1ซามูเอง 18 - Northern Pwo Karen Thai Bible

โยนาทาง อ ทเอิ้งล้าง ดี๊ ดาเว

¹ พี่ ดาเว โล้ แบ ซาอู ฌ้อง เย้า นอ, โยนาทาง อ เซิง อ ซ้ะ แบ โละอซ้ะ ดี๊ ดาเว, ดี๊ โยนาทาง เอ ดาเว, ด้องซุ้ เอ ล้างไท้ อ กแช่ อ ซ้ะ

² ดี๊ ล นี้ง แย๊ นอ, ซาอู ย้ะทะ ดาเว, ล ญ่อง เกม๊า เว๊ อ ไท้ ลู่ง อ แพ่ อ เด้า อ ล่าง แบ

³ ฌ้อง นอ, โยนาทาง แม้ ทเอิ้งล้าง ดี๊ ดาเว, เมะเว๊, เอ เว๊ ด้องซุ้ เอ ล้างไท้ อ กแช่ อ ซ้ะ ล้อ

⁴ โยนาทาง เบ้าะล้างนี่ อ ไช๊แค่ พ้ะโท๊ ล ท๊า, พี่ อ ซุ้ เว๊, เลา ดี๊ อ นางดึ้นางชาง, ทึเมะ อ น้ะ, อ คลีง บ้อง, ดี๊ อ ย่างเด้งพลี้ง ฌี้, เกล๊าง เอะ ดาเว

⁵ ดี๊ ดาเว นอ, ไจทาง ลี้ เท่อ กุ้ จอง พี่ ซาอู เจ่-อ้ะ, อ เว๊ แม้ เท่อ ชิ้เทา กุ้เม้ง, อ กย้อง บี่นอ, ซาอู ต๊างทาง-อ้ะ, ม๊า โอ โท๊เละ โพล้งดึ้ซึ้เท่อพู ซีงลแพ นอ ล้อ, ทแม้ บี่อี้ง นอ, เก เท่อ ลู่ง แบ โพล้งเฌงพูฆ๊างพู อ ซ้ะ, ดี๊ แบ ซาอู อ กดูกแซย่ ซีงลแพ นอ อ ซ้ะ ปะ

⁶ พี่ อ ซื๊งเว๊ซีง เฌ๊ไท้ นอ, ดาเว โอ ลู่ง ทล่าง แม้ซี๊ง โพล้ง ฟีลีเตีย ล แฌ้ นอ เฌ๊ไท้, โพล้ง มืง ซีง, พี่ อ โอ ลู่ง กเย่ โพล้ง อีซลาเอง อ เว่ง พ้า เลาพะ นอ, ไจทาง ซ้ะอวีง แท๊, ดี๊ เฌ้เทิงลี่ง ตองช๊าฮะช๊า กจุ้แฆว้ ซาอู, ดี๊ รางมานา ดี๊ แม้ แท๊ เซิงฆวี๊งซ้ะโย้, ดี๊ ทโพะเซ๊ เด้งเซ๊

⁷ ดี๊ โพล้ง มืง ซีงลแพ นอ, เฌ้เทิงลี่ง ดี๊ ซ้ะอวีง แท๊ พาง โละอซ้ะ ไจ้ะเว๊ “ซาอู แม้ซี๊ง โพล้ง อ แฌ้ อ ม๊า พ้า เมะ ดาเว นอ แม้ซี๊ง โพล้ง อ แฌ้ อ ไซ พ้า”

⁸ ซาอู อ ซ้ะ เฌ๊ทาง น้ะมะ, ทไคล้ พี่ โพล้ง ซ้ะอวีง แท๊ นอ, ล แบ อ ซ้ะ แบ เฆาะ, อ เว๊ ไจ้ะเว๊, “โพล้ง อางปฆ้า ดาเว, ไจ้ะเว๊ แม้ซี๊ง โพล้ง อ แฌ้ อ ไซ พ้า, เมะ ยี๊แด นอ, อ ซื๊งเว๊ ไจ้ะเว๊ แม้ซี๊ง โพล้ง อ แฌ้ อ ม๊า พ้า เฆาะ, โอก้ะที่ มื่งบ้าง ล เม้ง ล้อ, พี่ ดาเว ล นี่ เว๊ ได้ะ แบ”

