เอซเทอ 9 - Northern Pwo Karen Thai Bible

โพล้ง ยู อดีงอแด้ เซงทื่งเฌ๊ฌ้อง

¹ ลู่ง มื่ง ชี๊งซ๊า นี้ง ล นี้ง, แล้ ชี๊งคี๊ง เบง ล เบง พ้า, เมะเว๊ แล้ อาดา, มื่ง ล นี้ง แย๊ พี่ ม แม้โพะ กจุ้แฆว้ อ ทอางแบเลา, ดี๊ อ ไละอางแบเลา เท่อ อ ไค๊, ล นี้ง แย๊ นอ ล้อ, พี่ โพล้ง ยู อดีงอแด้ มื้งแล่ เว๊, ม โอ ดี๊ อดู้งอยาง ดูเละ โพล้ง ยู, แบเด้าะ เกทางก้ะ มื่ง นี้ง พี่ โพล้ง ยู ซีงลแพ, อดู้งอยาง โอ ดูเละ โพล้ง พี่ แช๊เมะไฌ๊ซ้ะ ดี๊ อ ซื๊งเว๊ซีง

² โพล้ง ยู นี่ โอซยอง โละซ้ะ ลู่ง กจุ้แฆว้ อาฮ้ะซูเอระ อ เว่งดูคล้องโท๊ พ้า กุ้ จอง, บี่ซุ้ ม แม้ซี๊ง กเย่ โพล้ง พี่ อางฆื๊ง เกล้ แม้อ้าแม้ซ๊าง อ ซื๊งเว๊, โพล้ง ปด้างทะ อ ซื๊งเว๊ ล ซี น่าง แฌ้ แบ, เมะเว๊ ทซ้ะเม โพล้ง ยู ซีงลแพ นอ คลึไบ้ะล้าง โพล้ง กุ้ที๊งกุ้ค่าง

³ เว่งดูคล้องโท๊ อ กดูกแซย่ กุ้ แฌ้, ดี๊ ทอคูอแน่, ดี๊ โพล้งโพะเว่ง ซีงลแพ, ดี๊ โพล้งแม้กจุ้แฆว้อเท่อ นอ, แม้ช้า โพล้ง ยู ลแพ นอ ปะ, เมะเว๊ ทซ้ะเม โมเดไค คลึไบ้ะล้าง อ ซื๊งเว๊

⁴ เมะเว๊ โมเดไค เก ทอดู โอ บลาง พ้า, ดี๊ อ เม้งลื้อแซท้อง ลี้ เฆ้ง เว่งดูคล้องโท๊ พ้า กุ้ อ จอง, เมะเว๊ กแคว๊ พี่ อ เม้ง โมเดไค นอ อดู้งอยาง โอ แอทาง ครึๆ

⁵ โพล้ง ยู ลแพ นอ ดึ้ซึ้ อดีงอแด้ เลาพะ นอ ดี๊ น้ะ, แม้ซี๊ง ดี๊ แม้ เฌ๊ฌ้อง เว๊, ดี๊ แม้ เอะ โพล้ง พี่ อ แช๊เมะไฌ๊ซ้ะ ดี๊ อ ซื๊งเว๊ นอ ท๊อง แบ อ ซ้ะ ล้อ

⁶ ลู่ง เว่ง ทล่างคุ้แคว่เท่อ ซูซา พ้า นอ, โพล้ง ยู นี่ แม้ซี๊ง ดี๊ แม้ เซงทื่งเฌ๊ฌ้องไฆวะ โพล้ง เย่แย้ แฌ้

⁷ นี่ แม้ ซี๊ง ปาชางดาทา, ดางโฟง, ดี๊ อะปาทา

⁸ ดี๊ โปราทา, อาดางยา, ดี๊ อารีดาทา

⁹ ดี๊ ปาม้ะทา, อารีไซ, อารีได, ดี๊ ไวซาทา

¹⁰ เมะเว๊ อ ซื๊งเว๊ นี่ แม้ซี๊ง โพล้ง ยู อดีงอแด้, ฮางเมดาทา อ พู ฮามาง นอ อ พูแคว๊ อ แฌ้ ล ชี๊ง นอ, แบเด้าะ ล ตมละนี่ เว๊ อ ทฆ้าทโฆ่ แบ

¹¹ ล นี้ง แย๊ นอ, โพล้ง พี่ แบ ทแม้ซี๊ง-อ้ะ ลู่ง เว่ง ทล่างคุ้แคว่เท่อ ซูซา พ้า นอ, แบ ทเฌ๊ โล้แบ กจุ้แฆว้

