เอเซเคียง 32 - Northern Pwo Karen Thai Bible

ทไฌ่ ฌางล้างย้าล้าง, แบฆ้ะ ดี๊ ฟาโร ดี๊ อีไย้ะ อ ไฌ่

¹ มื่งนี้ง อ ต้องคู ล นี้ง, แล้ ชี๊งคี๊ง เบง ล เบง, ลู่ง เนง ชี๊งคี๊ง เนง ล เนง พ้า นอ, กแช่ยาเว อลู่งอแท๊ เฌ๊ ท้อง แย้ ไจ้ะเว๊

² “กโพล้ง อ พู-เอ้อ, เกม๊า โล้ล้าง ทไฌ่ ฌางล้างย้าล้าง, แบฆ้ะ ดี๊ ฟาโร กจุ้แฆว้ ลู่ง อีไย้ะ อ ไฌ่, ดี๊ โล้ เกม๊า อ คุ้ช๊องแน บี่อี้ง น เก บี่ซุ้ดี๊ คี๊ยื่ง แพ๊ ลู่ง โพล้ง กุ้ชื้อกุ้ชะ อซุ้อแกล้ แบเด้าะ น เก บี่ซุ้ดี๊ ซแม พ้ะดู ลู่ง ที๊ง ลแพ นอ อ พ้า น ทูว้ะ ที๊ง ลู่ง น ที๊งกล้อง พ้า ลแพ นอ น ควิ้คว้ะ ที๊ง ดี๊ น คาง เกม๊า อ ดืง ดี๊ ดึ้ เกม๊า น ที๊งกล้อง แบอ้าแบซ๊าง

³ ทอดูทึโท๊ทึกแช่ยาเว ไจ้ะเว๊ บี่อี้ง ก ม ย้างแย่ ก ทฆี คลึไบ้ะ นล้องนย่าง ดี๊ ลู่ง โพล้ง อ ชื้อ แอฌี่งแอฌ้อง อ ท อางกีซยอง ซึ้พู อกย้องนอ อ ซื๊งเว๊ ม ทวี่งเละทาง แน้ ดี๊ ก เน๊ง

⁴ ดี๊ ก ม ญ๊องไฆวะ ล้าง แน้ ลู่ง ฌางคูคู ก ม เว่งว๊าง ล้าง แน้ ลู่ง ไชะคูแน้พ้า ดี๊ ม เกม๊า ทู เลาพะ ลู่ง ทพุ้พ๊าง นอ, เฌ๊ เปิ่งโอเปิ่งช๊อง ลู่ง นเค่งนฌ้าง อ ล้อง ดี๊ เกม๊า ทพูแฆ่ เฆ้ง ที๊งล่างค่างพ้า, บลิ้อางบลิ้โอ้ ดี๊ นล้องนย่าง

⁵ ก ม แม้นี่ น แย ลีงแล่-อ้ะ ลู่ง ทลู่ง คู ดี๊ จึ้ไบ้ะ ทลู่ง คางไท้ะ ดี๊ น จู น๊างโป้ง

⁶ ก ม ดึ้ เกม๊า ที๊งล่างค่าง พ้า ท้อง ลู่ง ทลู่ง นอ แบโจ ดี๊ น ซวีง พี่ อ แยว้ล้าง ดี๊ ที๊งกล้อง ล บ้อง แบ ล บ้อง นอ, ม แบ ท จึ้ไบ้ะ เกม๊า อ ฆวี้ ดี๊ นเค่งนฌ้าง

⁷ พี่ ก แม้ไฆวะ แน้ นอ, ก ม คลึไบ้ะทะ ทมุ้คู ดี๊ ม ดึ้ เกม๊า แซย ไค้ะไฆวะ ก ม แม้นี่ ทเอิง คลึไบ้ะ มื่ง ดี๊ แล้ ล พ้างล้าง แบ

⁸ มุ้คู อ พ้าง โฌ่งกลี เลาพะ นอ ก ม ดึ้ เกม๊า อ ไค้ะ โอ นเค่งนฌ้าง เช๊คู ดี๊ ก ม ชวี๊งล้าง ทไค้ะ ลู่ง น ที๊งล่างค่างพ้า ทอดูทึโท๊ทึกแช่ยาเว โล้ เว๊ บี่อี้ง ล้อ

