เอเซเคียง 9 - Northern Pwo Karen Thai Bible

แม้ซี๊ง โพล้ง โบงทางแบ้ทาง ทเค่งทฌ้าง ลแพ นอ

¹ ฌ้อง นอ กแช่แยว้ กุ้ซย้ะ พ้ะดู ล้าง จ แน่ พ้า ไจ้ะเว๊, “กเย่ เว่ง อ โพล้ง แม้ซี๊ง เท่อ-เอ้อ, เกม๊า เฌ๊ ลู่ง อี้ง, เฌ๊โชะ ดี๊ นางดึ้นางชาง แม้เฌ๊ฌ้อง เท่อ ปะ”

² ดี๊ อี้งเซ้อ, กแคว๊ โอ ฆู๊งแฌ้ เฌ๊ฆ้าง นี่ ลู่ง เกล้ ป้ะตู๊ง ท้ะโค๊, พี่ แกยฆ้าง อ เมะ ลู่ง มื่งเค๊ง ล โค๊, ล แฌ้ๆ, นอ, เฌ๊โชะ ดี๊ นางดึ้นางชาง แม้เฌ๊ฌ้อง เท่อ, ดี๊ กแคว๊ โอ ล แฌ้ ลู่ง อ ซื๊งเว๊ อซุ้อแกล้, ซุ้ ไช๊ ตไก้ยะ ลูง ไว้ะไก้, นางกวิ้ อ โด้ง โอ อ ย่างเด้ง ล้อง, ดี๊ อ ซื๊งเว๊ ลแพ นอ เฌ๊ฆ้าง, ฌ้อง ชี๊เทิง โอ ลู่ง ทลื่งล่าง ท่องบ้าง อ ฌ๊างไท้ะ

³ กแช่แยว้ ลู่ง อีซลาเอง อโฌ่งอพ้าง, พี่ โอ เครุ้ คู นอ, แบ ท โชะทาง ลู่ง เด้กแช่แยว้อล่างโอ อ ป้ะตู๊ง เคิง, ดี๊ กแช่แยว้ กุ้นี่ กแคว๊, พี่ ซุ้ ไช๊ ตไก้ยะ ลูง ไว้ะไก้, พี่ โอ ดี๊ นางกวิ้ อ โด้ง ลู่ง อ ย่างเด้ง ล้อง นอ

⁴ ดี๊ กแช่ยาเว อางแบเลา-อ้ะ บี่อี้ง, “เกม๊า นึฆ้าง เว่ง พ้า, เมะเว๊ เว่ง เยรูซเลง, ดี๊ แม้ ทแม้ไน ลู่ง โพล้ง พี่ อ แซซยู ทาง, ดี๊ ฌางล้างย้าล้าง ลแพ นอ, อ เมะเทิ่งคู, เป๊งนี่ ลู่ง ท ล้าง ซ้ะลูซ้ะไล้ะ กุ้เม้ง, พี่ อ แม้ ซกุ้ เว๊ เว่ง พ้า นอ อกย้อง”

⁵ ดี๊ กแช่แยว้ ไคล้ ดี๊ กแคว๊ อ แฌ้แพ, เกม๊า จ แน่ฌ๊า ไจ้ะเว๊, “เกม๊า น ลี้ เฆ้ง เว่ง, โพะ กแคว๊ ล แฌ้ นอ อ ไค๊, ฌ้อง นอ กล้างซี๊งไฆวะ-อ้ะ, เกม๊า น ซื๊ง เมะคลี๊ง เอดู เท่อ, ดี๊ เนโพลทาง น ทย๊างซ้ะ ล ฌี้

⁶ เกม๊า แม้ซี๊งไฆวะ เลา ดี๊ โพล้ง ซ้ะแซย่, โพล้ง น่างบางซ้ะบาง, ดี๊ มืงน้าง, เลา ดี๊ พืงแซ ดี๊ กมืง ลแพ นอ, แบเด้าะ โพล้ง พี่ ทแม้ไน โอ อ ล้อง นอ ลี้ฆ้าง เบ้า-อ้ะ ล ฌี้, ดี๊ เกม๊า แม้ทางซ๊าง เท่อ ลู่ง ก ทแบ้แยว้ล่างลู่งอฌี้”, ทบี่นอ อ ซื๊งเว๊ ซีง ลแพ แม้ทางซ๊าง เท่อ ดี๊ โพล้ง ซ้ะแซย่ แคว๊ พี่ โอ เด้กแช่แยว้อล่างโอ อ เมะแซ พ้า นอ

⁷ ฌ้อง นอ กแช่แยว้ ไคล้ ดี๊ อ ซื๊งเว๊ ลแพ นอ ไจ้ะเว๊, “เกม๊า แม้ แบอ้า เด้กแช่แยว้อล่างโอ, เกม๊า ญ๊องไฆวะ โพล้ง พี่ อ แบ ท แม้ซี๊ง ท่อง อ ล่าง พ้ะเล่ พ้า, เกม๊า ลี้ แดเทา”, อ ซื๊งเว๊ ลแพ นอ ไจทาง ลี้, ดี๊ เป้ กล้าง เท่อ ลู่ง เว่ง พ้า

⁸ พี่ อ ซื๊งเว๊ ซีง ลแพ เป้ กล้าง เท่อ อ แค๊ นอ, จ โอ ยื่งเย้ง ล แฌ้ เฆาะ, จ ซย๊องล้าง เมะ ท้อง ฌางคูคู กุ้ซย้ะ เท่อ บี่อี้ง, “ทอดูทึโท๊ทึกแช่ยาเว-เอ้อ, น ม แม้ เฌ๊ฌ้อง โพล้ง อีซลาเอง พี่ โอ ล้างลื๊อก้ะ นอ ท่อง อ เลา, บี่ซุ้ แม้ ไจทาง น ท ซ้ะทาง ลู่ง เยรูซเลง อ คูด้าง-อ้า?,”

⁹ ฌ้อง นอ กแช่แยว้ ไคล้ ดี๊ แย้ ไจ้ะเว๊, “อีซลาเอง ดี๊ ยูดา อชื้ออชะ อ ทเด้บ้ะ โอ แอ น้ะมะ, ที๊งล่างค่างพ้า นอ โอ ฆวี้ ดี๊ ทซวีง, ดี๊ ท ลเกิ้งลแบ แบ โอ ฆวี้ เว่ง, เป๊งนี่ อ ซื๊งเว๊ ไจ้ะเว๊ ‘กแช่ยาเว ญ๊องไฆวะ ค่าง อี้ง เย้า, ดี๊ กแช่ยาเว ล แคว่ เว๊ ล้า แบ’

¹⁰ ดี๊ ลู่ง ก ฌ่าง นอ, ก เมะคลี๊ง ม ล เอดู เท่อ แบ, ดี๊ ก ล เนโพลทาง ทย๊างซ้ะ แบ, แบเด้าะ ก ม แม้เตาแม้แต๊ เท่อ ลู่ง อ ซื๊งเว๊ อ คูด้าง, บี่ซุ้ดี๊ อ ซื๊งเว๊ อ ทไพ้ะทแม้ นอ ล้อ”

¹¹ ดี๊ แคว่-เซ้อ, กแคว๊ พี่ ซุ้ ไช๊ ตไก้ยะ ลูง ไว้ะไก้, ไทะ นางกวิ้ อ โด้ง ลู่ง อ ย่างเด้ง ล้อง นอ, เฌ๊ไท้ โล้ ทไคล้ บี่อี้ง, “จ นี่ แม้โพะ ทกุ้เม้ง อ ไค๊ พี่ น อางแบเลา เว้ แย้ นอ เย้า”