ทโกงซีมองแบ 4 - Northern Pwo Karen Thai Bible

¹ จ แกยไท้ ซ้ะ, ช๊องมองแคว่ที๊ง ท แม้น้ะแม้โน๊ง กุ้เม้งกุ้มยู๊, พี่ อ กึทาง ลู่ง มื่ง เช๊ละ อี้ง, ดี๊ แคว่เซ้อ, โพล้ง พี่ อ แบ ท แม้น้ะแม้โน๊ง อ เมะที๊ง นอ, โพล้ง ล โอ แม้มึทาง อ ซ้ะ น่างแฌ้ แบ, โพล้ง พี่ แม้น้ะแม้โน๊ง-อ้ะ นอ, โอ ดี๊ อดู้งอยาง, อกย้องบี่นอ, โพล้ง ล โอ แม้มึทาง อ ซ้ะ ซี น่างแฌ้ แบ

² อกย้องบี่นอ, จ อางปฆ้า โพล้ง พี่ อ ซี๊งไฆวะ เย้า บี่อี้ง, โบง โอ ฌี้เละ โพล้ง พี่ อ โอม๊า ได้ะ

³ พี่ อ ฌี้เละ โพล้ง คี๊งมู๊ง ได้ะ นอ, เมะเว๊ โพล้ง พี่ ล เฌ๊ กึทาง ได้ะ แบ, ดี๊ ล แด ทอ้าทซ๊าง พี่ อ กึทาง ลู่ง มื่ง เช๊ละ อี้ง แบ

⁴ ดี๊ จ แด ทไพ้ะทแม้ น้ะ กุ้เม้ง, ดี๊ ท เดว้ฌี้พลี๊ฌี้ ลู่ง ทไพ้ะทแม้ พ้า กุ้เม้ง นอ, เฌ๊นี่ ดี๊ โพล้ง อ ทไคว๊เซิงไคว๊ซ้ะ ดี๊ อ ฌุ้พาง, อ อี้ง นอ ลเฌิ่งลค๊า แบ ปะ, เมะเว๊ ล ล้างเปิ่งล้างเอ้ง แบ

⁵ โพล้ง เซ๊กูเฌ๊ฌ้อง วี๊งทาง อ จูง อ คาง ดี๊ อางล้างไท้ อ แย

⁶ ทฆ้าทโฆ่ ล ช้องจูง, พี่ นี่แบ-อ้ะ ดี๊ ทซยืงทบ้ะ นอ ฌี้เละ ทฆ้าทโฆ่ คี๊ง ช้องจูง, พี่ นี่แบ-อ้ะ ดี๊ ทไพ้ะทแม้ น้ะ ดี๊ ท ล ล้างเปิ่งล้างเอ้ง แบ

⁷ จ แกยไท้ ซ้ะ ช๊องมองแคว่ที๊ง เท่อ, แบฆ้ะ ดี๊ ท ลเฌิ่งลค๊า แบ ล ไฌ่ ได้ะ ลู่ง มื่ง เช๊ละ อี้ง

⁸ เมะเว๊, โพล้ง ล แฌ้ โอ เว๊ ล แฌ้ เฆาะ, อ พู ฌี้ อ น๊างพื่งวี่ ฌี้ ล โอ แบ, แบเด้าะ อ เว๊ แม้ เท่อ น้ะ ล โอไปว้ะโอแซ แบ, อ เมะคลี๊ง แคว่ ทโอทช๊อง ล บลิ้ แคว่ แบ, อ เว๊ ล ช๊องมอง เท่อ บี่อี้ง น่างชุ้ แบ, “จ แม้ เท่อ น้ะ ดี๊ จ เอ้าเซิงเอ้าซ้ะ ดี๊ เท่อ, พี่ อ แบ จ ซ้ะ นอ ลู่ง โพล้งเล้ อ ฌ่าง?”, อ อี้ง นอ, ลเฌิ่งลค๊า แบ ปะ, ดี๊ เก ท อ ไฌ่ ลู่ง ออ้าอซ๊าง ล้อ

ฌุ้พาง อลื่งอฆวี้

⁹ คี๊ง แฌ้ นอ ฌี้เละ ล แฌ้, เมะเว๊ อ เว๊ คี๊ง แฌ้ นอ, นี่แบ รางวาง ฌี้ ลู่ง อ ซื๊งเว๊ อ ทไพ้ะทแม้ น้ะ อ ฌ่าง

¹⁰ อ ไฌ่ บี่อี้ง, อ ซื๊งเว๊ เมะ ล้างเทะเค้า นอ, โพล้ง ล แฌ้ ม บุ้ชี๊เทิง อ ฌุ้พาง เกม๊า อ เฌ้เทิงทาง, แบเด้าะ ทเซงทื่งเฌ๊ฌ้อง แบ โพล้ง ล แฌ้ นอ, พี่ อ โอ ล แฌ้ เฆาะ, ท่อง อ เว๊ ล้างเทะเค้า นอ, โพล้ง ล โอ บุ้ชี๊เทิง-อ้ะ น่างแฌ้ แบ

¹¹ ล เม้ง ได้ะ, โพล้ง คี๊ง แฌ้ เมะ มี๊ง ฆึ โละซ้ะ นอ, อ ซื๊งเว๊ ล้าซอวี้งดี้ง, แบเด้าะ เมะ มี๊ง ล แฌ้ เฆาะ นอ, ม ล้า ซอวี้งดี้ง ซี บี่จะเล้?

¹² ดี๊ โพล้ง ล แฌ้ แม้น้า โพล้ง ล แฌ้ เมะ ซี นอ, โพล้ง คี๊ง แฌ้ แม้เทะแม้ท้าง-อ้ะ ซี เต้ๆ, ล้อ, พลี้ง ซ๊า น้อง ม เทะ โย๊ นอ ล ซี แบ

¹³ โพล้ง น่างบางซ้ะบาง คูซยางแน่ยะ, โอ ดี๊ ทโกงซีมองแบ นอ, ฌี้เละ กจุ้แฆว้ ซ้ะแซย่ เซ๊กูเฌ๊ฌ้อง, พี่ ล ฮะนี่ ท โล้ฌ้าละฌ้า ล้า แบ

¹⁴ ทึเมะ กแคว๊ น่างบางซ้ะบาง นอ ไจทางไฆวะ พ้อง พ้า, ฌ้อง ทาง เก กจุ้แฆว้ ฌี้, กึทาง เก โพล้ง ซยางพู ลู่ง อ กแช่ อมื่งอบ้าง พ้า ฌี้

¹⁵ จ ช๊องมองแคว่ที๊ง, โพล้ง กุ้แฌ้ พี่ อ โอม๊าโอว้ะ ลู่ง มื่ง เช๊ละ อี้ง, เลา ดี๊ กแคว๊ น่างบางซ้ะบาง ล แฌ้ เด้าะ, พี่ ม ทาง เก กจุ้แฆว้ เท่งก้ะ อ ล่าง

¹⁶ โพล้ง อ แอ อ แซย้ เลาพะ พี่ โอ วี่ง อ ซื๊งเว๊ นอ, โอ แอฌ้อง ท๊อง ดว้ะ ล น้า แบ, ดี๊ กเย่ โพล้ง พี่ เฌ๊ ลู่ง ไค๊ นอ, ล ซ้ะอวีงซ้ะโทะ เท่อ ดี๊ กแคว๊ น่างบางซ้ะบาง ล แฌ้ นอ แบ, อ อี้ง นอ, ลเฌิ่งลค๊า แบ ปะ, เมะเว๊ ล ล้างเปิ่งล้างเอ้ง แบ