⁹ ก ม ดึ้ เกม๊า โพล้ง กุ้ชื้อกุ้ชะ อ เซิงอึ้ซ้ะอึ้ พี่ ก แม้เฌ๊ฌ้อง แน้ ลู่ง โพล้ง กุ้ชื้อกุ้ชะ อซุ้อแกล้ ลู่ง ค่าง พ้า พี่ น ล ซีงแฌ๊ แบ นอ

¹⁰ ก ม ดึ้ เกม๊า โพล้ง อ ชื้อ แอฌี่งแอฌ้อง ซ้ะเมซ้ะไพล้ เท่อ ลู่ง น กย้อง ดี๊ กเย่ อ ซื๊งเว๊ อ กจุ้แฆว้ นอ, ม ว้ะโทะว้ะตี้ ลู่ง น กย้อง ท่อง ก เว่งว๊าง ก น้ะ ลู่ง อ ซื๊งเว๊ อ เมะแซ พ้า นอ อ ซื๊งเว๊ ซีง ลแพ ม ว้ะโทะ น๊างแฌ้ กุ้ พ๊า เมะเว๊ ล แฌ้ๆ, นอ, ล๊องก้อง ล้างไท้ อ ทม๊า ลู่ง มื่งนี้ง พี่ น ล้างเทะเค้า นอ

¹¹ เมะเว๊ ทอดูทึโท๊ทึกแช่ยาเว ไจ้ะเว๊ บี่อี้ง ก จุ้แฆว้ ลู่ง บาบีโลง อ น้ะ ม เฌ๊ฌูง แน้

¹² ก ม ดึ้ เกม๊า น เพล่ ซึ้พู ล้างเทะเค้า ดี๊ โพล้ง อ ซ้ะน้า ลแพ นอ อ น้ะ กุ้แฌ้ นอ, เก โพล้ง พี่ อดู้งอลู่ น้ะ ทึ ลู่ง โพล้ง กุ้ชื้อกุ้ชะ พ้า อ เว๊ เฌ๊ฌ้า ท เซงทื่งเฌ๊ฌ้อง ลู่ง อีไย้ะ อ ท เซิงชองซ้ะไคล๊ พ้า ดี๊ อ เพล่ ซึ้พู เลาพะ นอ, ม แบ ทแม้ เฌ๊ฌ้อง

¹³ ก ม แม้เฌ๊ฌ้อง อ ทพูแฆ่ ลื่งโด้ง เลาพะ โอนี่ ลู่ง ทล่าง พี่ โอ ดี๊ ที๊ง แอฌี่งแอฌ้อง ดี๊ กโพล้ง ม ควิ้คว้ะ ดืง ที๊ง ดี๊ อ คาง นอ, ล โอ น่างแฌ้ ล้า แบ ทพูแฆ่ ลื่งโด้ง อ คางมีง แท่ นอ, ล ควิ้คว้ะ ที๊ง เกม๊า อ ดืง ล้า แบ ปะ ล้อ

¹⁴ ฌ้อง นอ ก ม ดึ้ เกม๊า อ ซื๊งเว๊ อ ที๊ง โอ เฌิ่งเพิ่ง ดี๊ เกม๊า กเย่ อ ที๊ง นอ, แยว้ล้าง บี่ซุ้ดี๊ ทซู ทอดูทึโท๊ทึกแช่ยาเว โล้ เว๊ บี่อี้ง ล้อ

¹⁵ ท่อง ก ดึ้ เกม๊า ค่าง อีไย้ะ โอโปล้ก้ะ ท่อง ค่าง แบ ทลู่นี่ก้ะ ทฆ้าทโฆ่ พี่ โอ อ พ้า เลาพะ ดี๊ ท่อง ก แม้เฌ๊ฌ้อง โพล้ง กุ้แฌ้ พี่ เปิ่งโอเปิ่งช๊อง เว่ง พ้า นอ ฌ้อง อ ซื๊งเว๊ ซีง ลแพ, ม ซีงแฌ๊ เว๊ บี่อี้ง, เฆ้อ เมะเว๊ ยาเว ล้อ

