โล้​ล้างที๊ง​ทอางแม้เลา 34 - Northern Pwo Karen Thai Bible

โมเซ ซี๊ง เว๊, ดี๊ แบ ท เคิงล้างบ้า-อ้ะ ลู่ง ค่าง โมอา พ้า

¹ ฌ้อง โมเซ โอนี่ ทแด้คู โมอา, ลี้ทาง ท้อง ลู่ง ทลู่ง เนโบ, ท้อง ลู่ง ทลู่ง ปีซกา อ จ้องคู, พี่ อ โอ กแท้ โละซ้ะ ดี๊ เว่ง เยรีโค นอ, ดี๊ กแช่ยาเว เนโพลทาง เอะ อ เท่อ, เกม๊า เว๊ อ แด ที๊งล่างค่างพ้า นอ เลาพะ, เมะเว๊ ค่าง กีเลอา, ท้อง ลู่ง ค่าง ดาง

² เลา ดี๊ ค่าง นาทาลี, ที๊งล่างค่างพ้า เอฟาอีง, ดี๊ มานาเซ, เฆ้ง ที๊งล่างค่างพ้า ยูดา, ลี้ ไย้ โยะ ท้อง ลู่ง ปางเล มื่ง นึ ล โค๊

³ เลา ดี๊ ค่าง เนเกะ, ดี๊ ทแด้คู เว่ง เยรีโค, เว่ง เองทาพลาง มื่งเทิง, ลี้ ไย้ ท้อง ลู่ง โซอา

⁴ ดี๊ กแช่ยาเว ไคล้ ดี๊-อ้ะ ไจ้ะเว๊, “อ อี้ง นอ, เมะเว๊ ที๊งล่างค่างพ้า พี่ จ นี่ อืงล้าง เอะ อาบราฮาง อีซาฮ้ะ ดี๊ ยาคุ้ บี่อี้ง, ‘จ ม เกม๊า เอะ น พู น ลี้ง’, จ เกม๊า น แด ดี๊ เมะ ล้อ, แบเด้าะ น ล นี่ ลี้ นึฆ้าง ที๊งล่างค่างพ้า นอ แบ”

⁵ ทบี่นอ, กแช่ยาเว อ เพล่ โมเซ, ซี๊ง เว๊ พี่ นอ, ลู่ง ค่าง โมอา พ้า, บี่ซุ้ดี๊ กแช่ยาเว โล้ เว้ เว๊ นอ ล้อ

⁶ ดี๊ กแช่แยว้ เคิงล้างบ้า-อ้ะ ลู่ง ทลู่ง คางไท้ะ, ลู่ง ค่าง โมอา พ้า, โอ กแท้ โละซ้ะ ดี๊ เบเปโอ, ท้อง ล นี้ง แย๊ อี้ง นอ, โพล้ง ล โอ ซีงแฌ๊ ทล่าง เคิงล้างบ้า อ จู น่างแฌ้ แบ ล้อ

⁷ พี่ โมเซ ซี๊ง นอ, อ โญะ โอ อ เนง ล แย้ คี๊ง ชี๊ง, อ เว๊ อ เมะคลี๊ง ล ไค้ะ ได้ะ แบ, ดี๊ อไฌ่อแบ้ ล ล้างแช่ ได้ะ แบ

⁸ ดี๊ โพล้ง อีซลาเอง ฌางล้างย้าล้าง มองแบ โมเซ, ลู่ง ทแด้คู โมอา, อ นี้ง ซ๊า ชี๊ง, ท้อง ลู่ง มื่งนี้ง ฌาง มองแบม้ะแบ โมเซ ทึไฆวะ เว๊ แด ล้อ

⁹ ดี๊ นูง อ พูแคว๊ โยชูวา นอ, โอ ดี๊ ทโกงซีมองแบ, เมะเว๊ โมเซ อางกีล้าง อ จูง ลู่ง อ เว๊ อ ล้อง, ทบี่นอ, โพล้ง อีซลาเอง ชู่งลู่งเน้แท๊-อ้ะ, ดี๊ นี่ แม้ เว๊ บี่ซุ้ดี๊ กแช่ยาเว อางแบเลา เว้ โมเซ นอ ล้อ

¹⁰ ท๊อง นอ ลู่ง ไค๊, โมไคล้คิ้กแช่แยว้ โอทาง ลู่ง โพล้ง อีซลาเอง อซุ้อแกล้ ด้องซุ้ โมเซ, พี่ กแช่ยาเว ซีงแฌ๊-อ้ะ เมะ โต้ เมะ นอ, ล โอ น่างแฌ้ แบ

¹¹ พี่ อ แม้ เท่อ แบฆ้ะ ดี๊ ทแม้ไน, ดี๊ ทล้ะทเล่, พี่ กแช่ยาเว เจ่-อ้ะ, เกม๊า อ แม้ ลู่ง ค่าง อีไย้ะ พ้า, พี่ อ แม้ เอะ ฟาโร, ดี๊ กเย่ อ เพล่ กดูกแซย่, ดี๊ อ ที๊งล่างค่างพ้า เลาพะ

¹² ดี๊ แบฆ้ะ ดี๊ ดู้งยาง ลู่ง อดูอโท๊, ดี๊ ทไพ้ะทแม้ พี่ อ ล้าง ซ้ะเม, ดี๊ อดูอโท๊, พี่ โมเซ แม้ เว๊ ลู่ง โพล้ง อีซลาเอง กุ้ แฌ้ อ เมะแซ พ้า นอ ล้อ