เอซเทอ 8 - Northern Pwo Karen Thai Bible

น่าง เอซเทอ แม้ช้า โพล้ง ยู

¹ ล นี้ง แย๊ นอ, กจุ้แฆว้ อาฮ้ะซูเอระ เกล๊าง ฮามาง อ เด้า, พี่ เก โพล้ง ยู ลแพ อดีงอแด้ นอ, เอะ น่าง เอซเทอ, โมเดไค ลี้ฆ้าง โอ กจุ้แฆว้, เมะเว๊ น่าง เอซเทอ นี่ โล้ เว๊, อ เว๊ นอ เก ทเม้งเล้ ดี๊ น่าง เอซเทอ

² กจุ้แฆว้ เบ้าะล้าง อ จูงไซ้ะ พี่ โอ ดี๊ อดู้งอยาง, พี่ อ แม้นี่ไท้ เว๊ ดี๊ ฮามาง นอ, ฌ้อง เกล๊าง เอะ โมเดไค, เมะ น่าง เอซเทอ นอ ต๊างทาง โมเดไค, เก ทอดู ลู่ง ฮามาง อ เด้า พ้า นอ ล้อ

³ ฌ้อง น่าง เอซเทอ โล้แบ กจุ้แฆว้ ได้ะ, อ เว๊ แบ้ล้าง เท่อ ลู่ง กจุ้แฆว้ อ คางไท้ะ, ดี๊ อางโฆอางแย๊ เว๊ ดี๊ เมะที๊งเมะน๊อง, บี่ซุ้ อางท่าง เกม๊า แม้ โอโท๊ไฆวะ, ฮามาง โพล้ง อาก้ะ อ ทช๊องมอง เว้ แม้อ้า เท่อ, ดี๊ ช๊องมอง อ้า เท่อ ลู่ง โพล้ง ยู ลแพ นอ อ ฌ่าง

⁴ กจุ้แฆว้ เยาฆ้าง อ นางทุ้บ้อง ท๊อง เอะ น่าง เอซเทอ, น่าง เอซเทอ ชี๊เทิงทาง ลี้ฆ้าง โอ กจุ้แฆว้

⁵ อ เว๊ โล้แบ เว๊ ไจ้ะเว๊, “เมะ เก เท่อ พี่ แบ กจุ้แฆว้ อ ซ้ะ, ดี๊ แย้ จ เมะ เก เท่อ พี่ อ แบเมะล้างซ้ะ ลู่ง น เมะแซ พ้า, ท ล เม้ง นอ เมะ แบเมาะ เกิ้งด้าง ลู่ง น เมะแซ พ้า, ดี๊ แย้ จ เมะ เก เท่อ พี่ อ แบเมะล้าง ซ้ะ ลู่ง น เมะแซ พ้า นอ, เกม๊าเต้ โอ ดี๊ ทกวิ้ทางไละ, อางแบเลา เกม๊า เปลงไฆวะ ทไคล้ ลู่ง ไละกวิ้ยื่ง พ้า, พี่ ฮางเมดาทา อ พู ฮามาง โพล้ง อาก้ะ ช๊องมองทาง เว๊ ดี๊ กวิ้ทาง เว๊, บี่ซุ้ ม แม้ เฌ๊ฌ้อง โพล้ง ยู, พี่ โอ กจุ้แฆว้ อ เว่งดูคล๊องโท๊ พ้า เลาพะ ลแพ นอ

⁶ เมะเว๊ จ ม โก้ง ซ้ะ แคว่ ทอ้าทซ๊าง, เฌ๊ ท้อง โพล้ง ล ชื้อ ฆ่าง ดี๊ แย้ ซี บี่จะเล้?, จ ม โก้ง ซ้ะ แคว่ ทแม้ เฌ๊ฌ้อง จ พื่ง จ วี่ ซี บี่จะเล้?”

