2​ซามูเอง 16 - Northern Pwo Karen Thai Bible

โพล้ง ล มู๊ง พี่ อ แม้ ไทะทะ ดาเว

¹ พี่ ดาเว ลี้ พะไฆวะ ทลู่ง อ จ้อง คู ล ปี๊ นอ, แคว่เซ้อ, เมฟีโบเช อ เพล่ดู เมะเว๊, ซีบา เฌ๊ฆ้าง โอ-อ้ะ โอ ดี๊ อ แลว้ ล กู่ง จ้าทาง เว๊ ดี๊ อ ตาง เมาน่าง, ต้าง ดี๊ กู คี๊ง แย้ ลอง, ซไบ้ะ แซ ไฆ๊ อ เชา ล แย้, ดี๊ ทแซ ทคู่ แค๊ อ เชา ล แย้, ดี๊ ไซ้ะ ซไบ้ะ แซ ที๊ง ฆวี้ โทง ทไพ้ะ ล โพลง

² กจุ้แฆว้ ไคล้ ดี๊ ซีบา ไจ้ะเว๊, “น เฌ๊ โชะ ทลแพ อี้ง แม้ทเล้?”, ซีบา ไคล้ช๊า-อ้ะ ไจ้ะเว๊, “แลว้ ล กู่ง นอ บี่ซุ้ น พู น ลี้ง ม เทา เว๊, กู ดี๊ ทแซ ทคู่ แค๊ นอ, ลู่ง โพล้ง บาง ลแพ นอ ม อาง แบ เว๊, ดี๊ ไซ้ะ ซไบ้ะ แซ ที๊ง นอ, บี่ซุ้ โพล้ง พี่ อ ล้างแช่ล้างเบ้ ลู่ง แพะคูทเคแกล้ ลแพ นอ, ม โอ้ แบ เว๊”

³ กจุ้แฆว้ ไจ้ะเว๊, “น เซงคู อ พู โอ พี่จองเล้”, ซีบา โล้ เอะ กจุ้แฆว้ ไจ้ะเว๊, “แคว่เซ้อ, อ เว๊ โอโท่ ลู่ง เยรูซเลง พ้า, อ ไจ้ะเว๊ บี่อี้ง, ‘ล นี้ง แย๊ อี้ง, โพล้ง อีซลาเอง อชื้ออชะ, ม เกม๊า ไท้ จ แพ่ อ มื่ง อ บ้าง นอ เอะ แย้’, ”

⁴ ฌ้อง กจุ้แฆว้ ไคล้ ดี๊ ซีบา ไจ้ะเว๊, “แคว่เซ้อ, ค๊องเนงอี้ง, เมฟีโบเช อคองอแซย้ ล้างเทะแบ เก นี๊ แด”, ซีบา โล้ เอะ-อ้ะ ไจ้ะเว๊, “จ ม ไคล้ะล้าง คาง แบ้ทาง เท่อ ไคล้ทาง บี่อี้ง?, จ เซงคู กจุ้แฆว้-เอ้อ, เกม๊าเต้ จ เก โพล้ง ลู่ง แบเมะล้างซ้ะ แน้”

ชีเมอี ชูอ้า ดาเว

⁵ พี่ กจุ้แฆว้ ดาเว ลี้ ลู่ง ตางโบง บาฮูรีง พ้า นอ, โพล้ง แคว๊ โอ ล แฌ้, เก โพล้ง ลู่ง ซาอู อชื้ออชะ ล ดอง นอ อ แกล้, อ เม้ง ชีเมอี เก เกะรา อ พู, อ เว๊ นอ เฌ๊ทาง ไจ ไคว่ๆ, ชูอ้า เท่อ ไคว่ๆ

⁶ ดี๊ แม้นี่ โล่ง ไควะ ดาเว, ดี๊ ไควะ กเย่ กจุ้แฆว้ ดาเว อ กดูกแซย่ ลแพ นอ, ซึ้พู เลาพะ, ดี๊ โพล้งดึ้ซึ้เท่อพู ลู่ง อ ซ้ะ น้า เลาพะ นอ, โอ ลู่ง ดาเว อ ฆ้อง อ จี ล โค๊ ดี๊ อ ฆุ้ ล โค๊

