เอซเทอ 6 - Northern Pwo Karen Thai Bible

กจุ้แฆว้ อางปฆ้า แบ โมเดไค

¹ ล แน้ แย๊ นอ, กจุ้แฆว้ มี๊ง ล นี่ แบ, อ เว๊ อางแบเลา เกม๊า เฌ๊โชะ ไละ กวิ้ไน ทกึทาง อ ซ้ะ พี่ เกิ้ง นางแบ-อ้ะ, เมะเว๊ เฌ๊โชะ ไละ ทกวิ้ไน เท่อ, อ ซื๊งเว๊ พ้ะ ไละ นอ เอะ กจุ้แฆว้

² ดี๊ แด ทไคล้ กวิ้ เว๊ บี่อี้ง, โมเดไค นี่ โล้ เท่อ แบฆ้ะ ดี๊ กจุ้แฆว้ อ กแคว๊ได้ะดีง, เมะเว๊ บีทานา ดี๊ เทเร้ะ คี๊งแฌ้ นอ อ ไฌ่, พี่ อ เก โพล้งแคว่ทะป้ะตู๊งอเคิง, อ ซื๊งเว๊ เฌา อางฆื๊ง เกล้ ม แม้ซี๊ง กจุ้แฆว้ อาฮ้ะซูเอระ

³ กจุ้แฆว้ ไจ้ะเว๊ บี่อี้ง, “นี่ เกล๊าง เอะ โมเดไค อฆี๊งอแล้, ดี๊ อเม้งอแซ ลู่ง ท ล ไฌ่ อี้ง อกย้อง ล เม้งๆ, ชี่-อ้า?”, กจุ้แฆว้ อ กดูกแซย่ พี่ แม้ เอะ อ เท่อ นอ โล้-อ้ะ ไจ้ะเว๊, “ล นี่ เกล๊าง เอะ-อ้ะ ทน่าง เม้ง ได้ะ แบ กแช่-เอ้อ”

⁴ กจุ้แฆว้ ไจ้ะเว๊, “โพล้ง เล้, โอ เด้า อ คว้าง พ้า นอ?”, ฮามาง นอ เฌ๊ฆ้าง พู่ ท้อง บลาง อ คว้าง พ้า ค๊องโค๊ ล คะ นอ, บี่ซุ้ ม โล้แบ กจุ้แฆว้, แบฆ้ะ ดี๊ ทไฌ่ โยะล้างไฆวะ โมเดไค อ โคะ ลู่ง ทล่าง โยะล้าง โคะ, พี่ นี่ แด้เว้ เว๊ ลู่ง อ ฌ่าง นอ

⁵ กจุ้แฆว้ อ กดูกแซย่ โล้แบ-อ้ะ ไจ้ะเว๊, “อ นอ, ฮามาง, ชี๊เทิง โอ ลู่ง ท อ คว้าง พ้า กแช่-เอ้อ”, ดี๊ กจุ้แฆว้ ไจ้ะเว๊, “เกม๊า อ เฌ๊ฆ้าง”

⁶ ฮามาง นอ เฌ๊ฆ้าง, กจุ้แฆว้ ไคล้ ดี๊-อ้ะ ไจ้ะเว๊, “เกิ้ง ม แม้ บี่จะเล้, ดี๊ โพล้ง พี่ กจุ้แฆว้ แบ อ ซ้ะ ม อางปฆ้า เว๊?”, ดี๊ ฮามาง ไคล้ กโช้ อ ซ้ะ พ้า ไจ้ะเว๊, “โพล้ง เล้, พี่ กจุ้แฆว้ แบ อ ซ้ะ ม อางปฆ้า เว๊ แอเละ แย้?”

⁷ ฌ้อง ฮามาง โล้แบ กจุ้แฆว้ บี่อี้ง, “ลู่ง โพล้ง พี่ กจุ้แฆว้ แบ อ ซ้ะ ม อางปฆ้า เว๊ นอ

⁸ เกม๊า แม้ นี่ กจุ้แฆว้ อ ไช๊แค่, ดี๊ กซี พี่ อ เทา เว๊ โอ ดี๊ คูคล้าง ลู่ง อ คูล้อง นอ, เฌ๊โชะ-อ้ะ