⁹ ท๊อง ล นี้ง แย๊ นอ, ซาอู คุ้ แคว่ฌูงดุ้ ดาเว ครึๆ

¹⁰ โอ ลู่ง ไค๊ ล นี้ง นอ, วีงแล้ ลู่ง อ อ้า, พี่ เฌ๊นี่ ดี๊ กแช่แยว้ นอ เฌ๊ โอ ดี๊ ซาอู, ซาอู นอ ไคล้พลื่งไคล้มวี๊ง เท่อ, โอ ลู่ง อ บลาง พ้า, ดาเว นอ เด้ง ทแน่, ด้องซุ้ อ เด้ง เอะ เว๊ อ พ้องไฆวะ กุ้ นี้งๆ, นอ, ซาอู นอ โชะ ดี๊ พ้าง คระ

¹¹ ดี๊ ซาอู ซยุ้ฆ้าง อ พ้าง, ช๊องมอง เว๊ บี่อี้ง, “จ ม ซยุ้ ดาเว, เกม๊า อ แบชุ้เท่ง ดี๊ พี๊แด้ดอง”, แบเด้าะ ดาเว ไจซยู๊ไฆวะ นี่ คี๊ง พ๊า

¹² ซาอู ซ้ะเม ดาเว, เมะเว๊ กแช่ยาเว โอ ดี๊-อ้ะ, แบเด้าะ ไจแดไฆวะ ซาอู เย้า

¹³ ทบี่นอ, ซาอู เกม๊า แญ่ ดาเว ไจแดไฆวะ-อ้ะ, ม๊า เว๊ เกก้ะ ซึ้พู น๊างมู๊ง อ คู ดู, ดี๊ ดาเว ไจทาง ลี้ ดึ้ซึ้ เท่อ, เฌ๊ไท้ ลู่ง ซึ้พู ซีงลแพ นอ อ เมะแซ พ้า

¹⁴ ดาเว แม้ เท่อ ชิ้เทา กุ้ อ เม้ง, เมะเว๊ กแช่ยาเว โอ ดี๊-อ้ะ

¹⁵ ซาอู ซ้ะเม เท่อ, พี่ อ แด เว๊ ดาเว แม้ เท่อ, ฌ้องทางเกทาง แอมะ นอ

¹⁶ แบเด้าะ โพล้ง อีซลาเอง, ดี๊ โพล้ง ยูดา กุ้ อ แฌ้ นอ เอ ดาเว, เมะเว๊ ดาเว ไจทาง, ดี๊ เฌ๊ไท้ ลู่ง อ ซื๊งเว๊ อ เมะแซ พ้า

¹⁷ ซาอู โล้ เอะ ดาเว ไจ้ะเว๊, “แคว่เซ้อ, อ อี้ง นอ, เก จ พูมืงน้าง วี่แซย่ อ เม้ง น่าง เมร้ะ, จ ม เกล๊าง เอะ แน้ เก น แม๊, แบเด้าะ น แบ เก โพล้ง พี่ อ ซ้ะน้า ลู่ง จ ฌ่าง, ดี๊ ดึ้ เท่อ ลู่ง กแช่ยาเว อ ทดึ้ซึ้ พ้า”, อ ไฌ่ บี่อี้ง, ซาอู ช๊องมอง เว๊, “เกม๊า จ จูง ดึ้ซึ้-อ้ะ ล ฌี้, แบเด้าะ เกม๊า โพล้ง ฟีลีเตีย อ จูง ดึ้ซึ้-อ้ะ นอ ล้อ”

¹⁸ ดาเว ไคล้ ดี๊ ซาอู ไจ้ะเว๊, “ลู่ง โพล้ง อีซลาเอง อ แกล้ นอ, แย้ จ เก โพล้ง เล้?, จ มื่ง จ แคว๊, เมะเว๊ จ แพ่ อ ชื้อ อ ดอง นอ, เก ชี่ โพล้ง เล้, พี่ จ ม เกิ้ง เก กจุ้แฆว้ อ มะ?”

¹⁹ แบเด้าะ ท่อง แบ อ มื่ง, พี่ ซาอู ม เกม๊า อ พูมืง น่าง เมร้ะ เอะ ดาเว นอ, กมืง นอ แบ ทเกล๊าง, ม๊า เกก้ะ อ้ะรีเอง โพล้ง เมโฮลา ล แฌ้ นอ อ แม๊ เฆาะ

²⁰ ซาอู อ พูมืง น่าง มีคาง นอ เอ ดาเว, พี่ โพล้ง โล้ แบ ซาอู, แบฆ้ะ ดี๊ ท ล ไฌ่ อี้ง นอ, แบ อ เว๊ อ ซ้ะ ฌี้ มะ ล้อ