⁷ ชีเมอี ชูอ้า-อ้ะ ไจ้ะเว๊, “ลี้ไฆวะๆ, โพล้ง แม้ซี๊ง เท่อ แม้ล้าง ทซวีง-เอ้อ, โพล้งแม้คู่แม้โฌ้เท่อ-เอ้อ”

⁸ กแช่ยาเว แม้แกไท้ แน้, แบฆ้ะ ดี๊ ซาอู อชื้ออชะ ลแพ อ ซวีง นอ กุ้เม้ง, น โพะคอง เท่อ เท่งก้ะ อ เว๊ อ ล่าง, ดี๊ กแช่ยาเว อางกีล้าง มื่งบ้าง ลู่ง น พู อะซาโลง นอ อ จูง พ้า, แคว่เซ้อ, ทอ้าทซ๊าง ล้างแบก้ะ แน้ เย้า, เมะเว๊ น เก โพล้ง แม้ซี๊ง เท่อ แม้ล้าง ทซวีง”

⁹ น่าง เซรูยา อ พู เมะเว๊, อาบีไช โล้ เอะ กจุ้แฆว้ ไจ้ะเว๊, “แม้ทเล้?, เกม๊า ทวีง ซี๊ง ล ดื้ง อี้ง เฌ๊ ชูอ้า จ เซงคู กจุ้แฆว้, เกม๊า จ ลี้ ค๊างฆ้าง กล้างเทะ อ โคะ เซ้อ”

¹⁰ แบเด้าะ กจุ้แฆว้ ไจ้ะเว๊, “น่าง เซรูยา อ พู ซีง-เอ้อ, จ แบฆ้ะ ดี๊ แน้ บี่จะเล้?, อ เว๊ เมะ ชูอ้า เท่อ พี่ กแช่ยาเว โล้-อ้ะ ไจ้ะเว๊, ‘เกม๊า ชูอ้า ดาเว นอ’, โพล้ง เล้ ม ไจ้ะเว๊, ‘แม้ทเล้?, น แม้ บี่อี้ง’, ”

¹¹ ดาเว ไคล้ ดี๊ อาบีไช, ดี๊ อ กแช่ อ กดูกแซย่ เลาพะ นอ ไจ้ะเว๊, “แคว่เซ้อ, จ กแช่ อ พู เท่งซ้ะ เต้ๆ, เฌาโละ ม แม้นี่ จ ทโอม๊า ได้ะ, แบทเล้?, โพล้ง เบงยามีง ล แฌ้ อี้ง ล แม้ เว๊ แบ, แคว่-อ้ะ บละ, เกม๊า อ ชูอ้า แด เว๊, เมะเว๊ กแช่ยาเว โล้ เอะ-อ้ะ เย้า

¹² แบซีงลู่ง กแช่ยาเว ม แคว่ ล้าง จ ทน้ะเซิงน้ะซ้ะ, ดี๊ ม เกม๊า ไท้ เอะ แย้ ดี๊ ทอฌี้, เท่งก้ะ อ เว๊ อ ทชูอ้า ล นี้ง แย๊ อี้ง”

¹³ ดาเว ลี้ ลู่ง เกล้ เลา ดี๊ อ ซึ้พู, ชีเมอี ลี้ ลู่ง ทลู่ง คางไท้ะ กแท้โละซ้ะ ดี๊-อ้ะ, ลี้ไคว่ๆ, ชูอ้า ดาเว ไคว่ๆ, บี่นอ, แม้นี่ โล่งไควะ เว๊, ดี๊ แม้นี่ ฌางคู มูง พ๊า ดุ้ เว๊

¹⁴ กจุ้แฆว้ ดี๊ อ ซึ้พู เลาพะ พี่ โอ ดี๊-อ้ะ นอ, เฌ๊ ท้อง อ ล่าง ดี๊ ทไปว้ะน่างไปว้ะซ้ะ, โอไปว้ะโอแซ แม้นี่ อไฌ่อแบ้ พี่ นอ ล้อ

