2​ซามูเอง 1 - Northern Pwo Karen Thai Bible

ดาเว ฌางล้างย้าล้าง เท่อ, ลู่ง ซาอู ดี๊ โยนาทาง อ ฌ่าง

¹ โอ ลู่ง ไค๊ ท่อง ซาอู ซี๊ง เย้า, พี่ ดาเว ลี้ ดึ้ซึ้ น้า โพล้ง อามาเละ เฌ๊ไท้ นอ, ดาเว โอไปว้ะ ลู่ง ซีล้ะ พ้า คี๊ง นี้ง

² ลู่ง มื่ง ซ๊า นี้ง ล นี้ง พ้า นอ, แคว่เซ้อ, โพล้ง แคว๊ โอ ล แฌ้ โอ ลู่ง ซาอู อ ทล่างโอซยอง พ้า เฌ๊, ซุ้ ไช๊ ช้าง ยะปวิ้ ดี๊ ฌางคู มูง โอ อ คู ล้อง, ท่อง อ เฌ๊ ท้อง ดาเว อ โอ นอ, ซย๊องล้าง อ ซ้ะ อ เมะ ท้องล้าง ฌางคู คู

³ ดาเว อางจ้ะ-อ้ะ ไจ้ะเว๊, “น โอ พี่จองเล้ เฌ๊”, อ เท่อ ไคล้ช๊า-อ้ะ ไจ้ะเว๊, “จ โอนี่ ลู่ง โพล้ง อีซลาเอง อ ทล่างโอซยอง พ้า เฌ๊”

⁴ ดาเว อางจ้ะ-อ้ะ ไจ้ะเว๊, “โล้ แย้ ล ปี๊ ทแม้ อ ซ้ะ บี่จะเล้”, อ เท่อ ไคล้ช๊า-อ้ะ ไจ้ะเว๊, “ซึ้พู ซีง ไจคุ้ซูงแดไฆวะ ทดึ้ซึ้ ดี๊ ล้างเทะเค้า ซี๊ง แอ ฌ้อง, ซาอู ดี๊ อ พูแคว๊ โยนาทาง ซี๊ง ปะ”

⁵ ดาเว อางจ้ะ โพล้ง น่างบางซ้ะบาง แคว๊, พี่ อ เฌ๊ โล้ เอะ อ เท่อ นอ ไจ้ะเว๊, “น ซีงแฌ๊ ซี บี่จะเล้, ซาอู ดี๊ อ พูแคว๊ โยนาทาง ซี๊ง เย้า

⁶ โพล้ง น่างบางซ้ะบาง แคว๊, พี่ อ เฌ๊ โล้ เอะ อ เท่อ ล แฌ้ นอ ไจ้ะเว๊, “แบ พี่ อ โท้ ลู่ง จ เฌ๊ ทลู่ง กีโบอา คู, จ แด ซาอู ชี๊เทิง ดุ้ไน้ ซ้ะ ดี๊ อ พ้าง, ดี๊ แคว่เซ้อ, เลาะ ดึ้ซึ้ ดี๊ ซึ้พู เทา กซี เฌ๊ฆ้าง เบ้า-อ้ะ

⁷ ซาอู แกยฆ้าง อ ซ้ะ แด แย้, ฌ้อง กุ้ แย้, ดี๊ จ โล้ เอะ-อ้ะ กแช่-เอ้อ จ โอ พี่ อี้ง”

⁸ อ เว๊ อางจ้ะ แย้ ไจ้ะเว๊, “น เก โพล้ง เล้”, แย้ จ ไคล้ช๊า-อ้ะ, ‘จ เก โพล้ง อา‌มา‌เละ’

⁹ อ เว๊ โล้ เอะ แย้ ไจ้ะเว๊, ‘เฌ๊ ชี๊เทิง จ ฌ๊างไท้ะ ดี๊ แม้ซี๊ง แย้ อี้ง, เมะเว๊ ทแช๊ แย้ น้ะ เบ้า จ ม ซี๊ง เย้า, แบเด้าะ จ ทม๊า ล ล้างแม่ ได้ะ แบ’

