ทโกงซีมองแบ 3 - Northern Pwo Karen Thai Bible

ท กุ้เม้ง โอ ดี๊ อช๊าอโท่

¹ ทกุ้เม้ง โอ ดี๊ อว๊างอแค๊, ดี๊ ท อไฌ่อกย้อง กุ้เม้ง ลู่ง มุ้คู เช๊ละ โอ ดี๊ อช๊าอโท่

² โอ ดี๊ อช๊าอโท่ เกม๊า กึทาง, ดี๊ อช๊าอโท่ ซี๊ง โอ ดี๊ อช๊าอโท่ เซิงล้าง, ดี๊ อช๊าอโท่ ทิ้ทาง ญ๊องไฆวะ ท พี่ เซิงล้าง-อ้ะ

³ โอ ดี๊ อช๊าอโท่ แม้ซี๊ง, ดี๊ อช๊าอโท่ แม้ ก้องแย่ ไท้ โอ ดี๊ อช๊าอโท่ กูงล้างฆ่อง, ดี๊ อช๊าอโท่ ไต้ทาง

⁴ โอ ดี๊ อช๊าอโท่ ฌาง, ดี๊ อช๊าอโท่ นี่งควี โอ ดี๊ อช๊าอโท่ มองแบม้ะแบ, ดี๊ อ ช๊า อ โท่ เฌ้เทิงลี่ง

⁵ โอ ดี๊ อช๊าอโท่ ญ๊องไฆวะ โล่ง, ดี๊ อช๊าอโท่ อางกีซยอง นี่ โล่ง โอ ดี๊ อช๊าอโท่ โพะโฌ๊ง, ดี๊ อช๊าอโท่ โอโท๊ไฆวะ ท โพะโฌ๊ง

⁶ โอ ดี๊ อช๊าอโท่ อางฆื๊งแคว่, ดี๊ อช๊าอโท่ แม้ ล้างแม่ โอ ดี๊ อช๊าอโท่ อางกี แฌแซกต้าง ทะ, ดี๊ อช๊าอโท่ ญ๊องไฆวะ

⁷ โอ ดี๊ อช๊าอโท่ ยะปวิ้, ดี๊ อช๊าอโท่ ช้ะ ไท้ โอ ดี๊ อช๊าอโท่ โอ กโช้, ดี๊ อช๊าอโท่ ไคล้

⁸ โอ ดี๊ อช๊าอโท่ เอ เท่อ, ดี๊ อช๊าอโท่ แช๊เมะ ไฌ๊ซ้ะ โอ ดี๊ อช๊าอโท่ ทดึ้ทชาง, ดี๊ อช๊าอโท่ ทฆู๊งทพุ้

ทไพ้ะทแม้ พี่ กแช่แยว้ เกล๊าง เอะ กโพล้ง

⁹ โพล้ง แม้เท่อไพ้ะเท่อ, นี่แบอางแบ ทเม้งเล้ ลู่ง อ ทไพ้ะทแม้ น้ะ นอ

¹⁰ จ แด ทไพ้ะทแม้ พี่ กแช่แยว้ เกล๊าง เอะ กโพล้ง, อ นอ บี่ซุ้ เกม๊า อ ซื๊งเว๊ โค่งทางโค่งล้าง โอ ดี๊ ทไพ้ะทแม้ นอ ล้อ

¹¹ กแช่แยว้ ดึ้ เกม๊า ทกุ้เม้ง ฌี้ ท้อง อช๊าอโท่, กแช่แยว้ ชวี๊งล้าง ท ล้างชู้ล้างแกย ลู่ง กโพล้ง อ ซ้ะ พ้า ปะ, แบเด้าะ กโพล้ง อางฆื๊ง เว๊ ล แด ได้ะ แบ บี่อี้ง, กแช่แยว้ แม้ เว้ ทเม้งเล้ ลโค๊ลู่ง อ คางไท้ะคางพ๊าง ท้อง ลู่ง อช๊าอโท่ ไค๊ ทึ

¹² จ ซีงแฌ๊ เย้า บี่อี้ง, ลู่ง อ เว๊ อ ฌ่าง ท ล โอ น่างเม้ง แบ พี่ อ ฌี้เละ ซ้ะอวีงซ้ะโทะ, ดี๊ เซิงฆวี๊งซ้ะโย้ เพล้า อ ชู้

¹³ แอเละนอ ได้ะ, กแช่แยว้ อ ท เกล๊าง เอะ กโพล้ง นอ, เมะเว๊ กโพล้ง นี่ อาง เท่อ โอ้ เท่อ ดี๊ ซ้ะโทะ เท่อ, ลู่ง อ ทไพ้ะทแม้ น้ะ อซูงอแซ พ้า

