2​ซามูเอง 18 - Northern Pwo Karen Thai Bible

อะซาโลง ล น้า เท่อ แบ, ดี๊ ซี๊ง เว๊ ล้อ

¹ ดาเว แคว่ที๊ง ซึ้พู พี่ อ โอ ดี๊-อ้ะ ลแพ นอ, ฌ้อง ต๊างทางนี่ ซึ้คูแคว่ ซึ้พู อ แฌ้ ล ม๊า น้างๆ, ล แย้ น้างๆ, เกม๊า เว๊ อ แคว่ทะ เท่อ

² ดาเว โซ๊งทาง อ ซึ้พูมู๊ง ลี้ เท่อ, เกม๊า เว๊ อ โอ ลู่ง โยอะ อ ทอางแบเลา พ้า ล มู๊ง, ลู่ง ทซ๊า มู๊ง อ แกล้, ดี๊ ลู่ง น่าง เซรูยา อ พู โยอะ อ พื่ง อาบีไช อ ทอางแบเลา พ้า ล มู๊ง, ลู่ง ท ซ๊า มู๊ง อ แกล้, ดี๊ ล มู๊ง ลู่ง ท ซ๊า มู๊ง อ แกล้ เด้าะ นอ, โอ ลู่ง อิ้ไท โพล้ง กะทา ลแฌ้ นอ อ ทอางแบเลา พ้า, กจุ้แฆว้ ไคล้ ดี๊ ซึ้พู ซีงลแพ นอ ไจ้ะเว๊, “แย้ จ ม ไจทาง ลี้ ดี๊ น ซื๊ง เต้ๆ, ล้อ”

³ แบเด้าะ ซึ้พู ลแพ นอ, โล้ เอะ-อ้ะ ไจ้ะเว๊, “กแช่-เอ้อ, เกม๊า น ลี้ ล ฌี้, เฆ้อ ล มู๊ง อี้ง ก เมะ ซยู๊ไฆวะ นอ, อ ซื๊งเว๊ ล ควี๊งคูแกยแน่ ดี๊ เฆ้อ ล แพ อี้ง แบ, เฆ้อ ซีงลแพ อี้ง เมะ ซี๊งไฆวะ พุ้พ๊าง ฌี้, อ ซื๊งเว๊ ล ควี๊งคูแกยแน่ ดี๊ เฆ้อ ซีงลแพ อี้ง น่าง เม้ง แบ, แบเด้าะ แน้ นอ, อ ฆวี้ ดู ที๊ซุ้ ดี๊ เฆ้อ ลแพ อี้ง อ แฌ้ ล ไซ, อ กย้อง บี่นอ, เกม๊า น โซ๊ง โพล้ง ลู่ง เว่ง พ้า, โอ ตร้างทะ เท่อ ม ฌี้ ล โค๊”

⁴ กจุ้แฆว้ ไคล้ ดี๊ อ ซื๊งเว๊ ไจ้ะเว๊, “น ซื๊ง ช๊องมอง เกิ้ง แม้ บี่จะเล้ นอ, แย้ จ ม แม้ โพะ อ ไค๊”, กจุ้แฆว้ ชี๊เทิง ลู่ง เว่ง อ ป้ะตู๊ง ฆ้อง, ดี๊ ซึ้พู เลาพะ ไจทาง เก อ โป้ง อ แฌ้ ล แย้ โอ, ล ม๊า โอ

⁵ กจุ้แฆว้ อางแบเลา โยอะ, อาบีไช, ดี๊ อิ้ไท ไจ้ะเว๊, “แม้ น จูง โกย้ๆ, ดี๊ น่างบางซ้ะบาง แคว๊ อะซาโลง นอ ล ปี๊, แคว่ ลู่ง แด แย้ จ เมะ ไช้ะ”, ซึ้พู เลาพะ นอ, แน่ฌ๊า ทอางแบเลา พี่ กจุ้แฆว้ โล้ แบ เอะ ซึ้พูมู๊งอคูดู กุ้ อ แฌ้, พี่ แบฆ้ะ ดี๊ อะซาโลง อ กย้อง นอ ปะ ล้อ