¹⁶ อ อี้ง เก ทไฌ่ ฌางล้างย้าล้าง พี่ โพล้ง ม กุ้ซย้ะ ฌางล้างย้าล้าง ดี๊ กเย่ โพล้ง กุ้ชื้อกุ้ชะ อ พูมืง, ม กุ้ซย้ะ ฌางล้างย้าล้าง อ เว๊ ม ฌางล้างย้าล้าง แบฆ้ะ ดี๊ อีไย้ะ ดี๊ อ เพล่ ซึ้พู อ ไฌ่” ทอดูทึโท๊ทึกแช่ยาเว โล้ เว๊ บี่อี้ง ล้อ

ท มองแบม้ะแบ อีไย้ะ

¹⁷ ลู่ง มื่งนี้ง ชี๊งเย่ นี้ง ล นี้ง, ล แล้ แย๊ นอ, ลู่ง เนง ชี๊งคี๊ง เนง ล เนง นอ, กแช่ยาเว อลู่งอแท๊ เฌ๊ ท้อง แย้ ไจ้ะเว๊

¹⁸ “กโพล้ง อ พู-เอ้อ, เกม๊า ฌางชูฌางช้าง เท่อ, ลู่ง อีไย้ะ อ เพล่ ซึ้พู อ ฌ่าง ดี๊ เกม๊า โซ๊ง-อ้ะ ลี้ล้าง เลา ดี๊ อ กแช่ ดี๊ กเย่ โพล้ง กุ้ชื้อกุ้ชะ อ พูมืง พี่ อฌี้อแอว้ ลี้ล้าง ลู่ง ฌางคู อ ท ทึล้าง แย๊โค๊ ลี้ล้าง ซกุ้ ดี๊ โพล้ง พี่ ลี้ล้าง ลู่ง พลื่งค่าง เย้า ลแพ นอ

¹⁹ แน้ น ล้างเอล้างกวี้ง ฌี้เละ โพล้ง อ แฌ้แพ โบ่? เกม๊า ลี้ล้าง, ดี๊ มี๊งน้าง โอ ดี๊ โพล้ง พี่ ล นี่ แม้ ทไฌ่ไร้ะไฆวะไพ้ะ แบ ลแพ นอ

²⁰ อ ซื๊งเว๊ ลแพ นอ, ม ล้างเทะเค้า ลู่ง โพล้ง พี่ อ แบ ท แม้ซี๊ง ดี๊ น้ะ ลแพ นอ อซุ้อแกล้, น้ะ ล เบง แบ ท อางกีล้าง เย้า, เกม๊า ลี้ ทวี่งเละ อีไย้ะ ล พ๊าฆ่าง ดี๊ อ เพล่ ซึ้พู เลาพะ

²¹ อคูอแน่ พี่ อ ซ้ะน้า ดี๊ อ โพล้ง แม้ช้า-อ้ะ นอ, ม ไคล้ แบฆ้ะ ดี๊ อีไย้ะ ลู่ง พลื่งค่าง อ คี่งแกล้ พ้า ไจ้ะเว๊ ‘อ ซื๊งเว๊ เฌ๊ล้าง เย้า, อ ซื๊งเว๊ มี๊งน้าง โอ ไก้ไม่, โพล้ง พี่ ล แม้ ทไฌ่ไร้ะไฆวะไพ้ะ แบ ซีง ลแพ, พี่ อ แบ ท แม้ซี๊ง ดี๊ น้ะ นอ ล้อ’

²² “อะซีเรีย ดี๊ อ ซกุ้มู๊งโฌ่ เลาพะ นอ, โอ พี่ นอ, อ ซื๊ง เว๊ อ จู พ้า โอ วะ อฆูอฆ้อง, กุ้แฌ้ แบ ท แม้ซี๊ง, ดี๊ ล้างเทะเค้า ดี๊ น้ะ

