2​ซามูเอง 9 - Northern Pwo Karen Thai Bible

ทเอ ลู่ง อเฌิ่งอค๊า พี่ ดาเว เอ แบ เมฟีโบเช

¹ ดาเว โล้ เว๊, “โพล้ง ลู่ง ซาอู อเด้าคูล่างพ้า นอ, โอม๊า ล แฌ้ ๆ, ได้ะ-อ้า?, บี่ซุ้ จ ม เนโพลทาง ทเอ ลู่ง อเฌิ่งอค๊า เอะ โพล้ง ล แฌ้ นอ, ลู่ง จ แด โยนาทาง เก จ ซกุ้ นอ อ กย้อง”

² โพล้ง แคว๊ โอ ล แฌ้ อ เม้ง ซีบา, อ เว๊ เก โพล้ง ลู่ง ซาอู อชื้ออชะ ลแพ นอ อ เพล่ดู อ แกล้, โพล้ง กุ้นี่-อ้ะ เกม๊า เฌ๊ฆ้าง โอ ดาเว, ดี๊ กจุ้แฆว้ ไคล้ ดี๊-อ้ะ ไจ้ะเว๊, “แน้ น เก ซีบา-อ้า?”, อ เท่อ ไคล้ช๊า-อ้ะ ไจ้ะเว๊, “แย้ เมะเว๊ น เพล่ ซีบา ล้อ”

³ กจุ้แฆว้ ไจ้ะเว๊, “โพล้ง ลู่ง ซาอู อชื้ออชะ พ้า โอ ล แฌ้ๆ, ได้ะ-อ้า?, แย้ จ ม เนโพลทาง กแช่แยว้ อ ทเอทกวี้ง ลู่ง อเฌิ่งอค๊า นอ เอะ-อ้ะ”, ซีบา ไคล้ช๊า กจุ้แฆว้ ไจ้ะเว๊, “โยนาทาง อ พูแคว๊ โอ ล แฌ้ ได้ะ, แบเด้าะ อ เว๊ นอ อ คาง เฌ๊ฌ้อง ไจ ล ซี แบ”

⁴ กจุ้แฆว้ อางจ้ะ-อ้ะ ไจ้ะเว๊, “อ เว๊ โอ พี่จองเล้?”, ซีบา โล้ เอะ กจุ้แฆว้ ไจ้ะเว๊, “โอ ลู่ง อางมีเอง อ พู มาคี ล แฌ้ นอ อ เด้า, ลู่ง เว่ง โลเดบา พ้า”

⁵ กจุ้แฆว้ ดาเว, เกม๊า โพล้ง ลี้ แม้นี่ เว๊ ลู่ง มาคี อางมีเอง อ พู ล แฌ้ นอ อ เด้า, ลู่ง โลเดบา พ้า”

⁶ ท่อง เมฟีโบเช โยนาทาง อ พูแคว๊, เมะเว๊ ซาอู อ ลี้ง เฌ๊ โอ ดาเว, เฌ๊ ท้อง นอ คะด้ะ ล้าง อ ซ้ะ ซย๊องล้าง อ เมะ, ดี๊ ดาเว ไจ้ะเว๊, “เมฟีโบเช-เอ้อ”, อ เท่อ ไคล้ช๊า-อ้ะ ไจ้ะเว๊, “กแช่-เอ้อ, น เพล่ โอ พี่ อี้ง”

⁷ ดาเว ไคล้ ดี๊-อ้ะ ไจ้ะเว๊, “ซ้ะเม เท่อ ล ฌี้, แย้ จ ม เนโพลทาง ทเอ ลู่ง อเฌิ่งอค๊า เอะ แน้ เต้ๆ, ล้อ, เมะเว๊ ลู่ง น แพ่ โยนาทาง อ กย้อง, จ ม เกม๊า ไท้ เอะ แน้ น พู๊ง ซาอู อ ฌางคู ล่าง นอ เลาพะ, ดี๊ แน้ นอ, น ม อาง มี้ โอ้ ที๊ง แบ ดี๊ แย้ คะ ล ช๊อง ฆ่าง ครึๆ, ล้อ”

⁸ ฌ้อง อ เว๊ คะด้ะ ล้าง อ ซ้ะ, ซย๊อง ล้าง อ คู ดี๊ ไจ้ะเว๊, “น เพล่ เก เด้าะ ชี่ โพล้ง เล้?, พี่ น ม แคว่ที๊ง ดุ้ ทวีง พี่ อ ซี๊ง เย้า, แบด้อง แย้ อี้ง

⁹ ฌ้อง กจุ้แฆว้ กุ้นี่ ซีบา ซาอู อ เพล่ดู, ดี๊ โล้ เอะ เว๊ บี่อี้ง, “กเย่ ทกุ้ อ เม้ง พี่ อ เก ซาอู อ เท่อ, ดี๊ อชื้ออชะ อ เท่อ เลาพะ นอ, จ เกล๊าง เอะ น เซงคู อ พูแคว๊ เย้า

¹⁰ แน้ ดี๊ น พูแคว๊ ซีง, ดี๊ กเย่ น เพล่ ลแพ นอ, แบ แม้ ไชะ แม้ ฆึ้ เอะ-อ้ะ, ฌ้อง เฌ๊ฆ้าง โชะ ทซูงทแซ เอะ น เซงคู อ พูแคว๊ นอ, บี่ซุ้ ทอาง ม โอ อาง, แบเด้าะ, เมฟีโบเช น เซงคู อ พูแคว๊ นอ, ม อาง เท่อ ลู่ง จ คะ คู ดี๊ แย้ ครึๆ, ล้อ”, ซีบา นอ อ พูแคว๊ โอ ชี๊ง เย่ แฌ้, อ เพล่ โอ อ แฌ้ คี๊ง ชี๊ง

¹¹ ฌ้อง ซีบา ไคล้ ดี๊ กจุ้แฆว้ ไจ้ะเว๊, “ ทกุ้เม้ง พี่ จ เซงคู กจุ้แฆว้ อางแบเลา เอะ อ เพล่ นอ, อ เพล่ ม แม้ เว๊ ล้อ”, เมฟีโบเช อาง แบ มี้ ลู่ง ดาเว อ คะ คู, บี่ซุ้ ดี๊ อ เก กจุ้แฆว้ อ พูแคว๊ ล แฌ้ นอ ล้อ

¹² เมฟีโบเช อ พูแคว๊ โอ ล แฌ้ อ เม้ง มีคา, โพล้ง กุ้ อ แฌ้ พี่ โอ ลู่ง ซีบา อ เด้า พ้า นอ, เฌ๊ เก แบ เมฟีโบเช อ เพล่ เลาพะ ล้อ

¹³ อ กย้อง บี่นอ, เมฟีโบเช โอ เว๊ ลู่ง เยรูซเลง พ้า, เมะเว๊ อ เว๊ อาง แบ เท่อ ลู่ง กจุ้แฆว้ อ คะ คู ครึๆ, นอ ล้อ, อ เว๊ อ คาง คี๊ง แพ้ นอ เฌ๊ฌ้อง ไจ ล ซี แบ