⁹ ดี๊ กจุ้แฆว้ อ ไช๊แค่ ดี๊ กซี นอ, เกล๊าง เอะ กจุ้แฆว้ อ ทคูทแน่ ลู่ง อ ดูทึ ล แฌ้ นอ, ดี๊ เกม๊า อ เว๊ ดึ้ ซุ้ทาง เอะ โพล้ง พี่ กจุ้แฆว้ แบ อ ซ้ะ ม อางปฆ้า เว๊ นอ, ดี๊ เกม๊า โพล้ง แม้ช้า โพล้ง ล แฌ้ นอ, ทาง ชี๊น้าง กซี อ โคล๊งคู, ดี๊ ลี้ฌ้า-อ้ะ ลู่ง เกล้ เว่ง พ้า, ดี๊ เกม๊า โพล้ง ลี้ ลู่ง อ เมะแซ พ้า, กุ้ซย้ะทาง เท่อ บี่อี้ง, ‘โพล้ง พี่ กจุ้แฆว้ แบ อ ซ้ะ ม อางปฆ้า เว๊ นอ เก บี่อี้ง ล้อ’ ”

¹⁰ กจุ้แฆว้ ไคล้ ดี๊ ฮามาง ไจ้ะเว๊, “ปชื่ง แม้-อ้ะ แดเทา, แม้นี่ ไช๊แค่ ดี๊ กซี ด้องซุ้ น โล้ นอ, ฌ้อง แม้ เอะ โมเดไค โพล้ง ยู, พี่ ชี๊น้าง ลู่ง บลาง อ ป้ะตู๊งไท้ะ นอ บี่นอ, แม้-อ้ะ บี่ซุ้ดี๊ เท่อ พี่ น โล้ นอ, ท่อง อ กู้งทาง กุ้เม้ง, ม๊า ไว้ะไฆวะ ล ฌี้

¹¹ ฮามาง แม้ นี่ กจุ้แฆว้ อ ไช๊แค่ ดี๊ กซี, ดี๊ ดึ้ซุ้ ทาง เอะ โมเดไค, ดี๊ เกม๊า เว๊ อ ทาง กซี คู ลี้ ลู่ง เกล้ เว่ง พ้า, ฮามาง นอ ลี้ เว๊ ลู่ง อ เมะแซ พ้า, กุ้ซย้ะทาง เท่อ ไจ้ะเว๊, “โพล้ง พี่ กจุ้แฆว้ แบ อ ซ้ะ ม อางปฆ้า เว๊ นอ เก บี่อี้ง ล้อ”

¹² ฌ้อง โมเดไค เฌ๊ไท้ ลู่ง บลาง อ ป้ะตู๊ง พ้า, แบเด้าะ ฮามาง นอ ปชื่ง ไท้ ลู่ง อ เด้า, คลึไบ้ะล้าง อ คู, ดี๊ ฌางล้างย้าล้าง

¹³ ดี๊ ท กุ้เม้ง พี่ กึทาง อ ซ้ะ ดี๊-อ้ะ นอ, อ เว๊ อางโล๊ไท้ เอะ อ แม๊ น่าง เซเร้ะ, ดี๊ อ ฌุ้พาง กุ้ แฌ้ คุ้ช๊องแน เว๊, อ โพล้งเนฌ้าโล้ฌ้าเท่อ ดี๊ อ แม๊ น่าง เซเร้ะ นอ, ไจ้ะเว๊ บี่อี้ง, “น เมะ ล้างเทะเค้า ลู่ง โมเดไค อ เมะแซ พ้า, ดี๊ ลู่ง อ เว๊ เก โพล้ง อ ชื้อ ยู อกย้อง นอ, น ม ล น้า-อ้ะ แบ, แบเด้าะ ม ล้างเทะเค้า ลู่ง อ เมะแซ พ้า เต้ๆ, ล้อ”

ฮามาง ต้องนอง ทเซงทื่งเฌ๊ฌ้อง, แบเด้าะ โมเดไค ต้องนอง ท เกทางเกโท๊

¹⁴ พี่ อ ซื๊งเว๊ซีงลแพ ไคล้ ดี๊ ฮามาง อ แค๊ นอ, กจุ้แฆว้ อ กแคว๊ได้ะดีง ซีงลแพ เฌ๊ ท้อง, ดี๊ ปชื่ง ลี้ฌ้า ฮามาง ลู่ง ทลื่งอางลื่งโอ้ พ้า, พี่ น่าง เอซเทอ แม้ทางนี่ เว๊ นอ