ดานีเอง 8 - Northern Pwo Karen Thai Bible

ทแดเว้ แบฆ้ะ ดี๊ แกะ แพ๊ ดี๊ แมะ แพ๊

¹ ซ๊า เนง ล เนง ลู่ง กจุ้แฆว้ เบงชาซา อ ชู้ พ้า นอ, แย้ ดานีเองจ แด ทแดเว้ โพลทาง, ลู่ง ทแดเว้ พี่ อ โพลทาง เอะ แย้ อ ต้องคู ล พ๊า พ้องไค๊ไฆวะ นอ

² ดี๊ ลู่ง ทแดเว้ พ้า, พี่ จ แด-อ้ะ นอ, โพลทาง เว๊ บี่อี้ง, จ โอ ลู่ง ซูซา เว่งทล่างคุ้แคว่เท่อ อ พ้า, พี่ โอ เว่งดูคล้องโท๊ เอลาง พ้า, ดี๊ จ แด ทแดเว้, จ โอ ลู่ง ที๊ง อูไล กล้อง

³ จ บุ้ทาง เมะ แคว่ เท่อ, ดี๊ จ แด แกะ แพ๊ ล ดื้ง, ชี๊เทิง โอ ลู่ง ที๊งกล้อง คื่อคู, อ โน้ง โอ คี๊ง บ้อง, อ โน้ง คี๊ง บ้อง นอ พ้ะโท๊, แบเด้าะ อ โน้ง ล บ้อง โท๊เละ ล บ้อง ได้ะ, ดี๊ อ โน้ง พี่ อ โท๊ นอ ซยุ้ทาง ลู่ง ไค๊

⁴ จ แด แกะ แพ๊ ล ดื้ง นอ, ไคว้ะ เท่อ ลู่ง มื่งนึ มื่งเค๊ง ดี๊ มื่งแพ้, ทพูแฆ่ ล โอ น้า-อ้ะ น่างดื้ง แบ, ดี๊ โพล้ง ล โอ แม้ช้า เกม๊า พ้องไฆวะ ดี๊ อดู้งอยาง ซี น่างแฌ้ แบ, อ แม้ เท่อ ท๊อง อ ซ้ะ, ดี๊ ชีดูชีโท๊ ทาง อ ซ้ะ

⁵ พี่ จ ช๊องมอง ที๊ง เท่อ นอ, แมะ แพ๊ โอ ล ดื้ง, เฌ๊นี่ ลู่ง มื่งนึ ล โค๊, อ ยู้ง พะ ฌางคูโคล๊งคู เฌ๊, ล พองแบต้องแบ ฌางคู คู แบ, ดี๊ แมะ นอ โอ ดี๊ อ โน้ง เติ้งต้าง ล บ้อง ลู่ง อ เมะคลี๊ง เบ้าช้า พ้า

⁶ อ เว๊ เฌ๊ฌูง แกะ แพ๊ พี่ โอ ดี๊ อ โน้ง คี๊ง บ้อง, พี่ จ แด อ ชี๊เทิง โอ ลู่ง ที๊งกล้อง คื่อคู นอ, อ ลี้ ซยู๊ฆ้าง ดุ้ แกะ แพ๊ ล ดื้ง นอ ดี๊ ท ซ้ะทาง พ้ะดู

⁷ จ แด อ เฌ๊ฆ้าง เบ้า แกะ แพ๊, อ ซ้ะทาง ดี๊ ลี้ฆ้าง ไคว้ะ แกะ แพ๊, แม้ แค่ไฆวะ เว๊ อ โน้ง คี๊ง บ้อง นอ, ดี๊ แกะ แพ๊ นอ อไฌ่อแบ้ ดึ้-อ้ะ ล โอ แบ, อ เว๊ เว่งว๊าง ล้าง แกะ แพ๊ ลู่ง ฌางคู คู, ดี๊ ไย่ล้าง เว๊, ดี๊ โพล้ง ล โอ แม้ช้า แกะ แพ๊ เกม๊า พ้องไฆวะ ดี๊ อดู้งอยาง ซี น่างแฌ้ แบ

⁸ ฌ้อง แมะ แพ๊ นอ ชีดูชีโท๊ ทาง อ ซ้ะ น้ะ มะ, แบเด้าะ ท่อง อชองอไคล๊ เมาน่าง เย้า นอ, อ โน้ง พ้ะดู นอ แค่เทา, อ โน้ง โอ ลี่ง บ้อง ซยุ้ทางไท้ เท่งก้ะ อ ล่าง, วีงฆ้าง อ เมะ ลู่ง ทมุ้คู อ ลี้ง ลี่งแพ้ ลี่งโค๊ นอ

⁹ ดี๊ อ โน้ง พูปี๊ ล บ้อง, ซยุ้ทาง นี่ ลู่ง อ โน้ง ล บ้อง อ พ้า ลู่ง อ โน้ง ลแพ อี้ง, อ ซยุ้ทาง อดูอโท๊ ดู มะ, ดูทางโท๊ทาง ลี้ ลู่ง มื่งแพ้, ลี้ ลู่ง มื่งทาง ล โค๊, ดี๊ ลี้ ลู่ง ที๊งล่างค่างพ้า พี่ อดูอโท๊ นอ ล้อ

