1ซามูเอง 19 - Northern Pwo Karen Thai Bible

โยนาทาง อางท่าง เท่อ ลู่ง ดาเว อ ฌ่าง

¹ ซาอู โล้ เอะ อ พูแคว๊ โยนาทาง, ดี๊ กเย่ อ กดูกแซย่ ลแพ นอ เกม๊า แม้ซี๊งไฆวะ ดาเว, แบเด้าะ ซาอู อ พูแคว๊ โยนาทาง นอ เอ ดาเว เต้ๆ

² ดี๊ โยนาทาง โล้ เอะ ดาเว ไจ้ะเว๊, “จ แพ่ ซาอู เฌา อางฆื๊ง เกล้ พี่ ม แม้ซี๊ง แน้, ทบี่นอ, ลู่ง โฌ้ โฆะ ปโล่ล้าง น ซ้ะ เมะ ฌี้, โอ-อ้ะ ลู่ง ท กดื้งกทะ พ้า, อางกีซูงล้าง น ซ้ะ

³ ดี๊ จ ม ลี้ทาง ชี๊เทิง โอ ลู่ง จ แพ่ อ ฌ๊างไท้ะ, ลู่ง ญ้าง พ้า ทเคแกล้ พี่ น โอ-อ้ะ นอ, ดี๊ จ ม ไคล้ ดี๊ จ แพ่ แบฆ้ะ ดี๊ แน้, จ เมะ ซีงแฌ๊ เท่อ เม้ง ฌี้ๆ, นอ, จ ม โล้ เอะ แน้ ม๊า น ซีงแฌ๊”

⁴ โยนาทาง อางปฆ้า ดาเว, ลู่ง อ แพ่ ซาอู อ แน่ พ้า ไจ้ะเว๊, “เกม๊าเต้ กจุ้แฆว้ แม้ ทเด้บ้ะ แบ น เพล่ ดาเว ล ฌี้, เมะเว๊ ดาเว ล นี่ แม้ ทเด้บ้ะ แบ แน้ น่าง เม้ง แบ, ดี๊ อ ทแม้ ลู่ง น ฌ่าง นอ, ฌี้ ดู มะ ล้อ

⁵ อ ไฌ่ บี่อี้ง, อ เว๊ ญ่อง ซี๊งล้าง อ ซ้ะ, ดี๊ แม้ซี๊ง โพล้ง ฟีลีเตีย นอ, ดี๊ กแช่ยาเว ม๊า เว๊ อ น้า เท่อ ลู่ง อดูอโท๊, ลู่ง โพล้ง อีซลาเอง กุ้ แฌ้ อ ฌ่าง, น แด แบ-อ้ะ เย้า ดี๊ น เซิงฆวี๊งซ้ะมึ เท่อ, แบเด้าะ แบทเล้, น ม แม้ ทเด้บ้ะ แบ ทซวีง, พี่ อ ทไพ้ะทแม ล โอ แบ, ดี๊ ทแม้ซี๊ง ไฆวะ ดาเว, พี่ อ ไฌ่ อ กย้อง ล โอ น่าง เม้ง แบ?”

⁶ ซาอู คุ้ช๊องแน โยนาทาง อ ลู่ง, ดี๊ ซาอู อืงล้าง เท่อ บี่อี้ง, “กแช่ยาเว โอม๊า บี่จะเล้ นอ, ดาเว ม ล แบ ทแม้ซี๊ง ไฆวะ แบ”

⁷ ดี๊ โยนาทาง กุ้นี่ ดาเว, อางโล๊ไท้ เอะ เว๊, เกม๊า อ ซีงแฌ๊ ทไฌ่ เลาพะ ลแพ อี้ง, โยนาทาง ลี้ฌ้า ดาเว ลี้ฆ้าง โอ ซาอู, ดี๊ ดาเว โอ แบ ดี๊ ซาอู, บี่ซุ้ ดี๊ ลู่ง อ พ้องไฆวะ นอ ล้อ

มีคาง แม้ช้า ดาเว ไจไฆวะ ดี๊ ซาอูล

⁸ ทดึ้ทชาง โอทาง เด้าะ, ดาเว ไจทาง ลี้ ดึ้ซึ้ โพล้ง ฟีลีเตีย, ดี๊ แม้ซี๊ง กล้าง ซี๊ง เว๊ แอฌ้อง, อ ซื๊งเว๊ซีง ลแพ ซยู๊แดไฆวะ ดาเว

