2​ซามูเอง 3 - Northern Pwo Karen Thai Bible

อะเนอ แกยไท้ อ ซ้ะ, โอ ลแพ้ฆ่าง ดี๊ ดาเว

¹ โพล้ง พี่ อ โอ ดี๊ ซาอู ลแพ้, ดี๊ โพล้ง พี่ อ โอ ดี๊ ดาเว ลแพ้ นอ, ดึ้ซึ้ โละอซ้ะ พ้ะไยะ, แบเด้าะ, โพล้ง ลู่ง ดาเว ลแพ้ นอ, ชองทางไคล๊ทาง ครึๆ, เมะ โพล้ง ลู่ง ซาอู เว๊ ลแพ้ นอ, อ ไฌ่ อ แบ้ ล้างแช่ ทาง ล โค๊ ครึๆ, ล้อ

² ดาเว อ พูแคว๊ กึทาง ลู่ง เว่ง เฮโบรง พ้า ตบลึ้ แฌ้, อ พูแคว๊ วี่แซย่ นอ, อ เม้ง อางโนง, กึทางนี่ ดี๊ น่าง อาฮีโนอาง, โพล้ง ยีซเรเอง

³ คี๊ง แฌ้ ล แฌ้ นอ อ เม้ง คีเลอะ, กึทางนี่ ดี๊ น่าง อาบีกายี นาบาง อ แม๊ มืงเม๊, เก โพล้ง คาราเมง, ซ๊า แฌ้ ล แฌ้ นอ อ เม้ง อะซาโลง, กึทางนี่ ดี๊ น่าง มาอาคา, เก กจุ้แฆว้ ทางไม อ พูมืง, อ เว๊ โอ ลู่ง เว่ง เกชู

⁴ ลี่ง แฌ้ ล แฌ้ นอ อ เม้ง อาโดนียา, กึทางนี่ ดี๊ น่าง ฮะกี, เย่ แฌ้ ล แฌ้ นอ อ เม้ง เชฟาทียา, กึทางนี่ ดี๊ น่าง อาบีทาง

⁵ ฆู๊ง แฌ้ ล แฌ้ นอ อ เม้ง อิ้เรอาง, กึทางนี่ ดี๊ น่าง เอะลา ดาเว อ แม๊, ดาเว อ พูแคว๊ ลแพ อี้ง นอ, กึทาง ลู่ง เว่ง เฮโบรง พ้า นอ ล้อ

⁶ ลู่ง ไค๊ พี่ โพล้ง ลู่ง ซาอู เว๊ ลแพ้, ดี๊ ดาเว เว๊ ลแพ้ ดึ้ซึ้ โละอซ้ะ ได้ะ นอ, อะเนอ แม้ เฌิ่งทาง ค๊าทาง อ ซ้ะ, เก ลแพ้ ฆ่าง ดี๊ ซาอู

⁷ ซาอู นอ อ แม๊ พู โอ ล แฌ้, อ เม้ง น่าง รีซาปา, เก ไอยา อ พูมืง, ดี๊ อีโบเช ไคล้ ดี๊ อะเนอ ไจ้ะเว๊, “แม้ทเล้?, น ลี้ฆ้างฌูง จ แพ่ อ แม๊ พู?”

⁸ อะเนอ อ ซ้ะทาง ลู่ง อีโบเช อ ทไคล้ อี้ง อ กย้อง เต้ๆ, อะเนอ ไจ้ะ เอะ-อ้ะ, “แย้ โย้ จ เก โพล้ง ยูดา อ ทวีง คูฆีง โบ่, กุ้ นี้งๆ, อี้ง นอ, จ เนโพลทาง ทเซิงเท่งซ้ะโต้, เอะ น แพ่ ซาอู อชื้ออชะ, ดี๊ อ พื่ง อ วี่, ดี๊ อ ซกุ้ ฌุ้พาง, จ ล อางกีล้าง แน้ ลู่ง ดาเว อ จูง พ้า แบ, ล นี้ง แย๊ อี้ง, น ไจ้ะ มะ จ แม้ ไพ้ะ แบ เท่อ ดี๊ กมืง ล แฌ้ อี้ง เด้าะ

