2​กจุ้แฆว้ 6 - Northern Pwo Karen Thai Bible

ทล้ะทเล่, แกว้ ทางโพ๊ ที๊ง คู

¹ กเย่ โมไคล้คิ้กแช่แยว้ ลแพ นอ, ไคล้ ดี๊ เอลีชา ไจ้ะเว๊, “แคว่เซ้อ, ทล่าง พี่ เฆ้อ ซีงลแพ ก โอ-อ้ะ ดี๊ แน้ นอ ปี๊ น้ะ

² ม๊า ก ลี้ ลู่ง ที๊ง โจเด้ง กล้อง, เกม๊า ล แฌ้ๆ, นอ, แม้นี่ เซง แฌ้ กึ้ๆ, เฌ๊ แม้ทางนี่ ก ล่างโอล่างช๊อง พี่ นอ”, ดี๊ เอลีชา ไคล้ช๊า-อ้ะ ไจ้ะเว๊, “ลี้ แดเทา”

³ ฌ้อง โพล้ง ล แฌ้ ไจ้ะเว๊, “เกม๊า น ลี้ ดี๊ น เพล่ ปะ”, เอลีชา ไจ้ะเว๊, “จ ม ลี้”

⁴ อ เว๊ ลี้ ดี๊ โพล้ง ลแพ นอ, ดี๊ ท่อง อ เฌ๊ ท้อง ที๊ง โจเด้ง กล้อง นอ, อ ซื๊งเว๊ เคาล้าง เซง

⁵ โอ ล แฌ้ พี่ อ เคา เซง แค๊ นอ, อ แกว้ ล้างเทะ ลู่ง ที๊ง แกล้, ดี๊ กุ้ทาง เท่อ ไจ้ะเว๊, “ล กลุ้ ล้า แบ, จ เซงคู-เอ้อ, แกว้ นอ จ โชะนี่ ชู๊ โพล้ง อ เท่อ”

⁶ ฌ้อง โพล้ง กแช่แยว้ เว๊ อางจ้ะ-อ้ะ ไจ้ะเว๊, “แกว้ นอ ล้างเทะ พี่จองเล้?”, ท่อง อ เว๊ ต้องล้าง โล้ เอะ เว๊ ฌ้อง นอ, อ เว๊ กล้างนี่ เซง ล กึ้ ไควะล้าง เว๊ พี่ นอ, ดึ้ เกม๊า แกว้ ท้ะ นอ ทางโพ๊ ที๊ง คู

⁷ ดี๊ เอลีชา โล้ เอะ-อ้ะ ไจ้ะเว๊, “พองนี่ โชะทาง-อ้ะ เซ้อ”, อ เว๊ เยาล้าง อ จูง ลี้ พองนี่ โชะทาง เว๊

โพล้ง ซีเรีย ล น้า เอลีชา แบ

⁸ กจุ้แฆว้ ค่าง ซีเรีย ดึ้ซึ้ โละอซ้ะ ดี๊ โพล้ง อีซลาเอง, อ เว๊ ก้างแก้ โละอซ้ะ ดี๊ อ กดูกแซย่ ไจ้ะเว๊, “ก ม ช๊างล้าง ก ทล่างโอซยอง พี่ นอ

⁹ แบเด้าะ โพล้ง กแช่แยว้ เว๊, โซ๊ง ทโล้โค เอะ กจุ้แฆว้ ค่าง อีซลาเอง ไจ้ะเว๊, ‘ม๊า น ปโล่ล้าง ซ้ะ, เฌ๊ แพ๊ แบ เกล้ นอ ล ฌี้, เมะเว๊ โพล้ง ซีเรีย ลี้ล้าง พี่ นอ’, ”

¹⁰ ดี๊ กจุ้แฆว้ ค่าง อีซลาเอง เจ่ โพล้ง เกม๊า ลี้ ลู่ง ทล่าง, พี่ โพล้ง กแช่แยว้ เว๊ โล้ เอะ-อ้ะ นอ, อ เว๊ นี่ โล้ แบ เอะ กจุ้แฆว้ บี่อี้ง ล้อ, ฌ้อง กจุ้แฆว้ ปโล่ล้าง เว้ อ ซ้ะ พี่ นอ ซี, ล เมะ ล พ๊า คี๊ง พ๊า แบ