¹⁰ อ โน้ง ซยุ้ทาง พ้ะดู ท้อง กเย่ เท่อ พี่ อ โอ ลู่ง มุ้คู ลแพ นอ, ดี๊ เว่งว๊าง ล้าง กเย่ เท่อ พี่ อ โอ ลู่ง มุ้คู, เมะเว๊ แซย แบ ล โพลงๆ, เฌ๊ล้าง ลู่ง ฌางคู คู ฌ้อง ไย่เละค๊างพะ เว๊

¹¹ อ ดูทางโท๊ทาง ได้ะ, ท๊อง อ ท้อง กเย่ เท่อ พี่ อ โอ ลู่ง มุ้คู อคูอแน่, ดี๊ ทลื่งทาง เช้า ดี๊ มี ล้างชู้ล้างแกย นอ, แบ ทลู่นี่ ก้ะ ดี๊ กแช่แยว้, ดี๊ กแช่แยว้ อ ท แบ้แยว้ล่างลู่งอฌี้ นอ, แบ ทแม้ ล้างไช้ะล้างย่อง

¹² ลู่ง ท ลือค๊างพะ อกย้องนอ, กเย่ กแช่แยว้ อพูอลี้ง, ดี๊ ทลื่งทาง เช้า ดี๊ มี ล้างชู้ล้างแกย นอ, แบ ท แม้นี่ก้ะ, เต้ๆ, นอ แบ ท เว่งว๊าง ล้าง ลู่ง ฌางคูคู, ดี๊ อ โน้ง นอ เกทางเกโท๊ ลู่ง อ ทไพ้ะทแม้ พ้า

¹³ ฌ้อง จ แน่ฌ๊า โพล้ง เช๊งเกล้ง ล แฌ้ ไคล้, โพล้ง เช๊งเกล้ง ล แฌ้ ได้ะ เฌ๊ ไคล้ ดี๊ โพล้ง พี่ อ ไคล้ นอ ไจ้ะเว๊, “ทแดเว้ พี่ อ แบฆ้ะ ดี๊ ทลื่งทาง เช้า ดี๊ มี ล้างชู้ล้างแกย, เลา ดี๊ ท ลือค๊างพะ อ ไฌ่ พี่ ดึ้ เกม๊า ท โอโปล้ก้ะ กึทาง, ดี๊ ท โชะไฆวะ ท แบ้แยว้ล่างลู่งอฌี้ อ ไฌ่, ดี๊ กเย่ เท่อ พี่ อ โอ ลู่ง มุ้คู พี่ แบ ท ไย่ ท๊าเท่ง ล้าง อ ไฌ่ นอ, ม โอ ชี่ไยะเด้าะเล้?”

¹⁴ โพล้ง ล แฌ้ นอ ไคล้ช๊า แย้ ไจ้ะเว๊, “โอ ไยะ อ แฌ อ โฌ้ คี๊งม๊า ซ๊าแย้ มื่งแฌล้าง โค๊, ดี๊ มื่งโฌ้ โค๊, ฌ้อง ท แบ้แยว้ล่างลู่งอฌี้ นอ, ม โอไท้ เว๊ ท๊อง อเกิ้งอด้าง นอ ล้อ”

ทมุ้คูพู กาบีเอง โล้ ล้างที๊ง ทแดเว้ อ โค๊

¹⁵ ท่อง แย้ ดานีเอง แด ทแดเว้ เย้า นอ, จ เฌา แน-อ้ะ ซี, ดี๊ แคว่แดเทา, โพล้ง โอ ล แฌ้ บี่ซุ้ดี๊ กโพล้ง, ชี๊เทิง โอ ลู่ง จ เมะแซ พ้า

¹⁶ ดี๊ จ แน่ฌ๊า กแคว๊ ล แฌ้ อ ลู่ง, เฌ๊นี่ ลู่ง ที๊ง อูไล กล้อง อ ซ้ะคี่ง พ้า, ดี๊ ท อ ลู่ง นอ, กุ้ซย้ะ เท่อ ไจ้ะเว๊, “ทมุ้คูพู กาบีเอง-เอ้อ ดึ้ เกม๊า กแคว๊ ล แฌ้ อี้ง แน ทแดเว้ นอ ซี ไช้ะ”

¹⁷ ทบี่นอ, อ เว๊ เฌ๊ เบ้า ดี๊ ทล่าง พี่ จ ชี๊เทิง โอ นอ, ดี๊ ท่อง อ เว๊ เฌ๊ เย้า นอ, จ ซยึ้ เท่อ ซย๊องล้าง เมะ ท้อง ฌางคูคู, แบเด้าะ อ เว๊ โล้ เอะ แย้ ไจ้ะเว๊, “โอ้, กโพล้ง-เอ้อ, เกม๊า แน-อ้ะ ซี ไช้ะ บี่อี้ง, ทแดเว้ นอ เก ท อมื่งอแค๊ ลู่ง ไค๊ ทึ อ ไฌ่”

