2​ซามูเอง 15 - Northern Pwo Karen Thai Bible

อะซาโลง กไบล้ะ ดี๊ ดาเว

¹ โอ ลู่ง ไค๊, อะซาโลง อางกีซยองนี่ เลาะ ดึ้ซึ้ เท่อ, ดี๊ กซี ดี๊ อ ซึ้พู ซยู๊ วี่ง ทเมะแย๊ เย่ ชี๊ง แฌ้, ลู่ง อ กแช่ อ ฌ่าง

² อะซาโลง มี๊ง เฌ้เทิง ลู่ง โฌ้ ล คึ, ชี๊เทิง ลู่ง เกล้ ฆ้อง, พี่ ม ลี้ นึฆ้าง เว่ง อ ปะตู๊ง พ้า, โพล้ง พี่ แฌ้ เล้ อ ทไฌ่ทกย้อง เมะ โอ ล เม้งๆ, พี่ ม เกม๊า กจุ้แฆว้ ต้ะเซ๊ง เอะ-อ้ะ นอ, อะซาโลง ม กุ้นี่ โพล้ง ล แฌ้ นอ, อางจ้ะ เว๊ บี่อี้ง, “น โอนี่ เว่ง พี่จองเล้ เฌ๊?”, ดี๊ ท่อง เมะ โพล้ง ไคล้ช๊า-อ้ะ ไจ้ะเว๊, “น เพล่ เก โพล้ง ล ชื้อ ลู่ง อีซลาเอง อ แกล้”

³ อะซาโลง ม โล้ เอะ-อ้ะ ไจ้ะเว๊, “แคว่เซ้อ, น ทกุ้ทาง เท่อ นอ ฌี้ ดี๊ แบ เมาะ, แบเด้าะ กจุ้แฆว้ ล นี่ ต๊างทาง โพล้ง โอ คุ้ช๊องแน แน้ น่าง แฌ้ แบ”

⁴ อะซาโลง ไคล้ เท่อ แอเละ อี้ง ได้ะ ไจ้ะเว๊, “อ๊า, โพล้ง เมะ ต๊างทาง แย้ เก โพล้งต้ะเซ๊งเท่อ, ลู่ง ที๊งล่างค่างพ้า อี้ง นอ ม ฌี้, โพล้ง เมะ โอ ดี๊ ทติ้โละ ไอโละ ซ้ะ ล แฌ้ ๆ, ดี๊ เมะ แบซ้ะ ทต้ะเซ๊ง เอะ อ เท่อ นอ, อ เว๊ ม เฌ๊ฌูง แย้, ดี๊ แย้ นอ, จ ม เกม๊า ทอเกิ้งอแบ เอะ-อ้ะ”

⁵ โพล้ง เมะ เฌ๊ฆ้าง เบ้า-อ้ะ นอ, โพล้ง ม ซย๊องล้าง อ ซ้ะ แบ้ทาง-อ้ะ, อ เว๊ ม เยาฆ้าง อ จูง บุ้ทาง ไท้ โพล้ง ล แฌ้ นอ, ดี๊ น๊าม๊า เว๊ อ บุ้แพ้

⁶ อะซาโลง แม้ เท่อ บี่อี้ง, เอะ โพล้ง อีซลาเอง กุ้ แฌ้, พี่ อ เฌ๊ฆ้าง โอ กจุ้แฆว้, บี่ซุ้ อางท่าง เว๊ ม๊า อ ต้ะเซ๊ง เอะ อ เท่อ, อ กย้อง บี่นอ, อะซาโลง น้า กเย่ โพล้ง อีซลาเอง นอ อ ซ้ะ

⁷ โอ ท่อง อ พ้องไฆวะ ลี่ง เนง, อะซาโลง ไคล้ ดี๊ กจุ้แฆว้ ไจ้ะเว๊, “เกม๊าเต้ จ ลี้ แม้ ชิ้เทาไท้ เท่อ, พี่ จ อืงล้าง เว้ ซ้ะ, พี่ จ อืงล้าง เว้ เท่อ ดี๊ กแช่ยาเว ลู่ง เว่ง เฮโบรง”

