1ซามูเอง 23 - Northern Pwo Karen Thai Bible

ดาเว แม้ช้า เว่ง เคอีลา

¹ โพล้ง โล้ เอะ ดาเว ไจ้ะเว๊, “แคว่เซ้อ, โพล้ง ฟีลีเตีย ดึ้ซึ้ เว่ง เคอีลา, ดี๊ ตมละนี่ บืง ลู่ง ทล่าง เพา บืง พ้า”

² ดาเว ชูแพ เท่อ อางจ้ะ กแช่ยาเว ไจ้ะเว๊, “เกิ้ง พี่ จ ม ลี้ ดึ้ซึ้ โพล้ง ฟีลีเตีย ลแพ อี้ง ชี่-อ้า?”, ดี๊ กแช่ยาเว โล้ เอะ ดาเว ไจ้ะเว๊, “ลี้ ดึ้ซึ้ โพล้ง ฟีลีเตีย ลแพ นอ ดี๊ แม้ช้า เว่ง เคอีลา”

³ แบเด้าะ ดาเว อ ซกุ้ ลแพ นอ, โล้ เอะ-อ้ะ ไจ้ะเว๊, “แคว่เซ้อ, ก โอ ค่าง ยูดา พ้า อี้ง นอ ก ซ้ะเม เท่อ เย้า, ก เมะ ลี้ทาง ลู่ง เคอีลา, ดึ้ซึ้ โละซ้ะ ดี๊ โพล้ง ฟีลีเตีย อ ซึ้พูมู๊ง นอ, ก ม ซ้ะเม เท่อ น้ะ เด้าะ เมาะ ทเล้?”

⁴ ฌ้อง ดาเว อางจ้ะ กแช่ยาเว เด้าะ, ดี๊ กแช่ยาเว ไคล้ช๊า-อ้ะ ไจ้ะเว๊, “เฌ้เทิงทาง ลี้ล้าง ลู่ง เคอีลา พ้า แดเทา, เมะเว๊ จ ม อางกีล้าง โพล้ง ฟีลีเตีย ลู่ง น จูง พ้า”

⁵ ฌ้อง ดาเว ดี๊ อ ซกุ้ ล แพ นอ, ลี้ ลู่ง เคอีลา ดึ้ซึ้ โละซ้ะ ดี๊ โพล้ง ฟีลีเตีย, แม้นี่ก้ะ เว๊ อ ทพูแฆ่ น๊างมู๊ง, ดี๊ แม้เฌ๊ฌ้อง อ ซื๊งเว๊ แอฌ้อง, ทบี่นอ, ดาเว นี่ แม้พ้องพลิ้ โพล้ง เว่ง เคอีลา พ้า นอ ล้อ

⁶ พี่ อาฮีเมเละ อ พูแคว๊ อาบียาทา, ไจคุ้ซูง ลี้ฌูง ดาเว ลู่ง เว่ง เคอีลา พ้า นอ, อ เว๊ เฌ๊ล้าง โชะ ดี๊ ไช๊อเบงคูลท๊า นอ ปะ

⁷ โพล้ง ลี้ โล้ เอะ ซาอู ไจ้ะเว๊, ดาเว เฌ๊ นึฆ้าง เว่ง เคอีลา พ้า เย้า, ซาอู ไจ้ะเว๊, “กแช่แยว้ อางกีล้าง-อ้ะ ลู่ง จ จูง พ้า เย้า, เมะเว๊ พี่ อ เว๊ นึฆ้าง ลู่ง เว่ง พ้า, พี่ โอ ดี๊ ป้ะตู๊ง ดี๊ อ เจ้ นอ, อ เว๊ เด้าทะ อ กแช่ แด เว๊ ล้อ”

⁸ ดี๊ ซาอู กุ้นี่ อ ซึ้พู เลาพะ นอ ม๊า อ ลี้ ดึ้ซึ้ เท่อ, เกม๊า เว๊ อ ลี้ล้าง ลู่ง เคอีลา พ้า, บี่ซุ้ ม พ้องวะทะ ดาเว ดี๊ อ ซกุ้ ซีงลแพ นอ

⁹ ดาเว ซีงแฌ๊ เว๊ ซาอู ช๊องมอง ม แม้ ทอ้าทซ๊าง ดี๊-อ้ะ, อ เว๊ ไคล้ ดี๊ โพล้งลื่งเท่ออคู อาบียาทา ไจ้ะเว๊, “เฌ๊ โชะ ไช๊อเบงคูลท๊า นอ ลู่ง อี้ง แดเทา”

