เอเซเคียง 1 - Northern Pwo Karen Thai Bible

ทแดเว้ แบฆ้ะ ดี๊ กแช่แยว้ อโฌ่งอพ้าง

¹ ลู่ง มื่ง เย่นี้ง ล นี้ง พ้า, แล้ ลี่งเบง ล เบง, ลู่ง เนง ซ๊าชี๊ง เนง ล เนง พ้า, พี่ จ โอ โพล้ง เก ทอฆ่อง อซุ้อแกล้, ลู่ง ที๊งเคบา พ้าไท้ะ อ แค๊ นอ, ทมุ้คู อุ้พ้ะทาง อ ซ้ะ ดี๊ จ แด แบ กแช่แยว้ ลู่ง ทแดเว้ พ้า

² ลู่ง มื่ง เย่นี้ง ล นี้ง พ้า, ล แล้ แย๊ นอ, (เมะเว๊ ลู่ง เย่เนง ล เนง พ้า, พี่ กจุ้แฆว้ เยโฮยาคี ล้างแบ เก ทอฆ่อง นอ)

³ กแช่ยาเว อลู่งอแท๊ เฌ๊ท้อง บูซี อ พูแคว๊ เอเซเคียง, โพล้งลื่งเท่ออคู ลู่ง โพล้ง เคลเดีย อ ที๊งล่างค่างพ้า, ลู่ง ที๊งเคบา อ พ้าไท้ะ, พี่ พ นอ กแช่ยาเว อ จูง เฌ๊ โอ ลู่ง อ เช๊คู

⁴ แคว่-เซ้อ, พี่ จ แคว่ เท่อ นอ, ลี้งเฌ๊ พ้ะดู เฌ๊อูง นี่ เท่อ ลู่ง มื่งเค๊ง ล โค๊, ทเอิง คู่ลอง พ้ะดู พี่ โอ ดี๊ ทพ้าง วะชวะ, ดี๊ มี โอ เค้ทาง โฌ่งค้ะ ครึๆ, ลู่ง มี อ แกล้ พ้า นอ, แคว่-อ้ะ แบด้อง ท่องบ้าง พี่ อ โฌ่งค้ะ

⁵ ดี๊ ลู่ง มี อ แกล้ พ้า นอ, ท พี่ โอ ดี๊ อ ทม๊า อเค่งอฌ้าง โอ ลี่งดื้ง ท พี่ โอ ดี๊ อ ทม๊า ลแพ นอ, อมยู๊อฮ๊าง เก บี่อี้ง, เมะเว๊ โอ ดี๊ กโพล้ง อเค่งอฌ้าง

⁶ ล ดื้งๆ, นอ, อ เมะ โอ ลี่ง เบง, ดี๊ อ ได้ะ โอ ลี่ง แพ้

⁷ แบเด้าะ อ คาง นอ ล้องท้อง, อ คางย๊างซ้ะพ้า บี่ซุ้ดี๊ งู้ พู อ คางมีง ได้พ้ะ, ดี๊ โฌ่งค้ะ บี่ซุ้ดี๊ ท่องบ้าง เท้าโฌ่ง

⁸ ลู่ง อ ได้ะ เช๊ละ นอ, โอ ดี๊ จูง บี่ซุ้ดี๊ กโพล้ง อ จูง, โอ ลู่ง อ เฌาแพ้ล้อง ลี่งแพ้ เลา, ลี่งดื้ง นอ, ล ดื้งๆ, อ เมะ โอ ตบลึ้ เบง, ดี๊ อ ได้ะ โอ ตบลึ้ แพ้

⁹ ท พี่ โอ ดี๊ อ ทม๊า ลแพ นอ, ล ดื้งๆ, อ ได้ะ จุ้ท้อง โละ อ ซ้ะ, พี่ อ ยู้ง ลี้ อ แค๊ นอ, ล แบ แกย อ ซ้ะ แบ, ล ดื้งๆ, นอ ยู้ง ลี้ ล แพ้ แย๊ พี่ อ เมะ แคว่ เท่อ นอ ล้อ

¹⁰ ท พี่ โอ ดี๊ อ ทม๊า ลแพ นอ, อ เมะ อมยู๊อฮ๊าง, เมะเว๊ อ เมะแซ พ้า นอ เก กโพล้ง อ เมะ, อ ฆุ้ ล โค๊ นอ, เก คี๊ยื่ง อ เมะ, อ จี ล โค๊ นอ, เก งู้ อ เมะ, ดี๊ อ ล่างไค๊ ล โค๊ นอ เก ไละ พ้ะดู อ เมะ

¹¹ ท พี่ โอ ดี๊ อ ทม๊า ลแพ นอ, อ เมะ แม้ อ ซ้ะ บี่อี้ง ล้อ, แบเด้าะ อ ได้ะ ลแพ นอ, ย้างแย่ ทาง เว๊ ท้ะโค๊, ล ดื้งๆ, นอ, อ ได้ะ โอ คี๊งแพ้ พี่ จุ้ท้อง โละ อ ซ้ะ, ดี๊ อ ได้ะ คี๊งแพ้ เด้าะ นอ, คลึไบ้ะล้าง อล้องอย่าง

