เอซเทอ 5 - Northern Pwo Karen Thai Bible

น่าง เอซเทอ ลื่งอางลื่งโอ้ เท่อ

¹ ท่อง อ ท้อง มื่ง ซ๊านี้ง ล นี้ง นอ, น่าง เอซเทอ ซุ้ทาง อฆ้าอโฆ่ ลู่ง ทเก กจุ้แฆว้ อ แม๊ นอ, ดี๊ ชี๊เทิง ลู่ง บลาง อ คว้าง พ้า แย๊โค๊, กแท้ โละซ้ะ ดี๊ กจุ้แฆว้ อ ทล่างแดซยอง พ้า, กจุ้แฆว้ นอ ชี๊น้าง ลู่ง ล่างชี๊น้าง คู บลาง พ้า, พี่ กแท้ โละซ้ะ ดี๊ เกล้ นึฆ้าง บลาง พ้า

² ท่อง กจุ้แฆว้ แคว่ เท่อ, แด น่าง เอซเทอ ชี๊เทิง โอ บลาง อ คว้าง พ้า นอ, อ เว๊ แบเมะล้างซ้ะ กจุ้แฆว้ ฌี้ มะ, กจุ้แฆว้ เยาฆ้าง อ นางทุ้บ้อง ท๊อง, พี่ โอ อ จูงพ้า นอ เอะ น่าง เอซเทอ, ดี๊ น่าง เอซเทอ เฌ๊ฆ้าง พอง เว๊ อ นางทุ้บ้อง คี๊งทุ้

³ กจุ้แฆว้ ไคล้ ดี๊-อ้ะ ไจ้ะเว๊, “น่าง เอซเทอ-เอ้อ, ท อไฌ่อกย้อง โอ ล เม้งๆ, -อ้า?, น แบซ้ะ ทเม้งเล้?, นอ, จ ม เกล๊าง แน้ ซี ท้อง พุ้พ๊าง จ มื่ง จ บ้าง ล้อ”

⁴ ดี๊ น่าง เอซเทอ โล้แบ-อ้ะ ไจ้ะเว๊, “เมะ เก ทแบ กจุ้แฆว้ อ ซ้ะ นอ, เกม๊าเต้ กจุ้แฆว้ เฌ๊ ล พ๊าฆ่าง ดี๊ ฮามาง ล นี้ง แย๊ อี้ง, บี่ซุ้ อาง ทอางทโอ้ พี่ จ แด้เว้-อ้ะ เทว๊ เอะ แน้”

⁵ กจุ้แฆว้ ไจ้ะเว๊, “ปชื่ง ลี้ กุ้นี่ ฮามาง ม๊า อ เฌ๊, บี่ซุ้ ม นี่ แม้โพะ เท่อ พี่ น่าง เอซเทอ แบซ้ะ เว๊ นอ อ ไค๊”, กจุ้แฆว้ ลี้ ลู่ง น่าง เอซเทอ อ ทลื่งอางลื่งโอ้ พ้า, ล พ๊าฆ่าง ดี๊ ฮามาง

⁶ พี่ โอ้ ไซ้ะ ซไบ้ะ แซ ที๊ง อ แค๊ นอ, กจุ้แฆว้ ไคล้ ดี๊ น่าง เอซเทอ ไจ้ะเว๊, “น ม กุ้นี่ ทเม้งเล้?, จ ม เกล๊าง แน้, น ม อางท่าง ทเม้งเล้?, ทึเมะ พุ้พ๊าง จ มื่ง จ บ้าง ฌี้ นอ, น ม นี่-อ้ะ ล้อ”

⁷ น่าง เอซเทอ โล้ เว๊ บี่อี้ง, “จ ทกุ้นี่ ดี๊ จ ทอางท่าง นอ

⁸ เมะเว๊ จ เมะ เก โพล้ง ลู่ง อ แบเมะล้างซ้ะ กจุ้แฆว้, ดี๊ เก ท แบ กจุ้แฆว้ อ ซ้ะ, พี่ ม เกล๊าง เท่อ บี่ซุ้ดี๊ จ ทกุ้นี่, ดี๊ แม้ บี่ซุ้ดี๊ จ ทอางท่าง นอ, ลู่ง โฌ้โฆะ เกม๊า กจุ้แฆว้ เฌ๊ ลู่ง จ ท ลื่งอางลื่งโอ้ ล พ๊าฆ่าง ดี๊ ฮามาง, ดี๊ จ ม แม้โพะ กจุ้แฆว้ อ ทไคล้ นอ อ ไค๊”