²¹ ซาอู ช๊องมอง เว๊, “จ ม เกม๊า น่าง มีคาง เอะ-อ้ะ, บี่ซุ้ ม เก ทดุ้นี่ บล้ะนี่-อ้ะ, ดี๊ โพล้ง ฟีลีเตีย อ จูง ม ดึ้-อ้ะ”, ทบี่นอ, ซาอู โล้ เอะ ดาเว คี๊ง พ๊า ล พ๊า ไจ้ะเว๊, “ล พ๊า แย๊ อี้ง, น ม เก จ มะ ล้อ”

²² ซาอู อางแบเลา อ เพล่ดู ไจ้ะเว๊, “เกม๊า น ไคล้ ดี๊ ดาเว แฌ้ โต้ แฌ้ บี่อี้ง, ‘แคว่เซ้อ, กจุ้แฆว้ แบ อ ซ้ะ ดี๊ แน้, ดี๊ กเย่ อ เพล่ดู ลแพ นอ เอ แน้, เก กจุ้แฆว้ อ มะ แดเทา’, ”

²³ ท่อง ซาอู อ เพล่ดู อางโล๊ไท้ เอะ ดาเว, แบฆ้ะ ดี๊ ทไคล้ ลแพ อี้ง นอ, ดาเว อางจ้ะ-อ้ะ ไจ้ะเว๊, “น ซื๊ง แคว่-อ้ะ, เท่อ พี่ ม เก กจุ้แฆว้ อ มะ นอ, เก ท ล ปี๊ ล คี่ โบ่?, อ ไฌ่ บี่อี้ง, ยี๊แด จ เก โพล้ง ซยาง พู ล้อ, ดี๊ จ เม้ง จ แซ ล โอ น่าง เม้ง แบ”

²⁴ ดี๊ ซาอู อ เพล่ดู โล้ เอะ-อ้ะ ไจ้ะเว๊, “อ อี้ง นอ, เก ดาเว อ ทไคล้”

²⁵ ฌ้อง ซาอู โล้ เว๊, “เกม๊า น ไคล้ ดี๊ ดาเว บี่อี้ง, ‘กจุ้แฆว้ ล แบซ้ะ นี่ ทอโน้งอช้า น่าง เม้ง แบ, ม แม้ เว๊ ที่ โพล้ง ฟีลีเตีย อ ที คู ไพ้ะ เมาะ ล แย้ ล้อ, บี่ซุ้ กจุ้แฆว้ ม แม้แกไท้ แบ อดีงอแด’, ”, ซาอู ช๊องมอง เว๊, ม เกม๊า ดาเว ซี๊ง ดี๊ โพล้ง ฟีลีเตีย อ จูง

²⁶ ท่อง ซาอู อ เพล่ดู อางโล๊ไท้ ทไคล้ อี้ง เอะ ดาเว นอ, ท ล ไฌ่ อี้ง นอ, แบ ดาเว อ ซ้ะ, พี่ ม เก กจุ้แฆว้ อ มะ, ลู่ง ทอช๊าอโท่ อางกีล้าง ล คลึ้ เลาไฆวะ ได้ะ แบ อ แค๊

²⁷ ดาเว เฌ้เทิงทาง ล พ๊า ฆ่าง ดี๊ อ ซึ้พู, อ ซื๊งเว๊ แม้ซี๊ง โพล้ง ฟีลีเตีย คี๊ง แย้ แฌ้, ดี๊ ดาเว เก้า นี่ โพล้ง ลแพ นอ อ ที คู ไพ้ะ, เฌ๊ไท้ โชะ เอะ กจุ้แฆว้ กู้งทาง เมาะ, บี่ซุ้ อ เว๊ ม เก กจุ้แฆว้ อ มะ, ซาอู เกม๊า อ พูมืง น่าง มีคาง เก ดาเว อ แม๊

²⁸ ซาอู แด เว๊, ดี๊ ซีงแฌ๊ เว๊ กแช่ยาเว โอ ดี๊ ดาเว, ดี๊ ซาอู อ พูมืง น่าง มีคาง นอ เอ ดาเว

²⁹ ซาอู ซ้ะเม ดาเว แอทาง, ซาอู เก ดาเว อดีงอแด้ เพล้า อ ชู้ ล้อ

³⁰ กเย่ โพล้ง ฟีลีเตีย อ กดูกแซย่ ลแพ นอ, ไจทาง เฌ๊ ดึ้ซึ้ เท่อ, อ ซื๊งเว๊ ม เฌ๊ ฆวี่ พ๊า เล้ ฌี้ นอ, ดาเว แม้ เท่อ ฌ้องทางเกทาง, แอเละ ซาอู อ กดูกแซย่ ลแพ นอ ได้ะ, อ กย้อง บี่นอ, ดาเว อ เม้งลื้อแซท้อง ฌี้ มะ ล้อ