¹² ล ดื้งๆ, นอ, ลี้ยู้ง ล แพ้ แย๊ พี่ อ เมะ แกย อ ซ้ะ ลี้, วีงแล้ ม ลี้ พี่ ล แพ้ เล้ นอ, อ เว๊ ลี้ เกล้ ล บ้อง แย๊ นอ ล้อ, ดี๊ ลี้ ล แกย อ ซ้ะ แบ เฆาะ

¹³ ท พี่ โอ ดี๊ อ ทม๊า ลแพ นอ, อเค่งอฌ้าง ดี๊ อมยู๊อฮ๊าง บี่ซุ้ดี๊ แซว เค้ทาง, อมยู๊อฮ๊าง บี่ซุ้ดี๊ โซย๊เค้ ตบลึ้ ทื้ง ลี้ๆ, ไท้ๆ, ลู่ง ท พี่ โอ ดี๊ อ ทม๊า ลแพ นอ อ เบ้าช้า, โอ ดี๊ มี อ พ้าง, ดี๊ โอ ดี๊ ล๊างแว่ได้ะ อ พ้าง, ไจทาง นี่ ลู่ง มี พ้า นอ

¹⁴ ท พี่ โอ ดี๊ อ ทม๊า ลแพ นอ, ซยุ้ลี้ซยุ้ไท้ บี่ซุ้ดี๊ ล๊างแว่ได้ะ อมยู๊อฮ๊าง

¹⁵ พี่ จ แคว่ดุ้ ท พี่ โอ ดี๊ อ ทม๊า ลแพ นอ, แคว่-เซ้อ, ท อ คางไร้ะ โอ ลู่ง ฌางคูคู, โอ ลู่ง ท พี่ โอ ดี๊ อ ทม๊า ลแพ นอ อ ฌ๊างไท้ะ ล ดื้ง ล แพ้ๆ, ลี่งดื้ง เลา

¹⁶ ท อ คางไร้ะ ลแพ นอ, อมยู๊อฮ๊าง ดี๊ อเค่งอฌ้าง บี่ซุ้ดี๊ เบรีง ท อ คางไร้ะ ลี่ง แพ้ นอ, อมยู๊อฮ๊าง โอ บี่ซุ้ โละ อ ซ้ะ, อมยู๊อฮ๊าง ดี๊ อเค่งอฌ้าง โอ บี่ซุ้ดี๊ ท อ คางไร้ะ โดปท๊า อ ซ้ะ โอ ท อ คางไร้ะ อ ซ้ะคี่ง พ้า

¹⁷ พี่ อ ลี้ นอ, ท พี่ โอ ดี๊ อ ทม๊า ลแพ นอ, ม ลี้ แพ้ ฌี้ๆ, ลู่ง อ เมะ ลี่งแพ้ นอ ซี กุ้ แพ้ ล้อ, อ ซื๊งเว๊ ลี้ นอ ล แบ แกย อ ซ้ะ แบเฆาะ

¹⁸ ท อ คางไร้ะ อ ไพ้ไท้ะ นอ พ้ะโท๊, ดี๊ แคว่-อ้ะ ล้าง ซ้ะเมซ้ะไพล้, ดี๊ ท อ คางไร้ะ ลี่งแพ้ อ ไพ้ไท้ะ นอ, โอ ฆวี้ ดี๊ เมะคลี๊ง วะชวะ

¹⁹ ท่อง ท พี่ โอ ดี๊ อ ทม๊า ลี่งดื้ง ลี้ ยู้ง นอ, ท อ คางไร้ะ ลแพ นอ, ลี้โพะ อ ไค๊ ลู่ง อ ฌ๊างไท้ะ ปะ, ท่อง ท พี่ โอ ดี๊ อ ทม๊า ดี้งทาง นี่ ลู่ง ฌางคูคู นอ, ท อ คางไร้ะ ดี้งทาง ปะ

²⁰ พี่ วีงแล้ ม ลี้ พี่จองเล้ นอ, ท พี่ โอ ดี๊ อ ทม๊า ลแพ นอ, ลี้ เว๊ ปะ, ดี๊ ท อ คางไร้ะ นอ, ดี้ง ลี้โพะ เบ้าตไก้ะ อ ไค๊, เมะเว๊ ท พี่ โอ ดี๊ อ ทม๊า ลแพ นอ, อวีงอแล้ โอ ท อ คางไร้ะ พ้า

²¹ ท่อง ท พี่ โอ ดี๊ อ ทม๊า ลี่งดื้ง ลี้ยู้ง นอ, ท อ คางไร้ะ นอ ลี้ ปะ, ดี๊ ท่อง อ โอโท๊ นอ, ท อ คางไร้ะ นอ โอโท๊ ปะ, ท่อง อ ซื๊งเว๊ ซีง ลแพ ดี้งทาง นี่ ลู่ง ฌางคูคู นอ, ท อ คางไร้ะ นอ, ดี้งทาง ลี้โพะ เบ้าตไก้ะ อ ไค๊, เมะเว๊ ท พี่ โอ ดี๊ อ ทม๊า นอ, อวีงอแล้ โอ ท อ คางไร้ะ พ้า