⁶ ซึ้พู ซีงลแพ นอ, ไจทาง ลี้ ลู่ง ญ้าง พ้า ทเคแกล้, บี่ซุ้ ม ดึ้ซึ้ โละซ้ะ ดี๊ โพล้ง อีซลาเอง, ทดึ้ซึ้ อี้ง นอ แม้ เว๊ ลู่ง ทเค แกล้ เอฟาอีง

⁷ พี่ นอ, โพล้ง อีซลาเอง ล น้า ดาเว อ ซึ้พูกดูกแซย่ ลแพ นอ แบ, โอ ดี๊ ทชิ้ ซี๊ง กล้าง ซี๊ง โละซ้ะ พ้ะดู พี่ นอ, ล นี้ง แย๊ นอ, ซึ้พู ซี๊ง คี๊ง ไซ แฌ้

⁸ พี่ นอ ทดึ้ซึ้ ลี้ จฌะ เฆ้ง ที๊งล่างค่างพ้า, ล นี้ง แย๊ นอ, ทเค แกล้ อางไฆวะ ซึ้พู แอเละ น้ะ อาง เว๊ ได้ะ ล้อ

⁹ “ท่อง อะซาโลง ลี้ ต้องนอง ดาเว อ ซึ้พูกดูกแซย่ นอ, อะซาโลง เทา แนว้ คู, ดี๊ แนว้ นอ ลี้ ซยู๊ฆ้าง ซี๊ พ้ะดู มื่งเทิง ป้องปูง แกล้, อ เว๊ อ คูฆีง แบ บล้ะ ดี๊ ซี๊ ได้ นอ ไชะไนะ, ดี๊ อ เว๊ ล้างเช้ ลู่ง มุ้คู ดี๊ ฌางคู อ เบ้าช้า พ้า, เมะ แนว้ พี่ โอ อ เว๊ อ พ๊างละ นอ, ซยู๊ไฆวะ ไวะ

¹⁰ โพล้ง แคว๊ โอ ล แฌ้ เฌ๊ แด-อ้ะ, ฌ้อง ไท้ โล้ เอะ โยอะ ม๊า อ ซีง แฌ๊ ไจ้ะเว๊, “แคว่เซ้อ, จ แด อะซาโลง ล้างเช้ ลู่ง ซี๊ พ้ะดู มื่งเทิง ล้อง”

¹¹ โยอะ ไคล้ ดี๊ โพล้ง พี่ อ เท่อ โล้ เอะ-อ้ะ ล แฌ้ นอ ไจ้ะเว๊, “อู้ง, นแด-อ้ะ เย้า, แบทเล้, น ล กล้าง ล้างเทะ-อ้ะ ฌางคู คู พี่ นอ แบ?, น เมะ แม้ บี่ นอ, จ ม เกม๊า แน้ จี้ อ แทะ ล ชี๊ง, ดี๊ ย่างเด้ง พลี้ง ล บ้อง”

¹² แบเด้าะ, กแคว๊ ล แฌ้ นอ โล้ เอะ โยอะ ไจ้ะเว๊, “ทึเมะ จ จูง พองโฌ๊งทะ จี้ อ แทะ ล ม๊า ฌี้, จ ล เยาฆ้าง จ จูง แม้อ้าแม้ซ๊าง กจุ้แฆว้ อ พูแคว๊ แบ, เมะเว๊ เฆ้อ ลแพ อี้ง ก แน่ฌ๊า กจุ้แฆว้ อางแบเลา แน้, ดี๊ อาบีไช ดี๊ อิ้ไท ไจ้ะเว๊, ‘ เกม๊า น ยู่แคว่ทะ น่างบางซ้ะบาง แคว๊ อะซาโลง นอ, แด-อ้ะ ลู่ง จ เมะ อี้ง ไช้ะ’

¹³ แบเด้าะ, จ เมะ แม้อ้าแม้ซ๊าง อ ทโอม๊า นอ, (ดี๊ ท ล โอ อางกี กดื้งทะ เท่อ, ดี๊ กจุ้แฆว้ น่าง เม้ง แบ นอ), ฌ้อง แน้ นอ น ม ญ๊องไฆวะ แย้”