¹¹ กจุ้แฆว้ ค่าง ซีเรีย อ เซิงทางซ้ะไฌ๊ ลู่ง ท ล ไฌ่ อี้ง อ กย้อง, อ เว๊ กุ้นี่ อ กดูกแซย่ เฌ๊ฌูง-อ้ะ ไจ้ะเว๊, “น ซื๊ง ล โล้ เอะ แย้ แบ-อ้า?, โพล้ง พี่ ล แฌ้ เล้ ลู่ง ก แกล้, พี่ อ โอ ล แพ้ ฆ่าง ดี๊ กจุ้แฆว้ ค่าง อีซลาเอง”

¹² อ กดูกแซย่ ล แฌ้ โล้ เอะ-อ้ะ ไจ้ะเว๊, “จ เซงคู กจุ้แฆว้-เอ้อ, โพล้ง ล โอ น่าง แฌ้ แบ, แบเด้าะ เอลีชา โมไคล้คิ้กแช่แยว้, พี่ อ โอ ค่าง อีซลาเอง พ้า นอ, โล้ ทไคล้ พี่ น ไคล้-อ้ะ ลู่ง น ล่าง มี๊ง พ้า นอ, เอะ กจุ้แฆว้ ค่าง อีซลาเอง”

¹³ กจุ้แฆว้ ค่าง ซีเรีย ไจ้ะเว๊, “ลี้ อางฆื๊ง แคว่ แฆว่-อ้ะ, เมะ อ โอ พี่จองเล้, บี่ซุ้ จ ม เจ่ทาง โพล้ง ลี้ พองนี่-อ้ะ”, โพล้ง โอ โล้ เอะ-อ้ะ ไจ้ะเว๊, “แคว่เซ้อ, อเว๊ โอ ลู่ง โดทาง พ้า”

¹⁴ อ เว๊ โซ๊ง กซี, เลาะ ดึ้ซึ้ เท่อ, ดี๊ ซึ้พูมู๊ง พ้ะดู ลี้ พี่ นอ, อ ซื๊งเว๊ ลี้ ลู่ง มแน้โค๊ ดี๊ พ้องวะทะ เว่ง นอ

¹⁵ พี่ โพล้ง กแช่แยว้ เว๊ อ เพล่ นางทาง อ ซ้ะ ลู่ง โฌ้ ล คึ, ดี๊ ไจทาง นอ, แคว่เซ้อ, ซึ้พูมู๊ง ดี๊ กซี ดี๊ เลาะ ดึ้ซึ้ เท่อ พ้องวะ เว่ง, ดี๊ อ เพล่ โล้ เอะ-อ้ะ ไจ้ะเว๊, “ล กลุ้ ล้าแบ จ เซงคู-เอ้อ, ก ม แม้ก้ะ บี่จะเล้?”

¹⁶ อ เท่อ ไคล้ช๊า-อ้ะ ไจ้ะเว๊, “ซ้ะเม ล ฌี้, เมะเว๊ เฆ้อ ล แพ้ อี้ง ก โอ แอเละ อ ซื๊งเว๊ ล แพ้ นอ ได้ะ”

¹⁷ ฌ้อง เอลีชา ชูแพ อางท่าง เท่อ ไจ้ะเว๊, “กแช่ยาเว-เอ้อ, แม้ พ้างทาง เอะ อ เมะ, บี่ซุ้ อ เว๊ ม แด เท่อ”, ดี๊ กแช่ยาเว แม้ พ้างทาง น่างบางซ้ะบาง แคว๊ ล แฌ้ นอ อ เมะ, ฌ้อง อ เว๊ แคว่ เท่อ แด เว๊ ลู่ง ทลู่ง คู นอ กซี โอ ฆวี้ทะ, ดี๊ เลาะ ดึ้ซึ้ เท่อ พี่ เก มี นอ โอ วะ เอลีชา อ ฆ้อง

¹⁸ ดี๊ ท่อง โพล้ง ซีเรีย เฌ๊ล้าง ดึ้ โละซ้ะ ดี๊-อ้ะ นอ, เอลีชา ชูแพ อางท่าง เท่อ ดี๊ กแช่ยาเว ไจ้ะเว๊, “เกม๊า โพล้ง ลแพ อี้ง อ เมะ โบลไฆวะ”, กแช่แยว้ เกม๊า อ ซื๊งเว๊ อ เมะ โบลไฆวะ, บี่ซุ้ ดี๊ เอลีชา อ ทชูแพ อางท่าง เท่อ นอ ล้อ