¹⁰ ยี๊แด จ ลี้ฆ้าง ชี๊เทิง อ ฌ๊างไท้ะ, ดี๊ จ แม้ซี๊ง-อ้ะ เฆาะ, เมะเว๊ จ ซีงแฌ๊ ท่อง อ เว๊ ล้างเทะเค้า ฌ้อง นอ, ม โอม๊า เด้าะ ล ซี ล้าแบ, ท่องอช๊าง, จ เบ้าะล้างนี่ อ คูคล้าง ลู่ง อ คู ล้อง, ดี๊ อ ไท๊ ลู่ง อ จูง เด้ง ล้อง ฌ้อง เฌ๊ โชะ เอะ จ เซงคู อี้ง”

¹¹ ฌ้อง ดาเว ซย๊างยะ อ ไช๊ อ ช้าง, ดี๊ โพล้ง กุ้ แฌ้ พี่ โอ ดี๊-อ้ะ ลแพ นอ, แม้ เว๊ บี่นอ ปะ

¹² ฌ้อง อ ซื๊งเว๊ มองแบ เว๊, ฌาง, ดี๊ โก้ง อาง เท่อ ท้อง มื่งแฌล้าง โค๊, ลู่ง ซาอู ดี๊ อ พูแคว๊ โยนาทาง, ดี๊ กแช่ยาเว อ พู อ ลี้ง, ดี๊โพล้ง อีซลาเอง อคลี๊งอแซ นอ อ ฌ่าง, เป๊งนี่ อ ซื๊งเว๊ ล้างเทะเค้า ซี๊ง, ดี๊ น้ะ อ กย้อง นอ ล้อ

¹³ ดี๊ ดาเว อางจ้ะ โพล้ง น่างบางซ้ะบาง, พี่ อ เฌ๊ โล้ เอะ อ เท่อ ล แฌ้ นอ ไจ้ะเว๊, “น โอ พี่จองเล้ เฌ๊”, อ เท่อ ไคล้ช๊า-อ้ะ ไจ้ะเว๊, “แย้ จ เก โพล้ง อามาเละ, เมะเว๊ โพล้ง ล ชื้อ แด อ พู

¹⁴ ดาเว อางจ้ะ-อ้ะ ไจ้ะเว๊, “แบทเล้, น ล ยางแบซ้ะเม แบ, พี่ น เยาฆ้าง น จูง แม้ซี๊ง โพล้ง, พี่ กแช่ยาเว เท้าไน เว๊ นอ”

¹⁵ ฌ้อง ดาเว กุ้นี่ โพล้ง ล แฌ้ ลู่ง โพล้ง น่างบางซ้ะบาง อ แกล้ พ้า นอ โล้ เอะ เว๊, “ลี้ แม้ซี๊ง-อ้ะ”, ฌ้อง โพล้ง แม้ซี๊ง กแคว๊ ล แฌ้ นอ เฆาะ

¹⁶ ดาเว โล้ เอะ กแคว๊ ล แฌ้ นอ ไจ้ะเว๊, “ทไพ้ะทแม แบฆ้ะ ดี๊ ทซวีง อ กย้อง นอ, ล้างเทะแบก้ะ แน้, เมะเว๊ น กแช่ อ นุ้ แด เว๊ ล้อ, ไจ้ะ ล้าง แบ ไท้ น กแช่ พี่ น ไจ้ะ, ‘แย้ จ แม้ซี๊ง แบ โพล้ง พี่ กแช่ยาเว เท้าไน เว๊ นอ’, ”

¹⁷ ดาเว นอ ฌางล้างย้าล้าง เท่อ, บี่ซุ้ ดี๊ ทไคล้ ฌางล้างย้าล้าง เท่อ บี่อี้ง, ลู่ง ซาอู ดี๊ อ พูแคว๊ โยนาทาง อ ฌ่าง

¹⁸ ดาเว ไจ้ะเว๊, “เกิ้ง ม ซอง แท๊ คลีง บ้อง เอะ โพล้ง ยูดา อคลี๊งอแซ อี้ง, แคว่เซ้อ, ทไคล้ อี้ง นอ, แบ ทกวิ้ ล้าง-อ้ะ ลู่ง ไละ ยาชา พ้า ไจ้ะเว๊ บี่อี้ง

¹⁹ “โอ้ อีซลาเอง-เอ้อ, น ฆี๊ง น แล้ แบ ทแม้ซี๊ง-อ้ะ เย้า, ลู่ง น ซื๊ง ทล่าง พ้ะโท๊ คู นอ ดี๊ โพล้งดึ้ซึ้เท่อพู ลู่ง อ ซ้ะ น้า, ล้างเทะเค้า ซี บี่จะเล้