¹⁴ โยอะ ไจ้ะเว๊, “จ ล เกิ้ง เลาไฆวะ ทอช๊าอโท่ ดี๊ แน้ บี่อี้ง แบ”, อ เว๊ พอง นางคี๊งจู้ง ซ๊า บ้อง ลู่ง อ จูง พ้า, ชิ้ฆ้าง เว๊ อะซาโลง อ ซ้ะคูเย๊ พ้า, พี่ อ เท่อ ม๊า ได้ะ ลู่ง ซี๊ พ้ะดู มื่งเทิง แกล้ พ้า นอ

¹⁵ ซึ้พู น่างบางซ้ะบาง พี่ โชะ เอะ โยอะ อ นางดึ้นางชาง นอ, ลี้ฆ้าง พ้องวะ อะซาโลง, ฌ้อง แม้ซี๊ง เว๊ เฆาะ

¹⁶ โยอะ อูง เซ๊ทาง ควี้ ทโน้ง, ฌ้อง ซึ้พู ซีงลแพ นอ เฌ๊ไท้, ล ล้องช่อง โพล้ง อีซลาเอง ล้าแบ, เมะเว๊ โยอะ แม้ โอโท๊ทะ อ ซื๊งเว๊

¹⁷ โพล้ง โชะทางนี่ อะซาโลง อ จู, จึ้ล้าง เว๊ ลู่ง ทโบ้ พ้ะดู พ้า, ลู่ง ทเค แกล้, แม้นี่ โล่ง ก๊องซยองทาง เว๊ น๊างโป้ง พ้ะดู, โพล้ง อีซลาเอง เลาพะ นอ, ล แฌ้ๆ, นอ, ไท้ ซยู๊ โอ ลู่ง อ กแช่ อ ทล่าง แด เว๊ นอ ล้อ

¹⁸ พี่ อะซาโลง โอม๊า ได้ะ อ แค๊ อู้ง นอ, อ เว๊ ช๊างล้างนี่ เฌเทิง ลู่ง อ กแช่ อ ฌ่าง, ลู่ง ทลู่ง พ้ะดู คางไท้ะ, เมะเว๊ อ ไจ้ะเว๊ บี่อี้ง, “จ พูแคว๊ พี่ ม อางกีนี่ก้ะ จ เม้ง จ แซ ล โอ แบ”, เฌเทิง นอ กุ้ เว๊ อ เม้ง, ด้องซุ้ อ กแช่ อ เม้ง, โพล้ง กุ้ เว๊ อ เม้ง, อะซาโลง อ ทแม้ไน ล่าง, ท้อง กุ้ นี้งๆ, อี้ง ล้อ

ดาเว ซีงแฌ๊ โค เว๊ อะซาโลง ซี๊ง

¹⁹ ซาโด อ พู เมะเว๊, อาฮีมาอ้ะ ไจ้ะเว๊, “เกม๊า จ ไท้ ซยู๊ โล้ โค เอะ กจุ้แฆว้ บี่อี้ง, กแช่ยาเว แม้ช้า-อ้ะ, เกม๊า พ้องไฆวะ ดี๊ อ ดีง อ แด้ อ จูง เย้า”

²⁰ โยอะ ไคล้ช๊า-อ้ะ ไจ้ะเว๊, “เกม๊า น เก โพล้ง ลี้ โล้ โค เท่อ ล นี้ง แย๊ อี้ง ล ฌี้, ลี้-อ้ะ ลู่ง ไค๊ ล นี้ง โฆะ, เมะ ล นี้ง แย๊ อี้ง นอ, ลี้ โล้ โค เท่อ ล ฌี้ เฆาะ, เมะเว๊ กจุ้แฆว้ อ พูแคว๊ ซี๊ง เย้า”