¹⁹ ดี๊ เอลีชา โล้ เอะ โพล้ง ลแพ นอ ไจ้ะเว๊, “ล เมะ เกล้ ล บ้อง อี้ง แบ, ดี๊ ล เมะ เว่ง อี้ง แบ, เฌ๊ โพะ จ ไค๊, จ ม ลี้ฌ้า แน้ ลู่ง โพล้ง พี่ น อางฆื๊ง-อ้ะ ล แฌ้ นอ อ โอ”, ดี๊ ลี้ฌ้า เว๊ ลู่ง เว่ง ซมาเรีย พ้า

²⁰ โอ ลู่ง ไค๊ ท่อง นึฆ้าง เว่ง ซมาเรีย พ้า นอ, เอลีชา ไจ้ะเว๊, “จ กแช่ยาเว-เอ้อ, แม้ พ้างทาง โพล้ง ลแพ อี้ง อ เมะ, บี่ซุ้ อ เว๊ ม แด เท่อ ซี”, กแช่ยาเว แม้ พ้างทาง อ ซื๊งเว๊ อ เมะ ดี๊ อ ซื๊ง นอ แด ไท้ เท่อ, ดี๊ แคว่เซ้อ, อ ซื๊ง เฌ๊ โอ ลู่ง เว่ง ซมาเรีย พ้า

²¹ ดี๊ ท่อง กจุ้แฆว้ ค่าง อีซลาเอง แด อ ซื๊งเว๊ นอ, อ เว๊ ไคล้ ดี๊ เอลีชา ไจ้ะเว๊, “จ แพ่-เอ้อ, น ม เกม๊า จ แม้ซี๊ง-อ้ะ โบ่?, น ม เกม๊า จ แม้ซี๊ง-อ้ะ โบ่?”

²² เอลีชา ไคล้ช๊า-อ้ะ ไจ้ะเว๊, “เกม๊า น แม้ซี๊ง-อ้ะ ล ฌี้, น ล พองนี่ โพล้ง ลแพ อี้ง ดี๊ น้ะ ดี๊ คลีง น่าง เม้ง แบ, ฌ้อง น ม แม้ซี๊ง อ ซื๊งเว๊ โบ่?, ม๊า น แม้นี่ ทอาง ดี๊ ที๊ง เกม๊า อ อาง อ โอ้ เว๊ ฌ้อง ทูแพล่-อ้ะ, เกม๊า อ ไท้ฌูง ไท้ อ เซงคู แดเทา”

²³ กจุ้แฆว้ แม้ ทลื่งอาง ลื่งโอ้ พ้ะดู เอะ เว๊, ดี๊ ท่อง อ ซื๊งเว๊ อาง แบ โอ้ แบ เท่อ ฌ้อง นอ, ทูแพล่ไท้ เว๊, ดี๊ อ ซื๊งเว๊ ไท้ฌูง แบ ไท้ อ เซงคู, ดี๊ โพล้ง ซีเรีย ล เฌ๊ ดึ้ซรอง เท่อ ลู่ง ค่าง อีซลาเอง พ้า น่าง พ๊า ล้าแบ ล้อ

เบงฮาดะ พ้องวะ เว่ง ซมาเรีย

²⁴ โอ ลู่ง ไค๊ เบงฮาดะ กจุ้แฆว้ ค่าง ซีเรีย, อางกีซยองนี่ อ ซึ้พูมู๊ง เลาพะ นอ, ฌ้อง ลี้ทาง พ้องวะ เว่ง ซมาเรีย

²⁵ ทซ้ะวี่งล้างดุ้ พ้ะดู กึทาง ลู่ง เว่ง ซมาเรีย พ้า, พี่ อ ซื๊งเว๊ พ้องวะทะ เว่ง อ แค๊ นอ, ท่อง เว๊ แลว้ อ คู ล โพลง นอ, โพล้ง อางแช๊ โละอซ้ะ เก จี้ โฆะ ชี๊ง เชเค่ง ฆูง ดีง ล คึ เล๊ง นอ, อางแช๊ เว๊ เก จี้ เย่ เชเคง

²⁶ พี่ ล พ๊า แย๊ กจุ้แฆว้ ค่าง อีซลาเอง ลี้ แพ๊ฆ้าง ลู่ง กางแป คู นอ, กมืง โอ ล แฌ้ กุ้จู้-อ้ะ ไจ้ะเว๊, “จ เซงคู กจุ้แฆว้-เอ้อ, แม้ช้า ไช้ะ”

²⁷ อ เว๊ ไจ้ะเว๊, “กแช่ยาเว เมะ ล แม้ ช้า แน้ แบ นอ, แย้ จ ม แม้นี่ ทแม้ช้า พี่จองเล้?, เกม๊า แน้, แม้นี่ ลู่ง ทล่าง เพา บืง พ้า-อ้า?, ลู่ง ทล่าง ไย่นี่ ซไบ้ะ แซ ที๊ง พ้า-อ้า?”

