เอซเทอ 2 - Northern Pwo Karen Thai Bible

เอซเทอ นี่ เก แบ กจุ้แฆว้ อ แม๊

¹ ลู่ง ทกึทาง อ ซ้ะ ลแพ อี้ง พ้องไค๊ไฆวะ, พี่ กจุ้แฆว้ อาฮ้ะซูเอระ อ ทซ้ะทาง ล้างซยืง เย้า นอ, อ เว๊ นางแบทางไท้ น่าง วาที ดี๊ เท่อ พี่ อ แม้ เว๊, ดี๊ ไละ อางแบเลา เท่อ, พี่ อ กแช่ กวิ้ทาง เว๊ แบฆ้ะ ดี๊ น่าง วาที

² กจุ้แฆว้ อ กดูกแซย่ พี่ แม้ เอะ อ เท่อ นอ, โล้ เอะ-อ้ะ ไจ้ะเว๊, “เกม๊า อางฆื๊ง นี่ มืงน้าง เช๊งเกล้ง, พี่ ฌี้ เฌ๊ เทว๊ เอะ กจุ้แฆว้

³ ดี๊ เกม๊า กจุ้แฆว้ ต๊างทางนี่ โพล้ง แม้คิ้ เอะ อ เท่อ, ลู่ง เว่งดูคล้องโท๊ อมื่งอบ้าง พ้า กุ้ จอง, เกม๊า อางกีซยองนี่ มืงน้าง เช๊งเกล้ง, พี่ อ ฌี้ กุ้ แฌ้, เฌ๊ ลู่ง ฮาเรง เว่ง ทล่างคุ้แคว่เท่อ ซูซา พ้า, เกม๊า อ โอ กจุ้แฆว้ อ เพล่ เฮไก กแคว๊ได้ะดีง อ ท ยู่ทะแคว่ทะ พ้า, ดี๊ เกม๊า อ เกล๊าง ทฆ้าทโฆ่ ไต้ฆี๊ง ทาง ซ้ะ เอะ กมืง ลแพ นอ

⁴ ดี๊ เกม๊า มืงน้าง ล แฌ้ แย๊ พี่ อ แบ กจุ้แฆว้ อ ซ้ะ นอ, เก แบ กจุ้แฆว้ อ แม๊ เท่งก้ะ น่าง วาที”, ทโล้ อี้ง นอ แบ กจุ้แฆว้ อ ซ้ะ, อ เว๊ แม้ เว๊ บี่ซุ้ดี๊ นอ ล้อ

⁵ โพล้ง ยู โอ ล แฌ้ ได้ะ ลู่ง เว่ง ทล่างคุ้แคว่เท่อ ซูซา พ้า, อ เม้ง โมเดไค, โมเดไค นอ เก ยาอี อ พู, ยาอี นอ เก ชีเมอี อ พู, ชีเมอี นอ เก คี อ พู, คี นอ เก โพล้ง เบงยามีง

⁶ เมะเว๊ คี พี่ เนบูคาเนซา กจุ้แฆว้ ค่าง บาบีโลง พองนี่-อ้ะ, โอนี่ ลู่ง เยรูซเลง ลี้ ล พ๊าฆ่าง ดี๊ ทอฆ่อง, ดี๊ เยโคนียา กจุ้แฆว้ ลู่ง ค่าง ยูดา

⁷ อ เว๊ ลื่งนี่ ฮาดาชา เมะเว๊, เอซเทอ, พี่ เก อ ม้างโจ้ อ พูมืง, เมะเว๊ แด อ มู่ อ แพ่ ล โอ ล้าแบ, มืงน้าง ล แฌ้ อี้ง นอ, อ เค่งแบฌ้างฌี้ ดี๊ ล้าง แคว่ ดู มะ, พี่ อ มู่ อ แพ่ ซี๊ง เย้า นอ, โมเดไค ฮะ นี่ เว๊ เฌ๊ เก อ พู

⁸ ท่อง ทโล้ล้าง กจุ้แฆว้ อ ทอางแบเลา, ดี๊ อ ทอางกีล้าง นอ, โพล้ง มืงน้าง แอฌี่งแอฌ้อง แบ ทอางกีซยอง-อ้ะ, เฌ๊ นึฆ้าง ลู่ง เว่ง ทล่างคุ้แคว่เท่อ ซูซา พ้า, โอ ลู่ง เฮไก อ ทยู่ทะแคว่ทะ พ้า, น่าง เอซเทอ แบ ทเฌ๊ นึฆ้างฌ้า-อ้ะ ลู่ง บลาง พ้า, โอ ลู่ง เฮไก พี่ ยู่แคว่ กมืง นอ อ ทยู่แคว่ พ้า