²¹ โยอะ โล้ เอะ โพล้ง คุ้ ล แฌ้ ไจ้ะเว๊, “เกม๊า น ลี้ โล้ แบ กจุ้แฆว้ ม๊า อ ซีงแฌ๊, บี่ซุ้ เท่อ พี่ น แด แบ-อ้ะ อี้ง”, โพล้ง คุ้ ล แฌ้ นอ, ซย๊องล้าง อ ซ้ะ แบ้ทาง โยอะ, ฌ้อง ลี้ ซยู๊ ไวะ

²² ซาโด อ พู เมะเว๊, อาฮีมาอ้ะ นอ, โล้ เอะ โยอะ ได้ะ ไจ้ะเว๊, “เมะ เม้ง ฌี้ๆ, นอ, เกม๊า จ ลี้ ซยู๊ โพะ โพล้ง คุ้ ล แฌ้ นอ อ ไค๊ ปะ”, โยอะ ไคล้ช๊า-อ้ะ ไจ้ะเว๊, “พู-เอ้อ, น ม ลี้ ซยู๊ แม้ ทเม้งเล้, เมะเว๊ ทลี้ โล้ โค แบ เท่อ อี้ง นอ, ทเกล๊าง เอะ แน้ รางวาง ล โอ แบ”

²³ อ เว๊ ไคล้ ช๊า เว๊ ไจ้ะเว๊, “เม้ง ฌี้ๆ, นอ, แย้ จ ม ลี้ ซยู๊”, โยอะ โล้ เอะ-อ้ะ ไจ้ะเว๊, “ลี้ ซยู๊ ไวะ”, อาฮีมาอ้ะ ลี้ ซยู๊ ลู่ง เกล้ ทแด้คู, พะวี่ง โพล้ง คุ้ ล แฌ้ นอ

²⁴ ดาเว โอ ลู่ง เว่ง ป้ะตู๊ง คี๊ง พ้า อ เบ้าช้า, โอ ดี๊ ซึ้พู คุ้แคว่ เท่อ, ลี้ทาง โอ ลู่ง ป้ะตู๊ง อ คูด้าง, ลู่ง เว่ง อ กางแป คู นอ, ท่อง บุ้ทาง อ คู แคว่ เท่อ นอ, แด เว๊ โพล้ง แคว๊ เฌ๊ ซยู๊ โอ ล แฌ้

²⁵ ซึ้พู คุ้แคว่ เท่อ นอ, โล้จู้ล้าง เอะ กจุ้แฆว้, กจุ้แฆว้ ไจ้ะเว๊, “อ เว๊ เมะ เฌ๊ ล แฌ้ ล้อ นอ, ม เฌ๊ ไอโชะ ทโล้โค ล้อ”, โพล้ง แคว๊ ล แฌ้ นอ เฌ๊ ซยู๊ฆ้าง เบ้าทาง

²⁶ ซึ้พู คุ้แคว่ เท่อ, แด โพล้ง แคว๊ ล แฌ้ เด้าะ, เฌ๊ ซยู๊, ฌ้อง ซึ้พู คุ้แคว่ เท่อ นอ, โล้จู้ล้าง เอะ โพล้งคุ้แคว่เกล้ป้ะตู๊ง นอ ไจ้ะเว๊, “แคว่เซ้อ, โพล้ง แคว๊ เฌ๊ ซยู๊ โอ ล แฌ้ เด้าะ”, กจุ้แฆว้ ไจ้ะเว๊, “อ เว๊ เฌ๊ โล้ โค เท่อ ปะ ล้อ”

²⁷ ซึ้พู คุ้แคว่ เท่อ นอ โล้ เว๊ บี่อี้ง, “จ ช๊องมอง โพล้ง พี่ อ เฌ๊ ซยู๊ วี่ง ล แฌ้ นอ, ซยู๊ แบด้อง ซาโด อ พู อาฮีมาอ้ะ”, กจุ้แฆว้ ไจ้ะเว๊, “โพล้ง ล แฌ้ อี้ง นอ, เก โพล้ง ฌี้, อ เว๊ เฌ๊ ดี๊ ทโล้โค ลู่ง อ ฌี้”