²³ อ ซื๊งเว๊ อ ทล่าง เคิงล้างบ้า อ จู, โอ ลู่ง ทซี๊ง อ ล่าง พี่ อ ไย้ ทึ, อ ซกุ้มู๊งโฌ่ เลาพะ นอ, โอ วะชวะ อ พ้า เคิงล้างบ้า อ จู, กุ้แฌ้ แบ ท แม้ซี๊ง, ล้างเทะเค้า ดี๊ น้ะ, อ ซื๊งเว๊ ดึ้ กึทาง แบ ท ซ้ะเมซ้ะไพล้ ลู่ง โพล้ง ม๊า อ ที๊งล่างค่างพ้า

²⁴ “เอลาง ดี๊ อ เพล่ ซึ้พู เลาพะ นอ, โอ พี่ นอ, โอ วะชวะ อ แซวคู พ้า, กุ้แฌ้ แบ ท แม้ซี๊ง ดี๊ ล้างเทะเค้า ดี๊ น้ะ, โพล้ง พี่ ล นี่ แม้ ทไฌ่ไร้ะไฆวะไพ้ะ แบ ซีง ลแพ, พี่ ลี้ล้าง ลู่ง ฌางคู อ ท ทึล้าง แย๊โค๊, อ ซื๊งเว๊ ดึ้ กึทาง แบ ท ซ้ะเมซ้ะไพล้ ลู่ง โพล้ง ม๊า อ ที๊งล่างค่างพ้า, ดี๊ อ ซื๊งเว๊ แบ โท่งซยองไท้ ท ฌางแช้ฌางเด ดี๊ โพล้ง พี่ ลี้ล้าง ลู่ง พลื่งค่าง

²⁵ โพล้ง นี่ แม้ เอะ อ ล่างมี๊ง, ลู่ง โพล้ง แบ ท แม้ซี๊ง ลแพ นอ, อซุ้อแกล้ พ้า, ล พ๊าฆ่าง ดี๊ อ เพล่ ซึ้พู เลาพะ, ท แซวคู พ้า โอ วะ อฆูอฆ้อง, โพล้ง ล นี่ แม้ ทไฌ่ไร้ะไฆวะไพ้ะ แบ ลแพ นอ, แบ ท แม้ซี๊ง ดี๊ น้ะ, เมะเว๊ อ ซื๊งเว๊ พี่ ดึ้ กึทาง แบ ท ซ้ะเมซ้ะไพล้ ลู่ง โพล้ง ม๊า อ ที๊งล่างค่างพ้า, แบเด้าะ อ ซื๊งเว๊ แบ โท่งซยองไท้ ท ฌางแช้ฌางเด ดี๊ โพล้ง พี่ ลี้ล้าง ลู่ง พลื่งค่าง นอ, อ ซื๊งเว๊ แบ ท อางกีล้าง ลู่ง โพล้ง แบ ท แม้ซี๊ง ลแพ นอ อซุ้อแกล้ พ้า

²⁶ “เมเชะ ดี๊ ทูบาง ดี๊ อ เพล่ ซึ้พู เลาพะ นอ, โอ พี่ นอ, อ ซื๊งเว๊ อ แซวคู พ้า โอ วะ อฆูอฆ้อง, โพล้ง ล แม้ ทไฌ่ไร้ะไฆวะไพ้ะ แบ เลาพะ นอ, แบ ท แม้ซี๊ง ดี๊ น้ะ, เป๊งนี่ อ ซื๊งเว๊ ดึ้ กึทาง แบ ท ซ้ะเมซ้ะไพล้ ลู่ง โพล้ง ม๊า อ ที๊งล่างค่างพ้า

²⁷ อ ซื๊งเว๊ ลแพ นอ, มี๊งน้าง ดี๊ โพล้ง ล นี่ แม้ ทไฌ่ไร้ะไฆวะไพ้ะ แบ ซีง ลแพ, อ โพล้ง ซ้ะน้า พี่ อ ล้างเทะเค้า, โพล้ง พี่ ลี้ล้าง ลู่ง พลื่งค่าง, ล พ๊าฆ่าง ดี๊ อ ซื๊งเว๊ อ นางดึ้นางชาง ล เมะ แบ-อ้า?, อ ซื๊งเว๊ โอ ดี๊ น้ะ อางกีล้าง เว๊ อ คู เช๊ละ, ดี๊ อ ซื๊งเว๊ อ ทไพ้ะทแม นอ, โอ อฆีงอเกว้ คู, เป๊งนี่ โพล้ง ซ้ะน้า ลแพ นอ, ดึ้ กึทาง แบ ท ซ้ะเมซ้ะไพล้ ลู่ง โพล้ง ม๊า อ ที๊งล่างค่างพ้า