⁷ กจุ้แฆว้ อาฮ้ะซูเอระ ไคล้ ดี๊ น่าง เอซเทอ, ดี๊ โมเดไค โพล้ง ยู นอ ไจ้ะเว๊, “แคว่เซ้อ, จ อางกีล้าง ฮามาง อ เด้า เอะ น่าง เอซเทอ เย้า, ดี๊ อ ซื๊งเว๊ซีงลแพ โยะล้าง เว๊ อ โคะ ลู่ง ทล่าง โยะล้าง โคะ อ ล้อง, เมะเว๊ เป๊งนี่ อ เว๊ เยาฆ้าง อ จูง แม้อ้าแม้ซ๊าง โพล้ง ยู

⁸ เกม๊า น ซื๊ง เว๊ กวิ้ เท่อ, แบฆ้ะ ดี๊ โพล้ง ยู ลแพ นอ อ ไฌ่, ท๊อง น แคว่-อ้ะ ฌี้ ลู่ง กจุ้แฆว้ อเม้งอแซ พ้า, ดี๊ แม้ไน ทเอิ้งล้าง ดี๊ กจุ้แฆว้ อ จูงไซ้ะ พี่ โอ ดี๊ อดู้งอยาง, เมะเว๊ ไละอางแบเลา เท่อ, พี่ กวิ้ทาง ลู่ง กจุ้แฆว้ อเม้งอแซ พ้า, ดี๊ แม้ไน ทเอิ้งล้าง ดี๊ กจุ้แฆว้ อ จูงไซ้ะ พี่ โอ ดี๊ อดู้งอยาง นอ, ม เปลงไท้ ลซีแบ”

⁹ ฌ้อง กจุ้แฆว้ กุ้นี่ อ โพล้งกวิ้ไนไละ, ลู่ง กจุ้แฆว้ อ เด้า พ้า อคูอแน่ เฌ๊ฆ้าง ล ว๊าง แย๊ นอ, ลู่ง แล้ ซ๊าเบง ล เบง พ้า, เมะเว๊ แล้ ซีวาง มื่งนี้ง คี๊งชี๊ง ซ๊านี้ง ล นี้ง, ดี๊ เกม๊า กวิ้ทาง ไละ อางแบเลา เท่อ, บี่ซุ้ดี๊ โมเดไค อางแบเลา เว๊ นอ กุ้ อ เม้ง, โซ๊ง เอะ โพล้ง ยู, ท้อง ลู่ง กเย่ ทอคูอแน่, ดี๊ โพล้งโพะคองเว่ง ซีงลแพ, ดี๊ ทอดูอแซย่ ลู่ง เว่งดูคล้องโท๊ พ้า, ล โค๊ ลู่ง เองเดีย, ท้อง ลู่ง ค่าง คุ้ เว่งดูคล้องโท๊ ล แย้ คี๊ง ชี๊ง เนว๊ เว่ง, ลี้ ท้อง ลู่ง เว่งดูคล้องโท๊ พ้า นอ, เก ไละเมะ ลู่ง เว่งดูคล้องโท๊ เว๊ นอ, ดี๊ ท้อง โพล้ง กุ้ ชื้อ เก อ กแช่ อ คว่าง, ดี๊ ท้อง โพล้ง ยู เก ไละเมะ อ กแช่ อ คว่าง

¹⁰ ดี๊ โมเดไค กวิ้ทาง เว๊ ลู่ง กจุ้แฆว้ อาฮ้ะซูเอระ อเม้งอแซ พ้า, ดี๊ แม้ไน ทเอิ้งล้าง ดี๊ กจุ้แฆว้ อ จูงไซ้ะ พี่ โอ ดี๊ อดู้งอยาง, ดี๊ โซ๊ง ไละกวิ้ยื่ง นอ, ลี้ ดี๊ โพล้ง โชะไละ, พี่ ทาง เทา กซี เพล, พี่ เก กจุ้แฆว้ อ กซี

