1ซามูเอง 3 - Northern Pwo Karen Thai Bible

กแช่แยว้ กุ้ ซามูเอง

¹ พืงแซ แคว๊ ซามูเอง แม้ เอะ กแช่ยาเว อ เท่อ, โอ ลู่ง เอลี อ เมะแซ พ้า คระ, ล ว๊าง แย๊ นอ กแช่ยาเว อ ทไคล้ เฌ๊ แซย้ มะ, ทแดเว้ โอ ล เอะ ดึ้ แบ

² ล พ๊า แย๊ นอ เอลี มี๊งน้าง ลู่ง อ ล่าง มี๊ง คู, (อ เมะ ไค้ะ แคว่ เท่อ ล เอะ แด ล้าแบ)

³ กแช่แยว้ อ มีโด้ง ล ล้างไพะ ได้ะ แบ, ซามูเอง นอ มี๊ง ลู่ง กแช่ยาเวอเว่งฮ๊าง พ้า, ลู่ง ทล่าง พี่ กแช่แยว้ อ ไฮะ โอ พี่ นอ

⁴ กแช่ยาเว กุ้ ซามูเอง ดี๊ ซามูเอง ไคล้ช๊า เว๊, “จ โอ พี่ อี้ง”

⁵ ฌ้อง ลี้ ซยู๊ฆ้าง อางจ้ะ เอลี ไจ้ะเว๊, “น กุ้ แย้-อ้า?, จ โอ พี่ อี้ง”, แบเด้าะ เอลี ไคล้ช๊า-อ้ะ ไจ้ะเว๊, “จ ล กุ้ แน้ น่าง พ๊า แบ, ไท้ มี๊ง แดเทา”, อ เว๊ ไท้ มี๊ง ไท้ เด้าะ

⁶ กแช่ยาเว กุ้ทาง เท่อ เด้าะ ไจ้ะเว๊, “ซามูเอง-เอ้อ”, ดี๊ ซามูเอง เฌ้เทิงทาง ลี้ฌูง เอลี ไจ้ะเว๊, “จ โอ พี่ อี้ง, แน้ น กุ้ แย้”, แบเด้าะ เอลี ไคล้ช๊า-อ้ะ ไจ้ะเว๊, “พู-เอ้อ, จ ล กุ้ แน้ น่าง พ๊า แบ ไท้ มี๊ง ไท้ ไวะ”

⁷ ซามูเอง ล ซีงแฌ๊ กแช่ยาเว น่าง พ๊าได้ะ แบ, ดี๊ กแช่ยาเว ล เนโพลทาง อ ทลื่งทไคล้ ดี๊-อ้ะ น่าง พ๊าได้ะ แบ

⁸ ดี๊ กแช่ยาเว กุ้ ซามูเอง ซ๊า พ๊า ล พ๊า, ซามูเอง เฌ้เทิงทาง ลี้ฌูง เอลี ไจ้ะเว๊, “จ โอ พี่ อี้ง, แน้ น กุ้ แย้”, ฌ้อง เอลี ซีงแฌ๊ เว๊ กแช่ยาเว กุ้ พืงแซ นอ

⁹ อ กย้อง บี่นอ, เอลี ไคล้ ดี๊ ซามูเอง ไจ้ะเว๊, “ไท้ มี๊ง แดเทา, อ เว๊ เมะ กุ้ แน้ นอ, เกม๊า น ไคล้ช๊า-อ้ะ, ‘กแช่ยาเว-เอ้อ, ม๊า น ไคล้ แดเทา, เมะเว๊ น เพล่ โอคุ้ ช๊องแน แน้ ได้ะ’ ”, ฌ้อง ซามูเอง ไท้ มี๊ง ไท้ ลู่ง อ ล่างมี๊ง ไวะ

¹⁰ ดี๊ กแช่ยาเว เฌ๊ ชี๊เทิง กุ้ เท่อ บี่ กุ้ พ๊า ๆ, นอ, ไจ้ะเว๊, “ซามูเอง, ซามูเอง-เอ้อ”, ดี๊ ซามูเอง กุ้ ช๊า-อ้ะ ไจ้ะเว๊, “ม๊า น ไคล้ เท่อ แดเทา, น เพล่ โอ คุ้ช๊องแน แน้ ได้ะ”

¹¹ ฌ้อง กแช่ยาเว ไคล้ ดี๊ ซามูเอง ไจ้ะเว๊, “แคว่เซ้อ, จ ม แม้ เท่อ ล เม้ง ลู่ง โพล้ง อีซลาเอง อ แกล้, โพล้ง กุ้ แฌ้ อ แน่ พี่ อ ฌ๊า เท่อ นอ, อ แน่ ม อ้าไทะ คี๊ง แพ้ เลา