⁹ ลู่ง ไค๊ วีงแล้ ลู่ง อ อ้า, พี่ เฌ๊นี่ ดี๊ กแช่ยาเว นอ, เฌ๊ โอ ดี๊ ซาอู, พี่ อ เว๊ ชี๊น้าง โอ ลู่ง อ กแช่ อล่างโอ พ้า นอ, โชะ ดี๊ อ พ้าง ลู่ง อ จูง พ้า, ดี๊ ดาเว นอ เด้ง ทแน่ เอะ-อ้ะ

¹⁰ ดี๊ ซาอู เฌาโละ ซยุ้ อ พ้าง, ม เกม๊า แบชุ้เท่ง ดาเว บึ้เบง ดี๊ พี๊แด้ดอง, แบเด้าะ ดาเว ไจคุ้ซูงไฆวะ ซาอู, ซาอู ซยุ้ พ้าง แบชุ้ท๊าง พี๊แด้ดอง ล้อง, ดี๊ ดาเว ไจ พ้องไฆวะ เว๊ ล แน้ แย๊ นอ ล้อ

¹¹ ซาอู เจ่ทาง โพล้งไคล้เดิงเท่อ, เกม๊า เว๊ ลี้ ลู่ง ดาเว อ เด้า, บี่ซุ้ โอคุ้แคว่ฌูง ดุ้ เว๊, ดี๊ ม แม้ซี๊ง ไฆวะ เว๊ ลู่ง ทพ้างทาง โฌ้โค๊, แบเด้าะ ดาเว อ แม๊ น่าง มีคาง โล้ เอะ ดาเว ไจ้ะเว๊, “ล แน้ แย๊ อี้ง น เมะ ล ไจคุ้ซูงไฆวะ แบ นอ, ลู่ง โฌ้ โฆะ น ม แบ ทแม้ซี๊ง ล้อ”

¹² น่าง มีคาง เช้ล้าง ดาเว ลู่ง ป้อง พ้า, ดี๊ อ เว๊ ไจคุ้ซูง พ้องไฆวะ เว๊ ไวะ

¹³ น่าง มีคาง แม้นี่ ทเค่งทฌ้าง, เฌ๊ อางกีล้าง เว๊ ลู่ง ล่างมี๊ง คู, ดี๊ อางกีล้าง คูเคิง แมะ ชอง, ลู่ง อ คูไท้ะ, ฌ้อง คลึล้างไบ้ะ เว๊ ดี๊ แบย เฆาะ

¹⁴ ท่อง ซาอู เจ่ทาง โพล้งไคล้เดิงเท่อ, ลี้ พองนี่ ดาเว นอ, น่าง มีคาง ไคล้ช๊า-อ้ะ ไจ้ะเว๊, “ดาเว ล เก แบ”

¹⁵ ฌ้อง ซาอู โซ๊ง โพล้งไคล้เดิงเท่อ นอ, เกม๊า เว๊ อ ลี้ แคว่ ดาเว, โล้ เว๊ บี่อี้ง, “แม้นี่-อ้ะ ดี๊ อ ล่างมี๊ง, เกม๊า อ เฌ๊ฌูง แย้, บี่ซุ้ จ ม นี่ แม้ซี๊ง ไฆวะ-อ้ะ”

¹⁶ ท่อง โพล้งไคล้เดิงเท่อ เฌ๊ฆ้าง เด้า พ้า นอ, แด เว๊ ทเค่งทฌ้าง โอ ล่างมี๊ง คู, โอฆึ ดี๊ คูเคิง แมะ ชอง, โอ อ คูไท้ะ

¹⁷ ซาอู อางจ้ะ น่าง มีคาง ไจ้ะเว๊, “แม้ทเล้, น คีงอูง แบ แย้ บี่อี้ง, ดี๊ ทูแพล่ไฆวะ จ ดีง จ แด้, อ เว๊ ไจไฆวะ เว๊?”, น่าง มีคาง ไคล้ช๊า ซาอู ไจ้ะเว๊, “ดาเว ไคล้ ดี๊ แย้ ไจ้ะเว๊, ‘เปล้ เกม๊า จ ไจไฆวะ ไช้ะ, น ม เกม๊า จ แม้ซี๊ง แน้ แม้ ทเม้งเล้?’, ”