²² ลู่ง ท พี่ โอ ดี๊ ท ม๊า ซีง ลแพ อ คูด้าง นอ, โอ ดี๊ ท พี่ อมยู๊อฮ๊าง โอ แบด้อง ทมุ้คู พี่ อ บี่ซุ้ดี๊ ทล้างกลุ้ กดื้ง เมะคลี๊ง จแล่ พ้ะเล่ โอ ลู่ง อ ซื๊งเว๊ ลแพ นอ อ คูด้าง

²³ ลู่ง มุ้คู เช๊ละ อี้ง อ ซื๊งเว๊ อ ได้ะ ย้างแย่ ทาง ล้องท้อง ลี้ จเฌิ่ง โละ อ ซ้ะ, ดี๊ ล ดื้งๆ, นอ, อได้ะ โอ คี๊ง แพ้ คลึไบ้ะ ล้าง อล้องอย่าง

²⁴ ดี๊ ท่อง ท พี่ โอ ดี๊ อ ทม๊า ซีง ลแพ ลี้ ยู้ง นอ, จ แน่ฌ๊า อ ได้ะ เซ๊ บี่ซุ้ดี๊ ที๊ง ล้างแยว้ ชอง บี่ซุ้ดี๊ กแช่แยว้ พี่ โอ ดี๊ อดู้งอยาง อซยื๊งอซย้อง อ ลู่ง เซ๊, ท อ ลู่ง เซ๊ เติ้งทาง เติ้งล้าง บี่ซุ้ดี๊ ซึ้พู น๊างมู๊ง อ ลู่ง เซ๊, ท่อง อ ซื๊งเว๊ ซีง ลแพ ชี๊เทิง เฌิ่งเพิ่ง นอ, อ ได้ะ ม ไคล้ะล้างไท้ อ ซ้ะ

²⁵ ดี๊ ท อ ลู่ง โอ เฌ๊นี่ ลู่ง มุ้คู ท้ะโค๊ พี่ โอ อ ซื๊งเว๊ อ คูด้าง, พี่ ท พี่ โอ ดี๊ อ ทม๊า ซีง ลแพ ชี๊เทิง เฌิ่งเพิ่ง อ แค๊ นอ, อ ได้ะ ลแพ นอ ไคล้ะล้างไท้ อ ซ้ะ

²⁶ ดี๊ ลู่ง มุ้คู ท้ะโค๊ พี่ โอ อ ซื๊งเว๊ อ คูด้าง นอ, ท โอ ล เม้ง พี่อเค่งอฌ้าง โอ แบด้อง กแช่แยว้ อ ล่าง ชี๊น้าง, พี่ อมยู๊อฮ๊าง โอ บี่ซุ้ดี๊ ไพลีง ดี๊ ท พี่ อเค่งอฌ้าง โอ แบด้อง กแช่แยว้ อ ล่างชี๊น้าง คู นอ, โอ ดี๊ โพล้ง พี่ อมยู๊อฮ๊าง โอ บี่ซุ้ดี๊ กโพล้ง โอ เว๊ อ คู พี่ นอ

²⁷ ดี๊ โอ นี่ ท๊อง โพล้ง ล แฌ้ นอ อ ท พี่ อมยู๊อฮ๊าง โอ ล้างโฌ่ ย่างเด้ง ทาง ท้ะโค๊ นอ, จ แด เท่อ ล้างโฌ่ ท่องบ้าง พ้าง โฌ่งค้ะ, อมยู๊อฮ๊าง แบด้อง มี แบ ทแม้ กดื้งทะ วะชวะ, ดี๊ โอ นี่ ท๊อง ท พี่ อมยู๊อฮ๊าง โอ ล้างโฌ่ ย่างเด้ง ล้าง ละโค๊ นอ, จ แด เท่อ พี่ อมยู๊อฮ๊าง โอ แบด้อง มี, ดี๊ ทโฌ่ง ฆีงฆอง โอ วะชวะ โพล้ง ล แฌ้ นอ ล้อ

²⁸ ท โฌ่ง ฆีงฆอง พี่ โอ วะชวะ นอ, อมยู๊อฮ๊าง บี่ซุ้ดี๊ ล๊าง ล้างโอ้ที๊ง, พี่ โพลทาง ลู่ง ทเอิง พ้า, พี่ ทเฌ๊ช้า อ แค๊ นอ กแช่ยาเว อโฌ่งอพ้าง อมยู๊อฮ๊าง ดี๊ อเค่งอฌ้าง แม้ อ ซ้ะ บี่อี้ง ล้อ, ดี๊ ท่อง จ แด-อ้ะ เย้า นอ, จ ซย๊องล้าง จ เมะ ท้อง ฌางคูคู, ดี๊ จ แน่ฌ๊า โพล้ง ล แฌ้ อ ลู่ง ไคล้