แยว้ ลู่ง มุ้คู, อ ทอางแม้เลา เอดุ้ นี่ แบ เว๊ ดี๊ แน้ นอ, เกม๊า น แม้นี่ เอะ-อ้ะ ดี๊ ทฆ้ะทไฆ๊

²² ทึเมะ จี้ ฆ๊า ซ๊าม๊า ลี่งแย้ กีโล, ดี๊ บืง ซาลี ท้อง อ กีโล ล ไซ, ไซ้ะ ซไบ้ะ แซ ที๊ง คี๊งม๊า เล๊ง, ทซู คี๊งม๊า เล๊ง, ดี๊ ที๊งแล ล ดว้ะ อแอ อแซย้ แบ

²³ ท เม้ง ฌี้ๆ, พี่ กแช่แยว้ ลู่ง มุ้คู อางแบเลา เว๊ นอ, เกม๊า แม้ เอะ กแช่แยว้ ลู่ง มุ้คู อ ล่างโอ นอ ท่อง อล๊าอฆวี้, ไค๊ไก้ะ กแช่แยว้ อ ทซ้ะทาง ม ล้างแบ กจุ้แฆว้ อ ค่างช๊า, ดี๊ กเย่ อ พูแคว๊ ลแพ นอ

²⁴ แย้ จ โล้แบ น ซื๊งซีง ปะ บี่อี้ง, ล เก ทอแบ บี่ซุ้ดี๊ ทอางกีล้าง แบ, พี่ ม กิ้นี่ ทแบเกล๊างนี่ชอง-อ้า, ทแบเกม๊าอฆวี้-อ้า, ท อ ค๊อง-อ้า, ดี๊ โพล้ง แฌ้ ฌี้ๆ, ลู่ง กเย่ โพล้งลื่งเท่ออคู อ แกล้ พ้า-อ้า, โพล้ง เลวี-อ้า, โพล้ง ซ้ะอวีงแท๊-อ้า, โพล้ง โอคุ้ แคว่ทะ ป้ะตู๊ง-อ้า, เพล่บาง อ แม้ เท่อ คระ ลู่ง กแช่แยว้อล่างโอ-อ้า, โพล้ง อ แฌ้แพ พี่ แม้ เท่อ ลู่ง กแช่แยว้อล่างโอ พ้า อี้ง-อ้า นอ

²⁵ “แบเด้าะ แน้ เอซรา-เอ้อ, บี่ซุ้ดี๊ น กแช่แยว้ อ ทโกงซีมองแบ พี่ โอ ดี๊ แน้ นอ, เกม๊า น ต๊างทางนี่ โพล้ง โพะคอง เท่อ, ดี๊ โพล้งต้ะเซ๊งเท่อ, พี่ ม ต้ะเซ๊ง เอะ กเย่ โพล้งเฌงพูฆ๊างพู, ลู่ง เว่งดูคล้องโท๊ ที๊ง แว่ โค๊ แพ้ ลู่ง มื่งนึ ล โค๊ นอ, เมะเว๊ โพล้ง กุ้ แฌ้ พี่ ซีงแฌ๊ น กแช่แยว้ อ ทอางแม้เลา, ดี๊ โพล้ง พี่ ล ซีงแฌ๊ เว๊ แบ ลแพ นอ, น ซื๊ง แบ ซอง-อ้ะ

²⁶ โพล้ง พี่ แฌ้ เล้, พี่ ล ชู่ง น กแช่แยว้ อ ทอางแม้เลา, ดี๊ กจุ้แฆว้ อ ทอางกีล้าง แบ นอ, เกม๊า ต้ะเซ๊ง แม้เตาแม้แต๊-อ้ะ เมาน่าง, ม เก เตา ท้อง ซี๊ง ฌี้, ท้อง แบ โฌ๊ไจไฆวะ-อ้ะ ฌี้, ท้อง ลู่นี่ก้ะ อคองอแซย้ ฌี้, ท้อง แบ เด้าทะ-อ้ะ ฌี้ นอ ซี”

²⁷ อางปฆ้าทาง กแช่ยาเว กพี๊งกพู๊งลู่งแย๊ อ กแช่แยว้, พี่ บุ้แบ กจุ้แฆว้ อ ซ้ะ, เกม๊า อ แม้ฌี้ทาง เอะ กแช่ยาเวอล่างโอ, พี่ โอ ลู่ง เยรูซเลง พ้า

²⁸ ดี๊ ลู่ง กแช่แยว้ อ ทเอทกวี้ง เฌิ่งค๊า อกย้อง นอ, ดึ้ เกม๊า จ โอ ดี๊ ท แบเมะล้างซ้ะ, ลู่ง กจุ้แฆว้ ดี๊ อ โพล้งเนฌ้าโล้ฌ้าเท่อ นอ อ เมะแซ พ้า, ดี๊ ลู่ง กจุ้แฆว้ อ ทอดู พี่ โอ ดี๊ อดู้งอยาง ลแพ นอ อ เมะแซ พ้า, ดี๊ แย้ นอ จ ซ้ะน้าทาง, เมะเว๊ กแช่ยาเว จ กแช่แยว้ อ จูง แม้ช้า แย้, ดี๊ แย้ จ นี่ อางกีซยอง โพล้ง อีซลาเอง อคูอแน่ ลี้ทาง ดี๊ แย้