¹⁰ ดาเว ไจ้ะเว๊, “กแช่ยาเว โพล้ง อีซลาเอง อ กแช่แยว้-เอ้อ, น เพล่ แน่ฌ๊า เว๊ เต้ๆ, บี่อี้ง, ซาอู เฌา อางฆื๊งนี่ อ เกล้ พี่ ม เฌ๊ ลู่ง เคอีลา พ้า, บี่ซุ้ ม แม้เฌ๊ฌ้อง เว่ง อี้ง, เป๊งนี่ ลู่ง แย้ จ กย้อง นอ ล้อ

¹¹ โพล้งเฌงพูฆ๊างพู ลู่ง เคอีลา พ้า, ม อางกีล้าง แย้ ลู่ง อ จูง พ้า-อ้า?, ซาอู ม เฌ๊ล้าง ด้องซุ้ ทแซ้ แบ น เพล่ อ แน่ นอ-อ้า?, กแช่ยาเว โพล้ง อีซลาเอง อ กแช่แยว้-เอ้อ, เกม๊าเต้ น โล้ เอะ น เพล่ ไช้ะ”, ดี๊ กแช่ยาเว ไจ้ะเว๊, “อ เว๊ ม เฌ๊ล้าง”

¹² ฌ้อง ดาเว ไจ้ะเว๊, “โพล้งเฌงพูฆ๊างพู ลู่ง เคอีลา พ้า, ม อางกีล้าง แย้ ดี๊ จ ซกุ้ ซีงลแพ อี้ง, ลู่ง ซาอู อ จูง พ้า-อ้า?”, กแช่ยาเว ไจ้ะเว๊, “อ ซื๊งเว๊ ม อางกีล้าง แน้”

¹³ ฌ้อง ดาเว ดี๊ อ ซกุ้, เมาะ เว๊ ฆู๊ง แย้ แฌ้ นอ, เฌ้เทิงทาง ไจแดไฆวะ เคอีลา พ้า, อ ซื๊งเว๊ ลี้ ลู่ง ทล่าง พี่ ม ลี้ เว๊ ซี นอ, ท่อง โพล้ง ลี้ โล้ เอะ ซาอู ไจ้ะเว๊, ดาเว ไจแดไฆวะ เคอีลา พ้า เย้า นอ, ซาอู ล ลี้ช่อง เว๊ ล้าแบ

¹⁴ ดาเว โอ เว๊ แพะคูทเคแกล้, ลู่ง ทล่าง ทุ้กดื้ง ซ้ะ ลู่ง อเฌิ่งอค๊า พ้า นอ, ดี๊ โอ ลู่ง ทลู่ง แพ้ล้อง ลู่ง แพะคูทเคแกล้ ซิ้ พ้า, ดี๊ ซาอู อางฆื๊ง แคว่-อ้ะ กุ้ นี้ง, แบเด้าะ กแช่แยว้ ล อางกีล้าง-อ้ะ, ลู่ง ซาอู อ จูง พ้า แบ

¹⁵ ดี๊ ดาเว แด เว๊, ซาอู เฌ๊ อางฆื๊ง แม้ซี๊ง-อ้ะ, ดาเว โอ ลู่ง แพะคูทเคแกล้ ซิ้ ลู่ง ทล่าง โฮเระ

¹⁶ ดี๊ ซาอู อ พูแคว๊ โยนาทาง, เฌ้เทิงทาง ลี้ฌูง ดาเว ลู่ง โฮเระ, ดี๊ แม้ ชองทาง เว๊ อ ซ้ะ ลู่ง กแช่แยว้ อ ซุ้

¹⁷ โยนาทาง ไคล้ ดี๊-อ้ะ ไจ้ะเว๊, “ซ้ะเม ล ฌี้, จ แพ่ ซาอู อ จูง ม อางฆื๊ง แน้ ล แด แบ, แน้ น ม เก แบ กจุ้แฆว้ ลู่ง โพล้ง อีซลาเอง อ พ๊างคู, ดี๊ แย้ นอ จ เก โพล้ง พี่ อ เท่ง ดี๊ แน้ ล แฌ้, จ แพ่ ซาอู ซีงแฌ๊ ท ล ไฌ่ อี้ง ปะ ล้อ”

¹⁸ อ ซื๊งเว๊ คี๊ง แฌ้ นอ, แม้ ทเอิ้งล้าง โละซ้ะ ลู่ง กแช่ยาเว อ เมะแซ พ้า ดาเว นอ โอโท่ ลู่ง โฮเระ ได้ะ, โยนาทาง นอ ไท้ ลู่ง บลาง พ้า

¹⁹ โพล้ง ซิ้ ลี้ทางฌูง ซาอู ลู่ง กีเบอา พ้า, โล้ เอะ เว๊ บี่อี้ง, “ดาเว โอคุ้ซูง เท่อ ลู่ง ก แกล้ พ้า ลู่ง ทล่าง ทุ้กดื้ง ซ้ะ ลู่ง อเฌิ่งอค๊า ลู่ง โฮเระ, ทลู่ง ฮาคีลา คู, พี่ อ โอ เยซิ้โมง เช๊ละ นอ ล เมะ แบ-อ้า?