⁹ เกม๊าเต้ กแช่แยว้ แม้ เอะ อะเนอ, ดี๊ แอทาง ได้ะ, เมะ ลู่ง จ ล แม้ เท่อ ลู่ง ดาเว อ ฌ่าง, บี่ซุ้ ดี๊ กแช่ยาเว อืงล้าง เว้ เอะ แน้ แบ นอ

¹⁰ เมะเว๊ จ ม แญ่ไฆวะ ซาอู อชื้ออชะ นอ อ มื่ง อ บ้าง ดี๊ ม ไต้ทางต๊างทาง ดาเว อ ล่าง ชี๊น้าง, โพะคอง โพล้ง อีซลาเอง ดี๊ ยูดา, โอนี่ ลู่ง ดาง ลี้ ท้อง ลู่ง เบเออเชบา”

¹¹ อีโบเช ไคล้ช๊า ไท้ อะเนอ ล ซี น่าง ทีง ล้าแบ เฆาะ, เป๊งนี่ อ เว๊ ซ้ะเม อะเนอ

¹² อะเนอ เจ่ทาง โพล้งไคล้เดิงเท่อ, ลี้ คิ้-อ้ะ ลี้ ฌูง ดาเว, อางจ้ะ เว๊ ที๊งล่างค่างพ้า อี้ง นอ, เก โพล้ง เล้ เว๊”, ดี๊ โล้ เอะ เว๊ เด้าะ ไจ้ะเว๊, “เกม๊า น แม้ ทเอิ้งล้าง โละซ้ะ ดี๊ แย้, แคว่เซ้อ, จ จูง ม โอ ลแพ้ ฆ่าง ดี๊ แน้, บี่ซุ้ ลี้ฌ้า โพล้ง อีซลาเอง เลาพะ นอ, แกย ไท้ อ ซ้ะ เฌ๊ไท้ โอก้ะ ลแพ้ ฆ่าง ดี๊ แน้”

¹³ ดาเว ไคล้ช๊า-อ้ะ ไจ้ะเว๊, “ฌี้ เย้า, จ ม แม้ ทเอิ้งล้าง โละซ้ะ ดี๊ แน้, แบเด้าะ จ ม อางท่าง แน้ เท่อ ล เม้ง บี่อี้ง, น เมะ เฌ๊ ฌูงแย้ โฆะ นอ, น แบ เฌ๊ โชะ เอะ แย้ ซาอู อ พูมืง น่าง มีคาง นอ, เมะ ล เมะ บี่นอ แบ นอ, เฌ๊ฌูง แย้ ล ฌี้”

¹⁴ ฌ้อง ดาเว โซ๊ง โพล้งไคล้เดิงเท่อ, ลี้ ฌูง ซาอู อ พูแคว๊ อีโบเช โล้ แบ-อ้ะ ไจ้ะเว๊, “เกม๊า ไท้ เอะ แย้ จ แม๊ น่าง มีคาง นอ ไช้ะ, เมะเว๊ จ อางเล๊ นี่-อ้ะ, ดี๊ โพล้ง ฟีลีเตีย อ แฌ้ ล แย้ อ ท คู ไพ้ะ”

¹⁵ อีโบเช โซ๊ง โพล้ง, เกม๊า ลี้ แม้นี่ไท้ น่าง มีคาง ไจพ้ะแด อ แว้, เมะเว๊ ลาอิ้ อ พู ปางทีเอง

¹⁶ แบเด้าะ, อ แว้ ลี้ โพะ เว๊ อ ไค๊ ดี๊ ฌาง ดี๊ ย้า, ท้อง ตางโบง บาฮูรีง, ฌ้อง อะเนอ โล้ เอะ-อ้ะ ไจ้ะเว๊, “ม๊า น ไท้ ไท้ ไวะ”, ดี๊ อ เว๊ ไท้ไท้ เว๊ ล้อ

¹⁷ อะเนอ ก้างแก้ โละอซ้ะ ดี๊ โพล้ง อีซลาเอง อเม้งอแซย่ ไจ้ะเว๊, “ลู่ง อู้ง นอ, น ซื๊ง แบซ้ะ ดาเว เก กจุ้แฆว้ โพะคอง น ซื๊ง