⁸ เมะเว๊ น เพล่ อืงล้าง เว้ เท่อ, พี่ ล พ๊า แย๊ จ โอ ลู่ง เว่ง เกชู, ค่าง ซีเรีย พ้า จไจ้ะ, “กแช่ยาเว เมะ เกม๊า จ เฌ๊ไท้ ลู่ง เยรูซเลง เต้ๆ, เย้า โฆะ นอ, จ ม เทว๊ ทโบงทางแบ้ทาง กแช่ยาเว’, ”

⁹ กจุ้แฆว้ ไคล้ช๊า-อ้ะ ไจ้ะเว๊, “เกม๊า น ลี้ ดี๊ ทมึทพ้า แดเทา, อ เว๊ เฌ้เทิงทาง ลี้ ลู่ง เฮโบรง

¹⁰ แบเด้าะ, อะซาโลง โซ๊ง คุ้ซูง โพล้ง ลี้ แคว่ฌูง เท่อ, ลี้ เฆ้ง โพล้ง อีซลาเอง กุ้ ชื้อ อ แกล้, เกม๊า เว๊ อ โล้ เท่อ บี่อี้ง, “น ซื๊ง เมะ แน่ฌ๊า ควี้ ทโน้ง อ ลู่ง เซ๊ ตแค๊ เล้ นอ, เกม๊า โล้ โละซ้ะ บี่อี้ง, ‘อะซาโลง เก กจุ้แฆว้ ลู่ง เฮโบรง พ้า’, ”

¹¹ โพล้ง แคว๊ โอ คี๊ง แย้ แฌ้ ลี้ ดี๊ อะซาโลง, โอนี่ ลู่ง เยรูซเลง พ้า, เก โพล้ง พี่ แบ ทอางจ้ะนี่-อ้ะ, โพล้ง ลแพ อี้ง ลี้ ดี๊ ทเซิงเช๊งซ้ะเกล้ง ล้อ, ล ซีงแฌ๊ ทอไฌ่อกย้อง น่าง เม้ง แบ

¹² พี่ ล พ๊า แย๊ อะซาโลง เทว๊ ทลื่งทาง อ แค๊ นอ, อ เว๊ โซ๊งโพล้ง เกม๊า ลี้ กุ้นี่ อาฮีโทเฟ โพล้ง กิ้โล, ดาเว อ โพล้งโล้ฌ้าเนฌ้าเท่อ, โอนี่ ลู่ง อ กแช่ อ เว่ง, เมะเว๊ กิ้โล, เป๊งนี่ อ นอ, ทช๊องมอง ซกุ้ เท่อ นอ, แอทาง ชองทาง, โพล้ง พี่ เฌ๊ โอ ล แพ้ ฆ่าง ดี๊ อะซาโลง นอ, แอทาง เว๊ ล้อ

ดาเว ไจคุ้ซูงไฆวะ เว่ง เยรูซเลง

¹³ โพล้งไคล้เดิงเท่อ ล แฌ้ เฌ๊ฆ้าง โอ ดาเว, โล้ เอะ เว๊ เกม๊า อ ซีงแฌ๊ บี่อี้ง, “โพล้ง อีซลาเอง, อ ซ้ะ ลี้ โพะ อะซาโลง อ ไค๊ เย้า”

¹⁴ ฌ้อง ดาเว อางแบเลา เอะ อ กดูกแซย่ พี่ โอ ดี๊-อ้ะ, ลู่ง เยรูซเลง พ้า นอ ไจ้ะเว๊, “เฌ้เทิงทาง เกม๊า ก ไจไฆวะ แดเทา, เมะ ล บี่นอ แบ นอ, เกล้ ม ไจคุ้ซูงไฆวะ อะซาโลง นอ, ล โอ ล้าแบ, ลี้ เมะเพล, ไค๊ไก้ะ แบ อ เว๊ ปชื่ง เฌ๊, ดี๊ ม คลึ้นี่ เฆ้อ, ดี๊ เฌ๊ โชะ ทอ้าทซ๊าง ท้อง เฆ้อ, ดี๊ ม แม้เฌ๊ฌ้อง เว่ง อี้ง ดี๊ น้ะ อ แน่”