¹⁴ จ ซีงแฌ๊ เว๊ บี่อี้ง ทกุ้เม้ง, พี่ กแช่แยว้ แม้ เว๊ นอ, โอ ล้างชู้ล้างแกย, ม แม้ แอทาง ทเม้งเล้ ได้ะ-อ้า, ม เท้าไฆวะ ทเม้งเล้-อ้า นอ ล ซี แบ, กแช่แยว้ แม้ เท่อ บี่นอ, บี่ซุ้ เกม๊า โพล้ง ลแพ นอ โอ ดี๊ ท ดู้งแบยางแบ ลู่ง กแช่แยว้ อ เมะแซ พ้า

¹⁵ ท เม้งฌี้ๆ, พี่ อ โอ ค๊องเนงอี้ง นอ, อ โอทาง เว๊ ลู่ง อไยะอเช้ เย้า, ท เม้งฌี้ๆ, พี่ ม เฌ๊ กึทาง นอ, อ กึทาง โอ ลี้ง ลู่ง อไยะอเช้ เย้า, ดี๊ กแช่แยว้ แม้ เท่อ อ ล่างๆ ได้ะ

ท ต้ะเซ๊ง ดี๊ มื่งนี้ง ชู่งแย๊โค๊ นอ, โอ ดี๊ กแช่แยว้

¹⁶ แอเละ อ นอ ได้ะ, ลู่ง มื่ง อ เช๊ละ จ แด เว๊ บี่อี้ง, ลู่ง ท อเกิ้งอแบ พ้า นอ, โอ ฆึ ดี๊ ท ลเกิ้งลแบ แบ ปะ, ดี๊ ลู่ง ทฌี้ทแอว้ พ้า นอ, โอ ฆึ ดี๊ ทอ้าทซ๊าง ปะ

¹⁷ จ ไคล้ ลู่ง จ ซ้ะ พ้า บี่อี้ง, กแช่แยว้ ม ต้ะเซ๊ง โพล้งแบกแช่แยว้อซ้ะ ดี๊ โพล้งอ้าโพล้งซ๊าง, เมะ เว๊ โอ ดี๊ ทอางกีล้าง ทช๊าทโท่ ลู่ง ท อไฌะอไฌ่ กุ้เม้ง อ ฌ่าง, ดี๊ ทไพ้ะทแม้ กุ้เม้ง อ ฌ่าง

¹⁸ จ ไคล้ ลู่ง ซ้ะ พ้า แบฆ้ะ ดี๊ กเย่ กโพล้ง บี่อี้ง, กแช่แยว้ แม้แคว่ดุ้ อ ซื๊งเว๊, บี่ซุ้ ม เนโพลทาง เว๊ บี่อี้ง, อ ซื๊งเว๊ เก ที่ ทพูแฆ่ เฆาะ ล้อ

¹⁹ เมะเว๊ กเย่ กโพล้ง อเคาะอน้าง ดี๊ ทพูแฆ่ อเคาะอน้าง นอ, บี่ซุ้ โละซ้ะ ล้อ, ล แพ้ ซี๊ง, ดี๊ ล แพ้ เด้าะ นอ ซี๊ง บี่ซุ้ โละซ้ะ ปะ, คี๊ง เม้ง นอ โอ ดี๊ ลี้ง แซทางแซล้าง ล เม้ง ฆ่าง, ดี๊ กโพล้ง อ ท ฌี้เละ ทพูแฆ่ ล โอ น่างเม้ง แบ, เป๊งนี่ ทกุ้เม้ง นอ ลเฌิ่งลค๊า แบ

²⁰ ทกุ้เม้ง ลี้ ลู่ง ทล่าง ล จอง ฆ่าง, ทกุ้เม้ง เกทาง นี่ ดี๊ ฌางคู มูง, ดี๊ ทกุ้เม้ง ไท้เกไท้ ฌางคู มูง ได้ะ

²¹ โพล้งเล้ ม ซีงแฌ๊ เว๊ กโพล้ง อวีงอแล้ ลี้ ลู่ง ทพุ้พ๊าง, ดี๊ ทพูแฆ่ อวีงอแล้ ลี้ ล้าง ลู่ง ฌางคู โคล๊งคู?

²² อกย้องบี่นอ, จ แด เว๊ บี่อี้ง, ท ล โอ น่างเม้ง แบ พี่ อ ฌี้เละ กโพล้ง ม ซ้ะอวีงซ้ะโทะ เท่อ, ลู่ง อ กแช่ อ ทไพ้ะทแม้ พ้า, เมะเว๊ พี่ นอ เก อ รางวาง, โพล้งเล้ ม ลี้ฌ้า-อ้ะ, เกม๊า อ แด เว๊ ทเม้งเล้ ม เฌ๊ กึทาง ลู่ง อ ล่างไค๊?