¹² กจุ้แฆว้ ไคล้ ดี๊ น่าง เอซเทอ ไจ้ะเว๊, “โพล้ง ยู ลแพ นอ, นี่ แม้ซี๊งไฆวะ เว๊ เย่แย้ แฌ้ ลู่ง เว่ง ทล่างคุ้แคว่เท่อ ซูซา พ้า, เลา ดี๊ ฮามาง อ พูแคว๊ อ แฌ้ ล ชี๊ง นอ ปะ, ลู่ง กจุ้แฆว้ อ เว่งดูคล้องโท๊ พ้า, พี่ ล้างลื๊อ ก้ะ นอ, อ ซื๊ง แม้ ทเม้งเล้?, ค๊องเนงอี้ง, น ม กุ้นี่ ทเม้งเล้ นอ?, จ ม เกล๊าง แน้, น ท ไคล้ อางท่าง เท่อ นอ, ม อางท่าง ทเม้งเล้ เด้าะ?, จ ม ดึ้เกม๊า อ ฌ้องทางเกทาง”

¹³ น่าง เอซเทอ โล้แบ-อ้ะ ไจ้ะเว๊, “เมะ เก ทแบ กจุ้แฆว้ อ ซ้ะ นอ, ลู่ง โฌ้โฆะ เกม๊า โพล้ง ยู พี่ โอ ซูซา พ้า ลแพ นอ, แม้ โพะ ไละอางแบเลา เท่อ ล นี้ง แย๊ อี้ง อ ไค๊, ดี๊ เกม๊า โยะล้าง ฮามาง อ พูแคว๊ อ แฌ้ ล ชี๊ง นอ อ โคะ, ลู่ง ทล่าง โยะล้าง โคะ อ ล้อง”

¹⁴ กจุ้แฆว้ อางแบเลา เกม๊า แม้ บี่นอ, โอ ดี๊ ไละอางแบเลา เท่อ โอนี่ ลู่ง ซูซา พ้า, ดี๊ อ ซื๊งเว๊ โยะล้าง ฮามาง อ พู อ แฌ้ ล ชี๊ง นอ อ โคะ

¹⁵ โพล้ง ยู พี่ อ โอ ซูซา พ้า ลแพ นอ, โอซยอง โละซ้ะ ลู่ง มื่ง ชี๊งลี่ง นี้ง ล นี้ง, แล้ อาดา พ้า ปะ, ดี๊ นี่ แม้ซี๊ง โพล้ง ลู่ง ซูซา พ้า นอ ซ๊าแย้ แฌ้, แบเด้าะ อ ซื๊งเว๊ ล ตมละนี่ ทฆ้าทโฆ่ แบ

¹⁶ เมะ โพล้ง ยู อ แฌ้แพ, พี่ โอ กจุ้แฆว้ อ เว่งดูคล้องโท๊ พ้า กุ้ จอง นอ, โอซยอง โละซ้ะ, บี่ซุ้ ปด้างทะล้าง อ ซ้ะ เกม๊า พ้องไฆวะ ดี๊ อดีงอแด้ ดี๊ แม้ซี๊งไฆวะ โพล้ง พี่ อ แช๊เมะไฌ๊ซ้ะ ดี๊ อ ซื๊งเว๊ ลแพ นอ, เนว๊ไซ เย่ม๊า แฌ้, แบเด้าะ ล ตมละนี่ ทฆ้าทโฆ่ แบ

¹⁷ ทกึทาง อ ซ้ะ อี้ง นอ, กึทาง ลู่ง มื่ง ชี๊งซ๊า นี้ง ล นี้ง, ลู่ง แล้ อาดา พ้า, ดี๊ ลู่ง มื่ง ชี๊งลี่ง นี้ง ล นี้ง นอ, อ ซื๊งเว๊ โอไปว้ะ, ดี๊ มื่ง ล นี้ง แย๊ นอ, แม้ เว๊ เก ทลื่งอางลื่งโอ้ อ มื่ง นี้ง, ดี๊ เก ทซ้ะมึ อ มื่ง นี้ง

แม้ทาง ซ๊าง ทไฌ่ ปูรีง

¹⁸ แบเด้าะ โพล้ง ยู พี่ โอ ซูซา พ้า ลแพ นอ, โอซยอง โละซ้ะ ลู่ง มื่ง ชี๊งซ๊า นี้ง ล นี้ง, ดี๊ ลู่ง มื่ง ชี๊งลี่ง นี้ง ล นี้ง พ้า, ดี๊ โอไปว้ะ ลู่ง มื่ง ชี๊งเย่ นี้ง ล นี้ง พ้า, มื่ง ล นี้ง แย๊ นอ, แม้ เก ทลื่งอางลื่งโอ้ อ มื่ง, ดี๊ เก ทซ้ะมึ อ มื่ง นี้ง