²⁰ โล้ แบ ท ล ไฌ่ อี้ง, ลู่ง เว่ง กะทา พ้า ล ฌี้ โล้ ล้าง ท ล ไฌ่ อี้ง, ลู่ง เว่ง อะเคโลง อ เกล้มื่ง พ้า ล ฌี้ ไค๊ไก้ะ โพล้ง ฟีลีเตีย อ พูมืง ซีง, ม เซิงฆวี๊งซ้ะโย้ ไค๊ไก้ะ โพล้ง พี่ ล นี่ แม้ ทไฌ่ ไร้ะไฆวะ ไพ้ะ แบ อ พูมืง ซีง นอ, ม เฌ้เทิงลี่งเฌ้เทิงไท้

²¹ ทลู่ง กีโบอา-เอ้อ เกม๊า ปช้าง ที๊ง ฌี้, ทช้า ฌี้ โอ น ล้อง ล ฌี้ ดี๊ ลู่ง ไชะ พ้า, พี่ โอ กู้งๆ, ล๊าๆ, ดี๊ ทดุ้ทแล ทซูงทแซ นอ ล ฌี้ เมะเว๊ พี่ นอ นอ, โพล้ง อ เซิง น้า ซ้ะ น้า อ นางปด้าง นอ, แบอ้า เย้า ซาอู อ นางปด้าง นอ, ล แบ ทเท้าไน-อ้ะ ดี๊ ทซู น่าง ชุ้ ล้าแบ

²² โยนาทาง อ คลีง บ้อง, ล แกย ไท้ อ ซ้ะ, ลู่ง โพล้ง พี่ อ แบ ทแม้ซี๊ง-อ้ะ ลแพ นอ, อ ซวีง แกล้ แบ ดี๊ ลู่ง โพล้งดึ้ซึ้เท่อพู ลู่ง อ ซ้ะ น้า ลแพ นอ, อ ซู แกล้ แบ ดี๊ ซาอู อ น้ะ นอ, ล นี่ เฌ๊ไท้ โอโปล้ปลิ้ แบ

²³ “ซาอู ดี๊ โยนาทาง-เอ้อ, น เก โพล้ง ล้างเอ ดี๊ ล้าง ซ้ะมึ ม ม๊า ฌี้, ม ซี๊ง ฌี้, คี๊ง แฌ้ อี้ง นอ, ล ไจพ้ะ โละอซ้ะ แบ คี๊ง แฌ้ อี้ง นอ, เพลเละ ไละ พ้ะดู ได้ะ คี๊ง แฌ้ อี้ง นอ, ชองเละ คี๊ยื่ง ได้ะ

²⁴ โพล้ง อีซลาเอง อ พูมืง-เอ้อ, เกม๊า น ซื๊ง ฌาง ลู่ง ซาอู อ ฌ่าง อ เว๊ แม้ฆี๊งแม้แล้ แน้ เมาน่าง, ดี๊ ตไก้ยะ โฌ้ จีลี อ เว๊ แม้ฆี๊งแม้แล้ ฆ้า โฆ่ ดี๊ ท๊อง, ลู่ง น ทไต้ ซ้ะ นอ อ ล้อง

²⁵ โพล้งดึ้ซึ้เท่อพู ลู่ง อ ซ้ะ น้า นอ, ล้างเทะเค้าไฆวะ เย้า ลู่ง ทดึ้ซึ้ พ้า โยนาทาง ซีง, แบ ทแม้ซี๊ง-อ้ะ, โอ ลู่ง น ทล่าง พ้ะโท๊ คู

²⁶ โยนาทาง จ วี่ โจ้-เอ้อ, ทน้ะเซิงน้ะซ้ะ แบ แย้ ลู่ง น ฌ่าง แน้ น เก เท่อ พี่ อ แม้ มึ ทาง จ ซ้ะ เต้ๆ น ทเอ ลู่ง น เอ แบ แย้ นอ, ล้างลู่ ล้างล้ะ ดูเละ กมืง อ ทเอ ได้ะ

²⁷ โพล้งดึ้ซึ้เท่อพู ลู่ง อ ซ้ะ น้า, ล้างเทะเค้า ซี บี่จะเล้ ดี๊ ทฆ้าทโฆ่ นางดึ้นางชาง, เซงทื่งเฌ๊ฌ้องไฆวะ นอ ล้อ”