⁹ กมืง นอ แบ อ เว๊ อ ทมอง, ดี๊ แบเมะล้างซ้ะ-อ้ะ, อ เว๊ ปชื่ง แม้นี่ทเท้าเมะเท้าแน๊, ดี๊ ทอางทโอ้ พี่ เก กมืง นอ อ ฌ่าง นอ, เลา ดี๊ เพล่มืง พี่ ลึนี่ เอะ เว๊ ลู่ง บลาง พ้า เย้า เนว๊แฌ้, ฌ้อง แญ่ไฆวะ กมืง นอ ดี๊ อ เพล่ มืง, ลี้ ลู่ง ทล่าง พี่ อ ฌี้ทึ ลู่ง ฮาเรง พ้า

¹⁰ น่าง เอซเทอ ล นี่ โล้ล้าง อไท้ะอบ้อง แบ เมะเว๊ โมเดไค อางแบเลา-อ้ะ, ล เกม๊า โล้ โพล้ง น่าง แฌ้ แบ

¹¹ กุ้ นี้งๆ, นอ โมเดไค ไจ ลี้ ไจ ไท้ ลู่ง ฮาเรง อ ทล่าง คว้าง พ้า, บี่ซุ้ คุ้ช๊องแน ทโล้โค แบฆ้ะ น่าง เอซเทอ อ เมะ, แม้ อ ซ้ะ บี่จะเล้, ดี๊ ทเม้งเล้ กึทาง ดี๊-อ้ะ

¹² ท่อง นี่ แด้เว้ ซ้ะ บี่ซุ้ดี๊ ทอางกีล้าง, แบฆ้ะ ดี๊ กมืง อ ไฌ่ ล ชี๊ง คี๊ง แล้ ฌ้อง เย้า นอ, ท้อง อช๊าอโท่ พี่ มืงน้าง กุ้ แฌ้, ม ลี้ ฆ้าง โอ กจุ้แฆว้ อาฮ้ะซูเอระ, (ดี๊ อ อี้ง นอ, เก อช๊าอโท่ โอ ลี้ง ลู่ง ท แม้ฌี้แม้แอว้ ไพ้ะแย อ ฌ่าง, เมะเว๊ เท้าล้าง ล้องย่าง ดี๊ กางยาง อ ซู ฆู๊งแล้, ดี๊ ทน๊าม๊า ลู่ง น๊าม๊า มึ, ดี๊ กมืง อ ทเท้าเมะเท้าแน๊ นอ ฆู๊งแล้ เด้าะ)

¹³ มืงน้าง นอ ม ลี้ฆ้าง โอ กจุ้แฆว้ บี่อี้ง, เมะเว๊ อ เว๊ ม แบซ้ะ แม้นี่ ทเม้งเล้ ลู่ง ฮาเรง พ้า, ลี้โชะ ลู่ง บลาง พ้า นอ, แม้นี่ ลี้โชะ ซี

¹⁴ กมืง นอ ลี้ฆ้าง โอ เว๊ ลู่ง มื่งแฌล้าง โค๊, ดี๊ ลู่ง โฌ้โค๊ นอ ไท้ๆ, ลู่ง ฮาเรง คี๊ง จอง ล จอง นอ อ พ้า, โอ ลู่ง ชาอะกา, กจุ้แฆว้ อ กแคว๊ได้ะดีง, พี่ ยู่ทะแคว่ทะ กมืง ลู่ง กจุ้แฆว้ เว๊ ลแพ นอ, อ ทยู่แคว่ พ้า, อ เว๊ ล นี่ ลี้ฆ้าง โอ กจุ้แฆว้ ล้าแบ, ท๊อง เว๊ กจุ้แฆว้ ม แบ อ ซ้ะ ดี๊-อ้ะ, ดี๊ กุ้ทาง อ เม้ง เกม๊า ลี้ฆ้าง โอ-อ้ะ นอ ล้อ

¹⁵ ท่อง ท้อง อช๊าอโท่ น่าง เอซเทอ, พี่ เก อาบีฮาอีง อ พู, พี่ อ เก โมเดไค อ ม้างโจ้, พี่ ฮะนี่ เว๊ เก อ พู, ม ลี้ฆ้าง โอ กจุ้แฆว้ นอ, อ เว๊ ล อางท่างนี่ เท่อ น่าง เม้ง แบ, โอ เว๊ ที่ เฮไก กจุ้แฆว้ อ กแคว๊ได้ะดีง, พี่ ยู่ทะแคว่ทะ กมืง โล้ฌ้า เอะ-อ้ะ นอ เอซเทอ นอ ล้อ, น่าง เอซเทอ แบเมะล้างซ้ะ โพล้ง กุ้ แฌ้ พี่ แด-อ้ะ นอ