¹⁸ พี่ อ เว๊ ไคล้ ดี๊ แย้ นอ, จ ซย๊องล้าง เมะ ท้อง ล้าง ฌางคูคู, ดี๊ ซ้ะนาง จ ซ้ะ ไชวะ, แบเด้าะ อ เว๊ พองแบต้องแบ แย้ เกม๊า จ ชี๊เทิงทาง

¹⁹ อ ไจ้ะเว๊ บี่อี้ง, “อี้งเซ้อ, จ ม เกม๊า น ซีงแฌ๊ ท พี่ ม กึทาง ลู่ง ไค๊, ลู่ง กแช่แยว้ อ ท ซ้ะทาง อช๊าอโท่ พ้า, เมะเว๊ อ แบฆ้ะ ดี๊ ท อางกีล้าง อชู้อว๊าง ลู่ง อ ไค๊ ทึ

²⁰ แกะ แพ๊ อ โน้ง โอ คี๊ง บ้อง พี่ น แด -อ้ะ อ ไฌ่ นอ, เมะเว๊ โพล้ง มีเดีย ดี๊ โพล้ง เปอแซย อ กจุ้แฆว้

²¹ ดี๊ แมะ แพ๊ นอ, เมะเว๊ โพล้ง กรี อ กจุ้แฆว้, ดี๊ อ โน้ง พ้ะดู ลู่ง เมะคลี๊ง อ เบ้าช้า นอ, เมะเว๊ กจุ้แฆว้ อ ต้องคู ล แฌ้

²² เมะ อ โน้ง พี่ แค่เทา, ดี๊ อ โน้ง ลี่ง บ้อง ได้ะ ซยุ้ทาง เท่งก้ะ อ ล่าง นอ, เมะเว๊ บ้างมื่ง ลี่ง มื่ง ม กึทางนี่ ดี๊ โพล้ง ล ชื้อ นอ, แบเด้าะ อดู้งอยาง ม ปี๊เละ อ โน้ง ต้องคู ล บ้อง นอ ได้ะ

²³ ลู่ง อ ซื๊งเว๊ ซีง ลแพ อ ชู้ อ ไค๊ ทึ นอ ท่อง โพล้ง ลือค๊างพะ เท่อ นี่ แม้ ทอ้าทซ๊าง แอ น้ะ เย้า นอ ม โอ ดี๊ กจุ้แฆว้ อ เมะดู้งเมะลู่ เฌ๊ กึทาง อ เว๊ ช๊องมอง ทโกงทแกย เท่อ ซี มะ

²⁴ อ เว๊ อดู้งอยาง มดูมโท๊ ดู มะ ดี๊ อ เว๊ ม ดึ้ กึทาง ท เซงทื่งเฌ๊ฌ้อง ลู่ง อ ล้าง ซ้ะเมซ้ะไพล้ อ เว๊ เกทางเกโท๊ ลู่ง อ ทไพ้ะทแม้ พ้า อ เว๊ ม แม้เฌ๊ฌ้อง โพล้ง อไฌ่อแบ้ โอ แอ ดี๊ กเย่ โพล้ง เช๊งเกล้ง อ เฌงพูฆ๊างพู

²⁵ ลู่ง อ ทไพ่ทแซย๊ อกย้องนอ อ เว๊ ม แม้ เล่ทางโท๊ทาง ท อางโล๊ไละ ดี๊ อ จูง ดี๊ อ เว๊ ม ช๊องมอง ล้าง อ ซ้ะ อ กแช่ นอ ดูทึโท๊ทึ อ เว๊ ม แม้เฌ๊ฌ้อง โพล้ง แอฌี่งแอฌ้อง พี่ ล โอ ดี๊ ทโล้ ซีงแฌ๊ เว้ แบ ฌ้อง ม เฌ้เทิงทาง ดึ้ซึ้ โละซ้ะ ดี๊ ทอดูทึโท๊ทึกแช่ แบเด้าะ อ เว๊ ม แบ ท บุ้แค่ แม้เฌ๊ฌ้องไฆวะ, ล เมะ ดี๊ กโพล้ง อ จูง แบ

²⁶ ทแดเว้ แบฆ้ะ ดี๊ มแฌล้าง ดี๊ ลู่ง โฌ้โค๊ อ ไฌ่, พี่ อางโล๊ไท้ นอ เก ทเมะทโต้ เต้ๆ, แบเด้าะ ม อางกีซูง ทะ ทแดเว้ นอ, เมะเว๊ เก ท ตบลึ้ นี้ง ลู่ง เมะแย๊ โค๊ ได้ะ อไฌ่อกย้อง”

²⁷ ดี๊ แย้ ดานีเอง จ ล้างเพาล้างแช่, ดี๊ มี๊งน้าง ช๊องไก้ ตบลึ้ นี้ง, ฌ้อง จ เฌ้เทิงทาง ลี้ แม้ เอะ กจุ้แฆว้ อ ทไพ้ะทแม้ เด้าะ, แบเด้าะ จ ซ้ะ ล มึ แบ ลู่ง ทแดเว้ นอ อกย้อง, ดี๊ จ แน ท อไฌ่อกย้อง ล ซี แบ เฆาะ