²⁰ จ กจุ้แฆว้-เอ้อ, พี่ พ๊า เล้ น เมะ แบซ้ะ ลี้ล้าง นอ, เกม๊า น ลี้ล้าง เซ้อ, เฆ้อ ลแพ อี้ง นอ, ก ม อางกีล้าง-อ้ะ ลู่ง กจุ้แฆว้ อ จูง พ้า”

²¹ ดี๊ ซาอู ไจ้ะเว๊, “เกม๊า กแช่ยาเว ชูฌี้ แบ น ซื๊ง, เมะเว๊ น ซื๊ง ย๊างซ้ะ แบ แย้

²² เกม๊า น ลี้ อางฆื๊ง แคว่-อ้ะ ท่อง ซีงแฌ๊ เต้ๆ, แบฆ้ะ ดี๊ อ เว๊ อล่าง โอ, โพล้ง แด-อ้ะ พี่ นอ ล แฌ้ๆ, ชี่-อ้า?, เมะเว๊ โพล้ง โล้ เอะ แย้ อ เว๊ นอ แซย๊ เต้ๆ

²³ เกม๊า แคว่ดุ้ ทล่าง โอคุ้ซูง เลาพะ, พี่ อ อางกีซูง ล้าง ซ้ะ พี่ นอ, ฌ้อง เฌ๊ไท้ฌูง แย้, โล้ เอะ แย้ ล้างที๊ง, ฌ้อง จ ม ลี้ ดี๊ น ซื๊ง, อ เว๊ เมะ โอ ค่าง พ้า ล ไฆ่ ล ว้าง นอ, จ ม อางฆื๊ง-อ้ะ ลู่ง โพล้ง ยูดา ล ดอง นอ อ ชื้อ แกล้ เลาพะ”

²⁴ อ ซื๊งเว๊ เฌ้เทิงทาง ลี้ ลู่ง ซิ้ ลี้ วี่ง ซาอู แบเด้าะ ดาเว ดี๊ อ ซกุ้ นอ, โอ ลู่ง แพะคูทเคแกล้ มาโอง พ้า, ลู่ง อาราบา พ้า ลู่ง เยซิ้โมง อ เช๊ละ

²⁵ ซาอู ดี๊ อ ซกุ้ ซีง อางฆื๊ง แคว่-อ้ะ, โพล้ง โล้ เอะ ดาเว, อ เว๊ ลี้ล้าง ลู่ง ไล๊ แกล้, ดี๊ โอ ลู่ง แพะคูทเคแกล้ มาโอง, ท่อง ซาอู ซีงแฌ๊ เว๊ นอ, ลี้ อางฆื๊ง ช่อง ดาเว, ลู่ง แพะคูทเคแกล้ มาโอง พ้า

²⁶ ซาอู ลี้ ลู่ง ทลู่ง อ แพ้ล้อง ลแพ้ แด, ดาเว ดี๊ อ ซกุ้ โอ ลู่ง, ทลู่ง คู ลแพ้ แด เด้าะ, ดาเว ปชื่ง ไจคุ้ซูงแดไฆวะ ซาอู, เมะเว๊ ซาอู ดี๊ อ ซกุ้ เฌ๊ฆ้าง พ้องวะ เท่อ, เบ้า ดี๊ ดาเว ดี๊ อ ซกุ้ ซีงลแพ นอ, บี่ซุ้ ม พองนี่ เว๊

²⁷ แบเด้าะ โพล้งไคล้เดิงเท่อ ล แฌ้, เฌ๊ โล้ เอะ ซาอู ไจ้ะเว๊, “เกม๊า ปชื่ง ไท้ๆ, เมะเว๊ โพล้ง ฟีลีเตีย เฌ๊ ตมละนี่ ที๊งล่างค่างพ้า”

²⁸ ซาอู ล ล้องช่อง ดาเว ล้าแบ, อ เว๊ เฌ๊ไท้ ลี้ ดึ้ซึ้ ดี๊ โพล้ง ฟีลีเตีย, โพล้ง กุ้ก้ะ ทล่าง ล จอง นอ อ เม้ง, ไล๊ พ้องไฆวะ ดี๊ ทอ้าทซ๊าง

²⁹ ดาเว ไจทางไฆวะ พี่ นอ, ลี้ทาง โอ เว๊ ลู่ง ทล่าง ทุ้กดื้ง ซ้ะ ลู่ง อเฌิ่งอค๊า, ลู่ง เองเกดี พ้า นอ ล้อ