¹⁸ ดาเว ไจพ้องไฆวะ เว๊ ไวะ, อ เว๊ เฌ๊ฌูง ซามูเอง ลู่ง เว่ง รามา พ้า, ดี๊ อางโล๊ไท้ เอะ เว๊, แบฆ้ะ ดี๊ ทไฌ่ พี่ ซาอู แม้ เอะ-อ้ะ กุ้เม้ง, อ เว๊ ดี๊ ซามูเอง ลี้ โอ ลู่ง นาโยะ พ้า

¹⁹ โพล้ง ลี้ โล้ เอะ ซาอู ไจ้ะเว๊, “แคว่เซ้อ, ดาเว โอ ลู่ง นาโยะ เว่ง รามา พ้า”

²⁰ ซาอู โซ๊ง โพล้งไคล้เดิงเท่อ, เกม๊า อ ลี้ พองนี่ ดาเว, ดี๊ ท่อง อ ซื๊งเว๊ แด โม ล มู๊ง, โล้ล้าง กแช่แยว้ อลู่งอแท๊, ดี๊ ซามูเอง ชี๊เทิง เก อ ซื๊งเว๊ อคูอแน่ นอ, กแช่แยว้ อ วีงฌี้แล้แอว้ เฌ๊ โอ ดี๊ ซาอู อ โพล้งไคล้เดิงเท่อ ลแพ นอ, ดี๊ อ ซื๊งเว๊ โล้ล้าง กแช่แยว้ อลู่งอแท๊ ปะ

²¹ ท่อง โพล้ง ลี้ โล้ เอะ ซาอู นอ, อ เว๊ เจ่ทางก้ะ โพล้งไคล้เดิงเท่อ อ แฌ้แพ ล มู๊ง ลี้ก้ะ เด้าะ, ดี๊ โพล้ง ลแพ นอ, โล้ล้างก้ะ กแช่แยว้ อลู่งอแท๊ ปะ, ซาอู เจ่ทาง โพล้งไคล้เดิงเท่อ ซ๊า มู๊ง ล มู๊ง, แบเด้าะ อ ซื๊งเว๊ โล้ล้างก้ะ กแช่แยว้ อลู่งอแท๊ ปะ

²² ซาอู กแช่ ลี้ แด เว๊ ลู่ง เว่ง รามา พ้า, อ เว๊ เฌ๊ ท้อง ที๊งน๊างโบ้ พ้ะดู ลู่ง เว่ง เซคู พ้า, ดี๊ อางจ้ะ เท่อ บี่อี้ง, “ซามูเอง ดี๊ ดาเว โอ พี่จองเล้?”, โพล้ง โล้ เอะ-อ้ะ ไจ้ะเว๊, “อ ซื๊งเว๊ คี๊ง แฌ้ นอ โอ ลู่ง นาโยะ เว่ง รามา พ้า”

²³ ซาอู ลี้ ลู่ง นาโยะ เว่ง รามา พ้า, ดี๊ กแช่แยว้ อ วีงฌี้แล้แอว้ เฌ๊ล้าง โอ ดี๊ ซาอู ปะ, อ เว๊ ไจ ไคว่ๆ, โล้ล้าง กแช่แยว้ อลู่งอแท๊ ไคว่ๆ, ท๊อง อ ลี้ ท้อง นาโยะ เว่ง รามา พ้า

²⁴ อ เว๊ เบ้าะล้างไฆวะ อ ไช๊ อ ช้าง, ดี๊ โล้ล้าง กแช่แยว้ อลู่งอแท๊, ลู่ง ซามูเอง อ เมะแซ พ้า, ดี๊ มี๊ง โบลงโกง ล แน้ แย๊ นอ, ซ๊างแน้คล้อง ดี๊ เซ๊งนี้งคล้อง, ทบี่นอ, โพล้ง ไคล้ โละอซ้ะ ไจ้ะเว๊, “ซาอู เก โม ล แฌ้, ลู่ง โม ซีงลแพ นอ อ แกล้ พ้า ชี่-ว้า?”