²⁸ แบเด้าะ กจุ้แฆว้ อางจ้ะ กมืง นอ ไจ้ะเว๊, “น แบ ทเม้งเล้?”, อ เท่อ ไคล้ช๊า-อ้ะ ไจ้ะเว๊, “กมืง ล แฌ้ อี้ง โล้ เอะ แย้ ไจ้ะเว๊, ‘แม้นี่ น พู เฌ๊ โชะ เกม๊า ก อาง ล นี้ง แย๊ อี้ง, ดี๊ ลู่ง โฌ้ ล นี้ง นอ ก ม อาง จ พู เด้าะ’

²⁹ ก เว๊ ก อางฆวี่ง จ พู ฌ้อง ก อาง-อ้ะ ดี๊ ทพ้าง โฌ้โค๊ จ ไคล้ ดี๊-อ้ะ จ ไจ้ะ, ‘เฌ๊โชะ น พู ก ม อาง-อ้ะ, แบเด้าะ อ เว๊ อางกีซูง ไฆวะ อ พู เฆาะ’, ”

³⁰ ท่อง กจุ้แฆว้ แน่ฌ๊า แบ กมืง อ ทไคล้ บี่นอ, อ เว๊ ซย๊างยะ ล้าง อ ไช๊แค่, (อ เว๊ ไจ ลู่ง กางแป คู), โพล้งเฌงพูฆ๊างพู แด เว๊ อ ซุ้ ตไก้ยะ กเซ้าะ โอ เท้งเน้ง

³¹ ดี๊ กจุ้แฆว้ นอ ไจ้ะเว๊, “ชาฟะ อ พู เอลีชา อ คูฆีง เมะ โอ อ จื๊งแป คู ล นี้ง แย๊ อี้ง ได้ะ นอ, เกม๊า กแช่แยว้ แม้ เตา แม้ แต๊ แย้ ดี๊ น้ะเละ อ นอ ได้ะ”

³² แบเด้าะ เอลีชา ชี๊น้าง โอ ลู่ง อ เด้า พ้า, ดี๊ โพล้งเม้งโพล้งแซย่ ชี๊น้าง โอ ดี๊-อ้ะ ปะ, กจุ้แฆว้ เจ่ทาง โพล้ง ลู่ง กจุ้แฆว้ อ เด้า พ้า, แบเด้าะ พี่ โพล้งไคล้เดิงเท่อ เฌ๊ ล คลึ้ ท้อง ได้ะ แบ นอ, เอลีชา ไคล้ ดี๊ โพล้งเม้งโพล้งแซย่ ลแพ นอ ไจ้ะเว๊, “น ซื๊ง แด ชี่-อ้า?, โพล้ง แม้ซี๊ง เท่อ ล แฌ้ อี้ง เจ่ทาง โพล้ง เฌ๊ แม้นี่ จ คูฆีง, แคว่เซ้อ, ท่อง โพล้งไคล้เดิงเท่อ เฌ๊ ท้อง นอ, ม๊า กาไบ้ะทะ เกล้ ดี๊ เจ้ทะ-อ้ะ ไชะไนะ, โอ นุ้ทะ-อ้ะ, อ เซงคู อ คาง เฌ๊ เซ๊ โพะ อ เว๊ อ ไค๊ ล เมะ แบ-อ้า?”

³³ พี่ เอลีชา ไคล้ ดี๊ อ ซื๊งเว๊ซีง ได้ะ นอ, แคว่เซ้อ, กจุ้แฆว้ เฌ๊ล้างฌูง-อ้ะ ดี๊ ไจ้ะเว๊, “ทอ้าทซ๊าง อี้ง เฌ๊นี่ ดี๊ กแช่ยาเว, จ ม โอคุ้แท๊ กแช่ยาเว ได้ะ แม้ ทเม้งเล้?”