²⁸ ฌ้อง อาฮีมาอ้ะ โล้ เอะ กจุ้แฆว้ ไจ้ะเว๊, “เกม๊า ทมึทพ้า โอดี๊ กจุ้แฆว้”, อ เว๊ ซย๊องล้าง อ ซ้ะ ลู่ง กจุ้แฆว้ อ เมะแซ พ้า, อ เมะ ท้องล้าง ฌางคู คู ไจ้ะเว๊, “อางปฆ้าทาง กแช่ยาเว, น กแช่แยว้, อ เว๊ อางกีล้าง กเย่ โพล้ง พี่ เยาทาง อ จูง, ดึ้ซึ้ จ เซงคู กจุ้แฆว้ นอ เย้า”

²⁹ กจุ้แฆว้ อางจ้ะ-อ้ะ ไจ้ะเว๊, “น่างบางซ้ะบาง แคว๊ อะซาโลง นอ โอมึช๊องพ้า-อ้า?”, อาฮีมาอ้ะ ไคล้ช๊า-อ้ะ ไจ้ะเว๊, “พี่ โยอะ เจ่ กจุ้แฆว้ อ เพล่ เฌ๊ นอ, ดี๊ แย้, เมะเว๊ กจุ้แฆว้ อ เพล่ อี้ง นอ, แด โพล้ง เติ้งทางเติ้งล้าง พ้ะดู, แบเด้าะ, แบ ทเม้งเล้ นอ ล ซีงแฌ๊ แบ”

³⁰ กจุ้แฆว้ ไจ้ะเว๊, “ฌ้าไฆวะ น ซ้ะ เฌ๊ ชี๊เทิง ลู่ง อี้ง”, อ เว๊ ฌ้าไฆวะ อ ซ้ะ ลี้ ชี๊เทิง ไก้ไม่

³¹ แคว่เซ้อ, โพล้ง คุ้ ล แฌ้ เฌ๊ ท้อง, โพล้ง คุ้ นอ โล้ เว๊ ไจ้ะเว๊, “จ โอ ดี๊ ทโล้ โค ลู่ง อ ฌี้, เฌ๊ โล้ เอะ จ เซงคู กจุ้แฆว้, เมะเว๊ ล นี้ง แย๊ อี้ง, กแช่ยาเว แม้คิ้ แน้, เกม๊า น พ้องไฆวะ ดี๊ กเย่ โพล้ง พี่ อ เฌ้เทิงทาง ดึ้ซึ้ แน้ ลแพ นอ เย้า”

³² กจุ้แฆว้ อางจ้ะ โพล้ง คุ้ ล แฌ้ นอ ไจ้ะเว๊, “น่างบางซ้ะบางแคว๊ อะซาโลง นอ, โอมึช๊องพ้า ล้อ-อ้า?”, โพล้ง คุ้ นอ โล้ เอะ-อ้ะไจ้ะเว๊, “เกม๊าเต้ กเย่ จ เซงคู กจุ้แฆว้ อดีงอแด้ ดี๊ เลาพะ, ดี๊ โพล้ง พี่ เฌ้เทิงทาง แม้อ้าแม้ซ๊าง แน้ นอ, เก แบด้องซุ้ น่างบางซ้ะบางแคว๊ ล แฌ้ นอ แดเทา”

ดาเว ฌางล้างย้าล้าง มองแบ อะซาโลง

³³ กจุ้แฆว้ อ ซ้ะ เฌ๊ฌ้อง น้ะ มะ, ลี้ทาง ลู่ง อ ล่าง ล เช้า แย๊ พี่ อ โอ ป้ะตู๊ง พ๊างคู, ดี๊ ฌาง, พี่ อ เว๊ ไจ ลี้ๆ, ไท้ๆ, อ แค๊ นอ, ไคล้ ไจ้ะเว๊, “โอ้ จ พู อะซาโลง, จ พู, จ พู อะซาโลง-เอ้อ, แย้ จ แบซ้ะ ซี๊ง คิ้ แน้, โอ้ จ พู อะซาโลง, จ พู-เอ้อ”