¹² ล นี้ง แย๊ นอ จ ม แม้ เท่อ กุ้ อ เม้ง พี่ จ ไคล้-อ้ะ, แบฆ้ะ ดี๊ โพล้ง ลู่ง เอลี อชื้ออชะ นอ, ท่อง อ ชิ้เทา ล โค๊ ลู่ง อ ต้องคู, ท้อง ลู่ง อ ไค๊ ทึ นอ ล้อ

¹³ ทบี่นอ, จ โล้ ล้าง-อ้ะ จ ม ต้ะเซ๊ง อชื้ออชะ ล้างชู้, เป๊งนี่ ลู่ง ทเด้บ้ะ ดี๊ อ ทอ้าทซ๊าง พี่ อ ซีงแฌ๊ เว๊ เย้า, เมะเว๊ อ พู คี๊ง แฌ้ นอ เฌ๊ ไท้ โชะ ท ชูอ้า ลู่ง อ กแช่ อ ฌ่าง, แบเด้าะ อ เว๊ ล ไจ้ะ ล ไคล้ อ พู น่าง เม้ง แบ

¹⁴ เป๊งนี่ อ นอ, จ อืงล้าง เท่อ เอะ เอลี อชื้ออชะ บี่อี้ง, เอลี อชื้ออชะ อ ทเด้บ้ะ ดี๊ อ ทอ้าทซ๊าง นอ, ม แม้ล้างแม่ไฆวะ-อ้ะ, ดี๊ ทพูแฆ่ ลื่งทาง เท่อ ดี๊ ทเทว๊ นอ ล ซี แบ ล้างชู้”

¹⁵ ซามูเอง มี๊ง ท้อง ทพ้างทาง โฌ้ โค๊, ฌ้อง เฌ้เทิง ลี้ อุ้พ้ะทาง กแช่ยาเวอล่างโอ อ เกล้ ป้ะตู๊ง, ดี๊ ซามูเอง นอ ซ้ะเม เท่อ, อ เว๊ โล้ ทแดเว้ นอ เอะ เอลี ล เบิง แบ

¹⁶ เอลี กุ้นี่ ซามูเอง ไจ้ะเว๊, “จ พู ซามูเอง-เอ้อ”, อ เว๊ ไคล้ช๊า-อ้ะ ไจ้ะเว๊, “จ โอ พี่ อี้ง”

¹⁷ ดี๊ เอลี อางจ้ะ-อ้ะ ไจ้ะเว๊, “กแช่แยว้ โล้ เอะ แน้ ทเม้งเล้?, อ ไฌ่, อางกีไบ้ะ แย้ ล ฌี้, น เมะ อางกีไบ้ะ เท่อ ดี๊ แย้ พี่ เม้ง เล้ พี่ อ เว๊ โล้ เอะ แน้ นอ, เกม๊าเต้ กแช่แยว้ แม้ เอะ แน้ ดี๊ แอทาง ได้ะ”

¹⁸ ซามูเอง โล้ ท กุ้เม้ง เอะ เอลี, ล อางกีไบ้ะ เท่อ ดี๊-อ้ะ น่าง เม้ง แบ, เอลี ไจ้ะเว๊, “อ เว๊ เก กแช่ยาเว, เกม๊าเต้ แม้ เว๊ บี่ซุ้ ดี๊ อ แด เว๊ เก ทอฌี้ นอ แดเทา”

¹⁹ ดี๊ ซามูเอง นอ ดูทาง โท๊ทาง, กแช่ยาเว โอ ดี๊-อ้ะ, เกม๊า เว๊ อ ทไคล้ กุ้ อ ทีง นอ ไจทางไฆวะ โปล้ๆ, แบ

²⁰ ดี๊ โพล้ง อีซลาเอง เลาพะ, ล โค๊ ลู่ง ดาง ลี้ ท้อง ลู่ง เบเออเชบา นอ, ซีงแฌ๊ เว๊ ซามูเอง นี่แบ ทต๊างทาง-อ้ะ, ม๊า อ เก กแช่ยาเว อ โมไคล้คิ้กแช่แยว้

²¹ ดี๊ กแช่ยาเว เนโพลทาง อ ซ้ะ เด้าะ ลู่ง ชิ้โล พ้า, เมะเว๊ กแช่ยาเว เนโพลทาง อ ซ้ะ เอะ ซามูเอง, เก กแช่ยาเว อ ทลื่งทไคล้ ลู่ง ชิ้โล พ้า, ดี๊ ซามูเอง อ ทลื่งทไคล้ นอ, เฌ๊ ท้อง โพล้ง อีซลาเอง กุ้ แฌ้ นอ ล้อ