อาฮีโทเฟ อ ทเนฌ้าโล้ฌ้า

¹⁵ อะซาโลง ดี๊ โพล้งเฌงพูฆ๊างพู เลาพะ, เมะเว๊ โพล้ง อีซลาเอง นอ เฌ๊ ท้อง เยรูซเลง, อาฮีโทเฟ เฌ๊ ปะ

¹⁶ ลู่ง ไค๊ พี่ ฮุ้ไช โพล้ง อาคี, เมะเว๊ ดาเว อ ซกุ้ ลี้ฆ้าง โอ อะซาโลง นอ, ฮุ้ไช โล้ เอะ อะซาโลง ไจ้ะเว๊, “เกม๊าเต้ กจุ้แฆว้ ดูทางโท๊ทาง, เกม๊าเต้ กจุ้แฆว้ ดูทางโท๊ทาง”

¹⁷ อะซาโลง ไคล้ ดี๊ ฮุ้ไช ไจ้ะเว๊, “อ อี้ง นอ, เก ทเซิงเท่งซ้ะโต้ แบ น ซกุ้ โบ่?, แบทเล้, น ล ลี้ ดี๊ น ซกุ้ แบ?”

¹⁸ ฮุ้ไช โล้ เอะ อะซาโลง ไจ้ะเว๊, “กแช่-เอ้อ, ล เมะ บี่นอ แบ, กแช่ยาเว ดี๊ โพล้งเฌงพูฆ๊างพู ลแพ อี้ง, ดี๊ โพล้ง อีซลาเอง เลาพะ นอ, ต๊างทาง โพล้ง เล้ นอ, แย้ นอ จ ม โอ โต้ก้ะ ดี๊ โพล้ง ล แฌ้ แย๊ นอ ล้อ

¹⁹ ล เม้ง เด้าะ นอ, เกิ้ง จ ม แม้ เอะ โพล้ง เล้ อ เท่อ?, ล เมะ โพล้ง ล แฌ้ นอ อ พูแคว๊ อ เท่อ แบ-อ้า?, แย้ จ นี่ แม้ เอะ น แพ่ อ เท่อ เย้า บี่จะเล้ นอ, จ ม แม้ เอะ น เท่อ บี่ นอ ปะ ล้อ”

²⁰ อะซาโลง อางจ้ะ อาฮีโทเฟ ไจ้ะเว๊, “เฆ้อ ซีงลแพ อี้ง ก ม แม้ทเล้?, ม ฌี้, เกม๊า น เนฌ้าโล้ฌ้า เอะ แย้”

²¹ อาฮีโทเฟ โล้ เอะ อะซาโลง ไจ้ะเว๊, “เกม๊า น ลี้ฆ้างฌูง น แพ่ อ แม๊ พู ซีงลแพ นอ, พี่ อ เว๊ คลุ้ล้าง เว๊ เกม๊า อ แคว่ก้ะ เท่อ บลาง พ้า”, ท่อง โพล้ง อีซลาเอง เลาพะ แน่ฌ๊า เว๊, แน้ น แม้ น ซ้ะ เกทาง น แพ่ อ ทแช๊เมะ ไฌ๊ซ้ะ เย้า นอ, จูง เลาพะ พี่ โอ ล แพ้ ฆ่าง ดี๊ แน้ นอ, ม ชองทางไคล๊ทาง”

²² โพล้ง กางทางนี่ เอะ อะซาโลง อ เด้, ลู่ง เด้า คู ท้ะ ล คะ นอ, อะซาโลง ลี้ฆ้างฌูง อ แพ่ อ แม๊ พู ซีงลแพ นอ, ลู่ง โพล้ง อีซลาเอง เลาพะ นอ อ เมะแซ พ้า

²³ ล ว๊าง แย๊ อู้ง นอ, อาฮีโทเฟ อ ทเนฌ้าโล้ฌ้า นอ, แบด้องซุ้ อ เว๊ นอ, นี่แบ ทไคล้ ดี๊ กแช่แยว้, เลา ดี๊ ดาเว ดี๊ อะซาโลง ทื๊งแบนะแบ อาฮีโทเฟ อ ทเนฌ้าโล้ฌ้า เลาพะ ล้อ