เอซเทอ 3 - Northern Pwo Karen Thai Bible

ฮามาง ช๊องมอง ม แม้เฌ๊ฌ้องไฆวะ โพล้ง ยู

¹ พี่ ทกึทาง อ ซ้ะ ลแพ อี้ง พ้องไค๊ไฆวะ นอ, กจุ้แฆว้ อาฮ้ะซูเอระ เกม๊า ฮางเมดาทา โพล้ง อาก้ะ อ พู ฮามาง, เก ทอดูอโท๊ อางกี ทางโท๊ เว๊, ดี๊ เกม๊า เว๊ อ ล่าง ชี๊น้าง, โท๊เละ ทอดูอแซย่ กุ้ แฌ้ พี่ โอ ดี๊-อ้ะ นอ

² กจุ้แฆว้ อ เพล่ดู กุ้ แฌ้ พี่ โอ ลู่ง บลาง อ ป้ะตู๊งไท้ะ นอ, แบ้ล้าง เท่อ เนโพลทาง ททื๊งแบนะแบ ฮามาง, เมะเว๊ กจุ้แฆว้ อางแบเลา เว๊, เกม๊า อ เนโพลทาง ททื๊งแบนะแบ-อ้ะ บี่นอ, แบเด้าะ โมเดไค ล แบ้ทาง-อ้ะ, ดี๊ ล เนโพลทาง ททื๊งแบนะแบ-อ้ะ แบ

³ กจุ้แฆว้ อ เพล่ดู, พี่ โอ ลู่ง บลาง ป้ะตู๊งไท้ะ ลแพ นอ, ไคล้ ดี๊ โมเดไค ไจ้ะเว๊, “แม้ ทเล้?, น ลือ ค๊างพะ กจุ้แฆว้ อ ทอางแบเลา”

⁴ โอก้ะ ลู่ง ไค๊, ท่อง อ ซื๊งเว๊ ไคล้ ดี๊-อ้ะ นี้งๆ, เย้า, นี้งๆ, เด้าะ, ดี๊ อ เว๊ ล คุ้ช๊องแน แบ นอ, อ ซื๊งเว๊ ลี้ โล้แบ ฮามาง บี่ซุ้ ม แคว่ดุ้ เว๊, โมเดไค อ ทไคล้ เมะ ม น้า เท่อ ชี่-อ้า? เมะเว๊ อ เว๊ โล้ โพล้ง ลแพ นอ, ไจ้ะเว๊ อ กแช่ เก โพล้ง ยู

⁵ ท่อง ฮามาง แด เว๊ โมเดไค ล แบ้ทาง-อ้ะ แบ, ล เนโพลทาง ททื๊งแบนะแบ-อ้ะ นอ, ฮามาง ซ้ะทาง พ้ะดู

⁶ แบเด้าะ แคว่ เว๊ เก ทเฌ๊ฌ้อง ทแม้ฆี๊งแม้แล้, พี่ ม พอง โมเดไค ล แฌ้ เฆาะ, เมะเว๊ แด อ ซื๊งเว๊ โล้ เกม๊า ซีงแฌ๊, แบฆ้ะ ดี๊ โมเดไค อชื้ออชะ อ ไฌ่ เย้า, อกย้อง บี่นอ, ฮามาง อางฆื๊ง เกล้ ม แม้ เฌ๊ฌ้อง โพล้ง ยู เลาพะ, เมะเว๊ โมเดไค อ ชื้อ เฆ้ง อาฮ้ะซูเอระ อมื่งอบ้าง พ้า

⁷ ลู่ง แล้ อ ต้องคู ล เบง พ้า, พี่ อ เก แล้ นีซาง ชี๊งคี๊ง เนง ล เนง พ้า, ลู่ง กจุ้แฆว้ อาฮ้ะซูเอระ อ ชู้ แค๊ นอ, อ ซื๊งเว๊ พอง ไละพู ลู่ง ฮามาง อ เมะแซ พ้า, บี่ซุ้ อางฆื๊ง มื่ง นี้ง อางฆื๊ง แล้, อ ซื๊ง เว๊ นี่ แล้ ล ชี๊งคี๊ง เบง ล เบง นอ, เมะเว๊ แล้ อาดา

⁸ ฌ้อง ฮามาง โล้แบ กจุ้แฆว้ อาฮ้ะซูเอระ ไจ้ะเว๊, “โพล้ง โอ ล ชื้อ ที่พ้ะที่ล้าง, ดี๊ โอเจโอพ้ะ โละซ้ะ ลู่ง โพล้ง ล ชื้อ แบ ล ชื้อ อ แกล้ พ้า, ลู่ง เว่งดูคล้องโท๊ พ้า กุ้ จอง, ลู่ง น มื่ง น บ้าง พ้า, อ ซื๊งเว๊ อ ทอางกีล้าง ล้างช๊าง โละซ้ะ ดี๊ อ ชื้อ อ แฌ้แพ อ ทอางกีล้าง เลาพะ, ดี๊ อ ซื๊งเว๊ ล แฌแซกต้าง กจุ้แฆว้ อ ทอางกีล้าง แบ, พี่ กจุ้แฆว้ ทูแพล่ อ ซื๊งเว๊ บี่อี้ง นอ, ล ล้างเปิ่ง ลู่ง กจุ้แฆว้ อ ฌ่าง แบ