¹⁸ ค๊องเนงอี้ง, ม๊า น แม้ บี่นอ, เมะเว๊ กแช่ยาเว ไคล้ ดี๊ ดาเว ไจ้ะเว๊, ‘จ ม แม้พ้องพลิ้ จ พู จ ลี้ง โพล้ง อีซลาเอง, ดี๊ จ เพล่ ดาเว อ จูง ลู่ง โพล้ง ฟีลีเตีย อ จูง พ้า, ดี๊ อดีงอแด้ เลาพะ ซีง นอ อ จูง พ้า’, ”

¹⁹ อะเนอ ไคล้ ดี๊ โพล้ง เบงยามีง ปะ, ฌ้อง ลี้ฌูง ดาเว ลู่ง เว่ง เฮโบรง พ้า, โล้ เอะ เว๊ ทกุ้เม้ง, พี่ โพล้ง อีซลาเอง ดี๊ โพล้ง เบงยามีง อชื้ออชะ แดฆึ เว๊ ฌี้ มะ, พี่ ม แม้ บี่นอ

²⁰ อะเนอ เฌ๊ฆ้าง โอ ดาเว ลู่ง เว่ง เฮโบรง พ้า, เฌ๊ ดี๊ โพล้ง อ แฌ้ คี๊ง ชี๊ง, ดาเว ลื่งอาง อะเนอ ดี๊ โพล้ง, พี่ อ โอ ดี๊-อ้ะ ลแพ นอ

²¹ อะเนอ โล้ เอะ ดาเว ไจ้ะเว๊, “จ ม เฌ้เทิงทาง, จ ม ไท้ อางกีซยองนี่ โพล้ง อีซลาเอง เลาพะ, เกม๊า เฌ๊ ลู่ง จ เซงคู กจุ้แฆว้ อ โอ, บี่ซุ้ อ ซื๊งเว๊ซีง ม แม้ ทเอิ้งล้าง โละซ้ะ ดี๊ แน้, ดี๊ บี่ซุ้ น ม โพะคอง เท่อ เลาพะ, ท๊อง ทแบ น ซ้ะ”, ฌ้อง ดาเว โซ๊ง อะเนอ ไท้ไวะ, ดี๊ อ เว๊ ไท้ ดี๊ ทมึทพ้า นอ ล้อ

โยอะ แม้ซี๊ง อะเนอ

²² แคว่แฆว่ เซ้อ, ดาเว อ ซึ้พู ดี๊ โยอะ ลี้ ตมละ เท่อ เฌ๊ไท้, เฌ๊ไท้ โชะ ดี๊ เท่อ พี่ อ ลู่นี่ เว๊ นอ แอฌ้อง, แบเด้าะ อะเนอ นอ ล โอ ดี๊ ดาเว ลู่ง เฮโบรง พ้า ล้าแบ, เมะเว๊ อ เท่อ โซ๊ง ไท้-อ้ะ ดี๊ ทมึทพ้า เย้า

²³ ท่อง โยอะ ดี๊ ซึ้พูมู๊ง เลาพะ, พี่ โอ ดี๊-อ้ะ เฌ๊ ท้อง นอ, โพล้ง โล้ เอะ โยอะ ไจ้ะเว๊, “เนอ อ พู เมะเว๊ อะเนอ นอ, เฌ๊ฆ้าง โอ กจุ้แฆว้, ฌ้อง กจุ้แฆว้ โซ๊ง ไท้-อ้ะ, ดี๊ อ เว๊ ไท้ ดี๊ ทมึทพ้า ล้อ

²⁴ ฌ้อง โยอะ ลี้ฆ้าง โอ กจุ้แฆว้, โล้ เอะ เว๊ ไจ้ะเว๊, “น แม้ ทเม้งเล้ นอ?, แคว่เซ้อ, อะเนอ เฌ๊ฆ้าง โอ แน้, แม้ ทเม้งเล้ น โซ๊ง ไท้-อ้ะ บี่นอ?, อ เว๊ ไจคุ้ซูงไฆวะ เย้า เต้ๆ, ล้อ