¹⁶ โพล้ง ลี้ฌ้า เอซเทอ, ลี้ฆ้าง โอ กจุ้แฆว้ อาฮ้ะซูเอระ ลู่ง บลาง พ้า, ลู่ง แล้ อ เบง ล ชี๊ง ล เบง นอ, พี่ เก แล้ เทเบะ ลู่ง เนว๊เนง ล เนง พ้า ลู่ง อ เว๊ อ ชู้ แค๊

¹⁷ กจุ้แฆว้ เอ เอซเทอ ดูเละ กมืง อ แฌ้แพ เลาพะ, ดี๊ กจุ้แฆว้ แบเมะล้างซ้ะ, ดี๊ ย๊างซ้ะ น่าง เอซเทอ แอเละ มืงล้าง เช๊งเกล้ง กุ้ แฌ้ๆ, นอ เลาพะ, กจุ้แฆว้ พลางทาง คูคล้าง ลู่ง เอซเทอ อ คู ล้อง, ดี๊ ต๊างทาง เว๊ ม๊า เก อ แม๊ เท่งก้ะ น่าง วาที

¹⁸ ฌ้อง กจุ้แฆว้ แม้ ทลื่งอางลื่งโอ้ เอะ อ ทอดูอแซย่, ดี๊ อ กดูกแซย่ กุ้ แฌ้, เก ทลื่งอาง บี่ซุ้ แม้ฆี๊งแม้แล้ เอะ น่าง เอซเทอ, อ เว๊ อางกีล้าง เว๊ เกม๊า โอ ดี๊ มื่ง โอไปว้ะ นี้ง เอะ เว่งดูคล้องโท๊ กุ้ จอง, ดี๊ เกม๊า ทเกล๊าง ดี๊ ทซ้ะโพล๊ นอ ล้อ

โมเดไค แด ทแด้เว้ ซ้ะ, ม แม้อ้าแม้ซ๊าง กจุ้แฆว้

¹⁹ ท่อง โพล้ง กุ้ซยองนี่ มืงน้าง เฌ๊ คี๊ง พ๊า ล พ๊า นอ, โมเดไค ชี๊น้าง โอ ลู่ง บลาง อ ป้ะตู๊งไท้ะ

²⁰ แบเด้าะ น่าง เอซเทอ นอ, ล นี่ เกม๊า โพล้ง ซีงแฌ๊ อไท้ะอบ้อง น่าง แฌ้ แบ ด้องซุ้ พี่ โมเดไค โล้ อางแบเลา เอะ-อ้ะ นอ, เมะเว๊ น่าง เอซเทอ ชู่งลู่งเน้แท๊ โมเดไค, บี่ซุ้ดี๊ ล ว๊าง แย๊ พี่ อ โอ เว๊ อ ทยู่แคว่ พ้า อู้ง นอ ล้อ

²¹ พี่ ล พ๊า แย๊ โมรเดไค ชี๊น้าง ลู่ง บลาง อ ป้ะตู๊งไท้ะ นอ, บิ้ทาง ดี๊ เทเร้ะ, พี่ เก กจุ้แฆว้ อ กได้ะดีง คี๊ง แฌ้, พี่ แคว่ทะ ป้ะตู๊งอเคิง นอ, โอ ดี๊ อ ทซ้ะทาง, ดี๊ อางฆื๊ง นี่ อช๊าอโท่ แม้ซี๊ง กจุ้แฆว้ อาฮ้ะซูเอระ

²² ท ล ไฌ่ อี้ง นอ โมรเดไค ซีงแฌ๊ เว๊, ดี๊ อ เว๊ โล้ เอะ น่าง เอซเทอ, ท่อง อ ช๊าง นอ, น่าง เอซเทอ โล้ เอะ กจุ้แฆว้ ลู่ง โมรเดไค อเม้งอแซ พ้า

²³ ท่อง ทอางจ้ะ ที๊ง ท ล ไฌ่ อี้ง เมะ เท่อ เต้ๆ, เย้า นอ, กจุ้แฆว้ เกม๊า โยะ ซี๊ง กแคว๊ คี๊ง แฌ้ นอ, ลู่ง ทล่าง โยะล้าง โคะ นอ อ ล้อง ดี๊ กวิ้ล้าง ท ล ไฌ่ อี้ง, ลู่ง ไละ กวิ้ไน กจุ้แฆว้ อ ไฌ่ ล ปะ นอ อ พ้า, ลู่ง กจุ้แฆว้ อ เมะแซ พ้า นอ ล้อ