¹⁵ กจุ้แฆว้ อ กดูกแซย่ ไคล้ช๊า-อ้ะ ไจ้ะเว๊, “แคว่เซ้อ, ก เซงคู กจุ้แฆว้ ม ลึนี่ แม้ บี่จะเล้ นอ, กเย่ น เพล่ดู ลแพ อี้ง, ม แม้โพะ เว๊ อ ไค๊ กุ้ อ เม้ง ล้อ”

¹⁶ กจุ้แฆว้ ไจทางไฆวะ ล พ๊า ฆ่าง ดี๊ โพล้ง เลาพะ, ลู่ง อ บลางพ้า นอ, โอก้ะ ฆวี๊ อ แม๊ พู อ แฌ้ ล ชี๊ง นอ ล้อ, พี่ กจุ้แฆว้ เกม๊า โอ แคว่ก้ะ เท่อ บลาง พ้า

¹⁷ กจุ้แฆว้ ไจทางไฆวะ เว๊ ล้อ, ซึ้พู เลาพะ นอ โพะ อ ไค๊, ดี๊ ลี้โอก้ะ ลู่ง เด้า พี่ อ โอ ไย้ โยะ นอ

¹⁸ กเย่ อ กดูกแซย่กุ้ แฌ้ นอ, ไจ ลู่ง อ ฆ้อง, กเย่ โพล้ง เคเรที, ดี๊โพล้ง เปเละ, ดี๊ โพล้ง กะทา, โอ ฆู๊ง แย้ แฌ้ พี่ โพะ อ ไค๊, โอนี่ ลู่ง เว่ง กะทา, ลี้ วี่ง ลู่ง กจุ้แฆว้ อ เมะแย๊ ล โค๊

¹⁹ กจุ้แฆว้ โล้ เอะ อิ้ไท, พี่ เก โพล้ง กะทา นอ ไจ้ะเว๊, “น ม ลี้ ดี๊ เฆ้อ แม้ ทเล้?, ไท้ โอ ไท้ ดี๊ กจุ้แฆว้ อู้ง, เมะเว๊ น เก โพล้ง ล ชื้อ แด, ดี๊ แบ ทโฌ๊ไจไฆวะ-อ้ะ ปะ, ไท้ ไท้ ลู่ง น เฌง น ฆ๊าง อู้ง แดเทา

²⁰ น เฌ๊ พู่ ท้อง มแฌ อู้ง ได้ะ ล้อ, ดี๊ ล นี้ง แย๊ อี้ง, เกิ้ง พี่ จ ม เกม๊า น ลี้ๆ, ไท้ๆ, ดี๊ เฆ้อ ชี่ ว่า?, ก ม ลี้ พี่จองเล้ นอ, ก ล ซีงแฌ๊ น่าง เม้ง แบ, ไท้ ไท้ แดเทา, เกม๊า น พื่ง น วี่ ไท้ ไท้ ปะ, เกม๊า ทเอ ลู่ง อเฌิ่งอค๊า ดี๊ ทโต้ทล้อง, โอ ดี๊ แน้ แดเทา”

²¹ แบเด้าะ อิ้ไท ไคล้ช๊า กจุ้แฆว้ ไจ้ะเว๊, “กแช่ยาเว โอม๊า ได้ะ บี่จะเล้ นอ, จ เซงคู กจุ้แฆว้ โอม๊า ได้ะ บี่จะเล้ นอ, จ เซงคู กจุ้แฆว้ ลี้ โอ พี่จองเล้, ม ซี๊ง ฌี้, ม ม๊า ฌี้ นอ, น เพล่ ม ลี้ โอ พี่ นอ ปะ ล้อ”