¹⁹ อกย้อง บี่นอ, โพล้ง ยู ลู่ง เฌงพูเฌงแช่ พ้า, พี่ โอ วะ เว่ง ฆ้อง ค๊องโค๊ นอ, นี่ แม้ มื่ง ชี๊งลี่ง นี้ง ล นี้ง, ลู่ง แล้ อาดา พ้า นอ, เก ทซ้ะมึ อ มื่ง นี้ง, ดี๊ เก ทลื่งอางลื่งโอ้ อ มื่ง นี้ง, ดี๊ เก ทเซิงฆวี๊งซ้ะโย้ อ มื่ง นี้ง, ดี๊ เก ทเกล๊างมึซ้ะ โละซ้ะ เท่อ อ มื่งนี้ง

²⁰ ดี๊ โมเดไค กวิ้ล้างไน ทกึทาง อ ซ้ะ ลแพ อี้ง, ดี๊ โซ๊ง ไละกวิ้ยื่ง ลี้ ลู่ง โพล้ง ยู เลาพะ นอ อ โอ, พี่ โอ กจุ้แฆว้ อ เว่งดูคล้องโท๊ พ้า กุ้ อ จอง, เลา ดี๊ อ เบ้า ดี๊ อไย้

²¹ อางจ้ะนี่ อ ซื๊งเว๊ เกม๊า อ ทื๊ง มื่ง ชี๊งลี่ง นี้ง ล นี้ง, ลู่ง แล้ อาดา พ้า, ดี๊ มื่ง ชี๊งเย่ นี้ง ล นี้ง, ลู่ง แล้ ล เบง ฆ่าง นอ กุ้ อ เนง

²² เก มื่ง นี้ง พี่ โพล้ง ยู ลแพ นอ, พ้องไฆวะ ดี๊ อดีงอแด้, ดี๊ เก แล้ พี่ เปลง ทเมะมองแน๊อึ้ เกก้ะ ทซ้ะมึ, ดี๊ ทฌางล้างย้าล้าง เกก้ะ เซิงฆวี๊งซ้ะคล้าง อ มื่ง นี้ง, เอะ อ ซื๊งเว๊, ดี๊ เกม๊า อ ซื๊งเว๊ ทื๊ง ทลื่งอางลื่งโอ้ อ มื่ง นี้ง, ดี๊ ทเซิงมึซ้ะมึ อ มื่งนี้ง, เก มื่งนี้ง พี่ โซ๊ง ทเกล๊างมึซ้ะ โละซ้ะ เท่อ, ดี๊ เกล๊าง ทเกล๊างมึซ้ะ เอะ โพล้งซยางโพล้งน้ะ

²³ โพล้ง ยู ลแพ นอ เอิ้งล้าง ม แม้โพะ เท่อ, พี่ อ ซื๊งเว๊ แม้ทางซ๊าง เว๊ เย้า นอ อ ไค๊, ดี๊ แม้โพะ เท่อ พี่ โมเดไค กวิ้ทางไละ ท้อง อ ซื๊ง เว๊ นอ อ ไค๊

²⁴ เป๊งนี่ ฮางเมดาทา อ พู ฮามาง โพล้ง อาก้ะ, โพล้ง ยู ซีงลแพ อดีงอแด้ นอ, นี่ ช๊องมอง เท่อ ม แม้อ้าแม้ซ๊าง โพล้ง ยู, บี่ซุ้ แม้ เฌ๊ฌ้อง อ ซื๊งเว๊, ดี๊ นี่ พ้ะมื่งพ้ะแล้ บี่ซุ้ แม้ ล้างเทา ดี๊ แม้ เฌ๊ฌ้อง อ ซื๊งเว๊

²⁵ แบเด้าะ ท่อง น่าง เอซเทอ ลี้ฆ้าง โอ กจุ้แฆว้ นอ, อ เท่อ อางแบเลา-อ้ะ เก ไละเมะ, เกม๊า ทช๊องมอง ทแม้อ้าแม้ซ๊าง พี่ ฮามาง ช๊องมอง ลู่ง โพล้ง ยู อ ฆ่าง นอ, ล้างแบไท้ อ กแช่ อ คู, ดี๊ เกม๊า อ กแช่ ดี๊ อ พู นอ, แบ ทโยะ อ โคะ ลู่ง ทล่าง โยะล้าง โคะ นอ อ ล้อง