¹¹ บี่ซุ้ดี๊ ไละกวิ้ยื่ง ลแพ อี้ง นอ, กจุ้แฆว้ เอิ้งล้าง เกม๊า โพล้ง ยู ซีงลแพ, พี่ โอ เว่ง พ้า กุ้ จอง นอ, เฌ๊ โอซยอง โละซ้ะ, บี่ซุ้ ปโล่ปด้างล้าง อ ซ้ะ, บี่ซุ้ แม้ เฌ๊ฌ้อง, บี่ซุ้ แม้ซี๊ง, ดี๊ บี่ซุ้ แม้ ล้างเทาไฆวะ โพล้งเฌงพูฆ๊างพู-อ้า, เว่งดูคล้องโท๊-อ้า, อ ซึ้พู น๊างมู๊ง นอ เลาพะ, พี่ ม เฌ๊ แม้อ้าแม้ซ๊าง อ ซื๊งเว๊, เลา ดี๊ พืงแซ ดี๊ กมืง, ดี๊ เฌ๊ ตมละ นี่ก้ะ อ ซื๊งเว๊ อฆ้าอโฆ่

¹² ลู่ง ล นี้ง ฆ่าง พ้า นอ, เฆ้ง กจุ้แฆว้ อาฮ้ะซูเอระ อ เว่งดูคล้องโท๊ พ้า กุ้ จอง, เมะเว๊ มื่ง ชี๊งซ๊า นี้ง ล นี้ง ลู่ง แล้ ชี๊งคี๊ง เบง ล เบง พ้า, ลู่ง แล้ อาดา พ้า

¹³ ไละ พี่ กวิ้ทาง เว๊ นอ อเตว่ ม แบ โซ๊งทาง-อ้ะ, เก ไละอางแบเลา เท่อ ลู่ง เว่งดูคล้องโท๊ พ้า กุ้ จอง, ดี๊ โล้ล้าง เกม๊า โพล้งเฌงพูฆ๊างพู กุ้ แฌ้ ซีงแฌ๊ เว๊, ดี๊ เกม๊า โพล้ง ยู ลแพ โอซยอง โละซ้ะ ล พ๊าฆ่าง ล นี้ง แย๊ นอ, บี่ซุ้ แม้แกไท้ อ กแช่ อดีงอแด้

¹⁴ โพล้ง โชะไละ นอ เทาทาง กซี, ปชื่ง ลี้ บี่ซุ้ดี๊ กจุ้แฆว้ อ ทอางแบเลา, ไละอางแบเลา เท่อ นอ กวิ้ทาง เว๊ ลู่ง เว่ง ทล่างคุ้แคว่เท่อ ซูซา พ้า

¹⁵ พี่ ล พ๊า แย๊ โมเดไค ไจทาง พ้องไฆวะ กจุ้แฆว้ อ เมะ นอ, อ เว๊ ซุ้ ไช๊แค่ อ เปย้า ดี๊ อ แอว้, ล พ๊าฆ่าง ดี๊ คูคล้าง ท๊อง พ้ะดู, ดี๊ ไช๊แค่ พ้ะโท๊ อ ลึ้, เมะ โพล้ง เว่ง ซูซา พ้า นอ, ซองลี้ เซิงมึซ้ะมึ

¹⁶ โพล้ง ยู ลแพ นอ โอ ดี๊ ทมึทพ้า, ทเซิงมึซ้ะมึ, ทเซิงฆวี๊งซ้ะโย้, ดี๊ ทฆี๊งทแล้

¹⁷ ลู่ง เว่งดูคล้องโท๊ พ้า กุ้ อ จอง, จองฌี้กล้ะฌี้ พี่ กจุ้แฆว้ อ ทอางแบเลา, ดี๊ อ ไละอางแบเลา เท่อ เฌ๊ ท้อง นอ, โอ ดี๊ ทซ้ะอวีงซ้ะโทะ, ทเซิงฆวี๊งซ้ะโย้ ลู่ง โพล้ง ยู ซีงลแพ นอ อ แกล้, โอ ดี๊ ทลื่งอางลื่งโอ้, ดี๊ มื่ง นี้ง ทแม้มึอางอวีง, โพล้ง แอฌี่งแอฌ้อง เฌ๊นี่ ลู่ง โพล้ง กุ้ที๊งกุ้ค่าง นอ อ ค่าง พ้า, เฌ๊ฆ้าง นึ เก โพล้ง ยู, เมะเว๊ อ ซื๊งเว๊ โอ ทซ้ะเมซ้ะไพล้ โพล้ง ยู ลแพ นอ อดู้งอยาง พ้า