²² ดาเว โล้ เอะ อิ้ไท ไจ้ะเว๊, “เกม๊า น ลี้ ดี๊ ไจ จ ฆ้อง แดเทา”, อิ้ไท โพล้ง กะทา นอ, ไจ เว๊ อ ฆ้อง, เลา ดี๊ กเย่ โพล้งเม้งโพล้งแซย่ ดี๊ พืงแซ เลาพะ

²³ ท่อง ซึ้พู เลาพะ ลี้ แพ๊ฆ้าง นอ, โพล้ง ที๊งล่างค่างพ้า เลาพะ นอ, ฌาง อ ลู่ง เซ๊ พ้ะดู, กจุ้แฆว้ นอ ลี้ ค๊างฆ้าง ที๊งพูกล้อง คีโรง, ดี๊ ซึ้พู เลาพะ นอ, ลี้ แพ๊ฆ้าง ลู่ง แพะคูทเคแกล้ ล้อ

²⁴ ดี๊ แคว่เซ้อ, ซาโด เฌ๊ ปะ, เฌ๊ ดี๊ โพล้ง เลวี เลาพะ, เฌ๊ ยุ้ ดี๊ไฮะ กแช่แยว้ อ ทเอิ้งล้าง, ดี๊ อ ซื๊งเว๊ อางกีล้าง กแช่แยว้ อ ไฮะ นอ, ท้อง โพล้งเฌงพูฆ๊างพู ไจทางไฆวะ เว่ง พ้า เลา, ดี๊ อาบียาทา เฌ๊ทาง ปะ

²⁵ ดี๊ กจุ้แฆว้ โล้ เอะ ซาโด ไจ้ะเว๊, “เกม๊า ไท้ ยุ้ ไท้ กแช่แยว้ อ ไฮะ นอ, ลู่ง เว่ง พ้า แดเทา, เมะ ลู่ง มะ กแช่ยาเว แบเมะล้างซ้ะ ดี๊ เฆ้อ นอ, อ เว๊ ม ไท้ ฌ้า ไท้ เฆ้อ ล้อ, ดี๊ เกม๊า ก แด เลา, ดี๊ ไฮะ ดี๊ อ เว๊ อ ล่าง โอ ปะ

²⁶ แบเด้าะ อ เว๊ เมะ ไจ้ะเว๊, ‘จ ล แบ จ ซ้ะ ดี๊ แน้ แบ นอ’, แคว่เซ้อ, จ โอ พี่ อี้ง, เกม๊า กแช่แยว้ แม้ เอะ แย้, บี่ซุ้ แด เว๊ เกิ้ง ม แม้ นอ แดเทา”

²⁷ กจุ้แฆว้ ไคล้ ดี๊ โพล้งลื่งเท่ออคู ซาโด ปะ ไจ้ะเว๊, “น เก โพล้งพ้ะเว้เท่อ ล เมะ แบ-อ้า?, เกม๊า น ไท้ นึฆ้าง ไท้ เว่ง พ้า ดี๊ ทมึทพ้า, ดี๊ น พูแคว๊ คี๊ง แฌ้ เมะเว๊, น พู อาฮีมาอ้ะ, ดี๊ โยนาทาง อ พู อาบียาทา นอ

²⁸ แคว่เซ้อ, จ ม โอคุ้แท๊ เท่อ ลู่ง เกล้ ค๊างฆ้าง, ม ลี้ แพะคูทเคแกล้ นอ, ท้อง โพล้ง ลู่ง น ซื๊ง แกล้ ม โล้ โค แย้, เกม๊า จ ซีงแฌ๊”

²⁹ ซาโด ดี๊ อาบียาทา, ไท้ ยุ้ ไท้ กแช่แยว้ อ ไฮะ, ลู่ง เยรูซเลง พ้า ดี๊ โอโท่ เว๊ พี่ นอ