²⁶ อกย้องบี่นอ, อ ซื๊งเว๊ กุ้ มื่งนี้ง ลแพ นอ บี่อี้ง, ปูรีง, บี่ซุ้ดี๊ ทไคล้, “ปู”, ทบี่นอ, เมะเว๊ ทกุ้เม้ง พี่ กวิ้ล้าง ลู่ง ไละกวิ้ยื่ง พ้า อี้ง, ดี๊ ลู่ง เท่อ พี่ โพล้ง ยู ซีงลแพ แด แบ ท ล ไฌ่ อี้ง อกย้อง, ดี๊ เท่อ พี่ กึทาง ดี๊ อ ซื๊งเว๊ นอ

²⁷ โพล้ง ยู อางกีล้าง ดี๊ เอิ้งล้าง เว๊, อ ซื๊งเว๊ อ กแช่, ดี๊ อ ซื๊งเว๊ อชื้ออชะ, ดี๊ กุ้ อ แฌ้ พี่ นึฆ้าง แม้ โพล้ง อไฌะอไฌ่ นอ ม ทื๊ง มื่ง คี๊ง นี้ง อี้ง, ด้องซุ้ ทกวิ้ล้าง เว้ เว๊, ดี๊ บี่ซุ้ ดี๊ มื่ง นี้ง อช๊าอโท่, พี่ อางกีล้าง เว้ เว๊ กุ้เนง, ล โอโท่ไฆวะ เว๊ แบ

²⁸ ดี๊ เอิ้งล้าง เว๊ ม นางแบ มื่ง นี้ง อี้ง, ดี๊ ทื๊ง เว๊ เพล้า โพล้ง กุ้ อ ชู้, กุ้ อ ดอง, เว่งดูคล้องโท๊ พ้า กุ้ จอง, ดี๊ กุ้ อ เว่ง, ทไฌ่ ปูรีง อ มื่ง นี้ง อี้ง, ม ทื๊ง เว๊ ลู่ง โพล้ง ยู อ แกล้ พ้า, ล อางกีโท่ไฆวะ เว๊ แบ, ทนางแบทางไท้ มื่ง นี้ง ลแพ อี้ง นอ, ม ล ทึไฆวะ ลู่ง อ ซื๊งเว๊ อชื้ออชะ พ้า แบ

²⁹ ฌ้อง อาบีฮาอีง อ พูมืง น่าง เอซเทอ, ล พ๊าฆ่าง ดี๊ โมเดไค โพล้ง ยู นอ, นี่ กวิ้ไละ ระ ไละกวิ้ยื่ง คี๊งเบง ล เบง, พี่ แบฆ้ะ ดี๊ ทไฌ่ ปูรีง อี้ง นอ เมาน่าง

³⁰ โมเดไค โซ๊ง ไละกวิ้ยื่ง ลี้ ท้อง โพล้ง ยู กุ้ อ แฌ้, ลู่ง กจุ้แฆว้ อ เว่งดูคล้องโท๊ พ้า, ล แย้ คี๊งชี๊ง เนว๊ จอง นอ, เก ทชูฌี้ชูแอว้ เกม๊า โอซยืงโอบ้ะ

³¹ ดี๊ เกม๊า ทื๊ง ท ไฌ่ ปูรีง, บี่ซุ้ดี๊ ทอางกีล้าง อช๊าอโท่ นอ, ด้องซุ้ โมเดไค โพล้ง ยู, ดี๊ น่าง เอซเทอ อางแบเลา โพล้ง ยู ลแพ นอ, ดี๊ บี่ซุ้ดี๊ พี่ อ ซื๊งเว๊ อางกีล้าง เว๊ ลู่ง อ กแช่ อ ฌ่าง, ดี๊ ลู่ง อ ซื๊งเว๊ อชื้ออชะ อ ฌ่าง, แบฆ้ะ ดี๊ อ ซื๊งเว๊ อ ทดืงอาง เท่อ, ดี๊ อ ทฌางล้างย้าล้าง

³² น่าง เอซเทอ อ ทอางแบเลา นอ อางกีล้าง เว้ ทไฌ่ ปูรีง อ ไฌ่ ล ฆ๊างๆ, โอ ดี๊ ทกวิ้ล้างไน เก ไละเมะ นอ ล้อ