²⁵ น ซีงแฌ๊ เย้า, เนอ อ พู เมะเว๊ อะเนอ นอ, เฌ๊ โล๊ไละล้าง แน้, บี่ซุ้ แบซ้ะ ซีงแฌ๊ น ทไจทาง ไจล้าง, ดี๊ บี่ซุ้ ม ซีงแฌ๊ ทกุ้เม้ง กุ้เจ้ง พี่ น แม้-อ้ะ”

²⁶ ท่อง โยอะ ลี้ฆ้าง โอ ดาเว ไจทาง เย้า นอ, อ เว๊ โซ๊ง โพล้งไคล้เดิงเท่อ, ม๊า ลี้ช่องนี่ อะเนอ, ฌ้อง อ ซื๊งเว๊ ลี้ แม้นี่ เว๊ ลู่ง ที๊งน๊างโบ้ ลู่ง ซีรา พ้า, แบเด้าะ ดาเว ล ซีงแฌ๊ เว๊ แบ

²⁷ ดี๊ ท่อง อะเนอ เฌ๊ไท้ ไท้ ท้อง เว่ง เฮโบรง พ้า เย้า นอ, โยอะ ลี้ฌ้า-อ้ะ ลู่ง เว่ง อ ป้ะตู๊ง พ้า, บี่ซุ้ ม ไคล้ เว๊ ดี๊-อ้ะ คี๊ง แฌ้ เฆาะ, แบเด้าะ, โยอะ นอ ชิ้ อะเนอ อ ฌู่โพ๊ง, ดี๊ อ เท่อ ซี๊ง เว๊, โยอะ แม้แกไท้ อ พื่ง อาซาเฮง อ ซวีง อ กย้อง นอ ล้อ

²⁸ โอ ลู่ง ไค๊, ท่อง ดาเว ซีงแฌ๊ แบฆ้ะ ดี๊ ท ล ไฌ่ อี้ง นอ, ไจ้ะเว๊, “แย้ จ กแช่ แด เว๊ ดี๊ จ มื่ง จ บ้าง นอ, ล โอ ดี๊ ทไพ้ะทแม ลู่ง กแช่ยาเว อ เมะแซ พ้า แบ ล้างชู้, พี่ แบฆ้ะ ดี๊ เนอ อ พู, เมะเว๊ อะเนอ อ ซวีง นอ อ กย้อง

²⁹ เกม๊า ทซวีง นอ ล้างเทะแบ โยอะ อ คู, ดี๊ อ แพ่ อชื้ออชะเลาพะ นอ อ คู, เกม๊าเต้ โพล้ง พี่ โอ ดี๊ อ ทที๊ง ไจทาง, โพล้ง แบ ทแช๊ คีงเตา, โพล้ง อล้องอย่าง โอ ล ล๊า ล ฆวี้ แบ, โพล้ง พี่ แบ ทแม้ซี๊ง แบ-อ้ะ ดี๊ น้ะ, โพล้ง ทอางทโอ้ ล โอ แบ นอ, ล้างเทาไฆวะ ดี๊ โยอะ อ ชื้อ ล ฌี้

³⁰ ทแม้ อ ซ้ะ บี่อี้ง, โยอะ ดี๊ อ พื่ง แคว๊ อาบีไช แม้ซี๊ง อะเนอ, เป๊งนี่ อะเนอ แม้ซี๊ง อ พื่ง แคว๊ อาซาเฮง ลู่ง ทดึ้ซึ้ พ้า, ลู่ง ทล่าง กีเบโอง พ้า อู้ง

³¹ ฌ้อง ดาเว ไคล้ ดี๊ โยอะ, ดี๊ โพล้งเฌงพูฆ๊างพู กุ้ อ แฌ้, พี่ อ โอ ดี๊ โยอะ ลแพ นอ ไจ้ะเว๊, “เกม๊า น ซื๊ง ซย๊างยะ ไช๊ช้าง, ดี๊ เราทาง ตไก้ยะ กเซ้าะ ลู่ง ย่างเด้ง ล้อง, เกม๊า น ซื๊ง พี่ น มองแบ อะเนอ นอ ลี้ วี่ง”, ดี๊ กจุ้แฆว้ ดาเว นอ, ลี้ โพะ อะเนอ อโช่ง อ ไค๊