³⁰ ดาเว ลี้ทาง ลู่ง เกล้, พี่ ม ทาง ทลู่ง ไพ มื่งเทิง ไท้ะ, ลี้ ไคว่ๆ, ฌาง ไคว่ๆ, คลึไบ้ะล้าง อ คู ดี๊ ตไก้ยะ, ไจ ดี๊ อ คาง โปลิ้ปลิ้, ดี๊ซึ้พู เลาพะ พี่ โอ ดี๊-อ้ะ นอ, คลึไบ้ะล้าง อ คู ดี๊ ตไก้ยะ, ไจไคว่ๆ, ฌาง ไคว่ๆ

³¹ โพล้ง โล้ เอะ ดาเว เกม๊า อ ซีงแฌ๊ บี่อี้ง, “อาฮีโทเฟ นอ, โอ ลู่ง อะซาโลง อ ทช๊องมอง กไบล้ะ นอ อ แกล้ ปะ”, ดาเว ไจ้ะเว๊, “กแช่ยาเว-เอ้อ, เกม๊าเต้ อาฮีโทเฟ อ ทเนฌ้าโล้ฌ้า เท่อ นอ, เซ๊กูเฌ๊ฌ้องไฆวะ”

ฮุ้ไช เก โพล้ง ด้องดู เท่อ เอะ ดาเว

³² โอ ลู่ง ไค๊, พี่ ดาเว เฌ๊ ท้อง ทลู่ง อ จ้อง คู, พี่ เก ทล่าง โบงทางแบ้ทาง กแช่แยว้ นอ, แคว่เซ้อ, ฮุ้ไช โพล้ง อาคี อ ชื้อ ล ดอง นอ เฌ๊ฆ้าง โอ-อ้ะ, อ ไช๊ยะ ช้างเทะ ดี๊ ฌางคู โอ อ คู ล้อง

³³ ดาเว ไคล้ ดี๊-อ้ะ ไจ้ะเว๊, “น เมะ ลี้ ค้างฆ้าง ดี๊ เฆ้อ นอ, น ม เก ก ทอวีงทยุ้ เอะ เฆ้อ โปล้ ล้อ”

³⁴ แบเด้าะ, น เมะ ไท้ นึ ไท้ เว่ง พ้า, ดี๊ ไคล้ ดี๊ อะซาโลง น เมะ ไจ้ะ, ‘กจุ้แฆว้-เอ้อ, จ ม เทว๊ ล้าง จ ซ้ะ เก เอะ น เพล่, บี่ซุ้ ดี๊ จ เก เอะ น แพ่ อ เพล่ ไยะ เย้า บี่จะเล้ นอ, จ ม เก เอะ น เพล่ บี่นอ ปะ ล้อ’, อ นอ, น ม ดึ้ เกม๊า อาฮีโทเฟ อ ทเนฌ้าโล้ฌ้า นอ, ล้างกวางไฆวะ ลู่ง จ ฌ่าง

³⁵ ซาโด ดี๊ อาบียาทา โพล้งลื่งเท่ออคู ลแพ นอ, โอ ดี๊ แน้ พี่ นอ เย้า ล เมะ แบ-อ้า?, ทกุ้เม้ง พี่ น แน่ฌ๊า แบ-อ้ะ ลู่ง บลาง พ้า นอ, เกม๊า น โล้ เอะ ซาโด ดี๊ อาบียาทา, โพล้งลื่งเท่ออคู ลแพ นอ ซีงแฌ๊ เว๊

³⁶ แคว่เซ้อ, อ พู คี๊ง แฌ้ โอ พี่ นอ ปะ, เมะเว๊ ซาโด อ พู อาฮีมาอ้ะ ดี๊ โยนาทาง อ พู อาบียาทา, เกม๊า น ซื๊ง เจ่ทาง-อ้ะ เฌ๊ โล้ แบ แย้ ทกุ้ อ เม้ง พี่ น แน่ฌ๊า”

³⁷ ดาเว อ ซกุ้ ฮุ้ไช ไท้ นึฆ้างไท้ เว่ง พ้า, แบ พี่ ล โท้ แย๊ อะซาโลง ม เฌ๊ นึฆ้าง เยรูซเลง พ้า เมาะ