²⁸ ทบี่นอ, น ม แบ ทแม้ เฌ๊ฌ้อง ดี๊ มี๊งน้าง โอ ดี๊ โพล้ง ล นี่ แม้ ทไฌ่ไร้ะไฆวะไพ้ะ แบ ลแพ นอ, ดี๊ โพล้ง พี่ แบ ท แม้ซี๊ง ดี๊ น้ะ

²⁹ “เอโดง นอ โอ พี่ นอ, เลา ดี๊ กเย่ อ กจุ้แฆว้, ดี๊ กเย่ อคูอแน่ ลแพ นอ, ทึเมะ อ ซื๊งเว๊ โอ ดี๊ ท ซ้ะน้า ฌี้ นอ, อ แบ ท อางกีล้าง ดี๊ โพล้ง พี่ อ แบ ท แม้ซี๊ง ดี๊ น้ะ ลแพ นอ, อ ซื๊งเว๊ มี๊งน้าง โอ ดี๊ โพล้ง ล นี่ แม้ ทไฌ่ไร้ะไฆวะไพ้ะ แบ ซีง ลแพ, ดี๊ โพล้ง พี่ อ ลี้ล้าง ลู่ง พลื่งค่าง ลแพ นอ ล้อ

³⁰ “ท อคูอแน่ กุ้แฌ้ ลู่ง มื่งเค๊ง, ล พ๊าฆ่าง ดี๊ โพล้ง ไซดอง เลาพะ นอ, โอ พี่ นอ, เมะเว๊ โพล้ง พี่ ลี้ล้าง ดี๊ ท แช้เมะแช้แน๊, ล พ๊าฆ่าง ดี๊ โพล้ง แบ ท แม้ซี๊ง, ทึเมะ อ ซื๊งเว๊ อ ท ซ้ะน้า นอ, นี่ ดึ้ กึทาง แบ ท ซ้ะเมซ้ะไพล้ ฌี้ นอ, โพล้ง พี่ ล นี่ แม้ ทไฌ่ไร้ะไฆวะไพ้ะ แบ ซีง ลแพ มี๊งน้าง พี่ นอ, ดี๊ โพล้ง พี่ แบ ท แม้ซี๊ง ดี๊ น้ะ, ดี๊ โท่งซยองไท้ ท ฌางแช้ฌางเด ดี๊ โพล้ง ลแพ นอ, พี่ ลี้ล้าง ลู่ง พลื่งค่าง

³¹ “ทอดูทึโท๊ทึกแช่ยาเว ไจ้ะเว๊, ท่อง ฟาโร แด อ ซื๊งเว๊ เย้า นอ, อ เว๊ อ ซ้ะ ม ฆวี๊งทาง แบฆ้ะ ดี๊ อ เพล่ ซึ้พู เลาพะ, พี่ แบ ท แม้ซี๊ง ดี๊ น้ะ นอ, ฟาโร ดี๊ อ เพล่ ซึ้พู เลาพะ

³² เป๊งนี่ อ เว๊ ดึ้ กึทาง แบ ท ซ้ะเมซ้ะไพล้ ลู่ง โพล้ง ม๊า อ ที๊งล่างค่างพ้า, อ เว๊ ม แบ ทอางกีล้าง ลู่ง โพล้ง ล นี่ แม้ ทไฌ่ไร้ะไฆวะไพ้ะ แบ ซีง ลแพ อซุ้อแกล้ พ้า, ล พ๊าฆ่าง ดี๊ โพล้ง พี่ อ แบ ท แม้ซี๊ง ดี๊ น้ะ ลแพ นอ, เลา ดี๊ ฟาโร ดี๊ อ เพล่ ซึ้พู เลาพะ”, ทอดูทึโท๊ทึกแช่ยาเว โล้ เว๊ บี่อี้ง ล้อ