ฮามาง ช๊องมอง เว้ เท่อ ม โยะล้าง โมเดไค อ โคะ

⁹ ล นี้ง แย๊ นอ ฮามาง ไจทาง ดี๊ ทเซิงฆวี๊งซ้ะโย้, ดี๊ เซิงมึซ้ะมึ, แบเด้าะ ท่อง ฮามาง แด โมเดไค ลู่ง บลาง อ ป้ะตู๊งไท้ะ ล ชี๊เทิงทาง แบ, ล ว้ะโทะ ลู่ง อ เมะแซ พ้า แบ นอ, อ เว๊ ซ้ะ เฌ๊ทาง ดี๊ โมเดไค

¹⁰ ทึเมะ บี่นอ ฌี้ นอ, ฮามาง โก้ง เว๊ เฆาะ ไท้ ลู่ง อ เด้า ไวะ, เจ่ทาง โพล้ง ลี้ กุ้นี่ อ ฌุ้เม้งฌุ้พาง, ดี๊ อ แม๊ น่าง เซเร้ะ

¹¹ ฌ้อง ฮามาง อางโล๊ไท้ เท่อ แบฆ้ะ ดี๊ อ ทโอทช๊อง, อ พู อ แฌ้ แอ แฌ้ แซย้, ดี๊ อฆี๊งอแล้ ล เม้ง แบ ล เม้ง, พี่ กจุ้แฆว้ เกล๊าง เอะ-อ้ะ, ดี๊ อางโล๊ไท้ แบฆ้ะ ดี๊ เท่อ, พี่ กจุ้แฆว้ อางกีทางโท๊-อ้ะ ดูเละ กดูกแซย่, ดี๊ ทอดู แม้ เท่อ บลาง พ้า นอ บี่จะเล้

¹² ฌ้อง ฮามาง โล้ แอทาง เท่อ ได้ะ ไจ้ะเว๊, “ทึเมะ น่าง เอซเทอ ฌี้ นอ, ล เกม๊า โพล้ง ลี้โพะ กจุ้แฆว้ อ ไค๊, ลู่ง อ เว๊ อ ทลื่งอางลื่งโอ้ พ้า อี้ง น่าง แฌ้ แบ, โอ เว๊ ที่ แย้ ล แฌ้ ล้อ, ดี๊ ลู่งโฌ้โฆะ น่าง เอซเทอ โล้แบ แย้ ดี๊ กจุ้แฆว้ ลี้ ได้ะ

¹³ แบเด้าะ ทลแพ อี้ง เลาพะ นอ, ล ล้างเปิ่ง ลู่ง จ ฌ่าง แบ, พี่ จ แด โมเดไค โพล้ง ยู, ชี๊น้าง โอ ลู่ง บลาง อ ป้ะตู๊งไท้ะ ได้ะ นอ

¹⁴ อ แม๊ น่าง เซเร้ะ ดี๊ อ ฌุ้พาง กุ้ แฌ้ ไคล้ ดี๊-อ้ะ ไจ้ะเว๊, “เกม๊า แม้ทางนี่ ทล่าง โยะล้าง โคะ โท๊ ชี๊เทิง ลี่งชี๊ง ลี่ง แพล่, ทพ้างทาง โฌ้โค๊ โล้แบ กจุ้แฆว้ เกม๊า โยะล้าง โมเดไค อ โคะ พี่ นอ, ฌ้อง ลี้ ดี๊ กจุ้แฆว้ ลู่ง ท ลื่งอางลื่งโอ้ พ้า นอ, ดี๊ ทเซิงฆวี๊งซ้ะโย้” ทโล้ฌ้า อี้ง นอ แบ ฮามาง อ ซ้ะ, อ เว๊ อางแบเลา เกม๊า แม้ทางนี่ ทล่าง โยะล้าง โคะ นอ ล้อ