⁹ เมะ แบ กจุ้แฆว้ อ ซ้ะ นอ, เกม๊า กวิ้ทางไละ อางแบเลา เท่อ, เกม๊า แม้เฌ๊ฌ้องไฆวะ อ ซื๊งเว๊ ลแพ นอ, ดี๊ จ ม เทว๊ จี้ ล ไซ ตะลาง ชวี๊งล้าง ลู่ง โพล้ง ยู่แคว่ กจุ้แฆว้ อ ทไพ้ะทแม้ นอ อ จูงพ้า, บี่ซุ้ ม อางกีล้าง เว๊ ลู่ง กจุ้แฆว้ อ ทล่าง อางกีซยอง เท่อ นอ อ พ้า”

¹⁰ กจุ้แฆว้ เบ้าะล้างนี่ อ จูงไซ้ะ พี่ โอ ดี๊ อดู้งอยาง ลู่ง อ จูง ล้อง นอ, เกล๊าง เอะ ฮางเมดาทา โพล้ง อาก้ะ อ พู, เมะเว๊ ฮามาง, พี่ เก โพล้ง ยู อดีงอแด้

¹¹ ดี๊ ไคล้ ดี๊ ฮามาง ไจ้ะเว๊, “จี้ ดี๊ โพล้งเฌงพูฆ๊างพู นอ, จ อางกีล้าง เอะ แน้, บี่ซุ้ น ม แม้ เอะ อ ซื๊งเว๊ ท๊อง น แคว่-อ้ะ ฌี้ แม้ นอ”

¹² ฌ้อง อ กุ้ นี่ โพล้งกวิ้ไนไละ ลู่ง บลาง พ้า เฌ๊ฆ้าง, ลู่ง มื่ง ชี๊งซ๊า นี้ง ล นี้ง, แล้ อ ต้องคู ล เบง, เกม๊า อ กวิ้ทาง ไละ อางแบเลา เท่อ, บี่ซุ้ดี๊ ฮามาง อางแบเลา เว๊ นอ กุ้เม้ง, โซ๊ง เว๊ ลี้ท้อง กจุ้แฆว้ อ ทอดูอคูอแน่ ดี๊ ท้อง โพล้งโพะคองเว่ง, พี่ โอ ยู่แคว่ เว่งดูคล้องโท๊ คระ กุ้ จอง, ดี๊ ท้อง โพล้ง กุ้ชื้อ อกดูกแซย่, ดี๊ เว่งดูคล้องโท๊ กุ้ จอง, เก โพล้ง กุ้ชื้อ อ ไละเมะ, บี่ซุ้ดี๊ อ กแช่ อ คว่าง, กวิ้ล้าง เว๊ ลู่ง กจุ้แฆว้ อาฮ้ะซูเอระ อเม้งอแซ พ้า, ฌ้อง แม้ไน ล้าง ทเอิ้งล้าง ดี๊ กจุ้แฆว้ อ จูงไซ้ะ พี่ โอ อดู้งอยาง

¹³ เกม๊า โพล้ง โชะไละ, ลี้ โชะ ไละกวิ้ยื่ง ลแพ อี้ง, ลู่ง กจุ้แฆว้ อ เว่งดูคล้องโท๊ พ้า กุ้ จอง, อางแบเลา เกม๊า แม้ เฌ๊ฌ้อง, แม้ซี๊ง, ดี๊ แม้ ล้างเทาไฆวะ โพล้ง ยู เลาพะ, เลา ดี๊ อ บาง อ แซย่, เลา ดี๊ พืงแซ ดี๊ กมืง ล นี้งฆ่าง นอ, เมะเว๊ มื่ง ชี๊งซ๊า นี้ง ล นี้ง แล้ ชี๊งคี๊ง เบง ล เบง พ้า, เมะเว๊ แล้ อาดา, ดี๊ เกม๊า ลู่นี่ก้ะ อ ซื๊งเว๊ ลแพ นอ อฆ้าอโฆ่ ปะ

¹⁴ เกม๊า แม้ทาง นี่ ไละ นอ อเตว่, ดี๊ กวิ้ทาง-อ้ะ เก ไละ อางแบเลา เท่อ, ลู่ง เว่งดูคล้องโท๊ พ้า กุ้ จอง, ลี้ โล้ล้าง เกม๊า โพล้ง กุ้ที๊งกุ้ค่าง แด้เว้ ซ้ะ, ล พ๊าฆ่าง ลู่ง ล นี้ง แย๊ นอ อ ฌ่าง

¹⁵ โพล้ง โชะไละ นอ ปชื่ง ลี้, บี่ซุ้ดี๊ กจุ้แฆว้ อ ทอางแบเลา, แบเด้าะ ไละ อางแบเลา เท่อ นอ, เจ่ทาง เว๊ ลู่ง เว่ง ทล่างคุ้แคว่เท่อ ซูซา พ้า, กจุ้แฆว้ นอ ชี๊น้าง โอ้ ซกุ้ เท่อ ดี๊ ฮามาง, พี่ เว่ง ทล่างคุ้แคว่เท่อ ซูซา พ้า เติ้งทางเติ้งล้าง อ แค๊ นอ