³² อ ซื๊งเว๊ เคิงล้างบ้า อะเนอ อ จู, ลู่ง เฮโบรง พ้า, ดี๊ กจุ้แฆว้ นอ ฌาง พ้ะดู, ลู่ง ทล่าง เคิงล้างบ้า อะเนอ อ จู ไท้ะ นอ, โพล้งเฌงพูฆ๊างพู กุ้ แฌ้ ฌาง ปะ

³³ กจุ้แฆว้ ฌางล้างย้าล้าง เท่อ, แบฆ้ะ ดี๊ อะเนอ อ กย้อง บี่อี้ง “เกิ้ง ชี่ ว้า พี่ อะเนอ ม ซี๊ง, แบด้อง โพล้ง เฌ๊ฌ้อง?

³⁴ อ จูง ล แบ ทจ้าทะ-อ้ะ แบ อ คาง ล แบ ทซุ้ทะ-อ้ะ แบ อ เว๊ ล้างเทะเค้า แบด้อง โพล้ง ล้างเทะเค้า ลู่ง โพล้งอ้าโพล้งซ๊าง อ เมะแซ พ้า” ดี๊ โพล้งเฌงพูฆ๊างพู กุ้ อ แฌ้, ฌาง มองแบ อะเนอ เด้าะ

³⁵ ฌ้อง โพล้งเฌงพูฆ๊างพู เฌ๊ โล้ แบ ดาเว, เกม๊า อาง มี้ พี่ มื่ง โอ ได้ะ อ แค๊ นอ, แบเด้าะ ดาเว อืงล้าง อ ซ้ะ ไจ้ะเว๊, “จ เมะ ไช่ดุ้ กู ฌี้, ทเม้ง ฌี้ๆ, ลู่ง มื่ง ล นี้ง แย๊ อี้ง ล ล้าง นึ ได้ะ แบ นอ, เกม๊าเต้ กแช่แยว้ แม้ เอะ แย้ ดี๊ แอทาง ได้ะ”

³⁶ ท่อง โพล้งเฌงพูฆ๊างพู กุ้ แฌ้, แด เว๊ ทแม้ อ ซ้ะ บี่นอ, แบ อ ซื๊งเว๊ อ ซ้ะ, ดี๊ แด เว๊ เก ทอฌี้, บี่ซุ้ ดี๊ อ ซื๊งเว๊ แบ อ ซ้ะ, ดี๊ ทกุ้ อ เม้ง พี่ กจุ้แฆว้ แม้ เว๊ นอ

³⁷ โพล้งเฌงพูฆ๊างพู เลาพะ, ดี๊ โพล้ง อีซลาเอง กุ้ แฌ้ นอ, ซีงแฌ๊ โย๊ เว๊ ล นี้ง แย๊ นอ บี่อี้ง, กจุ้แฆว้ ล แบฆ้ะ ดี๊ ทแม้ซี๊ง เนอ อ พู, เมะเว๊ อะเนอ นอ แบ

³⁸ กจุ้แฆว้ ไคล้ ดี๊ อ เพล่ดู ลแพ นอ ไจ้ะเว๊, “น ซื๊ง ล ซีงแฌ๊ แบ-อ้า, ล นี้ง แย๊ อี้ง, กดูกแซย่ ดี๊ โพล้ง ลู่ง อ ดู ล แฌ้, ล้างเทะเค้า ลู่ง ค่าง อีซลาเอง พ้า อี้ง?

³⁹ ทึเมะ แย้ จ แบ ทเท้าไน-อ้ะ, เก กจุ้แฆว้ เย้า ฌี้ นอ, จ ไฌ่ ล้างแช่ โย๊ เฆาะ ล นี้ง แย๊ อี้ง, กแคว๊ พี่ เก น่าง เซรูยา อ พู ลแพ อี้ง, เก โพล้ง แน่ลู่ อ ซ้ะ ชองโฆะ เละ แย้ ได้ะ, เกม๊าเต้ กแช่ยาเว แม้ช๊าไท้ เอะ โพล้ง, พี่ อ แม้ ทอ้าทซ๊าง, บี่ซุ้ ดี๊ อ ทอ้าทซ๊าง นอ แดเทา”